Madonong na Hatol Dapit sa Pagigin Daing Agom Asin Pagigin May Agom
Madonong na Hatol Dapit sa Pagigin Daing Agom Asin Pagigin May Agom
“Ini sinasabi ko . . . tanganing pahiroon kamo sa bagay na angay asin nangangahulogan nin danay na paglilingkod sa Kagurangnan na mayo nin disturbo.”—1 COR. 7:35, NW.
1, 2. Taano ta dapat aramon nin saro an hatol kan Biblia dapit sa pagigin daing agom asin may agom?
AN PAGTRATAR niato sa mga bakong kasekso saro sana sa pirang aspekto nin buhay na parateng nagreresulta sa kaogmahan, pagkadesganar, o kahaditan. Huling naeeksperyensiahan niato an siring na laen-laen na emosyon, kaipuhan tang hagadon an paggiya nin Dios, alagad may iba pang dahelan sa paghagad kaiyan. An sarong Kristiano na kontento na sa pagigin daing agom tibaad makamate na ginigipit kan saiyang mga kapamilya o katood tanganing mag-agom. Tibaad boot man nin saro na mag-agom alagad mayo pa siang naheheling na angay na magin agom. An nagkapira kaipuhan nin giya kun paano mag-aandam para sa mga paninimbagan nin agom na lalaki o babae. Asin an mga Kristianong daing agom saka may agom parehong napapaatubang sa mga pagbalo mapadapit sa seksuwal na moralidad.
2 Apuera sa personal na kaogmahan niato, may epekto ini sa kamugtakan niato sa atubangan ni Jehova Dios. Sa kapitulo 7 kan enot na surat ni Pablo sa mga taga Corinto, nagtao sia nin giya dapit sa pagigin daing agom asin may agom. An katuyohan nia iyo na motibaron an mga nagbabasa kan surat nia dapit “sa bagay na angay asin nangangahulogan nin danay na paglilingkod sa Kagurangnan na mayo nin disturbo.” (1 Cor. 7:35) Mantang pinag-iisipan mo an hatol nia dapit sa mahahalagang bagay na ini, pagmaigotan na helingon an saimong situwasyon—may agom man o daing agom—bilang paagi na mas lubos na paglingkodan si Jehova.
Magabat na Personal na Desisyon
3, 4. (a) Ano an mga nagigin problema kun minsan kun an iba sobra an pagmakolog sa katood o paryente na daing agom? (b) Paano an hatol ni Pablo makakatabang sa saro na magkaigwa nin timbang na pagmansay sa pag-agom?
3 Arog sa Judiong sosyedad kan enot na siglo, idinodoon nin dakol na kultura ngonyan na an pag-agom iyo an pinakamamawot nin kadaklan. Kun an sarong soltero o daraga lumampas na sa partikular na edad pero dai pa nag-aagom, an may pagmakolog na mga katood asin paryente tibaad maobligar na tawan sia nin sadol. Sa pag-orolay, tibaad isuherir ninda na orog siang magdesidir sa paghanap nin magigin agom. Tibaad may ireto sinda na sa heling ninda angay na magin agom. Tibaad gumamit pa ngani sinda nin dai risang paagi tanganing magkamidbidan an sarong soltero asin daraga. Kun minsan, minaresulta ini sa pagkapasupog, pagkarinaotan nin boot nin magkatood, asin kolog nin boot.
4 Nungkang ginipit ni Pablo an iba tanganing mag-agom o magdanay na daing agom. (1 Cor. 7:7) Kontento sia sa paglilingkod ki Jehova dawa daing agom, alagad iginalang nia an deretso nin iba na mag-agom. An indibiduwal na mga Kristiano ngonyan igwa man nin deretso na magdesisyon kun baga maagom o magdadanay na daing agom. Dai sinda dapat gipiton nin iba na gibohon an arin man dian.
Pagigin Mapanggana Bilang Daing Agom
5, 6. Taano ta irinekomendar ni Pablo an pagigin daing agom?
