Ginigiyahan kan Espiritu nin Dios kan Enot na Siglo Asin Ngonyan

“Ini gabos guiniguibo kan iyo man sanang [espiritu].”​—1 COR. 12:11.

1. Anong mga punto an pag-oolayan niato sa artikulong ini?

PENTECOSTES. Nakakaogmang mga pangyayari nanggad an nagigirumdoman niato sa sarong terminong iyan! (Gui. 2:​1-4) An pagbubo kan banal na espiritu sa okasyon na iyan kan enot na siglo nagin importanteng pagbabago sa pagtratar nin Dios sa mga lingkod nia. Sa sinundan na artikulo, pinag-olayan niato an nagkapira sa mga paagi na tinabangan kan espiritu nin Dios an mga maimbod kan suanoy tanganing magibo an depisil asin detalyadong mga asignasyon. Alagad, ano an pagkakalaen kan paagi nin pagpunsionar kan espiritu nin Dios kan enot na siglo asin kan mga panahon bago kan mga Kristiano? Asin paano nakikinabang an mga Kristiano sa pagpunsionar ngonyan kan banal na espiritu nin Dios? Helingon niato.

“Uya, an Oripon nin Kagurangnan”

2. Paano naeksperyensiahan ni Maria an epekto kan banal na espiritu?

² Yaon si Maria sa dakulang kuarto sa itaas, na nasa Jerusalem, kan ibubo an ipinanugang banal na espiritu. (Gui. 1:​13, 14) Pero labing tolong dekada bago kaiyan, naeksperyensiahan na nia an  pambihirang mga epekto kan espiritu ni Jehova. Ibinalyo ni Jehova an buhay kan Aki nia hale sa langit pasiring sa daga, na nagpangyaring mangidam si Maria dawa birhen pa. An sarong iyan ipinangidam nia “paagi sa banal na espiritu.”​—Mat. 1:​20, NW.

3, 4. Anong atitud an ipinaheling ni Maria, asin paano niato sia puedeng arogon?

³ Taano ta si Maria an tinawan kan daing kaagid na pribilehiong iyan? Pagkatapos na ipaliwanag kan anghel an kabotan ni Jehova mapadapit ki Maria, sia nagsabi: “Uya, an oripon nin Kagurangnan; mangyari sa sako siring sa saimong tataramon.” (Luc. 1:38) Sa sinabing iyan ni Maria, ihinayag nia an nasa puso nia, na naheling na nin Dios. An pagsimbag tolos nia nagpaparisa na andam niang akoon an kabotan nin Dios dapit sa bagay na iyan. Dai sia naghapot nin ano man manongod sa kun ano an magigin pagmansay kan mga nasa komunidad dapit sa pagbados nia o kun ano an posibleng magin epekto kaini sa relasyon nia sa katrato niang pakasalan. Paagi sa pagsabi ni Maria na sia an pinakahamak sa mga lingkod, ipinaheling nia na lubos siang nagtitiwala ki Jehova bilang Kagurangnan nia.

⁴ Kun beses, namamatean mo daw na medyo nagagabatan ka huli sa mga kadepisilan o paninimbagan sa paglilingkod sa Dios? Marahay na hapoton kan lambang saro sa sato an satong sadiri: ‘Lubos daw akong nagtitiwala na aasikasohon ni Jehova an mga bagay-bagay kaoyon kan kabotan nia? Talaga daw na ipinapaheling ko na andam akong kumuyog?’ Makakasierto ka na itinatao nin Dios an espiritu nia sa mga nagtitiwala sa saiya nin bilog na puso asin minimidbid an kabotan nia bilang Soberano.​—Gui. 5:32.

