Tabangan an mga Lalaki na Umoswag sa Espirituwal
Tabangan an mga Lalaki na Umoswag sa Espirituwal
“Magpoon gñunian magdadakop ka nin magña tauo.”—LUC. 5:10.
1, 2. (a) Ano an nagin reaksion kan mga lalaki sa paghuhulit ni Jesus? (b) Ano an pag-oolayan sa artikulong ini?
KAN si Jesus asin an saiyang mga disipulo naghuhulit sa bilog na Galilea, suminakay sinda sa sarong baroto tanganing magpasiring sa sarong puerang lugar. Alagad dakol na tawo an nagsurunod sa sainda na nagraralakaw. An mga nagduruman kan aldaw na idto may bilang na “limang ribong lalaki, na dai kabilang an magña babae asin magña aki.” (Mat. 14:21) Sa saro pang pangyayari, dinolok si Jesus nin dakol na tawo na nagmamawot na mapaomayan asin madangog siang magtaram. Kaiba sa sainda an “apat na ribong lalaki, na dai kabilang an magña babae asin magña aki.” (Mat. 15:38) Minalataw na dakol na lalaki an kaiba sa mga tawong nagdolok ki Jesus asin nagpaheling nin interes sa saiyang itinotokdo. Sa katunayan, inaasahan nia na dakol na iba pa an mahimate, huling pagkatapos niang pangyarihon na milagrosong makadakop nin kadakol na sira, sinabi ni Jesus sa saiyang disipulo na si Simon: “Magpoon gñunian magdadakop ka nin magña tauo.” (Luc. 5:10) Itataktak kan mga disipulo an saindang mga hikot sa dagat nin katawohan asin sinda makakaasa na kaiba sa ‘madadakop’ ninda an dakol na lalaki.
2 Ngonyan, may mga lalaki man na nagpapaheling nin interes asin naghihimate sa sono sa Kasuratan na mensahe na ihinuhulit niato. (Mat. 5:3) Minsan siring, dakol na lalaki an nag-aalangan asin dai nag-ooswag sa espirituwal. Paano niato sinda matatabangan? Minsan ngani si Jesus mayo nin espesyal na ministeryo tanganing hulitan an mga lalaki, tinawan nanggad nia nin atension an mga isyung pinagkakainteresan nin mga lalaki kan saiyang panahon. Ginagamit an halimbawa ni Jesus, siyasaton ta kun paano niato matatabangan an mga lalaki na atubangon an tolong bagay na parateng ikinakahadit ngonyan: (1) paghanapbuhay, (2) pagkatakot sa opinyon nin kadaklan, asin (3) pakamate nin kawaran nin kakayahan.
Paghanapbuhay
3, 4. (a) Ano an pangenot na ikinakahadit kan dakol na lalaki? (b) Taano ta mas ipinapaorog nin nagkapirang lalaki an paghanapbuhay kisa sa espirituwal na mga bagay?
3 “Paratokdo,” an sabi nin sarong eskriba ki Jesus, ‘masunod ako saimo saen ka man paduman.’ Minsan siring, kan sinabi sa saiya ni Jesus na “an Aki nin tauo dai nin mahihigdaan,” an eskriba nagduwaduwa. Minalataw na dai nagustohan kan eskriba an pagigin daing kasegurohan kun saen sia makua nin kakanon asin kun saen sia maistar, huling mayong ebidensia na sia nagin parasunod ni Cristo.—Mat. 8:19, 20.
4 Sa parate, mas ipinapaorog kan mga lalaki an materyal na seguridad kisa sa espirituwal na mga bagay. An pagkua nin halangkaw na edukasyon asin pagkaigwa nin trabaho na may halangkaw na sueldo iyo an prioridad kan dakol sa sainda. Oyon sa saindang pagmansay, an pagganar nin kuarta mas importante asin praktikal kisa sa ano man na pakinabang sa pag-adal kan Kasuratan asin paghingoang magin dayupot sa Dios. Tibaad nagugustohan ninda an itinotokdo kan Biblia, alagad an “kahaditan kan kinaban, asin an kadayaan nin kayamanan” nakakapuot sa ano man na interes na tibaad igwa sinda. (Mar. 4:18, 19) Estudyare kun paano tinabangan ni Jesus an saiyang mga disipulo na itanos an saindang mga prioridad.