5 An sarong pambihirang aspekto kan sinabi ni Pablo sa mga taga Corinto iyo an saiyang positibong pagmansay sa pagigin daing agom. (Basahon an 1 Corinto 7:8.) Minsan ngani si Pablo daing agom, dai nia ilinangkaw an saiyang sadiri sa mga may agom, arog kan klero nin Kakristianohan na dai nag-aagom. Imbes, idinoon kan apostol an bentaha nin dakol na daing agom na ministro kan maogmang bareta. Ano iyan?
6 An Kristianong daing agom sa parate nasa kamugtakan na mag-ako nin mga asignasyon sa paglilingkod ki Jehova na tibaad dai magibo nin may agom. Tinawan si Pablo nin espesyal na pribilehio bilang ‘apostol sa mga Gentil.’ (Roma 11:13) Sa Guibo kapitulo 13 sagkod 20, mababasa niato na sia asin an mga kapwa misyonero naghulit sa bagong mga teritoryo saka nag-establisar nin bagong mga kongregasyon. Sa paglilingkod ni Pablo, tinagalan nia an kasakitan na dai maeeksperyensiahan nin kadaklan sa sato ngonyan. (2 Cor. 11:23-27, 32, 33) Alagad nagin kapakipakinabang an kasakitan na iyan huli sa kagayagayahan nia sa pagtabang sa dakol na magin disipulo. (1 Tes. 1:2-7, 9; 2:19) Magigibo daw nia iyan gabos kun sia nag-agom o nagpamilya? Posibleng dai.
7. Magtao nin halimbawa dapit sa mga Saksing daing agom na ginagamit an saindang kamugtakan tanganing paoswagon an intereses kan Kahadean.
7 Ginagamit nin dakol na daing agom an kamugtakan ninda sa presente tanganing dakol an magibo para sa Kahadean. Si Sara asin Limbania, na daing agom na mga payunir sa Bolivia, nagbalyo sa sarong baryo na dakol nang taon na dai nahuhulitan. Nagin problema daw an kawaran nin kuryente? Sabi ninda: “Mayo nin radio o TV, kaya an mga tawo dai nadidisturbo sa pangenot na pampalipas-oras ninda—an pagbasa.” Ipinaheling sa mga payunir kan nagkapira sa mga taga baryo an kopya ninda kan mga publikasyon kan Mga Saksi ni Jehova na haloy nang dai iniimprenta alagad binabasa pa ninda. Huling an mga payunir may nanonompongan na interesado sa haros kada harong, nadepisilan sindang dalawon an gabos na pamilya sa teritoryo. Sarong may edad nang babae an nagsabi sa sainda: “Seguradong harani na an katapusan huling nakaabot na samo an mga Saksi ni Jehova.” Dai naghaloy, an nagkapira sa baryong iyan nag-aatender na sa mga pagtiripon.
8, 9. (a) Ano an nasa isip ni Pablo kan paborable an sabihon nia dapit sa pagigin daing agom? (b) Ano an mga bentaha nin mga daing agom?
8 Siempre, an mga may agom nagkakaigwa man nin mararahay na bunga kun naghuhulit kan maogmang bareta sa masakit na mga teritoryo. Alagad an nagkapirang asignasyon na bukas sa mga payunir na daing agom tibaad depisil para sa mga may agom o may mga aki. Naheling ni Pablo an potensial kan mga kongregasyon kaidto sa pagpalakop kan maogmang bareta. Gusto nia na an gabos maggayagaya, arog nia. Huli kaiyan, paborable an sinabi nia dapit sa paglilingkod ki Jehova bilang daing agom.
9 An sarong daing agom na tugang na babaeng payunir sa Estados Unidos nagsurat: “Naniniwala an nagkapira na dai magigin maogma an mga daing agom. Alagad naheling ko na an nagdadanay na kaogmahan depende sa pakikikatood nin saro ki Jehova. Minsan ngani sakripisyo an pagigin daing agom, iyan pambihirang balaog kun aaprobetsaran.” Mapadapit sa pagigin maogma, sia nagsurat: “An pagigin daing agom nakakakontribwir sa kaogmahan, bakong kaolangan. Aram ko na may agom man o daing agom, parehong pinapahelingan ni Jehova nin mamomoton na kapadangatan.” Sia ngonyan maogmang naglilingkod sa lugar na mas nangangaipo nin mga parahayag. Kun ika daing agom, puede mo daw aprobetsaran an saimong kamugtakan tanganing orog na makikabtang sa pagtotokdo kan katotoohan sa iba? Mapapatunayan mo man na an pagigin daing agom sarong balaog hale ki Jehova na daing kaagid an halaga.
