Tanganing Magkaigwa nin Buhay Asin Katoninongan, Maglakaw Sono sa Espiritu

‘Dai maglakaw sono sa laman, kundi sono sa espiritu.’—ROMA 8:4.

1, 2. (a) Anong seryosong situwasyon an nagigin resulta kun an saro bakong konsentrado sa pagmaneho? (b) Anong peligro an puedeng magin resulta kun an saro bakong konsentrado sa espirituwal?

“AN PAGMANEHO na bakong konsentrado sarong epidemya asin garo baga naggagrabe kada taon.” Iyan an sinabi kan sekretaryo nin transportasyon kan E.U.A. Kaiba an cell phone sa mga gadyet na nakakadisturbo sa drayber sa sarong bagay na dapat iyo sana an ginigibo nia—an pagmaneho. Labing un-tersio kan mga ininterbio sa sarong surbey an nagsabi na sinda nabangga o dikit pang mabangga nin lunadan na an drayber naggagamit nin cell phone. An paggibo nin iba pang bagay mantang nagmamaneho garo baga kapakipakinabang, alagad puede iyan na magin kapahapahamak.

² Totoo man iyan sa satong espirituwalidad. Kun paanong sa parate dai naheheling nin bakong konsentradong drayber an mga peligro, an saro na bakong konsentrado sa espirituwal madali man mapahamak. Kun totogotan niato an satong sadiri na maparayo sa Kristianong pamumuhay asin teokratikong mga aktibidad, puedeng raoton kaiyan an satong pagtubod. (1 Tim. 1:18, 19) Si Pablo nagpatanid sa mga  kapwa Kristiano sa Roma dapit sa peligrong ini: “An pagisip nin laman iyo an kagadanan; alagad an pagisip kan [espiritu] iyo an buhay asin katoninogñan.” (Roma 8:6) Ano an boot sabihon dian ni Pablo? Paano niato malilikayan na ‘magparaisip dapit sa laman’ asin pagmamaigotan na ‘magparaisip dapit sa espiritu’?

Sinda “Mayo Na nin Silot” o Pagkakondenar

3, 4. (a) Anong paglalaban na naeksperyensiahan mismo ni Pablo an isinurat nia? (b) Taano ta maninigo kitang magin interesado sa situwasyon ni Pablo?

³ Sa surat ni Pablo sa mga taga Roma, sinabi nia an dapit sa paglalaban na naeeksperyensiahan nia mismo—an paglalaban kan laman asin kan isip nia. (Basahon an Roma 7:21-23.) Si Pablo dai man nananarahotan o naheherak sa sadiri nia, na garo baga sia nagagabatan na gayo huli sa kasalan kaya mayo na siang magigibo sa sadiri nia. An totoo, sia maygurang, linahidan nin espiritu, asin pinili na magin “apostol [sa] magña Gentil.” (Roma 1:1; 11:13) Kun siring, taano ta isinurat ni Pablo an manongod sa paglalaban na naeksperyensiahan nia mismo?

⁴ Sadiosan na inako ni Pablo na kun sa sadiri sana nia, dai nia kayang gibohon an kabotan nin Dios sa paagi na talagang gusto nia. An dahelan? “An gabos nagkasala, asin dai nakaabot kan kamurawayan nin Dios,” an sabi nia. (Roma 3:23) Bilang naggikan ki Adan, naeksperyensiahan ni Pablo an mga epekto nin kasalan sa bakong perpektong laman. Nasasabotan niato sia huling kita gabos bakong perpekto asin may kaagid na mga paglalaban na dapat atubangon aroaldaw. Apuera dian, dakol na pandisturbo an puedeng makakua kan atension niato asin ikarayo kita sa “hayakpit [na] dalan na pasiring sa buhay.” (Mat. 7:14) Minsan siring, may paglaom pa an situwasyon ni Pablo, asin iyo man kita.

5. Paano si Pablo nakakua nin tabang asin kaginhawahan?

⁵ Si Pablo nagsurat: “Siisay an makakaagao sako . . . ? Ako nagpapasalamat sa Dios huli ki Jesu-Cristo na satong Kagurangnan.” (Roma 7:24, 25) Dangan, kinaolay nia an mga “yaon ki Cristo Jesus”—an linahidan na mga Kristiano. (Basahon an Roma 8:1, 2.) Paagi sa banal na espiritu ni Jehova, inampon nia sinda bilang mga aki, na inaapod sindang mga “kapua-paramana ni Cristo.” (Roma 8:14-17) Paagi sa espiritu nin Dios, kaiba an pagtubod sa atang na pantubos ni Cristo, nakapanggana sinda sa paglalaban na ilinadawan ni Pablo kaya sinda “mayo na nin silot” o pagkakondenar. Nakatalingkas na sinda “sa katogonan [“ley,” NW] nin kasalan asin nin kagadanan.”

