Dai Magtogot na Mawaran Ka nin Kagayagayahan Huli sa Helang

IMAHINARA na pagmata mo, minamawot mong matapos na tolos an aldaw. Kaipuhan mo na naman na tagalan sa bilog na aldaw an pisikal o emosyonal na kolog. Tibaad namamatean mo pa ngani an arog kan ki Job, na nagsabi: “Kaya pinili kan sakong kalag . . . an kagadanan, kisa mga kakulgan kong ini.” (Job 7:​15, An Banal na Biblia) Paano kun an siring na kamugtakan nagdadanay pa ngani nin dakol na taon?

Iyan an kamugtakan ni Mephi-boseth, an aki kan katood ni Hadeng David na si Jonatan. Kan singko anyos si Mephi-boseth, sia ‘nahulog asin napilay.’ (2 Sam. 4:4) An kolog na namamatean nia huli sa pagkabaldado siertong nag-orog huli sa emosyonal na kasakitan kan, pag-abot nin panahon, sia putik na inakusaran nin pagtraydor sa hade dangan nawaran nin materyal na mga bagay. Pero, sia pirmeng nagpaheling nin marahayon na halimbawa sa pagtagal sa kamatean, pagpakaraot, asin pagkadesganar, na dai nagtogot na mawara an kagayagayahan nia huli kaiyan.​—2 Sam. 9:​6-10; 16:​1-4; 19:​24-30.

An saro pang halimbawa iyo si Pablo. Sarong beses, sia nagsurat dapit sa “sarong tonok sa laman” na kaipuhan niang labanan. (2 Cor. 12:7) An tunok na sinambit nia tibaad sarong haloy nang kamatean, o iyan posibleng an mga tawong kinukuestion an pagkaapostol nia. Ano man an nagin problema nia, iyan nagdanay asin kaipuhan niang atubangon an pisikal o emosyonal na kolog na resulta kaiyan.​—2 Cor. 12:​9, 10.

Nasasakitan an nagkapirang lingkod ni Jehova ngonyan huli sa nagpapaluya asin nagdadanay na mga helang o tension sa emosyon. Sa edad na 18, si Magdalena na-diagnose na may systemic lupus erythematosus, sarong helang na an sistema nin paglaban kan hawak sa helang (immune system) rinaraot an sadiri kaining mga organo. “Grabe an takot ko,” an sabi nia. “Sa paglihis nin panahon, naggrabe an kamugtakan ko asin nagin seryoso huli sa darakulang sangaw (mouth ulcer), saka problema sa panunaw asin halanuhan.” Iba man an situwasyon ni Izabela, kaipuhan niang tioson an mga kamugtakan na daing gayo naririsa. Sia nagsabi: “Poon sa pagkaaki, may depresyon na ako. Nagresulta ini sa makuring takot (panic attack), masakit na paghangos, asin grabeng kolog nin tulak. Parate akong nakakamate nin kapagalan.”

Pag-ako sa mga Limitasyon

Puede kang magin mamondo huli sa helang asin kamatean. Kun mangyari iyan, makakatabang an pagtukaw tanganing onestong siyasaton an kamugtakan mo. Tibaad bakong pasil an pag-ako sa mga limitasyon mo. Si Magdalena nagsabi: “Naggagrabe an helang ko. Sa parate, nangluluya akong gayo kaya dai ako makabangon. Depisilon para sa sako an pagplano nin mga bagay-bagay huling dai ko aram kun noarin maatake an helang ko. An pinakanakakadesganar sa sako iyo na dai ko na kayang gibohon an arog kadakol kan nagigibo ko kaidto sa paglilingkod ki Jehova.

Si Zbigniew nagsabi: “Mantang nag-aagi an mga taon, nagluluya ako huli sa rheumatoid arthritis asin saro-saro kaining rinaraot an  mga pagsokmolan ko. Kun grabe an paggatok, dai ko nahihimo dawa an pinakasimpleng mga gibohon. Huli kaiyan, nangluluyang gayo an boot ko.”

Nagkapirang taon na an nakaagi, si Barbara na-diagnose na may naggagrabeng tumor sa hotok. “May biglang mga pagbabago sa hawak ko,” an sabi nia. “Mabublay ako, pirmeng makolog an payo, asin nadedepisilan magkonsentrar. Huli sa bagong mga limitasyon, kaipuhan kong siyasaton giraray an gabos na bagay.”

Gabos sinda nagdusay na lingkod ni Jehova. Para sa sainda, prioridad an paggibo kan kabotan nia. Sinda lubos na nagtitiwala sa Dios asin nakikinabang sa suporta nia.​—Tal. 3:​5, 6.

Si Jehova Nagtatabang​—Paano?

