‘Rangahon an Gabos na Nagtatangis’
‘Rangahon an Gabos na Nagtatangis’
“Linahidan ako ni Jehova . . . sa pagragña kan gabos na nagtatagñis.”—ISA. 61:1, 2.
1. Ano an ginibo ni Jesus para sa mga nagtatangis, asin taano?
SI Jesu-Cristo nagsabi: “An sakong kakanon iyo an pagguibo kan boot kan nagsogo sako, asin an paghaman kan saiyang guibo.” (Juan 4:34) Sa pag-otob ni Jesus kan asignasyon na itinao sa saiya nin Dios, ipinabanaag nia an kahangahangang mga kualidad kan saiyang Ama. Kaiba digdi an dakulang pagkamoot ni Jehova sa mga tawo. (1 Juan 4:7-10) Sinambit ni Pablo an sarong pagpaheling kan pagkamoot na iyan kan iladawan nia si Jehova bilang “Dios nin bilog na karagñahan.” (2 Cor. 1:3) Ipinaheling ni Jesus an siring na pagkamoot kan otobon nia an ihinula ni Isaias. (Basahon an Isaias 61:1, 2.) Sa sinagoga sa Nazaret, binasa ni Jesus an hulang iyan asin iinaplikar sa sadiri nia an mga tataramon dian. (Luc. 4:16-21) Durante kan bilog na ministeryo ni Jesus, mamomoton niang rinanga an mga nagtatangis, na tinatawan sinda nin pamparigon sa boot asin katoninongan nin isip.
2, 3. Taano an mga parasunod ni Cristo ta kaipuhan na arogon sia sa pagtao nin karangahan?
2 An gabos na parasunod ni Jesus kaipuhan na arogon sia paagi sa pagranga sa mga nagtatangis. (1 Cor. 11:1) Si Pablo nagsabi: “Magparagñaragña kamo, asin magparororigon kamo.” (1 Tes. 5:11) Nangorognang kaipuhan tang rangahon an iba huling an katawohan napapaatubang ngonyan sa “magña panahon na makahahandal.” (2 Tim. 3:1) An mga sadiosan an puso sa bilog na kinaban paorog nang paorog na napapaatubang sa mga tawo na an pagtaram asin paghiro nagigin dahelan nin pagtangis, kolog nin boot, asin kamondoan.
3 Arog kan ihinula sa Biblia, sa huring mga aldaw na ini kan maraot na sistema nin mga bagay, dakol an “mamomoton sa sainda man sana, magña mamomoton sa pirak, maabhao, mapalangkao, magña pararaway, masumbikal sa magña magurang, dai tataong magbalos, bakong banal, dai nin pagkamoot, dai maoyonan, parapakaraot, dai tataong magpogol sa saiya man sana, marigñis, bakong mamomoton sa karahayan, magña parapasaloib, magña matagas an payo, magña mahambug, magña mamomoton sa kasigñawan nin orog pa ki sa Dios.” An siring na mga ugale mas grabe ngonyan kisa kasuarin man, huling ‘an mga maraot asin nandadaya orog na nagraraot.’ (NW)—2 Tim. 3:2-4, 13.
4. Ano an nangyayari sa mga kamugtakan kan kinaban ngonyan?
4 Dai niato maninigong ipagngalas an gabos na ini, huling linilinaw kan Tataramon nin Dios na “an bilog na kinaban namumugtak ki Maraot.” (1 Juan 5:19) Kaiba sa “bilog na kinaban” an politikal, relihioso, asin komersial na mga kabtang, saka an mga paagi kaiyan sa pagpalakop nin propaganda. Daing duda, si Satanas na Diablo angay apodon na “an poon nin kinaban” asin an “dios kan kinaban na ini.” (Juan 14:30; 2 Cor. 4:4) An mga kamugtakan sa bilog na daga padagos na nagraraot huling grabe an kaanggotan ni Satanas ngonyan, sa pakaaram na halipot na sana an panahon na natatada bago sia pohoon ni Jehova. (Kap. 12:12) Nakakaranga nanggad maaraman na madali nang matapos an pagtogot nin Dios ki Satanas asin sa maraot na sistemang ini, saka mareresolberan na an isyung pinalataw nia mapadapit sa soberaniya ni Jehova!—Gen., kap. 3; Job, kap. 2.