6. Taano ta maninigong tawan nin atension kan gabos na lingkod nin Dios an sinabi ni Pablo?

⁶ Minsan ngani linahidan na mga Kristiano an kaolay ni Pablo, an sinabi nia manongod sa espiritu nin Dios asin atang na pantubos ni Cristo puedeng magtaong pakinabang sa gabos na lingkod ni Jehova, ano man an saindang paglaom. Dawa ngani si Pablo pinasabngan na itao an siring na hatol sa linahidan na mga Kristiano, mahalagang marhay na an gabos na lingkod nin Dios masabotan an isinurat nia asin maghingoang makinabang dian.

Kun Paano nin Dios Kinondenar o ‘Sinilotan an Kasalan sa Laman’

7, 8. (a) Sa anong dahelan masasabi na an Ley “maluya huli kan laman”? (b) Ano an nagibo nin Dios paagi sa espiritu nia asin sa atang na pantubos?

⁷ Sa ika-7 kapitulo kan Roma, inadmitir ni Pablo an kapangyarihan nin kasalan sa bakong perpektong laman. Sa ika-8 kapitulo, nagkomento sia dapit sa kapangyarihan kan banal na espiritu. Ipinaliwanag kan apostol kun paano makakatabang sa mga Kristiano an espiritu nin Dios sa paglaban sa kapangyarihan nin kasalan tanganing makapamuhay sinda kaoyon kan kabotan ni Jehova asin magkamit kan pag-oyon nia. Sinabi ni Pablo na paagi sa espiritu nin Dios asin atang na pantubos kan saiyang Aki, may nagibo an Dios na dai magigibo kan Ley ni Moises.

⁸ Kinondenar kan Ley, na may dakol na togon, an mga parakasala. Apuera dian, an halangkaw na mga saserdote kan Israel na  naglilingkod sa irarom kan Ley bakong perpekto asin dai makakadolot nin supisyenteng atang para sa kasalan. Huli kaini, masasabi na an Ley “maluya huli kan laman.” Alagad paagi sa “[pagsugo] nin Dios kan saiyang sadiring Aki sa kabaing nin laman” asin pagdolot sa saiya bilang pantubos, kinondenar o “sinilotan [nin Dios] an kasalan sa laman,” sa siring nagigibo kaiyan an “dai naguiguibo kan katogonan [“Ley,” NW].” Bilang resulta, an linahidan na mga Kristiano ibinibilang na matanos basado sa pagtubod ninda sa atang na pantubos ni Jesus. Sinasadol sinda na ‘dai maglakaw sono sa laman, kundi sono sa espiritu.’ (Basahon an Roma 8:3, 4.) Sa katunayan, dapat na gibohon ninda iyan na may kaimbodan sagkod sa katapusan kan saindang daganon na buhay tanganing matawan sinda “kan corona nin buhay.”—Kap. 2:10.

9. Ano an boot sabihon kan terminong “ley” na ginamit sa Roma 8:2?

⁹ Apuera sa “Ley,” sinambit ni Pablo an “katogonan [“ley,” NW] kan [espiritung]” iyan asin an “katogonan [“ley,” NW] nin kasalan asin nin kagadanan.” (Roma 8:2) Ano an mga ley na ini? An termino digdi na “ley” dai nanonongod sa nagkapirang reglamento, arog kan mga nasa Ley ni Moises. An sarong reperensia nagsusuherir: “An Griegong termino para sa ley nangangahulogan nin bagay na minagiya sa paggawe nin saro—marahay man o maraot. An termino man na iyan nagtatao nin pamantayan para sa pamumuhay nin saro.”