Dai niato maninigong isipon na an helang niato ebidensia kan kaanggotan nin Dios. (Lam. 3:33) Isip-isipa an kaipuhan na agihan ni Job dawa sia “daing katuyawan asin tanos.” (Job 1:​8, NW) Dai binabalo nin Dios an siisay man paagi sa maraot na mga bagay. (Sant. 1:13) An gabos na helang​—kaiba na an nagdadanay asin may koneksion sa emosyon​—makamomondong pamana kan enot tang mga magurang, si Adan asin Eva.​—Roma 5:12.

Minsan siring, an mga matanos tatabangan nanggad ni Jehova asin ni Jesus. (Sal. 34:15) Nangorogna sa masakit na mga panahon sa satong buhay, minimidbid niato na an Dios iyo an ‘satong sinasarigan asin paalawan.’ (Sal. 91:2) Sa siring, kun napapaatubang sa masakit na mga kamugtakan, ano an makakatabang sa saimo na mapagdanay an kagayagayahan?

Pamibi: Arog kan maimbod na mga lingkod nin Dios kan suanoy na panahon, puede mong ipasa an saimong pasan sa satong langitnon na Ama paagi sa pamibi. (Sal. 55:22) Sa paggibo kaiyan, maeeksperyensiahan mo “an katoninogñan nin Dios, na minalampas sa gabos na pakasabot.” An panglaog na katoninongan na iyan an ‘maingat kan saimong puso asin kan saimong pag-isip.’ (Fil. 4:​6, 7) Huli sa pagsarig sa Dios paagi sa pamimibi, natatagalan ni Magdalena an helang na nagpapaluya sa saiya. Sia nagsabi: “An biyong pagpahayag ki Jehova kan nasa puso ko nakakapaginhawa asin nakakapagayagaya giraray sa sako. Ngonyan, talagang nasasabotan ko na an kahulogan nin pagsarig sa Dios aroaldaw.”​—2 Cor. 1:​3, 4.

 Bilang simbag ni Jehova sa mga pamibi nindo, puede nia kamong tawan nin kosog paagi sa saiyang banal na espiritu asin Tataramon saka Kristianong kasararoan nin magturugang. Dai mo lalaoman na milagrosong hahaleon nin Dios an kamatean mo. Pero, makakaasa ka na tatawan ka nia nin kadonongan asin kosog na kaipuhan tanganing matagalan an lambang kasakitan. (Tal. 2:7) Puede ka niang pakosogon paagi sa pagtao sa saimo kan “puersa na labi sa ordinaryo.”​—2 Cor. 4:​7, NW.

Pamilya: An mamomoton asin mapagmalasakit na kapamilya makakatabang sa saimo na tagalan an helang. Pero, girumdomon na nagsasakit man an mga mahal mo sa buhay. Arog mo, puedeng namamatean man ninda na mayo sindang maginibo. Sa ibong kaiyan, yaon sinda para sa saimo, dawa sa masakit na mga panahon. An iribang pamimibi makakatabang sa saimo na mapagdanay an kalmadong puso.​—Tal. 14:30.

Si Barbara nagsabi mapadapit sa aki niang babae asin sa iba pang hoben na Kristiana sa kongregasyon: “Sinusuportaran ninda ako sa ministeryo. An kaigotan ninda nagpapaogma sa sako.” Mahalagang marhay ki Zbigniew an suporta kan agom nia. “Sia an nag-aasikaso kan kadaklan sa mga gibohon sa harong. Tinatabangan man nia akong magsangli asin parateng dinadara an bag ko pasiring sa mga pagtiripon asin ministeryo.”

Mga kapagtubod: Kun sinda kaiba niato, kita napaparigon asin nararanga. Alagad, paano kun dai ka nakakaatender sa mga pagtiripon huli sa helang? Si Magdalena nagsabi: “Sinesegurado kan kongregasyon na nakikinabang ako sa mga pagtiripon paagi sa audio recording. An mga tugang parateng nag-aapod sa sako sa telepono tanganing aramon kun ano pa an ikakatabang ninda. Pinapadarahan man ninda ako nin nakakaparigon sa boot na mga surat. An bagay na ginigirumdom ninda ako asin nagmamakolog sinda para sa ikakarahay ko nakakatabang sa sako na makatagal.”

Si Izabela, na may depresyon, nagsaysay: “Sa laog kan kongregasyon, dakol akong ‘ama’ asin ‘ina,’ na naghihinanyog asin nagmamaigot na masabotan ako. An kongregasyon an pamilya ko​—dian ko naeeksperyensiahan an katoninongan asin kagayagayahan.”