Tinabangan si Pedro kan Banal na Espiritu

5. Sa anong mga paagi naeksperyensiahan ni Pedro an pagpunsionar kan banal na espiritu bago Pentecostes 33 C.E.?

⁵ Arog ni Maria, personal na naeksperyensiahan ni Pedro an makapangyarihan na pagpunsionar kan banal na espiritu nin Dios bago Pentecostes 33 C.E. Sia asin an iba pang apostol tinawan ni Jesus nin autoridad na palayason an mga demonyo. (Mar. 3:​14-16) Asin minsan ngani an Kasuratan dai nagtatao nin dakol na detalye, posibleng marhay na ginamit ni Pedro an autoridad na iyan. Naheling man an kapangyarihan nin Dios kan kuyogon ni Pedro an pangagda ni Jesus na lumakaw pasiring sa saiya sa ibabaw kan Dagat nin Galilea. (Basahon an Mateo 14:​25-29.) Malinaw na nagsarig si Pedro na tatabangan sia kan banal na espiritu na magibo an pambihirang mga bagay. Dai mahahaloy, an espiritung iyan matabang ki Pedro asin sa mga kapwa disipulo na makagibo nin iba pang bagay.

6. Paagi sa espiritu nin Dios, ano an nagibo ni Pedro durante asin pagkatapos kan Pentecostes 33 C.E.?

⁶ Sa Kapiestahan nin Pentecostes 33 C.E., tinawan si Pedro asin an iba pa nin milagrosong kakayahan na makikomunikar gamit an mga lenguahe kan mga nagbibisita sa Jerusalem. Pagkatapos kaiyan, nangenot si Pedro sa pakikipag-olay sa mga nagkakatiripon duman. (Gui. 2:​14-36) Iyo, an tawong ini na kun beses pusokpusokan o matatakton tinawan nin kosog nin boot tanganing makapagpatotoo nin daing takot sa ibong nin mga huma asin persekusyon. (Gui. 4:​18-20, 31) Nagkaigwa sia nin kaaraman paagi sa kapahayagan nin Dios. (Gui. 5:​8, 9) Asin tinawan pa ngani sia nin kapangyarihan na bumuhay liwat.​—Gui. 9:40.

7. Anong katokdoan ni Jesus an nagin malinaw sana para ki Pedro pagkatapos na sia lahidan?

⁷ Dawa bago kan Pentecostes, nasabotan ni Pedro an dakol na katotoohan na itinokdo ni Jesus. (Mat. 16:​16, 17; Juan 6:68) Alagad may mga aspekto kan katokdoan ni Jesus na bakong malinaw para sa saiya bago kan Pentecostes. Halimbawa, dai nasabotan ni Pedro na sa ikatolong aldaw bubuhayon liwat si Cristo bilang espiritu; dai man nia nasabotan na an Kahadean mamumugtak sa langit. (Juan 20:​6-10; Gui. 1:6) Dai man nia nasabotan na may mga tawong magigin espiritung linalang asin mamamahala sa langitnon na Kahadean. Kan sia bautismohan sa banal na espiritu asin tawan nin langitnon na paglaom, nasabotan nia an kahulogan kan katokdoan ni Jesus manongod sa mga puntong iyan.

8. Anong kaaraman an itinatao sa mga linahidan saka “ibang magña carnero”?

⁸ An dating dai nasasabotan kan mga disipulo  ni Jesus nasabotan sana pagkabubo sa sainda nin banal na espiritu. Paagi sa pagpasabong, ipinaliwanag kan mga kagsurat kan Kristianong Griegong Kasuratan​—para sa kapakinabangan niato​—an makangangalas na mga aspekto kan katuyohan ni Jehova. (Efe. 3:​8-11, 18) Ngonyan, an mga linahidan nin espiritu saka an mga kabilang sa “ibang magña carnero” magkairibang nagkakakan sa espirituwal, na nasasabotan an iyo man sanang mga katotoohan. (Juan 10:16) Pinapahalagahan daw nindo an kaaraman asin pakasabot sa Tataramon nin Dios na itinatao sa saindo sa tabang kan banal na espiritu?