Mga Daing Agom na Gusto Nang Mag-agom
10, 11. Paano sinusuportaran ni Jehova an mga gustong mag-agom alagad dai pa nakakaheling nin angay na magin agom?
10 Pakalihis nin pirang panahon na daing agom, dakol na maimbod na lingkod ni Jehova an nagdedesisyon na maghanap nin magigin agom. Huling aram ninda na kaipuhan an paggiya, naghahagad sinda nin tabang ki Jehova sa paghanap nin angay na magin agom.—Basahon an 1 Corinto 7:36. *
11 Kun gusto nindo na magin agom an saro na nagmamawot man na paglingkodan si Jehova nin bilog na kalag, padagos na ipamibi ini sa Saiya. (Fil. 4:6, 7) Gurano man kahaloy na kaipuhan nindong maghalat, dai mawaran nin paglaom. Magtiwala sa satong mamomoton na Dios bilang Paratabang, asin susuportaran nia kamo sa emosyon segun sa pangangaipo nindo.—Heb. 13:6.
12. Taano ta dapat maingat na turotimbangon nin sarong Kristiano an alok na kasal?
12 An sarong daing agom na gustong mag-agom tibaad alokon nin kasal nin saro na maluya an espirituwalidad o bako nganing kapagtubod. Kun mangyari iyan sa saimo, girumdomon na huli sa salang pagpili nin agom puedeng magin mas mamondo ka nanggad kisa kan ika dai pang agom. Asin kun kamo mag-agom na, bilog na buhay na kamong nakagakod, sabi ngani, sa saindong agom—sa maginhawa man o masakit na kamugtakan. (1 Cor. 7:27) Dai mag-agom o magpaagom huli sana ta desperado na kamo, ta tibaad pagbasolan nindo iyan.—Basahon an 1 Corinto 7:39.
Mag-andam Para sa mga Realidad nin Pagigin May Agom
13-15. Anong posibleng mga gikanan nin kahorasaan nin pagigin may agom an maninigong pag-olayan nin magkailusyon bago magpakasal?
13 Minsan ngani irinekomendar ni Pablo an paglilingkod ki Jehova bilang daing agom, dai nia minenos an mga nagdesisyon na mag-agom. Imbes, an ipinasabong na hatol nia nakakatabang sa mga mag-agom na atubangon an mga realidad nin pagigin may agom asin na magin permanente an pag-ibanan ninda.
14 Kaipuhan nin nagkapira na liwaton an mga inaasahan ninda kun sinda mag-agom na. Mantang magkailusyon pa, sa pagmate ninda napapalaen asin pambihira an pagkaminootan ninda, na garantiya na kun sinda mag-agom na magigin lubos an kaogmahan ninda. Huli kaiyan, sinda naniniwala na mayo nin ano man na makakaraot kan kaogmahan ninda. Bakong realistiko an siring na kaisipan. Nakakaogmang marhay an romantikong mga aspekto nin buhay bilang mag-agom, alagad bako sana iyan an kaipuhan tanganing magin andam para sa mga kahorasaan nin pagigin may agom.—Basahon an 1 Corinto 7:28. *
15 Dakol na bagong kasal an nabibigla, nadedesganar pa ngani, kun magkalaen an pagmansay ninda sa mahahalagang isyu. Tibaad bako sindang magkaoyon kun dapit sa paggastos asin paglilibang, kun saen maistar, saka kun gurano kaparate nindang dadalawon an mga panugangan ninda. Asin an kada saro may mga ugale na puedeng ikauyam kan lambang saro. Mantang magkailusyon, madali sanang baliwalaon an siring na mga ugale, alagad sa huri puedeng magin dakula an epekto kaiyan sa buhay nin mag-agom. Bago magpakasal, marahay kun reresolberan na kan magkailusyon an siring na mga bagay.
