An mga Maimbod kan Suanoy—Giniyahan kan Espiritu nin Dios
An mga Maimbod kan Suanoy—Giniyahan kan Espiritu nin Dios
“An Kagurangnan na si Jehova isinobol ako, asin [kan] saiyang espiritu.”—ISA. 48:16.
1, 2. Ano an kaipuhan tanganing makapaheling nin pagtubod, asin anong pagdagka an makukua niato sa pag-adal sa buhay nin mga maimbod kan suanoy?
MINSAN ngani dakol na an nagpaheling nin pagtubod poon pa kan panahon ni Abel, “bakong . . . gabos may pagtubod.” (2 Tes. 3:2) Kaya, taano ta igwa kan kualidad na ini an sarong tawo, asin ano an nakakatabang sa saiya na magin maimbod? Sa dakulang kabtang, an pagtubod kasunod kan mga bagay na nadangog hale sa Tataramon nin Dios. (Roma 10:17) Sarong aspekto iyan kan bunga kan banal na espiritu nin Dios. (Gal. 5:22, 23) Kun siring, tanganing magkaigwa asin makapaheling nin pagtubod, kaipuhan niato an banal na espiritu.
2 Salang isipon na an maimbod na mga lalaki asin babae namundag na igwa na kaiyan, na an pagtubod naturalesa na ninda. An arogan na mga lingkod na nababasa niato sa Biblia mga tawong “may magña pakamate siring sato.” (Sant. 5:17) Sinda nagkaigwa nin mga pagduda, kahaditan, asin kaluyahan alagad ‘pinakosog’ kan espiritu nin Dios tanganing maatubang an mga kadepisilan. (Heb. 11:34) Paagi sa pag-adal kun paano nagpunsionar sa sainda an espiritu ni Jehova, kita ngonyan madadagka na padagos na magin maimbod, sa panahon na ini na sinasalakay an pagtubod niato.
An Espiritu nin Dios Nagtao nin Kapangyarihan ki Moises
3-5. (a) Paano niato naaraman na tinabangan si Moises kan banal na espiritu sa mga paninimbagan nia? (b) Ano an itinotokdo sa sato kan halimbawa ni Moises manongod sa pagtao ni Jehova kan espiritu nia?
3 Sa gabos na tawong nabubuhay kan 1513 B.C.E., si Moises an “kanigoan ka boot [“pinakamahoyo,” NW].” (Bil. 12:3) An mahoyong lingkod na ini pinagkatiwalaan nin dakulaon na paninimbagan sa nasyon nin Israel. An espiritu nin Dios nagtao nin kapangyarihan ki Moises tanganing maghula, maghokom, magsurat, mangenot, asin maggibo nin mga milagro. (Basahon an Isaias 63:11-14.) Pero, may panahon na nagreklamo si Moises na magabaton nanggad an pasan nia. (Bil. 11:14, 15) Kaya, si Jehova ‘nagkua nin espiritu’ ki Moises asin itinao iyan sa 70 iba pa tanganing magin katuwang nia sa pagpasan kan mga gibohon. (Bil. 11:16, 17) An totoo, minsan ngani garo baga magabaton an pasan ni Moises, dai sia nagsosolo sa pagpasan kaiyan—ni an 70 na ninombrahan na magin katuwang nia.
4 Tinawan si Moises nin supisyenteng banal na espiritu para sa gibohon. Pagkatapos na tawan an 70, sia may supisyente pang espiritu na kaipuhan nia. Dai kaiyan kinulang si Moises, asin dai man kaiyan nasobrahan an 70 kamagurangan. Tinatawan man kita ni Jehova nin supisyenteng espiritu na kaipuhan niato, segun sa satong kamugtakan. “Dai nia sinosokol an pagtao [nin espiritu]” kundi sia nagtatao hale “sa saiyang kapanoan.”—Juan 1:16; 3:34.