Si Pablo “Napano nin Banal na Espiritu”

9. Ano an nagibo ni Pablo paagi sa banal na espiritu?

⁹ Mga sarong taon pagkatapos kan Pentecostes 33 C.E., may saro pang tinawan kan balaog nin Dios na banal na espiritu. Sia si Saulo, na inapod na Pablo. Tinabangan sia kan espiritu sa mga paagi na nakikinabang kita ngonyan. Pinasabngan sia sa pagsurat kan 14 libro sa Biblia. Asin arog ni Pedro, tinabangan sia kan espiritu nin Dios na masabotan asin ikasurat nin malinaw an manongod sa paglaom na imortalidad asin pagkadai nalalapa sa kalangitan. Paagi kaiyan, sia nagpaomay nin mga may helang, nagpalayas nin mga demonyo, asin nagbuhay pa ngani nin mga gadan! Minsan siring, an kapangyarihan na itinatao paagi kaiyan may mas mahalagang katuyohan, na naeeksperyensiahan kan gabos na lingkod nin Dios ngonyan, minsan ngani bakong paagi sa milagro.

10. Ano an nagin epekto kan banal na espiritu sa kakayahan ni Pablo na magtaram?

¹⁰ Si Pablo, na “napano nin banal na espiritu,” (NW) daing takot na nagtaram tumang sa sarong pararatak. Dakula nanggad an nagin epekto kaiyan sa pangenot na administrador sa Chipre, na naghihinanyog sa bilog na pag-oolay! Inako kan prokonsul na iyan an katotoohan, huli ta sia ‘nagngalas sa katokdoan nin Kagurangnan.’ (Gui. 13:​8-12) Malinaw nanggad na aram na marhay ni Pablo an halaga kan banal na espiritu nin Dios kun dapit sa pagtaram kan katotoohan. (Mat. 10:20) Kan huri, nakimaherak sia sa kongregasyon sa Efeso na ipamibi sia na may pagngayongayo na tawan sia kan kakayahan na iyan na ‘magtaram.’​—Efe. 6:​18-20.

11. Paano si Pablo giniyahan kan espiritu nin Dios?

¹¹ Si Pablo dai sana tinabangan kan banal na espiritu na magtaram kundi, kun beses, binawalan man na magtaram sa nagkapirang lugar. Sa pagpoon kan pagmimisyonero nia, giniyahan sia kaiyan. (Gui. 13:2; basahon an Guibo 16:​6-10.) An paghuhulit ginigiyahan pa man giraray ni Jehova paagi sa espiritu nia. Arog ni Pablo, an gabos na makinuyog na lingkod ni Jehova naghihingoang marhay na ipahayag an katotoohan nin maigot asin daing takot. Dawa ngani an pagdirehir nin Dios ngonyan bakong arog karisa kan panahon ni Pablo, makakasierto kita na ginagamit ni Jehova an banal na espiritu tanganing seguradohon na an mga maninigo makakadangog kan katotoohan.​—Juan 6:44.

“Manlaenlaen na Pagguibo”

12-14. An espiritu daw nin Dios nagpupunsionar sa saro sanang paagi sa gabos na lingkod nia? Ipaliwanag.

¹² An mga pagkasaysay daw dapit sa bendisyon ni Jehova sa enot na siglong kongregasyon kan mga linahidan nagtatao nin dakulang pamparigon sa nagdusay na mga lingkod nin Dios ngonyan? Iyo nanggad! Tandaan an ipinasabong na mga tataramon ni Pablo sa kongregasyon sa Corinto mapadapit sa milagrosong mga balaog kan  espiritu kan panahon nia: “Igua nin manlaenlaen na balaog, alagad saro sanang [espiritu]. Asin igua nin manlaenlaen na paglingkod, alagad saro sanang Kagurangnan. Asin igua nin manlaenlaen na pagguibo, alagad saro sanang Dios, na nagguiguibo kan gabos na bagay sa gabos.” (1 Cor. 12:​4-6, 11) Iyo, an banal na espiritu puedeng magpunsionar sa manlaenlaen na paagi sa manlaenlaen na mga lingkod nin Dios para sa sarong katuyohan. Tunay nanggad na itinatao iyan sa “sadit na aripompon” ni Cristo saka sa “ibang magña carnero” nia. (Luc. 12:​32, NW; Juan 10:16) Pero, dai iyan pirmeng nagpupunsionar sa saro sanang paagi sa kada miembro kan kongregasyon.