10. Sa anong paagi kita apektado kan ley nin kasalan asin kagadanan?

¹⁰ Si Pablo nagsurat: “Huli sa sarong tauo an kasalan lominaog sa kinaban, asin an kagadanan huli sa kasalan; asin sa siring an kagadanan nakalakop sa gabos na tauo, huli ta an gabos nagkasala.” (Roma 5:12) Bilang naggikan ki Adan, kita gabos apektado kan ley nin kasalan asin kagadanan. An satong makasalan na laman padagos na nag-iimpluwensia sa sato na gumibo nin mga bagay na ikinakaanggot nin Dios, na kagadanan sana an kaaabtan. Sa surat ni Pablo sa mga taga Galacia, inapod nia an siring na mga gawe asin ugale na “magña guibo nin laman.” Dangan, nagsabi pa sia: “An magña nagguiguibo kan magña bagay na iyan dai magmamana kan kahadean nin Dios.” (Gal. 5:19-21) An arog kaining mga tawo kapareho kan mga naglalakaw sono sa laman. (Roma 8:4) Talagang makalaman an “bagay na minagiya sa paggawe” ninda asin an “pamantayan para sa pamumuhay” ninda. Alagad an mga naggigibo daw nin pakikisaro, idolatriya, espiritismo, o iba pang magagabat na kasalan iyo sana an naglalakaw sono sa laman? Dai, huling kaiba sa mga  gibo nin laman an tibaad para sa nagkapira personal na mga kaluyahan sana, arog kan pag-imon, pagputok nin kaanggotan, pagpasuruhay, asin pagkauri. Siisay an makakasabi na sia biyo nang dai naglalakaw sono sa laman?

11, 12. Ano an ginibong probisyon ni Jehova sa pagtabang sa sato na madaog an ley nin kasalan asin kagadanan, saka ano an dapat tang gibohon tanganing magkaigwa kan pag-oyon nin Dios?

¹¹ Ikinakaogma nanggad niato na pinagin posible ni Jehova na madaog niato an ley nin kasalan asin kagadanan! Si Jesus nagsabi: “An Dios namoot na gayo sa kinaban, na itinao nia an saiyang Aking bogtong, tagñaning an siisay man na minatubod sa saiya dai mapahamak, kundi magkaigua nin buhay na dai nin katapusan.” Paagi sa pag-ako sa pagkamoot nin Dios asin pagtubod sa atang na pantubos ni Jesu-Cristo, puede kitang makatalingkas sa pagkakondenar na resulta kan satong minanang kasalan. (Juan 3:16-18) Kun siring, mapapahiro kita na magsabi, arog ni Pablo: “Ako nagpapasalamat sa Dios huli ki Jesu-Cristo na satong Kagurangnan.”

¹² Kita garo man sana binobolong sa grabeng helang. Kun gusto tang lubos na magrahay, dapat na sunodon niato an ipinapagibo nin doktor. Minsan ngani an pagtubod sa pantubos makakapatalingkas sa sato sa ley nin kasalan asin kagadanan, kita makasalan pa saka bako pang perpekto. Dakol pa an kalabot sa pagkamit nin marahay na espirituwal na salud asin pagkaigwa kan pag-oyon saka bendisyon nin Dios. May koneksion sa pag-otob kan “matanos na kahagadan kan Ley,” sinambit man ni Pablo an dapit sa paglakaw sono sa espiritu.—Roma 8:4, NW.

Maglakaw Sono sa Espiritu—Paano?

13. Ano an kahulogan kan paglakaw sono sa espiritu?

¹³ Kun kita naglalakaw, nag-aabante kita pasiring sa sarong destinasyon o katuyohan. Sa siring, an paglakaw sono sa espiritu nagkakaipo nin dagos-dagos na espirituwal na pag-oswag—bakong espirituwal na pagkaperpekto. (1 Tim. 4:15) Sa aroaldaw asin sa pinakamakakaya niato, kita dapat na magmaigot na maglakaw, o mamuhay, sono sa paggiya kan espiritu. An ‘paglakaw sa espiritu,’ nagreresulta sa pag-oyon nin Dios.—Gal. 5:16.

14. Ano an tendensia kan mga “nabubuhay sono sa laman”?

¹⁴ Sa surat ni Pablo sa mga taga Roma, sunod niang sinambit an duwang klase nin tawo na may magkalaen na kaisipan. (Basahon an Roma 8:5.) Digdi an laman dai man nangangahulogan nin pisikal na hawak. Sa Biblia, an terminong “laman” kun beses nanonongod sa pagigin makasalan asin pagkabakong perpekto kan laman. Ini an dahelan kan paglalaban kan laman asin kan isip na sinambit ni Pablo sa enotan. Minsan siring, bakong arog nia, an  mga “nabubuhay sono sa laman” dai ngani naghihingoang labanan iyan. Imbes na isipon an kahagadan sa sainda nin Dios asin akoon an tabang na itinatao nia, may tendensia sindang “[mag-isip] kan magña bagay na sono sa laman.” Parate sindang nakapokus sa pagpanigo sa saindang makalaman na kaginhawahan asin makasalan na mga pagmawot. Sa kabaliktaran, an tendensia kan mga nabubuhay “sono sa [espiritu]” iyo na ikonsentrar an saindang isip sa “magña bagay na sa [espiritu]”—an espirituwal na mga probisyon asin aktibidad.