5 May tinatagalan daw kamong mga pagbalo? Kaipuhan daw nindo nin dakol na panahon huli sa nagdadakol na paninimbagan? Pinagmamaigotan daw nindong itao an espirituwal asin pisikal na pangangaipo kan saindong pamilya mantang inaatubang an nagdadakol na gastos o kahaditan sa salud? May magabat daw kamong mga paninimbagan sa kongregasyon? Makakasierto kamo na paagi sa espiritu nin Dios, puede nia kamong tawan nin kosog na kaipuhan tanganing maatubang an ano man na situwasyon.—Roma 15:13.
Si Bezaleel Pinagin Kualipikado kan Banal na Espiritu
6-8. (a) Ano an nagibo ni Bezaleel asin Aholiab sa tabang kan espiritu nin Dios? (b) Ano an nagpapaheling na sinda giniyahan kan espiritu nin Dios? (c) Taano an eksperyensia ni Bezaleel ta partikularmenteng nakakaparigon sa sato?
6 An eksperyensia kan kakontemporanyo ni Moises na si Bezaleel dakol an ihinahayag dapit sa kun paano nagpupunsionar an espiritu nin Dios. (Basahon an Exodo 35:30-35.) Ninombrahan si Bezaleel tanganing mangenot sa paggibo nin mga kasangkapan na kaipuhan sa tabernakulo. Bago kan dakulang proyektong ini, may aram daw sia sa paggibo kaiyan? Puede, alagad dakula an posibilidad na an huring trabaho nia iyo an paggibo nin mga ladrilyo para sa mga Egipcio. (Ex. 1:13, 14) Kaya, paano magigibo ni Bezaleel an komplikadong trabaho nia? Si Jehova “pinakapano . . . siya kan espiritu nin Dios, sa pakanood, sa kaisipan, asin sa kadonogñan, patin sa anoman na guibo, sa pagisip nin magña katta [“kasangkapan,” NW] . . . sa pakahaman nin anoman na katta na guikan sa kaisipan.” Ano man na natural na abilidad na puedeng igwa si Bezaleel, pinaoswag iyan kan banal na espiritu. Iyo man si Aholiab. Seguradong nagin eksperto sinda, huling dai sana ninda nagibo an saindang trabaho kundi tinokdoan man ninda an iba kun ano an gigibohon. Iyo, ilinaog nin Dios sa puso ninda an pagtokdo.
7 An saro pang patotoo na giniyahan sinda kan espiritu nin Dios iyo an pagigin matagal nanggad kan mga ginibo ninda. Ginagamit pa iyan pakalihis nin mga 500 na taon. (2 Cron. 1:2-6) Bakong arog kan mga paragibo nin kasangkapan ngonyan, dai interesado si Bezaleel asin Aholiab na ilaag sa ginibo ninda an saindang ngaran o tatak. Itinao ninda ki Jehova an gabos na kaomawan huli sa mga nahaman ninda.—Ex. 36:1, 2.
8 Ngonyan, tibaad mapaatubang kita sa masakiton na gibohon na kaipuhan nin espesyal na abilidad, arog baga nin pagtogdok, pag-imprenta, pag-organisar nin mga kombension, pag-asikaso nin ayuda kun may kalamidad, asin pakikikomunikar sa mga doktor saka nagtatrabaho sa ospital manongod sa paninindogan niato na basado sa Kasuratan dapit sa paggamit nin dugo. Kun beses, ginigibo iyan nin mga eksperto, alagad mas parateng ginigibo iyan nin mga boluntaryo na mayong gayong aram sa arog kaiyan na gibohon. Huli sa espiritu nin Dios, nagigin mapanggana an paghihingoa ninda. Nag-aalangan ka daw na akoon an sarong asignasyon sa paglilingkod ki Jehova, huling sa pagmate mo mas kualipikado an iba kisa sa saimo? Girumdomon na mapapaoswag kan espiritu ni Jehova an kaaraman asin kakayahan mo saka tatabangan ka niang maotob an ano man na asignasyon na itinatao nia sa saimo.
