“Dai Ka Manarig sa Saimong Sadiring Pakasabot”

“Magtiwala ka ki Jehova sa bilog mong puso asin dai ka manarig sa saimong sadiring pakasabot.”—TAL. 3:5, NW.

1, 2. (a) Anong mga situwasyon an tibaad mapaatubang sa sato? (b) Kun napapaatubang sa mga situwasyon na iyan, kiisay kita maninigong magsarig, asin taano?

ISINERA na kan among ni Cynthia * an pirang kabtang kan saiyang kompanya asin sinisante an nagkapirang empleyado. Naniniwala si Cynthia na sia an sunod na sisisantehon. Ano an gigibohon nia kun mawaran sia nin trabaho? Paano na an mga bayadan nia? An Kristianang si Pamela gustong magbalyo sa lugar na mas nangangaipo nin mga parahayag, alagad maninigo daw? Laen man an ikinakahadit kan solterong si Samuel. Nagpaparaheling sia nin pornograpiya kan aki pa. Ngonyan na labi na siang 20 anyos, nasusugotan nanggad siang bumalik sa dating gaweng iyan. Paano nia iyan malalabanan?

² Kiisay kamo nagsasarig kun napapaatubang sa masakit na mga situwasyon, naggigibo nin importanteng mga desisyon, o may linalabanan na mga sugot? Sa saindong sadiri sana daw kamo nagsasarig, o ‘ibinubugtak daw nindo ki Jehova an saindong pasan’? (Sal. 55:22) “An magña mata ni Jehova [nakaturuhok] sa magña banal,” an sabi kan Biblia, “asin andam an saiyang magña taligña sa saindang pagagragñay.” (Sal. 34:15) Kun siring, mahalaga nanggad na magtiwala kita ki Jehova sa bilog tang puso asin dai kita manarig sa sadiri tang pakasabot!—Tal. 3:5.

3. (a) Ano an kalabot sa pagtitiwala ki Jehova? (b) Taano ta may tendensia an nagkapira na magsarig sa sadiri nindang pakasabot?

³ Kalabot sa bilog na pusong pagtitiwala ki Jehova an paggibo nin mga bagay segun sa pamamaagi nia, oyon sa kabotan nia. Sa paggibo kaiyan, mahalagang marhay na padagos kitang dumolok sa saiya sa pamibi asin odok sa pusong hagadon an paggiya nia. Minsan siring, depisil para sa dakol an lubos na pagsarig ki Jehova. Halimbawa, an Kristianang si Lynn nag-admitir, “Padagos akong nasasakitan kun paano lubos na magsasarig ki Jehova.” Taano? “Mayo kaming komunikasyon kan sakong ama,” an sabi nia, “asin an sakong ina mayo nin pagmakolog sa emosyonal o pisikal na pangangaipo ko. Kaya tolos-tolos kong nanodan na asikasohon an sadiri ko.” Huli kaiyan, nadepisilan si Lynn na lubos na magtiwala sa siisay man. An personal na abilidad asin kapangganahan puede man magin dahelan na an saro magsarig na sana sa sadiri nia. Huli sa pagsarig nin sarong elder sa sadiri niang eksperyensia, tibaad asikasohon nia an mga bagay-bagay na pangkongregasyon na dai nguna nagdodolok sa Dios sa pamibi.

4. Ano an pag-oolayan sa artikulong ini?

⁴ Inaasahan ni Jehova na sinsero tang hihingoahon na gumawe sono sa mga pamibi niato asin humiro kaoyon kan kabotan nia. Kun siring, paano kita magigin timbang sa pagpabaya sa saiya kan mga ikinakahadit niato asin sa personal na paghihingoa tang resolberan an mga problema? Kun dapit sa pagdesisyon, ano an dapat tang ingatan? Taano ta mahalaga an pamibi kun pinagmamaigotan tang labanan an mga sugot? Pag-oolayan niato an mga hapot na ini paagi sa pag-estudyar sa mga halimbawa sa Kasuratan.

