Hapot Hale sa mga Parabasa

Ano an maninigo kong gibohon kun may hapot ako manongod sa nabasa ko sa Biblia o kun kaipuhan ko nin sadol dapit sa personal na problema?

An Talinhaga 2:1-5 nagsasadol sa kada saro sa sato na padagos na “hanapon” an pakasabot asin pakabatid na garo baga kita naghahanap nin nakatagong “magña kayamanan.” Ipinaparisa kaini na maninigo kitang maghingoa na siyasaton an simbag sa mga hapot niato manongod sa Biblia asin hanapon an solusyon sa personal na mga problema. Paano niato magigibo ini?

Itinao kan Makinabang sa Edukasyon sa Teokratikong Paadalan sa Pagmiministro, sa pahina 33 sagkod 38, an paagi “Kun Paano an Pagsiyasat” gamit an mga kasangkapan hale sa “maimbod asin mapagmansay na oripon.” (Mat. 24:45, NW) Ipinaliwanag sa pahina 36 kun paano gagamiton an Watch Tower Publications Index, na an kada edisyon may subject index asin scripture index. Pinapagin posible kaini an pagsiyasat magsalang paagi sa pangenot na mga tataramon o teksto sa Biblia, na dian may mga reperensia na puede mong konsultahon. Magin mapasensia sa pagsiyasat sa espesipikong simbag o paggiya na kaipuhan mo. Girumdomon na naghahanap ka nin nakatagong “magña kayamanan,” na kaipuhan an panahon asin paghihingoa.

Siempre, may mga tema asin teksto na dai espesipikong tinokar sa mga publikasyon niato. Asin dawa pa sa mga publikasyon na may komento na sa partikular na teksto sa Biblia, tibaad dai tinokar dian an dapit sa espesipikong hapot na nasa isip mo. Igwa man nin mga pagkasaysay sa Biblia na nakakapaisip nin mga hapot huli ta dai espesipikong sinasabi sa Kasuratan an gabos na detalye. Huli kaini, dai niato tolos makukua an simbag sa kada hapot na naiisip niato. Kun siring kaiyan, dai kita maninigong magbanabana—manongod sa mga bagay na dai talaga masisimbag—tanganing dai kita mapalabot sa pagdedebate dapit sa “mga hapot para sa pagsiyasat imbes na magwaras nin ano man na bagay hale sa Dios may koneksion sa pagtubod.” (1 Tim. 1:4, NW; 2 Tim. 2:23; Tito 3:9) An sangang opisina ni an pambilog na kinaban na opisina prinsipal mayo sa kamugtakan na analisaron asin simbagon an gabos na siring na hapot na dai natokar sa mga babasahon niato. Kontento na kita sa bagay na an Biblia nagtatao nin supisyenteng impormasyon na magiya sa satong buhay, dawa ngani dai iyan nagtatao nin igong detalye tanganing makapaheling kita nin makosog na pagtubod sa Dios na Autor kaiyan.—Helingon an pahina 185 sagkod 187 kan librong Rumani ki Jehova.

Paano kun ginibo mo na an bilog na makakaya tanganing magsiyasat dapit sa bagay na personal na nakakaapektar sa saimo, alagad dai mo pa man giraray nakukua an paggiya o solusyon na kaipuhan mo? Dai mag-alangan na dumolok sa maygurang na kapagtubod, na puedeng saro sa mga magurang sa kongregasyon nindo. Dakol sindang kaaraman sa Biblia saka eksperyensia sa buhay bilang Kristiano. An balanseng tabang ninda nangorognang angay kun kaipuhan mo nin sadol dapit sa personal na problema o desisyon, huling ika midbid ninda asin dayupot sa sainda saka aram ninda an situwasyon mo. Asin nungkang lingawan na espesipikong ipamibi ki Jehova an mga kahaditan mo saka makiolay sa saiya na giyahan an saimong kaisipan paagi sa banal na espiritu nia, ‘huli ta si Jehova nagtatao nin kadonongan asin pakasabot.’—Tal. 2:6; Luc. 11:13.