Si Josue Nagin Mapanggana sa Tabang kan Espiritu nin Dios
9. Ano an kamugtakan kan mga Israelita pagkahale ninda sa Egipto, asin luminataw an anong hapot?
9 An espiritu nin Dios giniyahan man an sarong kakontemporanyo ni Moises asin Bezaleel. Dai nahaloy pagkahale kan banwaan nin Dios sa Egipto, basta na sana sinda sinalakay kan mga Amalecita. Kan panahon na idto, dapat nang lumaban an mga Israelita. Minsan ngani bako talaga sindang tuod na makipaglaban, kaipuhan nindang gibohon iyan bilang hukbo, asin sa primerong pagkakataon bilang talingkas na banwaan. (Ex. 13:17; 17:8) Kaipuhan nin mangengenot sa pakikipaglaban na iyan. Siisay daw iyan?
10. Taano ta nanggana sa ralaban an mga Israelita na pinangengenotan ni Josue?
10 Si Josue an napili. Alagad, kun kaipuhan niang sabihon an nagin eksperyensia nia sa pagtrabaho tanganing makualipikar sa pangengenot na iyan, ano an sasabihon nia? Oripon na trabahador? Paragibo nin ladrilyo? Namumurot nin manna? Totoo, an lolo ni Josue na si Elisama iyo an namamayo sa tribo ni Ephraim asin minalataw na iyo an nangengenot sa 108,100 na lalaki sa saro sa manolotolong tribo na dibisyon kan Israel. (Bil. 2:18, 24; 1 Cron. 7:26, 27) Pero, si Jehova nagboot paagi ki Moises na bakong si Elisama ni an aki kaining si Nun, kundi si Josue an mangengenot sa hukbo na madaog sa kaiwal. Haros sarong aldaw an ilinawig kan ralaban. Huli sa lubos na pagkuyog asin dakulang pagpahalaga ni Josue sa paggiya kan banal na espiritu nin Dios, nanggana an Israel.—Ex. 17:9-13.
11. Paano kita magigin mapanggana sa sagradong paglilingkod arog ni Josue?
11 Kan huri, si Josue, na ‘pano kan espiritu nin kadonongan,’ an nagin kasalihid ni Moises. (Deut. 34:9) Dai pinangyari kan banal na espiritu na sia makapaghula o makagibo nin mga milagro arog ki Moises, alagad talagang tinabangan kaiyan si Josue na pangenotan an Israel sa militar na pakikipaglaban na duminaog sa Canaan. Ngonyan, tibaad sa pagmate niato kita mayong eksperyensia o bakong gayo kualipikado para sa partikular na mga aspekto kan satong sagradong paglilingkod. Pero, arog ni Josue, sierto an kapangganahan niato kun maingat tang susunodon an instruksion nin Dios.—Jos. 1:7-9.
An Espiritu ni Jehova Nagdatong ki Gedeon
12-14. (a) Ano an ihinahayag kan bagay na kayang daogon kan 300 na lalaki an dakulaon na hukbo nin mga Midianita? (b) Paano ni Jehova pinakosog an boot ni Gedeon? (c) Anong pagsierto hale sa Dios an itinatao sa sato ngonyan?
12 Pagkagadan ni Josue, padagos na ipinaheling ni Jehova kun paano mapapakosog kan kapangyarihan nia an mga maimbod. An libro nin Hokom dakol nin pagkasaysay dapit sa mga tawo na “napakosog hale sa kaluyahan.” (Heb. 11:34) Paagi sa banal na espiritu, pinahiro nin Dios si Gedeon na makilaban para sa banwaan Nia. (Hok. 6:34) Minsan siring, an hukbo na binilog ni Gedeon mas sadit kisa sa hukbo nin mga Midianita, na may proporsion na 1 Israelita sa kada 4 na Midianita. Sa pagheling ni Jehova, dawa an sadit na hukbong iyan nin Israel dakulaon pa nanggad. Duwang beses siang nagboot na inaan ni Gedeon an hukbo kan mga Israelita sagkod na an proporsion magin 1 Israelita sa kada 450 kaiwal. (Hok. 7:2-8; 8:10) Inoyonan ni Jehova an bilang na ini. Kun makamtan kan Israel an pambihirang kapangganahan, siisay an makakapaghambog na idto huli sa paghihingoa o kadonongan nin tawo?