An Maogmang Bareta Ihinuhulit sa Bilog na Kinaban
5. Paano an hula manongod sa paghuhulit naootob sa huring mga aldaw na ini?
5 Sa masakit na panahon na ini kan kasaysayan nin tawo, naootob an ihinula ni Jesus. Sia nagsabi: “Ining evangelio nin kahadean ihuhulit sa bilog na kinaban sa pagpatotoo sa gabos na nacion; asin dagñan madatong an katapusan.” (Mat. 24:14) Padakol nang padakol an nakikikabtang sa pambilog na kinaban na pagpatotoong ini mapadapit sa Kahadean nin Dios. Ngonyan, labing 7,500,000 na Saksi ni Jehova, na asosyado sa labing 107,000 na kongregasyon sa bilog na daga, an naghuhulit manongod sa Kahadean nin Dios, na iyo man an tema kan paghuhulit asin pagtotokdo ni Jesus. (Mat. 4:17) Bilang resulta kan satong paghuhulit ngonyan, nararanga nanggad an mga nagtatangis. Iyo, kan nakaagi pa sanang duwang taon, 570,601 an nagpabautismo bilang Mga Saksi ni Jehova!
6. Ano an masasabi nindo manongod sa pagigin lakop kan paghuhulit niato?
6 Lubos tang nasasabotan na lakop nang marhay an paghuhulit na ini huling an Mga Saksi ni Jehova ngonyan nagtatradusir asin nagdidistribwir nin mga babasahon na basado sa Biblia sa labing 500 na lenguahe. Ngonyan sana ini nangyari sa bilog na kasaysayan nin tawo! Talagang pambihira an pag-eksister, paghuhulit, asin pag-oswag kan daganon na kabtang kan organisasyon ni Jehova. Kun mayo an paggiya asin tabang kan makapangyarihan na banal na espiritu nin Dios, imposibleng mangyari iyan sa kinaban na ini na kontrolado ni Satanas. Huli sa paghuhulit kan maogmang bareta sa bilog na ineerokan na daga, an karangahan hale sa Kasuratan nakakamtan ngonyan bako sanang kan mga kapagtubod niato kundi pati kan mga nagtatangis na nag-aako kan mensahe kan Kahadean.
Pagranga sa mga Kapwa Parasamba
7. (a) Taano ta dai niato maaasahan na hahaleon ni Jehova an gabos na masakit na situwasyon ngonyan? (b) Paano niato naaraman na posible para sa sato na tagalan an persekusyon asin kasakitan?
7 Sa kinaban na ini na pano nin karatan, seguradong mapapaatubang kita sa nagkapirang masakit na situwasyon. Sagkod na dai pa linalaglag nin Dios an sistemang ini nin mga bagay, dai niato maaasahan na hahaleon nia an gabos na dahelan nin kamondoan o pagtangis. Mientras tanto, mantang napapaatubang kita sa ihinulang persekusyon, nakataya an integridad niato ki Jehova bilang mga parasuportar kan saiyang unibersal na soberaniya. (2 Tim. 3:12) Minsan siring, paagi sa tabang asin pagranga kan satong langitnon na Ama, puede kitang magin arog kan linahidan na mga Kristiano sa suanoy na Tesalonica, na napangganahan an mga persekusyon asin kasakitan huli sa pakatagal asin pagtubod.—Basahon an 2 Tesalonica 1:3-5.
8. Ano an ebidensia sono sa Kasuratan na rinaranga ni Jehova an mga lingkod nia?
8 Mayong duda na nagtatao si Jehova nin kinakaipuhan na karangahan sa mga lingkod nia. Halimbawa, kan si propeta Elias gustong gadanon kan maraot na si Reyna Jezabel, sia nawaran nin kosog nin boot asin nagdulag, na nagsasabi pa ngani na gusto na niang magadan. Alagad imbes na anggotan si Elias, sia rinanga ni Jehova asin pinakosog an boot tanganing maotob an gibohon nia bilang propeta. (1 Ha. 19:1-21) Maheheling man sa eksperyensia kan Kristianong kongregasyon kan enot na siglo na rinaranga ni Jehova an banwaan nia. Halimbawa, mababasa niato an dapit sa sarong panahon kan “an simbahan [“kongregasyon,” NW] sa bilog na Judea, asin Galilea, patin Samaria nagkaigua nin katoninogñan, na nagkokosog.” Apuera dian, iyan “nagdadakol, na naglalakao sa takot sa Kagurangnan, asin sa karagñahan nin Espiritu Santo [“banal na espiritu,” NW].” (Gui. 9:31) Kita nagpapasalamat nanggad na kita man may ‘karangahan nin banal na espiritu’!
9. Taano an pakanood manongod ki Jesus ta puedeng makaranga sa sato?
9 Bilang mga Kristiano, nararanga kita paagi sa pakanood manongod ki Jesu-Cristo asin pag-arog sa saiya. Si Jesus nagsabi: “Madia kamo sa sako gabos na nagpapagal asin nagagabatan, asin tatawan ko kamo nin pahigñalo. Pasanon nindo an sakong sakal, asin maghinonod kamo sako; huli ta ako mahoyo asin mapakumbaba sa puso: Asin makakakua kamo nin kapahigñaloan sa saindong magña kalag. Huli ta an sakal ko marahay, asin an pasan ko maguian.” (Mat. 11:28-30) An pakanood sa nakakaparigon na paagi nin pagtratar ni Jesus sa mga tawo dangan pag-arog sa positibong halimbawa nia dakula nang tabang tanganing mainaan an tension na tibaad naeeksperyensiahan niato.