15, 16. (a) Paano an pagkonsentrar nin saro sa sarong bagay nakakaapektar sa kaisipan nia? (b) Ano an masasabi niato manongod sa kaisipan nin kadaklan na tawo ngonyan?

¹⁵ Basahon an Roma 8:6. Tanganing magibo an ano man na bagay—marahay man o maraot—dapat na dian nakakonsentrar an isip nin saro. Kun padagos na ikinokonsentrar nin mga tawo an saindang isip sa mga bagay kan laman, dai mahahaloy magkakaigwa sinda nin kaisipan o tendensia na biyong nakapokus sa mga bagay kan laman. Sa parate, an saindang mga saboot, interes, asin hilig biyong magigin okupado nin siring na mga bagay.

¹⁶ Sa anong mga bagay okupado an kadaklan na tawo ngonyan? Si apostol Juan nagsurat: “An gabos na nasa kinaban, an horot nin laman asin an horot nin magña mata patin an kapaabaoabawan nin buhay, bakong sa Ama, kundi sa kinaban.” (1 Juan 2:16) Kalabot digdi an arog kan pakikidorog minsan kiisay, pagkaprominente, asin pagkaigwa nin dakolon na rogaring. Kadakol kaini sa mga libro, magasin, diaryo, pelikula, pasale sa TV, asin Internet huli ta sa pangenot dian nakakonsentrar an isip nin kadaklan na tawo asin iyan talaga an gusto ninda. Minsan siring, “an pagisip nin laman iyo an [“nangangahulogan nin,” NW] kagadanan”—ngonyan, sa espirituwal; sa maabot na panahon, sa pisikal. Taano? “Huli ta an pagisip nin laman tumang sa Dios; huli ta iyan dai minapasakop sa katogonan nin Dios, asin dai [nanggad] mangyayari: Asin an magña nasa laman dai makakapaogma sa Dios.”—Roma 8:7, 8.

17, 18. Paano niato padagos na magigibo an pag-isip kan espiritu, asin ano an magigin resulta kaiyan?

¹⁷ Sa ibong na lado, “an pagisip kan [espiritu] iyo an buhay asin katoninogñan”—na nangangahulogan nin buhay na daing katapusan sa maabot na panahon saka panglaog na katoninongan patin pakipagkatoninongan sa Dios ngonyan. Paano niato padagos na magigibo “an pagisip kan [espiritu]”? Paagi sa regular na pagkonsentrar kan satong isip sa mga bagay kan espiritu asin pagpatalubo nin interes sa espirituwal na mga bagay saka espirituwal na kaisipan. Mantang ginigibo niato ini, nagkakaigwa kita nin kaisipan na “minapasakop sa katogonan nin Dios” asin kaoyon kan saiyang kaisipan. Kun kita mapaatubang sa sugot, dai kita magduduwaduwa kun ano an maninigo tang gibohon. Mapapahiro kitang gumibo nin tamang desisyon—saro na sono sa espiritu.

¹⁸ Kun siring, mahalagang marhay na ikonsentrar an satong isip sa mga bagay kan espiritu. Ginigibo niato ini paagi sa ‘paghagkos kan satong isip’ para sa gibohon, na isinesentro an satong buhay sa espirituwal na rutina, kaiba an regular na pamimibi, pagbasa asin pag-adal kan Biblia, pag-atender sa mga pagtiripon, saka ministeryo. (1 Ped. 1:13) Imbes na madisturbo kan mga bagay kan laman, ikonsentrar niato an satong isip sa mga bagay kan espiritu. Sa siring, kita padagos na malakaw sono sa espiritu. An paggibo kaiyan magtatao sa sato nin mga bendisyon, huli ta an pagparaisip kan espiritu nangangahulogan nin buhay asin katoninongan.—Gal. 6:7, 8.

Ikakapaliwanag daw Nindo?

• Ano an ‘dai nagibo kan katogonan [“Ley,” NW],’ asin paano iyan nagibo nin Dios?

• Ano an “katogonan nin kasalan asin nin kagadanan,” asin paano kita makakatalingkas dian?

• Ano an dapat tang gibohon tanganing mapatalubo “an pagisip kan [espiritu]”?

[Mga Hapot Para sa Pag-adal]

[Mga Ritrato sa pahina 12, 13]

Kamo daw naglalakaw sono sa laman o sono sa espiritu?