5, 6. Ano an nakatabang ki Andres, Pedro, Santiago, asin Juan na itanos an saindang mga prioridad mapadapit sa pakikikabtang sa paghuhulit asin paghanapbuhay?
5 Si Andres asin an saiyang tugang na si Simon Pedro magkasosyo sa negosyong paninira. Si Juan, an tugang niang si Santiago, asin an saindang ama na si Zebedeo magkakasosyo man sa paninira. Marahay an negosyo kaya igwa sinda nin tinatangdanan na mga trabahador. (Mar. 1:16-20) Kan enot na maaraman ni Andres asin Juan an manongod ki Jesus paagi ki Juan na Bautisador, kombensido sinda na nanompongan na ninda an Mesiyas. Ibinareta ini ni Andres sa tugang niang si Simon Pedro, asin tibaad iyo man an ginibo ni Juan sa tugang niang si Santiago. (Juan 1:29, 35-41) Sa suminunod na mga bulan, sindang apat uminiba ki Jesus mantang sia naghuhulit sa Galilea, Judea, asin Samaria. Dangan an apat na disipulo buminalik sa negosyong paninira. Interesado sinda sa espirituwal na mga bagay, alagad an ministeryo bakong pangenot sa saindang buhay.
6 Paghaloyhaloy, inagda ni Jesus si Pedro asin Andres na sumunod sa saiya asin magin ‘mga parasira nin tawo.’ Ano an nagin reaksion ninda? ‘Tolos nindang binayaan an saindang mga hikot asin nagsunod sa saiya.’ Iyan man an ginibo ni Santiago asin Juan. ‘Tolos man nindang binayaan an sakayan asin an saindang ama patin nagsunod sa saiya.’ (Mat. 4:18-22) Ano an nakatabang sa mga lalaking ini na maglaog sa bilog na panahon na ministeryo? Nadara sana daw sinda kan saindang emosyon asin nagin pabiglabigla sa saindang desisyon? Dai nanggad! Sa nakaaging mga bulan, an mga lalaking ini nagdangog ki Jesus, naheling siang guminibo nin mga milagro, namasdan an saiyang kaigotan para sa katanosan, asin naheling mismo an makangangalas na reaksion nin mga tawo sa saiyang paghuhulit. Bilang resulta, kuminosog an saindang pagtubod asin tiwala ki Jehova!
7. Paano niato matatabangan an satong mga tinotokdoan sa Biblia na mapatalubo an tiwala sa kakayahan ni Jehova na susteniran an mga lingkod nia?
7 Paano niato maaarog si Jesus sa pagtabang sa mga tinotokdoan niato sa Biblia na pataluboon an tiwala ninda ki Jehova? (Tal. 3:5, 6) May dakulang kabtang digdi an satong paagi nin pagtotokdo. Kun kita nagtotokdo, puede niatong idoon an panuga nin Dios na abunda nia kitang bebendisyonan kun eenoton niato an intereses kan Kahadean. (Basahon an Malaquias 3:10; Mateo 6:33.) Minsan ngani puede kitang gumamit nin manlaenlaen na teksto tanganing idoon kun paano sinususteniran ni Jehova an saiyang mga lingkod, dai niato dapat paglingawan an epekto kan sato mismong halimbawa. An pagsaysay kan sadiri niatong mga eksperyensia puedeng makatabang nin dakula sa satong mga tinotokdoan sa Biblia na mapatalubo an pagsarig ki Jehova. Puede man kitang magsaysay nin nakakaparigon sa boot na mga eksperyensia na nabasa niato sa satong mga babasahon. *
8. (a) Taano ta mahalaga para sa sarong tinotokdoan sa Biblia na ‘namitan asin helingon na marahayon si Jehova’? (b) Paano niato matatabangan an satong mga tinotokdoan sa Biblia na maeksperyensiahan nin personal an karahayan ni Jehova?