10, 11. Sa kongregasyon, sairisay an puedeng magtao nin karangahan?
10 Puede man kitang maranga nin mga kapwa Kristiano. Halimbawa, estudyare kun paano tinatabangan nin mga magurang sa kongregasyon an mga napapaatubang sa masakit na mga situwasyon. Si disipulo Santiago nagsurat: “May naghehelang dian sa saindo [sa espirituwal]? Omapod sia kan magña magurang kan simbahan [“kongregasyon,” NW]; asin sinda mamibi manogñod saiya.” Na may anong resulta? “An pamibi nin pagtubod maligtas sa naghehelang, asin babagñonon sia nin Kagurangnan; asin kun sia nakaguinibo nin magña kasalan, iyan ipapatawad saiya.” (Sant. 5:14, 15) An ibang miembro kan kongregasyon puede man magtao nin karangahan.
11 Sa parate, mas pasil para sa mga babae na ipakipag-olay sa kapwa babae an manlaenlaen na problema. An may edad na asin mas eksperyensiadong mga tugang na babae nangorognang makakatao nin marahay na sadol sa hoben na mga tugang na babae. Tibaad naeksperyensiahan na kan may edad na asin maygurang na mga Kristianang ini an kaagid na mga situwasyon. Dakula an ikakatabang kan saindang simpatiya asin mga kualidad na pambabae. (Basahon an Tito 2:3-5.) Siempre, an mga magurang sa kongregasyon asin an iba pa puede asin maninigong ‘pakosogon an mga nangluluya an boot’ na mga tugang niato. (1 Tes. 5:14, 15) Asin marahay na girumdomon na an Dios ‘nagraranga sato sa gabos tang kasakitan, tanganing kita makapagranga kan mga nasa ano man na kamondoan.’—2 Cor. 1:4.
12. Taano ta mahalagang marhay na kita mag-atender sa mga pagtiripon?
12 An sarong mahalagang marhay na paagi tanganing maranga iyo na magin presente sa mga pagtiripon, na dian napaparigon kita kan mga pagtokar dapit sa Biblia. Mababasa niato na si Judas asin Silas nagparigon o “nagsadol sa magña tugang sa balakid na tataramon, asin nagpakosog sainda.” (Gui. 15:32) Bago asin pagkatapos kan mga pagtiripon, nagpaparinigonan an mga miembro kan kongregasyon paagi sa pag-orolay-olay. Kaya dawa kun nakakaeksperyensia kita nin masakit na situwasyon, dai niato isuway an satong sadiri, huli ta magrabe sana an kamugtakan. (Tal. 18:1) Imbes, marahay na sunodon niato an ipinasabong na hatol ni Pablo: “Magpamaromangno kita na magpasaradolsadol sa pagkamoot asin sa magña marahay na guibo; na dai pagpabayaan an satong pagtorotiripon siring kan kaugalean nin nagkapira, kundi na magpasaradolsadol kita; asin lalo na, ta nahihiling nindo na an aldao naghaharani.”—Heb. 10:24, 25.
Maranga kan Tataramon nin Dios
13, 14. Ipaheling kun paano kita puedeng maranga kan Kasuratan.
13 Baga man kita bautisado na o nagpopoon pa sanang makanood manongod sa Dios asin sa mga katuyohan nia, mararanga nanggad kita kan nasusurat na Tataramon nin Dios. Nagsurat si Pablo: “An gabos na isinurat kaidto, isinurat sa pagtokdo sato, tagñaning huli sa pakatagal asin sa karagñahan kan magña kasuratan, magkaigua kita nin paglaom.” (Roma 15:4) An Banal na Kasuratan makakaranga sa sato asin gigibohon kitang lubos na may kakayahan asin “andam [nanggad] manogñod sa gabos na marahay na guibo.” (2 Tim. 3:16, 17) An pakaaram kan katotoohan manongod sa mga katuyohan nin Dios asin an pagkaigwa nin tunay na paglaom sa maabot na panahon sierto nanggad na magtatao nin dakulang karangahan. Kun siring, lubos na gamiton niato an Tataramon nin Dios asin mga publikasyon na basado sa Biblia na magtatao sa sato nin karangahan asin pakinabang sa dakol na paagi.