Marahay na likayan kan mga nag-aagi nin manlaenlaen na pagbalo na ‘isuway an sadiri.’ Imbes, pinapahalagahan ninda an pakikiasosyar sa  kongregasyon. (Tal. 18:​1, NW) Sa siring, sinda nagigin dakulang gikanan nin pamparigon sa boot para sa iba. Sa primero, tibaad mag-alangan kang ipaaram sa mga tugang an mga pangangaipo mo. Pero, kun ika magigin prangka, papahalagahan iyan kan mga kapagtubod mo. Magtatao ini sa sainda nin oportunidad na ipaheling an “daing pagmalemale [‘bakong ipokrito,’ NW] na pagkamoot.” (1 Ped. 1:22) Taano ta dai ipaaram sa sainda na kaipuhan mo nin malulunadan pasiring sa pagtiripon, na gusto mo sindang makaibanan sa ministeryo, o na boot mong makaolay sinda nin personal? Siempre, dai kita maninigong magin mapaghanap kundi magin mapag-apresyar sa tabang ninda.

Magin positibo: Sa parate, nakadepende na sa saimo kun paano matatagalan an nagdadanay na helang na dai man nawawara an kagayagayahan. An kawaran nin paglaom asin grabeng kamondoan puedeng magresulta sa negatibong kaisipan. An Biblia nagsasabi: “An boot kan tauo magtitios kan saiyang helang: tara, Siisay an magpapasan kan nasasakitan na boot?”​—Tal. 18:14.

Si Magdalena nagsabi: “Hinihingoa ko nanggad na likayan na magpokus sa mga problema ko. Pinagmamaigotan kong magin maogma sa mga aldaw na mas marahay an pagmate ko. Napaparigon an boot ko sa pagbasa nin mga estorya dapit sa mga nakakapagpadanay nin kaimbodan dawa nagdadanay an helang.” Napapakosog si Izabela kun iniisip nia na namomotan asin pinapahalagahan sia ni Jehova. Sia nagsabi: “Namamatean kong mahalaga ako, asin may dahelan ako na mabuhay para sa saiya. Igwa man ako nin pambihirang paglaom sa maabot na panahon.”

Si Zbigniew nagsabi: “Huli sa sakong helang, nanodan ko an pagigin mapakumbaba asin makinuyog. Nanodan ko man na magpaheling nin pakasabot asin marahay na paghusgar saka magpatawad nin gikan sa puso. Nanodan kong ikaogma an paglilingkod ki Jehova na dai naheherak sa sadiri. Sa katunayan, namotibar akong padagos na umoswag sa espirituwal.”

Girumdomon na maingat na inoobserbaran ni Jehova an pagtagal mo. Nagmamalasakit asin nagmamakolog sia sa saimo. Dai nia ‘lilingawan an saimong gibo asin an pagkamoot na ipinahayag mo sa saiyang ngaran.’ (Heb. 6:10) Isapuso an panuga nia sa gabos na may pagkatakot sa saiya: “Sa anoman na paagui, dai ako mapasudia sa saimo, dai taka man sa anoman na paagui pababayaan.”​—Heb. 13:5.

Kun may beses na nangluluya an boot mo, magpokus sa pambihirang paglaom na mabuhay sa bagong kinaban. Marikas nang nagdadangadang an panahon na maheheling mo mismo sa daga an mga bendisyon kan Kahadean nin Dios!

[Kahon/Mga Ritrato sa pahina 28, 29]

Padagos Sindang Naghuhulit Dawa May Nagdadanay na Helang

“Dai ko na kayang maglakaw nin solo, kaya iniibanan ako sa ministeryo kan agom ko o nin iba pang mga tugang. Nagtutuom ako nin mga presentasyon asin teksto sa Biblia.”​—Jerzy, may diperensia sa pagheling.

“Apuera sa pagpapatotoo paagi sa telepono, nagsusurat ako asin regular na nakikipagsuratan sa nagkapirang interesado. Mantang nasa ospital, pirme kong ibinubugtak sa kataed kan higdaan ko an Biblia asin mga publikasyon. Nakakatabang iyan sa sako na makapoon nin dakol na marahay na pakikipag-olay.”​—Magdalena, na-diagnose na may “systemic lupus erythematosus.”

“Gusto ko an ministeryong pagharongharong, alagad kun bakong marahay an pagmate ko, nagpapatotoo ako paagi sa telepono.”​—Izabela, may “clinical depression.”

“Ikinakaogma ko an pagdalaw liwat asin an pagtabang sa mga tinotokdoan sa Biblia. Sa mga aldaw na mas marahay an pagmate ko, gusto kong magharongharong.”​—Barbara, may tumor sa hotok.

“Nagdadara sana ako nin magianon na bag para sa mga magasin. Nagluluwas ako sa langtad sagkod na kaya ko dawa nagkokolog an mga pagsokmolan ko.”​—Zbigniew, may “rheumatoid arthritis.”

[Ritrato sa pahina 30]

Ano man an edad nin mga tawo, puede sindang magin gikanan nin pamparigon sa boot