8 An pagpatalubo nin makosog na pagtubod nangangaipo nin labi pa sa pagbasa asin pagdangog dapit sa kun paano naeksperyensiahan nin iba an bendisyon ni Jehova. Kaipuhan man na personal na maeksperyensiahan nin sarong tinotokdoan sa Biblia an karahayan ni Jehova. An salmista nag-awit: “Namitan nindo asin hiligña nindo ta marahayon si Jehova; paladan an tauo na mananarig dian sa saiya.” (Sal. 34:8) Paano niato matatabangan an tinotokdoan sa Biblia na maheling na si Jehova marahay? Ipamugtak na an sarong tinotokdoan sa Biblia na may problema sa pinansial nagmamaigot man na mapangganahan an sarong maraot na bisyo, arog baga nin paninigarilyo, pagsugal, o makosog na pag-inom. (Tal. 23:20, 21; 2 Cor. 7:1; 1 Tim. 6:10) Bako daw na an pagtokdo sa saiya na mamibi para sa tabang nin Dios na mapangganahan an maraot na bisyo makakatabang sa saiya na maeksperyensiahan an karahayan ni Jehova? Isipon man an puedeng mangyari kun dadagkahon niato siang magtao nin prioridad sa espirituwal na mga bagay paagi sa pagtao nin panahon para sa semanal na pag-adal sa Biblia asin pag-andam saka pag-atender sa Kristianong mga pagtiripon. Iyo nanggad, mantang personal niang naeeksperyensiahan an bendisyon ni Jehova sa saiyang mga paghihingoa, magigin mas makosog an saiyang pagtubod!
Pagkatakot sa Opinyon nin Kadaklan
9, 10. (a) Taano ta dai ihinayag ni Nicodemo asin Jose na taga Arimatea an saindang interes sa mensahe ni Jesus? (b) Taano ta nag-aalangan an nagkapirang lalaki ngonyan na sumunod ki Cristo?
9 Huli sa panggigipit nin mga kairiba, an nagkapirang lalaki tibaad mag-alangan na sumunod nin lubos ki Cristo. Dai ihinayag ni Nicodemo asin Jose na taga Arimatea an saindang interes sa mensahe ni Jesus huling natatakot sinda sa kun ano an tibaad sabihon o gibohon kan ibang mga Judio kun maaraman ninda iyan. (Juan 3:1, 2; 19:38) An pagkatakot na ini bakong imahinasyon sana. Uminabot an panahon na nagin grabe nanggad an kaanggotan ki Jesus kan mga namomoon sa relihion kaya an siisay man na nagpapahayag nin pagtubod sa saiya hinahale bilang miembro kan sinagoga.—Juan 9:22.
10 Sa nagkapirang lugar ngonyan, kun an sarong lalaki nagigin interesadong marhay sa Dios, sa Biblia, o sa relihion, puede siang persegiron kan saiyang mga katrabaho, kaamigo, o paryente. Sa ibang mga lugar, tibaad peligroso pa nganing pag-olayan an pagsalida nin relihion. Nangorognang nagigin depisil an panggigipit nin mga kairiba kun an sarong lalaki naglilingkod sa militar, politika, o lokal na komunidad. Halimbawa, an sarong lalaki sa Alemania nag-admitir: “Totoo an ihinuhulit nindong mga Saksi manongod sa Biblia. Alagad kun magin Saksi ako ngonyan, sa aga aram na iyan kan gabos. Ano an iisipon kan sakong mga katrabaho, kataraed, asin kan mga miembro kan club na kinabibilangan ko asin kan sakong pamilya? Dai ko kakayanon iyan.”
11. Paano tinabangan ni Jesus an saiyang mga disipulo na maatubang an pagkatakot sa tawo?
11 Minsan ngani mayo man nin kobarde sa mga apostol ni Jesus, kinaipuhan ninda gabos na labanan an pagkatakot sa tawo. (Mar. 14:50, 66-72) Paano sinda tinabangan ni Jesus na umoswag sa espirituwal sa ibong nin grabeng panggigipit kan saindang mga kairiba? Guminibo si Jesus nin mga lakdang tanganing andamon an saiyang mga disipulo sa mga pagtumang na mapapaatubang sa sainda. “Paladan kamo kun maogñisan kamo kan magña tauo,” an sabi nia, “asin ipagsikual kamo sa saindang pagiriba, asin pagsopogon kamo, patin itapok an saindong gñaran siring sa maraot, dahel sa Aki nin tauo.” (Luc. 6:22) Pinatanidan ni Jesus an saiyang mga parasunod na maninigo nindang asahan an mga pag-olog-olog. An ano man na pag-olog-olog, “dahel sa Aki nin tauo.” Inasegurar man sinda ni Jesus na susuportaran sinda nin Dios basta nagsasarig sinda sa Saiyang tabang asin kosog. (Luc. 12:4-12) Dugang pa, inagda ni Jesus an mga bagohan na lubos na makiasosyar sa saiyang mga disipulo asin makipagkatood sa sainda.—Mar. 10:29, 30.