 Kun Nasa Masakit na Situwasyon

5, 6. Ano an ginibo ni Ezekias kan humaon sia kan hade nin Asiria?

⁵ Mapadapit ki Hadeng Ezekias nin Juda, an Biblia nagsasabi: “Nagdolok sia ki Jehova, asin dai sia saiya nagsuhay, kundi nagkuyog sia kan magña togon na itinao ni Jehova ki Moises.” Iyo, “ki Jehova na Dios kan Israel ibinogtak nia an saiyang paglaom.” (2 Ha. 18:5, 6) Ano an ginibo ni Ezekias kan sugoon ni Hadeng Sennacherib nin Asiria an mga representante nia—kaiba si Rabsaces—sa Jerusalem na kaiba an dakulang hukbong militar? Sinakop na kan mapuersang hukbo nin Asiria an nagkapirang nakukutaan na siudad sa Juda, asin sasalakayon na ni Sennacherib an Jerusalem. Si Ezekias nagduman sa harong ni Jehova asin namibi: “Oh Jehova na samuyang Dios, ligtasan kami, ipinakikimaherak ko sa saimo, sa saindang magña kamot, tagñaning makaisi an gabos na magña kahadean sa daga na ika sana, Jehova, an Dios.”—2 Ha. 19:14-19.

⁶ Si Ezekias naghiro kaoyon kan pamibi nia. Dawa bago sia magduman sa templo tanganing mamibi, ininstruksionan nia an banwaan na dai magsimbag sa mga pagduhagi ni Rabsaces. Nagsugo man si Ezekias nin sarong grupo ki Isaias na propeta tanganing maghagad nin sadol. (2 Ha. 18:36; 19:1, 2) Ginibo ni Ezekias an tamang mga lakdang. Dai nia prinobaran na gumibo nin lakdang na bakong kaoyon kan kabotan ni Jehova paagi sa pagpatabang sa Egipto o sa kataraed na nasyon. Imbes na magsarig sa sadiri niang pakasabot, nagtiwala sia ki Jehova. Pagkatapos na gadanon kan anghel ni Jehova an 185,000 sa mga tawohan ni Sennacherib, “naghale” si Sennacherib asin nagbalik sa Ninive.—2 Ha. 19:35, 36.

7. Anong karangahan an makukua niato sa mga pamibi ni Anna asin Jonas?

⁷ Si Anna, na agom kan Levitang si Elcana, nagsarig man ki Jehova kan sia nasa masakit na situwasyon huli sa dai nia pagkaigwa nin aki. (1 Sam. 1:9-11, 18) An propetang si Jonas ilinuwa nin dakulaon na sira pagkapamibi nia: “Nagarang ako sa sakuyang kasakitan ki Jehova asin ta hininanyog [nia ako]; nagarang ako sa tulak kan lulubgñan, asin ta dinagñog mo an sakuyang tigñog.” (Jon. 2:1, 2, 10) Nakakaranga nanggad maaraman na gurano man kagrabe kan situwasyon niato, puede kitang magkurahaw ki Jehova na may “pakimaherak”!—Basahon an Salmo 55:1, 16.

8, 9. Anong mahahalagang bagay an ipinahayag sa mga pamibi ni Ezekias, Anna, asin Jonas, saka ano an manonodan niato digdi?

⁸ An mga halimbawa ni Ezekias, Anna, asin Jonas nagtotokdo man sa sato nin mahalagang marhay na leksion manongod sa dai niato maninigong lingawan kun namimibi mantang nasa masakit na kamugtakan. Sindang tolo nakolgan an emosyon kan nasa masakit na mga kamugtakan. Pero, ipinapaheling kan pamibi ninda na bako sanang sadiri ninda an ikinakahadit ninda asin gusto nindang maginhawahan sa mga problema ninda. An pinakamahalaga sa sainda iyo an ngaran nin Dios, pagsamba sa saiya, asin paggibo kan kabotan nia. Nakolgan si Ezekias huli sa pag-olog-olog sa ngaran ni Jehova. Nanuga si Anna na papaglilingkodon nia sa tabernakulo sa Shiloh an mismong aking lalaki na pinakamamawot nia. Asin si Jonas nagsabi: “Babayadan ko an sakuyang itinuga.”—Jon. 2:9.