¹³ Halimbawa, an kamagurangan ninonombrahan kan banal na espiritu. (Gui. 20:28) Alagad bakong gabos na linahidan kaiyan paraataman sa kongregasyon. Ano an puede tang ikongklusyon digdi? Sa simpleng pagtaram, an espiritu nin Dios nagpupunsionar sa manlaenlaen na paagi sa mga miembro kan kongregasyon.

¹⁴ An espiritu na nagsisierto sa mga linahidan na sinda may “espiritu nin pagpaniakia,” o na inampon sinda, iyo man an espiritung ginamit ni Jehova sa pagbuhay sa saiyang bugtong na Aki hale sa mga gadan pasiring sa imortal na buhay sa langit. (Basahon an Roma 8:​11, 15.) Iyan man an ginamit ni Jehova tanganing lalangon an bilog na uniberso. (Gen. 1:​1-3) Paagi sa iyo man sanang banal na espiritu, pinagin kualipikado ni Jehova si Bezaleel para sa espesyal na gibohon sa tabernakulo, tinawan nia si Samson nin kapangyarihan tanganing magibo an mga bagay na nangangaipo nin pambihirang kosog, asin pinangyari niang makalakaw si Pedro sa tubig. Kun siring, dai niato dapat saboton na pareho an pagkaigwa kan espiritu nin Dios asin an pagigin linahidan kan espiritu nin Dios, huling an huring nasambit saro sanang espesyal na pagpunsionar kan espiritu. An paglahid nin espiritu nakadepende sa pagpili nin Dios.

15. An bautismo daw sa banal na espiritu magpapadagos sagkod sa panahon na daing talaan? Ipaliwanag.

¹⁵ An banal na aktibong puersa nin Dios nagpupunsionar na sa manlaenlaen na paagi sa maimbod na mga lingkod nia poon pa kaidtong nagkaigwa sia nin maimbod na mga lingkod, iyo, rinibong taon bago pa magpoon an paglahid nin espiritu. Nagpoon an bagong pagpunsionar na iyan kan Pentecostes 33 C.E., alagad dai iyan magpapadagos sagkod lamang. Matatapos an bautismo sa espiritu, alagad an banal na espiritu padagos na magpupunsionar sa banwaan nin Dios tanganing magibo ninda an saiyang kabotan sa bilog na panahon na daing sagkod.

16. Ano an ginigibo ngonyan kan mga lingkod nin Dios paagi sa espiritu nia?

¹⁶ Ano an partikular na ginigibo ngonyan digdi sa daga paagi sa banal na espiritu ni Jehova? An simbag kan Kapahayagan 22:17: “An [espiritu] asin an novia nagsasabi, Madia. Asin an nakakadagñog, sumabi sia, Madia. Asin an napapaha, dumolok sia: an boot, ominom kan tubig nin buhay na daing bayad.” Huling pinapahiro kaiyan an mga Kristiano, ipinapaabot ninda ngonyan an nagtataong buhay na imbitasyon ni Jehova sa siisay man na “boot” na mag-ako kan tubig nin buhay. An linahidan na mga Kristiano an nangengenot sa paggibo kaini. Pero, nakikiiba an mga kabilang sa ibang mga karnero sa pagpaabot kan imbitasyon na ini. An duwang grupong iyan nakikipagtabangan sa iyo man sanang banal na espiritu sa pag-otob kan gibohon na ini. Sinisimbolisaran kan mga kabilang sa duwang grupo an pagdusay ninda ki Jehova paagi sa pagpabautismo “sa gñaran nin Ama asin nin Aki patin nin [“banal na espiritu,” NW].” (Mat. 28:19) Asin gabos sinda nagpapagiya sa espiritu nin Dios, na paagi kaiyan ikinakapaheling ninda an bunga kaiyan. (Gal. 5:​22, 23) Arog sa mga linahidan, nagpapatabang man dian an ibang mga karnero. Paagi sa tabang kaiyan, ginigibo ninda an pinakamakakaya ninda tanganing maabot an mga kahagadan ni Jehova dapit sa kabanalan.​—2 Cor. 7:1; Kap. 7:​9, 14.