12. Sa anong mga paagi matatabangan niato an mga bagohan na madaog an pagkatakot sa tawo?
12 Kaipuhan man niatong tabangan an mga tinotokdoan sa Biblia na madaog an pagkatakot sa tawo. Sa parate, mas madaling atubangon an sarong kadepisilan kun inantisipar na iyan. (Juan 15:19) Halimbawa, taano ta dai tabangan an tinotokdoan sa Biblia na mag-andam nin simple, makatanosan, asin sono sa Kasuratan na mga simbag sa mga hapot asin pagkontra na puedeng palatawon kan saiyang mga katrabaho asin iba pa? Apuera sa sato bilang dayupot niang katood, puede man niato siang ipamidbid sa ibang mga miembro kan kongregasyon, nangorogna sa mga tugang na tibaad may pagkakapareho sa sainda. Orog sa gabos, maninigo niato siang tokdoan na mamibi nin regular asin gikan sa puso. Makakatabang ini sa saiya na magin harani sa Dios saka gibohon si Jehova na saiyang Pailihan asin Gapo.—Basahon an Salmo 94:21-23; Santiago 4:8.
Pakamate nin Kawaran nin Kakayahan
13. Paano an pakamate nin kawaran nin kakayahan nakakaolang sa nagkapira na makikabtang sa espirituwal na mga bagay?
13 An nagkapirang lalaki nag-aalangan na makikabtang sa espirituwal na mga bagay huling sinda maluyang magbasa o dai ikinakapahayag nin malinaw an nasa boot ninda o sinda talagang masusupgon sana. An nagkapirang lalaki nag-aalangan na ipahayag an saindang opinyon o saboot kun nasa publiko. Haros dai ninda maimahinar na sinda kaipuhan mag-adal, magkomento sa Kristianong mga pagtiripon, o magsabi sa iba kan saindang pagtubod. “Kan ako hoben pa,” an sabi nin sarong Kristianong tugang na lalaki, “dali-dali akong minadolok sa pinto, sagin matimbre, asin pasimpleng malakaw parayo, na naglalaom na mayong makadangog o makaheling sa sako. . . . Iniisip ko pa sana an pagharongharong, garo na ako magkakahelang.”
14. Taano ta dai mapaomayan kan mga disipulo ni Jesus an solteritong sinaniban nin demonyo?
14 Isip-isipa an kawaran nin kompiansa na siertong namatean kan mga disipulo ni Jesus kan dai ninda mapaomayan an sarong solteritong sinaniban nin demonyo. Duminolok ki Jesus an ama kan solterito asin nagsabi: “[An sakong aking lalaki] naghehelang nin subisubi, asin nagtitios nin makuri; ta kun gayod napupukan sa kalayo, asin kun gayod sa tubig. Asin dinara ko na sia sa saimong magña discipulo, asin dai sinda nakapaomay saiya.” Pinaluwas ni Jesus an demonyo kaya naomayan an solterito. Paghaloyhaloy duminolok ki Jesus an mga disipulo asin naghapot: “Tadao ta dai kami nakapaluas saiya?” Suminimbag si Jesus: “Huli ta diit an saindong pagtubod: ta sa katotoohan ako nagsasabi saindo, Kun igua kamo nin pagtubod na siring sa sarong pisog nin mostaza, masasabihan nindo ining bukid, Maghale ka digdi pasiring duman; asin iyan mahale; asin dai nin anoman na dai nindo maguiguibo.” (Mat. 17:14-20) Kaipuhan an pagtubod ki Jehova tanganing mapangganahan an garo bukid na mga olang. Ano an mangyayari kun malingawan ini nin saro asin magpoon na magtiwala sa sadiri niang kakayahan? Dai sia magigin mapanggana, asin huli kaiyan sia mawawaran nin kompiansa.
15, 16. Paano niato puedeng matabangan an sarong tinotokdoan sa Biblia na mapangganahan an pakamate nin kawaran nin kakayahan?