16. Taano ta maninigong magkaoyon an mag-agom kun paano aatubangon an mga problema ninda?
16 Tanganing magin mapanggana asin maogma an mag-agom, dapat na saro an kaisipan ninda sa pag-atubang sa mga problema. Maninigong magkaoyon sinda kun paano didisiplinahon an mga aki asin kun paano aasikasohon an nagkakaedad nang mga magurang. An kasakitan sa laog kan pamilya bakong dahelan na magkaigwa nin garo siwang sa pag-oltanan nin mag-agom. Paagi sa pag-aplikar sa hatol kan Biblia, mareresolberan ninda an dakol na problema, matatagalan an mga problema na bakong madaling resolberan, asin magigin danay na maogma.—1 Cor. 7:10, 11.
17. Anong “magña bagay nin kinaban” an siertong magtatao nin kahaditan sa mag-agom?
17 Si Pablo nagsambit nin saro pang realidad nin pagigin may agom sa 1 Corinto 7:32-34. (Basahon.) Natural sana na an mga mag-agom nahahadit manongod sa “magña bagay nin kinaban,” arog baga nin kakanon, bado, istaran, asin iba pang pangangaipo. Taano man? Kun an sarong tugang na lalaki dai pang agom, tibaad ginagamit nia sa ministeryo an saiyang bilog na panahon asin kosog. Alagad kun sia may agom na, aram nia na dapat niang gamiton an pirang kabtang kaiyan tanganing asikasohon an agom nia asin sa siring mapaoyonan nia ini. Totoo man iyan sa agom na babae. Huli ta si Jehova madonong, aram nia an pangangaipong ini. Aram man nia na an pagigin mapanggana bilang mag-agom parateng nangangaipo nin kabtang kan panahon asin kosog na dating ginagamit ninda sa paglilingkod sa Saiya kan sinda bako pang mag-agom.
18. Anong mga pagliliwat dapit sa pakikiasosyar an kaipuhan na gibohon nin nagkapira pagkatapos kan kasal?
18 Alagad bako sana iyan an realidad. Kun kaipuhan nin mag-agom na inaan an panahon asin kosog na ginagamit sa paglilingkod sa Dios tanganing asikasohon an lambang saro, bako daw na maninigo man na inaan ninda an panahon na ginagamit sa pakikiasosyar kan sinda bako pang mag-agom? Ano an magigin epekto sa agom na babae kun an agom nia bangkag pa man giraray sa isport kaiba kan mga amigo nia? O ano an tibaad mamatean nin agom na lalaki kun kadakol na panahon pa man giraray an ginagamit kan agom nia sa mga kinahihiligan kaini kaiba kan mga amiga nia? Dai mahahaloy, an napapabayaan na agom tibaad makamate nin kapungawan, kamondoan, asin na sia dai namomotan. Malilikayan ini kun ginigibo nin mga mag-agom an bilog na makakaya ninda na pakosogon an saindang bogkos bilang mag-agom.—Efe. 5:31.
Kahagadan ni Jehova an Kalinigan sa Moral
19, 20. (a) Taano an mga mag-agom ta bako man protektado na sa sugot na gumibo nin imoralidad? (b) Ano an isinasapeligro nin mga mag-agom kun haloy na panahon sindang dai magkaibanan?
19 Determinado an mga lingkod ni Jehova na magdanay na malinig sa moral. An nagkapira nagdedesisyon na mag-agom tanganing makalikay sa mga problema na konektado dian. Pero, an pagigin may agom dai nangangahulogan na protektado na sinda sa seksuwal na imoralidad. Kan mga panahon kan Biblia, protektado sana an mga tawo sa sarong nakukutaan na siudad kun sinda magdadanay sa laog kan mga lanob kaiyan. Kun an saro maluwas dian, puede siang habonan o gadanon nin mga parasalakat asin tulisan. Kaagid kaiyan, protektado man an mga mag-agom kun sinda magdadanay sana sa seksuwal na mga limitasyon nin mag-agom na inestablisar para sa sainda kan Kagtugdas nin pag-agoman.