Padagos na Maghagad nin Banal na Espiritu

17. Ano an prueba niato na igwa kita kan espiritu nin Dios?

¹⁷ Kaya, baga man buhay na daing katapusan sa langit o sa daga an paglaom nindo, puede kamong tawan ni Jehova nin “puersa na labi sa ordinaryo” tanganing mapagdanay nindo an  integridad asin makamtan an balos. (2 Cor. 4:​7, NW) Puedeng olog-ologon kamo huli sa padagos na paghuhulit kan maogmang bareta kan Kahadean. Alagad girumdomon na “kun kamo pinagoologolog huli kan gñaran ni Cristo, paladan [“maogma,” NW] kamo; huli ta an [espiritu] nin kamurawayan asin [espiritu] nin Dios nagoontok dian sa saindo.”​—1 Ped. 4:14.

18, 19. Paano ka matatabangan ni Jehova paagi sa saiyang banal na espiritu, asin ano an determinasyon mo mapadapit digdi?

¹⁸ An banal na espiritu iyo an libreng balaog nin Dios sa mga sinserong naghahagad kaiyan. Puede kaiyan paoswagon an mga kakayahan mo patin pakosogon an pagmawot mong gibohon an pinakamakakaya sa paglilingkod sa saiya. ‘An Dios, huli sa pinagmarahay nia, iyo an nagpapahiro sa saimo tanganing ika magmawot sagkod humiro.’ An mahalagang marhay na balaog na banal na espiritu, kaiba an satong maigot na paghihingoa na magdanay na “marigon na nangangapot sa tataramon nin buhay,” makakatabang sa sato na ‘padagos na maghingoa na makamtan an sato mismong kaligtasan na may takot asin pagtakig.’​—Fil. 2:​12, 13, 16, NW.

¹⁹ Kun siring, paagi sa lubos na pagtitiwala sa espiritu nin Dios, bilog na puso mong gibohon an asignasyon sa saimo, magin eksperto sa ipinapagibo sa saimo, asin maghagad nin tabang ki Jehova. (Sant. 1:5) Itatao nia an kaipuhan mo tanganing masabotan an Tataramon nia, mapangganahan an mga problema sa buhay, asin ikahulit an maogmang bareta. ‘Hagad, asin itatao saimo; hanap, asin makakakua ka; tuktok, asin bubukasan saimo,’ saka kaiba digdi an pagtao sa saimo nin banal na espiritu. (Luc. 11:​9, 13) Iyo, padagos na magngayongayo ki Jehova paagi sa pamibi na ika magin siring sa mga nagdanay na maimbod​—kan suanoy saka sa presenteng panahon​—na nagpagiya sa banal na espiritu nin Dios.

Ikakapaliwanag daw Nindo?

• Arog ni Maria, anong atitud an puede tang ipaheling na maresulta sa mga bendisyon?

• Sa anong paagi giniyahan si Pablo kan espiritu nin Dios?

• Paano an mga lingkod nin Dios ginigiyahan ngonyan kan saiyang espiritu?

[Mga Hapot Para sa Pag-adal]

[Ritrato sa pahina 24]

Tinabangan si Pablo kan espiritu nin Dios na daing takot na magtaram tumang sa sarong pararatak

[Ritrato sa pahina 26]

Ngonyan, itinatao an banal na espiritu tanganing tabangan an mga Kristiano, ano man an paglaom ninda