⁹ Kun namimibi kita na makaginhawa sa masakit na situwasyon, madonong na siyasaton an motibo niato. An mahalaga sana daw sa sato iyo an makaginhawa sa problema, o si Jehova daw an ginigirumdom niato asin an katuyohan nia? Huli sa personal na kasakitan, puede kitang mahadit na gayo sa situwasyon niato, kaya nagigin bako nang gayong mahalaga an espirituwal na mga bagay. Kun namimibi sa Dios para sa tabang, danay tang isentro an satong isip ki Jehova, sa pagpakangbanal kan ngaran nia, asin pagbindikar kan saiyang soberaniya. Makakatabang iyan sa sato na mapagdanay an positibong pananaw dawa kun dai nangyayari an solusyon na linalaoman niato. Tibaad an simbag sa mga pamibi niato iyo na kaipuhan tang tagalan an situwasyon sa tabang nin Dios.—Basahon an Isaias 40:29; Filipos 4:13.

 Kun Nagdedesisyon

10, 11. Ano an ginibo ni Josaphat kan nasa situwasyon na dai nia aram kun paano aatubangon?

¹⁰ Paano kamo naggigibo nin magabat na mga desisyon sa buhay? Kamo daw tibaad nagdedesisyon nguna dangan namimibi ki Jehova na logod bendisyonan iyan? Estudyare an ginibo ni Josaphat, na hade nin Juda, kan an pinagsarong hukbo kan mga Moabita asin Ammonita magpoon nang makigiera sa saiya. An Juda daing kalabanlaban sa sainda. Ano an gigibohon ni Josaphat?

¹¹ “Nagkaigua siang katakotan; asin ibinogtak ni Josaphat an saiyang lalauogon sa pakihomapot ki Jehova,” an sabi kan Biblia. Sinabi nia sa bilog na Juda na mag-ayuno asin tiniripon nia an banwaan “sa paghagad nin tabang ki Jehova.” Dangan nagtindog sia sa kongregasyon nin Juda saka Jerusalem asin namibi. Sa sarong kabtang kaiyan, sia nakimaherak: “Oh samuyang Dios. Dai mo sinda hahatolan? Huli ta digdi samuya mayo nin kosog na itutumang sa siring kadakoldakol na nagdadagñadang na tumang sa samuya: Dai kami nakakaisi kun ano an samuyang guiguibohon, tara sa saimo itinotorohok niamo an samuyang magña mata.” Dinangog kan tunay na Dios an pamibi ni Josaphat asin ilinigtas Nia sinda sa milagrosong paagi. (2 Cron. 20:3-12, 17) Kun nagdedesisyon, nangorogna kun iyan puedeng makaapektar sa espirituwalidad niato, bako daw na maninigo kitang magsarig ki Jehova imbes na sa sadiri tang pakasabot?

12, 13. Anong halimbawa an itinao ni Hadeng David kun dapit sa pagdesisyon?

¹² Ano an maninigo tang gibohon kun mapaatubang sa mga problema na garo baga madaling resolberan—tibaad may naiisip tolos kitang solusyon huli sa nagin eksperyensia niato? An sarong pangyayari may koneksion ki Hadeng David nagtatao nin pakasabot sa bagay na ini. Kan sakyadahon kan mga Amalecita an siudad nin Siclag, dinara ninda an mga agom asin mga aki ni David saka an mga agom asin mga aki kan mga tawohan nia. Si David naghapot ki Jehova: “Lalamagon ko an kapisanan na ini?” Si Jehova nagsimbag: “Lamaga, ta totoong gayong [aabotan] mo sia, asin . . . ikakaligtas mo an gabos.” Sinunod nia iyan, asin “[ikinabalik] ni David an gabos na inagauan kan magña Amalecita.”—1 Sam. 30:7-9, 18-20.