15 An sarong marahay na paagi tanganing tabangan an saro na nakikipaglaban sa pakamate nin kawaran nin kakayahan iyo an pagdagka sa saiya na magtiwala ki Jehova imbes na sa sadiri nia. Nagsurat si Pedro: “Magpakumbaba kamo sa irarom kan mapangyaring kamot nin Dios, tagñaning palangkawon kamo nia sa kapanahonan; na ibugtak nindo sa saiya an gabos nindong kahaditan.” (1 Ped. 5:6, 7) Hinahagad kaini na tabangan niato an satong tinotokdoan sa Biblia na makapatalubo nin espirituwalidad. An saro na espirituwal an kaisipan nagpapahalaga nanggad sa espirituwal na mga bagay. Namomotan nia an Tataramon nin Dios asin nagpapaheling kan ‘bunga kan espiritu’ sa saiyang buhay. (Gal. 5:22, 23) Ugale na nia an pagpamibi. (Fil. 4:6, 7) Dugang pa, naglalaom sia sa Dios para sa kinakaipuhan na kosog nin boot asin kakayahan tanganing mapangganang maatubang an ano man na situwasyon o otobon an ano man na asignasyon.—Basahon an 2 Timoteo 1:7, 8.
16 An nagkapirang tinotokdoan sa Biblia tibaad mangaipo man nin praktikal na tabang tanganing mapaoswag an saindang abilidad sa pagbasa, pakikipag-olay, o pagtaram. An iba tibaad makamate na sinda bakong angay na maglingkod sa Dios huli sa saindang maraot na mga ginibo bago ninda namidbid si Jehova. Arin man digdi, an satong mamomoton asin mapasensiang pagtabang tibaad iyo mismo an kaipuhan ninda. “An mga marahay an salud dai nangangaipo nin doktor,” an sabi ni Jesus, “alagad an naghehelang iyo.”—Mat. 9:12, NW.
‘Magdakop’ nin Dakol Pang Lalaki
17, 18. (a) Paano kita makakapagpatotoo sa mas dakol pang lalaki sa satong ministeryo? (b) Ano an sunod niatong pag-aadalan?
17 Minamawot niato na dakol pang lalaki an maghihimate sa nakakakontentong marhay na mensaheng manonompongan sana sa Biblia. (2 Tim. 3:16, 17) Kaya paano kita makakapagpatotoo sa mas dakol pang lalaki sa satong ministeryo? Paagi sa paggamit nin mas dakol na oras sa pagpapatotoo kun banggi, sa mga hapon nin katapusan kan semana, o kun piesta opisyal na dian dakol na lalaki an nasa harong. Kun posible, puede niatong hagadon na makipag-olay sa padre de pamilya. Magpatotoo kita nin impormal sa mga katrabaho niatong lalaki kun angay ini asin hingoahon na pukawon an interes kan bakong kapagtubod na mga agom na lalaki kan satong mga kakongregasyon.
18 Mantang hinuhulitan ta an gabos na nanonompongan niato, magkakaigwa kita nin kompiansa na mahimate an mga may mapag-apresyar na puso. Mapasensia niatong tabangan an gabos na nagpapaheling nin sinserong interes sa katotoohan. Pero paano niato matatabangan an bautisadong mga lalaki sa kongregasyon na umabot nin mga pribilehio asin makualipikar sa mga paninimbagan sa organisasyon nin Dios? Sisimbagon an hapot na ini sa masunod na artikulo.
[Nota sa Ibaba]
^ par. 7 Helingon an mga Yearbook of Jehovah’s Witnesses saka an mga estorya nin buhay na ipinublikar sa An Torrengbantayan asin Awake!
Ano an Isisimbag Nindo?
• Paano matatabangan an mga lalaki na magtao nin prioridad sa espirituwal na mga bagay?
• Paano niato matatabangan an mga bagohan na maatubang an panggigipit nin mga kairiba?
• Ano an puedeng makatabang sa nagkapira na mapangganahan an pakamate nin kawaran nin kakayahan?
[Mga Hapot Para sa Pag-adal]
[Ritrato sa pahina 25]
Naggigibo daw kamo nin mga paagi tanganing makapagpatotoo sa mga lalaki dapit sa maogmang bareta?
[Ritrato sa pahina 26]
Paano nindo aandamon an saindong mga tinotokdoan sa Biblia na atubangon an mga pagbalo?