13 Haros andam na si Gedeon asin an tropa nia. Kun kaiba ka sa sadit na tropang iyan, magigin kampante ka daw huling aram mo na hinale na an matatakton asin bakong gayo alistong mga soldados? O medyo matatakot ka daw mantang iniisip mo an puedeng magin resulta? Dai na niato kaipuhan tuodan kun ano an namatean ni Gedeon. Ginibo nia an sinabi sa saiya na dapat gibohon! (Basahon an Hokom 7:9-14.) Dai ni Jehova inanggotan si Gedeon sa paghagad nin tanda bilang patunay na kaibanan nia an Dios. (Hok. 6:36-40) Imbes, pinakosog nia an pagtubod ni Gedeon.
14 Mayong limitasyon an kapangyarihan ni Jehova na magligtas. Kaya niang iligtas an banwaan nia sa ano man na masakit na kamugtakan, na ginigibo pa ngani iyan paagi sa paggamit nin mga tawo na garo baga maluya o mayong kalabanlaban. Kun beses, an pagmate niato tumang sa sato an dakol na tawo o nasa masakit kitang kamugtakan. Dai kita nag-aasa nin milagrosong patotoo arog kan naeksperyensiahan ni Gedeon, alagad makakakua kita nin abundang paggiya asin pagsierto hale sa Tataramon nin Dios saka paagi sa kongregasyon na dinidirehiran nin espiritu. (Roma 8:31, 32) An mamomoton na mga panuga ni Jehova nakakapakosog sa pagtubod niato asin nakakakombensir sa sato na sia talaga an Paratabang sa sato!
“An Espiritu ni Jehova Pominaduman ki Jephte”
15, 16. Taano ta marahay an nagin atitud kan aki ni Jephte, asin paano kaini pinaparigon an boot nin mga magurang?
15 Isip-isipa an saro pang halimbawa. Kan kaipuhan kan mga Israelita na makipaglaban sa mga Ammonita, “pominaduman ki Jephte” an espiritu ni Jehova. Huling gustong-gusto ni Jephte na manggana para sa kaomawan ni Jehova, nanuga sia nin sarong bagay na nagin dakulang sakripisyo para sa saiya. Nanuga sia na kun an Ammon itatao nin Dios sa kamot nia, magigin sadiri ni Jehova an enot na magluwas sa pinto pagpuli nia. Pakabalik nia pagkatapos na madaog an Ammon, duminalagan an aki niang babae tanganing sabaton sia. (Hok. 11:29-31, 34) Ikinabigla daw ini ni Jephte? Posibleng marhay na dai, huling saro sana an aki nia. Inotob nia an saiyang panuga paagi sa pagtao kan aki nia para sa eksklusibong paglilingkod sa santuaryo ni Jehova sa Shiloh. Huling maimbod na parasamba ki Jehova, kombensido an aki ni Jephte na maninigong otobon an ipinanuga kan ama nia. (Basahon an Hokom 11:36.) Tinawan sindang duwa kan espiritu ni Jehova nin kosog na kaipuhan ninda.
16 Paano nagkaigwa nin siring na pagsakripisyo an aki ni Jephte? Mayong duda na napakosog an pagtubod nia mantang namamasdan nia an kaigotan asin diosnon na debosyon kan saiyang ama. Mga magurang, naririparo kan saindong mga aki an halimbawa nindo. Maheheling sa saindong mga desisyon kun baga naniniwala kamo sa sinasabi nindo. Namamasdan kan mga aki nindo an saindong odok sa pusong pamimibi, epektibong pagtotokdo, asin halimbawa sa kun ano an boot sabihon kan paglilingkod ki Jehova na may bilog na puso. Huli kaiyan, posibleng marhay na makapatalubo sinda nin makosog na pagmawot na maglingkod ki Jehova. Sarong dahelan ini na maggayagaya.