20 Ipinaliwanag ni Pablo an mga limitasyon na iyan sa 1 Corinto 7:2-5. An agom na babae dapat na makipagrelasyon sana sa agom nia; iyo man an agom na lalaki. Inaasahan na itatao kan lambang saro an ‘nanonongod’ sa agom nia, o an seksuwal na relasyon na deretso kan lambang saro. Minsan siring, may mga mag-agom na haloy na panahon na dai magkaibanan—magkasuhay na nagbabakasyon o magkarayo huli sa sekular na trabaho, kaya dai ninda ikinakatao an ‘nanonongod’ sa lambang saro. Imahinara an grabeng kamondoan kun huli sa ‘dai pakapagpugol,’ an saro nagpadaog sa impluwensia ni Satanas asin nakagibo nin pagsambay. Binebendisyonan ni Jehova an mga payo nin pamilya na nagsusustento sa pamilya ninda, pero dai isinasapeligro an pagigin may agom ninda.—Sal. 37:25.
Mga Pakinabang sa Pagkuyog sa Hatol kan Biblia
21. (a) Taano ta depisil gumibo nin desisyon kun baga maagom o dai maagom? (b) Taano ta kapakipakinabang an hatol na nasa 1 Corinto kapitulo 7?
21 Kaiba sa pinakadepisil na mga desisyon na gigibohon nin saro iyo an kun baga maagom o dai maagom. An gabos na tawo bakong perpekto, na iyo an dahelan kan kadaklan sa mga problema dapit sa relasyon nin mga tawo. Kaya dawa an mga may pag-oyon asin bendisyon ni Jehova kun minsan nadedesganar man, sinda man may agom o daing agom. Kun iaaplikar nindo an madonong na hatol na nasa 1 Corinto kapitulo 7, malilikayan nindo an kadaklan sa mga problemang iyan. Sa pagheling ni Jehova ‘mapaparahay’ kamo, baga man may agom o daing agom. (Basahon an 1 Corinto 7:37, 38. *) An pagkaigwa kan pag-oyon nin Dios an pinakamarahay na pasohan na puede nindong makamit. Kun kamo may pag-oyon nia, padagos kamong maoswag pasiring sa buhay sa bagong kinaban. Sa panahon na iyan, mawawara na an mga kasakitan dapit sa relasyon nin mga lalaki asin babae na lakop na gayo ngonyan.
[Mga Nota sa Ibaba]
^ par. 10 “Alagad kun iniisip nin siisay man na sia minagawe nin bakong tama sa saiyang pagigin daing agom, kun iyan lihis na sa pagbukad nin pagkahoben, asin ini an maninigong mangyari, gibohon nia kun ano an gusto nia; dai sia nagkakasala. Mag-agom sinda.” (NW)
^ par. 21 “Alagad kun an siisay man desisyonado sa saiyang puso, na dai nakakamate nin pangangaipo, kundi kontrolado an saiyang sadiring boot asin naggibo kan desisyon na ini sa saiyang puso, na magdanay na daing agom, mapaparahay sia. Bilang resulta, an nag-aagom napaparahay, alagad an dai nag-aagom mas mapaparahay.” (NW)
Masisimbag daw Nindo?
• Taano ta dai maninigong gipiton an siisay man tanganing mag-agom?
• Paano nindo magagamit sa pinakamarahay na paagi an saindong panahon bilang daing agom na lingkod ni Jehova?
• Paano pag-aandaman nin magkailusyon an mga problema sa pagigin may agom?
• Taano an pagigin may agom ta dai nangangahulogan na protektado na kamo sa seksuwal na imoralidad?
[Mga Hapot Para sa Pag-adal]
[Mga Ritrato sa pahina 14]
Magayagaya an mga Kristianong daing agom na naggagamit kan saindang panahon tanganing mapahiwas an ministeryo ninda
[Ritrato sa pahina 16]
Anong mga pagliliwat an tibaad kaipuhan na gibohon nin nagkapira pagkatapos kan kasal?