¹³ Pagkatapos na magsakyada an mga Amalecita, sinakyada kan mga Filisteo an Israel. Naghapot giraray si David ki Jehova asin tinawan sia nin malinaw na simbag. An Dios nagsabi: “Lakao, huli ta totoong gayong itatao ko an magña Filisteo sa saimong magña kamot.” (2 Sam. 5:18, 19) Dai nahaloy pagkatapos kaiyan, si David sinakyada giraray kan mga Filisteo. Ano an gigibohon nia sa situwasyon na ini? Puede kutana siang mangatanosan: ‘Duwang beses na akong napaatubang sa kaagid na situwasyon. Makikipaglaban ako sa mga kaiwal nin Dios, arog kan ginibo ko kaidto.’ O hahagadon daw ni David an paggiya ni Jehova? Si David dai nagsarig sa nakaaging eksperyensia nia. Sia namibi giraray ki Jehova. Segurado nanggad na naogma sia na ginibo nia iyan! Laen an instruksion na itinao sa saiya sa situwasyon na ini. (2 Sam. 5:22, 23) Kun napapaatubang sa komun na situwasyon o problema, dapat kitang mag-ingat na dai sana magsarig sa nakaaging eksperyensia.—Basahon an Jeremias 10:23.

14. Anong leksion an manonodan niato sa kun paano trinatar ni Josue asin kan kamagurangan na lalaki sa Israel an mga Gabaonita?

¹⁴ Huling bakong perpekto, kita gabos—dawa an eksperyensiadong mga elder—kaipuhan na pirmeng magpagiya ki Jehova kun nagdedesisyon. Estudyare an ginibo kan kasalihid ni Moises na si Josue asin kan kamagurangan na lalaki sa Israel kan magdolok sa sainda an madonong na mga Gabaonita asin magsagin na hale sa harayong lugar. Si Josue asin an iba pa dai na naghapot ki Jehova, kundi nakipagkatoninongan tolos sa mga Gabaonita, na nakipagtipan sa mga ini. Minsan ngani sa katapustapusi sinuportaran ni Jehova an kasundoan, sinierto nia na an dai paghagad na ini kan paggiya nia ikarekord sa Kasuratan para sa kapakinabangan niato.—Jos. 9:3-6, 14, 15.

 Kun May Linalabanan na mga Sugot

15. Ipaliwanag kun taano ta mahalaga an pamibi sa paglaban sa sugot.

¹⁵ Huling igwa kita nin “katogonan nin kasalan” sa mga kabtang kan satong hawak, kaipuhan tang mapuersang labanan an makasalan na mga tendensia. (Roma 7:21-25) Ini sarong laban na puedeng ganahon. Paano? Sinabi ni Jesus sa mga parasunod nia na an pamibi mahalagang marhay sa paglaban sa sugot. (Basahon an Lucas 22:40.) Dawa kun an salang pagmawot o pag-isip magdanay pagkapamibi niato sa Dios, kaipuhan tang padagos na ‘humagad sa Dios’ nin kadonongan tanganing makaya an pagbalong ini. Sinisierto sa sato na sia abundang “nagtatao sa gabos . . . asin dai nagsasayuma.” (Sant. 1:5) Si Santiago nagsurat man: “May naghehelang dian sa saindo [sa espirituwal]? Omapod sia kan magña magurang kan simbahan [“kongregasyon,” NW]; asin sinda mamibi manogñod saiya, na lahidan sia nin lana sa gñaran nin Kagurangnan: Asin an pamibi nin pagtubod maligtas sa naghehelang.”—Sant. 5:14, 15.

16, 17. Kun naghahagad nin tabang na malabanan an sugot, noarin an pinakamarahay na panahon na mamibi?