“An Espiritu ni Jehova Naghiro” ki Samson
17. Ano an ginibo ni Samson paagi sa espiritu nin Dios?
17 Isip-isipa an saro pang halimbawa. Kan an Israel bihagon kan mga Filisteo, “an espiritu ni Jehova nagpoon” na pahiroon si Samson tanganing kaldahon sinda. (Hok. 13:24, 25) Tinawan si Samson nin kapangyarihan tanganing magibo ini na igwa nin kosog na makangangalas asin daing kaagid. Kan kombensiron kan mga Filisteo an mga kapwa Israelita ni Samson na bihagon sia, “an espiritu ni Jehova naghiro sa saiya, asin an mga pisi na nakagapos sa saiyang mga takyag nagin garo mga tursidong lino na nasulo sa kalayo, kaya an mga ramal sa saiya natunaw sa mga kamot nia.” (Hok. 15:14, NW) Dawa kaidtong sia maluya sa pisikal huli sa salang desisyon, tinawan si Samson nin kapangyarihan “huli sa pagtubod.” (Heb. 11:32-34; Hok. 16:18-21, 28-30) An espiritu ni Jehova nagpunsionar ki Samson sa daing kaagid na paagi huli sa pambihirang mga kamugtakan. Sagkod ngonyan, nakakapakosog na marhay sa sato an makasaysayan na mga pangyayaring ini. Taano man?
18, 19. (a) Ano an sinisierto sa sato kan eksperyensia ni Samson? (b) Paano ka nakinabang sa pag-estudyar sa halimbawa kan maimbod na mga lingkod sa artikulong ini?
18 Arog ni Samson, nagsasarig kita sa iyo man sanang banal na espiritu. Ginigibo niato iyan mantang inootob niato an gibohon na itinao ni Jesus sa mga parasunod nia, an “maghulit sa magña tauo, asin magpatotoo.” (Gui. 10:42) Kaipuhan sa asignasyon na ini an abilidad na puedeng bakong naturalesa niato. Nagpapasalamat nanggad kita na ginagamit ni Jehova an espiritu nia tanganing tabangan kitang mahaman an dakol asin laen-laen na gibohon na ipinagkakatiwala sa sato! Huli kaini, mantang inootob niato an sugo sa sato, makakasabi kita arog ki propeta Isaias: “An Kagurangnan na si Jehova isinobol ako, asin [kan] saiyang espiritu.” (Isa. 48:16) Iyo, an espiritu nin Dios an nagsusugo sa sato! Itinatao niato an satong bilog na puso sa gibohon huling nakakasierto kita na papaoswagon ni Jehova an satong pagigin kualipikado arog ni Moises, Bezaleel, asin Josue. Ginagamit niato “an minasbad nin [espiritu], na iyo an tataramon nin Dios,” huling may kompiansa kita na tatawan nia kita nin kosog arog ni Gedeon, Jephte, asin Samson. (Efe. 6:17, 18) Paagi sa pagtitiwala ki Jehova na tatabangan nia kitang mapangganahan an mga olang, puede kitang magin makosog sa espirituwal kun paanong si Samson nagin man makosog sa pisikal.
19 Malinaw nanggad na binebendisyonan ni Jehova an mga daing takot na naninindogan para sa tunay na pagsamba. Mantang minahiro kita oyon sa pagpunsionar kan banal na espiritu nin Dios, nagkokosog man an satong pagtubod. Kun siring, kawiliwili man na repasohon an nagkapira sa nakakaogmang mga pangyayari na yaon sa Kristianong Griegong Kasuratan. Ihahayag kaiyan kun paano nagpunsionar an espiritu ni Jehova sa maimbod na mga lingkod nia kan enot na siglo, bago asin pagkatapos kan Pentecostes 33 C.E. Pag-oolayan an mga pagkasaysay na ini sa sunod na artikulo.
Taano ta napapakosog kamong maaraman kun paano an espiritu nin Dios nagpunsionar ki . . .
• Moises?
• Bezaleel?
• Josue?
• Gedeon?
• Jephte?
• Samson?
[Mga Hapot Para sa Pag-adal]
[Blurb sa pahina 22]
Paagi sa espiritu nin Dios, puede kitang magin makosog sa espirituwal kun paanong si Samson nagin man makosog sa pisikal
[Ritrato sa pahina 21]
Mga magurang, an saindong halimbawa nin kaigotan mahalaga para sa mga aki nindo