14 Si Jesus nagtao sa sato nin marahay na halimbawa paagi sa paggamit kan Kasuratan sa pagtokdo asin pagranga sa iba. Halimbawa, durante kan saro sa mga pagpaheling nia pagkabuhay liwat sa saiya, lubos niang ‘binukas an mga kasuratan’ sa duwa sa mga disipulo nia. Mantang kinakaolay nia sinda, biyong napahiro an puso ninda. (Luc. 24:32) Bilang pag-arog sa marahayon na halimbawa ni Jesus, si Pablo ‘nakipag-olay hale sa mga kasuratan.’ Sa Berea, an mga naghihinanyog sa saiya “nagako sa madale [“dakulaon na pagmawot nin isip,” NW] kan tataramon, na nagsisiasat aroaldao kan magña kasuratan.” (Gui. 17:2, 10, 11) Angay nanggad na aroaldaw tang basahon an Biblia, na nakikinabang dian asin sa mga publikasyon na dinisenyo tanganing tawan kita nin karangahan saka paglaom sa masakit na mga panahon na ini!
Dugang Pang mga Paagi na Rangahon an Iba
15, 16. Ano an nagkapirang magigibo niato tanganing makatabang asin makaranga sa mga kapwa Kristiano?
15 Makakatabang kita asin sa siring makakaranga sa mga kapwa Kristiano sa manlaenlaen asin praktikal na paagi. Halimbawa, puede tang ipanaod an mga may edad na o may helang na kapagtubod. Puede tang tabangan an iba sa mga gibohon ninda sa harong, na sa siring nagpapaheling nin personal na interes sa sainda. (Fil. 2:4) Puede tang omawon an mga kapwa parasamba huli sa marahay na mga kualidad na arog kan saindang pagkamoot, pagkamapamaagi, kosog nin boot, asin pagtubod.
16 Sa paghihingoang rangahon an mga may edad na, puede niato sindang bisitahon asin maingat na hinanyogon kun sinda nag-eestorya manongod sa nakaaging mga eksperyensia asin risang-risang mga bendisyon sa sainda sa paglilingkod ki Jehova. Iyo, talagang makakaparigon asin makakaranga ini sa sato! Puede tang basahan an mga binibisita niato nin sarong kabtang kan Biblia o kan mga publikasyon na basado dian. Puede tang pag-adalan kaiba ninda an artikulo para sa semanal na Pag-adal sa Torrengbantayan o an ginagamit na publikasyon sa Pag-adal sa Biblia kan Kongregasyon. Puede niato sindang ibanan sa pagdalan o pagheling nin mga DVD niato. Dangan, puede man niato sindang basahan o estoryahan nin nakakaparigon na mga eksperyensia hale sa mga publikasyon niato.
17, 18. Bilang maimbod na mga lingkod ni Jehova, taano ta makakasierto kita na susuportaran asin rarangahon nia kita?
17 Kun marisa niato na kaipuhan nin pagranga nin kapwa parasamba ki Jehova, puede niato siang sambiton sa pribadong mga pamibi niato. (Roma 15:30; Col. 4:12) Mantang inaatubang niato an personal na mga problema asin maigot na naghihingoang rangahon an iba, puede kitang magkaigwa nin pagtubod asin kombiksion na siring kan sa salmista na nag-awit: “Bugtakan dian ki Jehova an saimong pasan, asin sia aatamanon ka; [dai] pababayaan sagkod lamang na maholog an banal.” (Sal. 55:22) Tunay nanggad na si Jehova pirmeng andam na rangahon asin suportaran kita bilang maimbod na mga lingkod nia.
18 Sinabi nin Dios sa mga nagsasamba sa saiya kan suanoy na mga panahon: “Ako, ako an saindong pararagña.” (Isa. 51:12) Gigibohon man iyan sa sato ni Jehova asin bebendisyonan nia an marahay na mga gibo asin tataramon niato mantang rinaranga niato an mga nagtatangis. Baga man an paglaom niato sa langit o sa daga, an lambang saro sa sato puedeng maranga kan sinabi ni Pablo sa mga kapwa Kristiano na linahidan nin espiritu: “An Kagurangnan na si Jesu-Cristo man sana, asin an Dios na satong Ama na namoot sato asin nagtao sa sato kan daing katapusan na karagñahan asin marahay na paglaom huli sa biyaya, rumagña logod kan saindong magña puso asin pumarigon kaiyan sa gabos na marahay na guibo asin tataramon.”—2 Tes. 2:16, 17.
Nagigirumdoman daw Nindo?
• Gurano kalakop kan satong gibohon na pagranga sa mga nagtatangis?
• Ano an nagkapirang magigibo niato tanganing rangahon an iba?
• Ano an ebidensia sono sa Kasuratan na rinaranga ni Jehova an banwaan nia?
[Mga Hapot Para sa Pag-adal]
[Ritrato sa pahina 28]
Nakikikabtang daw kamo sa pagranga sa mga nagtatangis?
[Ritrato sa pahina 30]
An mga hoben saka gurang puedeng makaparigon