¹⁶ An pamibi mahalagang marhay sa paglaban sa sugot, alagad dapat tang isaisip na kaipuhan na mamibi sa tamang panahon. Estudyare an dapit sa sarong hoben na lalaking nasambitan sa Talinhaga 7:6-23. Kan pabanggi na, sia naglalakaw sa tinampo na aram niang gayo na nagpipirme an imoral na babae. Huling nabensir kan babae asin naakit kan mahamis na mga tataramon kaini, an lalaki nagsunod sa saiya, siring sa toro na pasiring sa bunoan. Taano ta nagduman sia? Posibleng marhay na linalabanan nia an salang mga pagmawot huling sia “kulang nin pagisip,” an boot sabihon, daing eksperyensia. (Tal. 7:7) Noarin kutana nakatabang na marhay sa saiya an pamibi? Siempre, marahay kutana kun namibi sia na malabanan an sugot mantang kinakaolay sia kan babae. Alagad, an pinakamarahay kutanang panahon na namibi sia iyo an kan enot niang maisip na maglakaw sa tinampong iyan.

¹⁷ Ngonyan, an sarong lalaki tibaad nagmamaigot na marhay na malabanan an pagheling nin pornograpiya. Minsan siring, ipamugtak ta baga na nagbubukas sia nin mga site sa Internet na aram niang may mga retrato o video na nakakapukaw sa sekso. Bako daw na magigin kaagid sia kan hoben na lalaking iyan na nasambit sa Talinhaga kapitulo 7? Kanigoan kapeligroso na magpoon na lumakaw sa dalan na iyan! Tanganing malabanan an sugot na magheling nin pornograpiya, an saro kaipuhan na maghagad nin tabang ki Jehova paagi sa pamibi bago magpoon na dumuman, sabi ngani, sa rutang iyan sa Internet.

18, 19. (a) Taano ta depisil na labanan an sugot, alagad paano nindo iyan mapapangganahan? (b) Ano an determinasyon mo?

¹⁸ Bakong pasil labanan an sugot o pangganahan an maraot na mga gawe. “An laman . . .  tumang sa [espiritu],” an isinurat ni Pablo, “asin an [espiritu] tumang sa laman.” Kun siring, “dai [kita] makaguibo kan magña bagay na boot [niato].” (Gal. 5:17) Tanganing mapangganahan ini, sa enot pa sanang pagsabong sa isip niato nin salang kaisipan o sugot, kaipuhan na niatong odok na mamibi dangan humiro kaoyon kaiyan. “Dai nin sugot na nadatong saindo kundi an matatagal,” asin sa tabang ni Jehova, puede kitang magdanay na maimbod sa saiya.—1 Cor. 10:13.

¹⁹ Baga man kita napapaatubang sa masakit na situwasyon, naggigibo nin magabat na desisyon, o nagmamaigot na labanan an sugot, tinawan kita ni Jehova nin pambihirang balaog—an mahalagang marhay na probisyon na pamibi. Paagi kaiyan, ipinapaheling niato an pagsarig sa saiya. Maninigo man niatong padagos na hagadon sa Dios an saiyang banal na espiritu, na naggigiya asin nagpapakosog sa sato. (Luc. 11:9-13) Asin magtiwala nanggad kita ki Jehova saka dai magsarig sa sadiri tang pakasabot.

[Nota sa Ibaba]

Nagigirumdoman daw Nindo?

• Ano an nanodan nindo ki Ezekias, Anna, asin Jonas kun dapit sa pagtitiwala ki Jehova?

• Paano idinodoon kan mga halimbawa ni David asin Josue na kaipuhan an pag-iingat kun nagdedesisyon?

• Noarin kita nangorognang maninigo na mamibi manongod sa mga sugot?

[Mga Hapot Para sa Pag-adal]

[Ritrato sa pahina 9]

Sa paglaban sa sugot, noarin nakakatabang na marhay an pamibi?