Kapakipakinabang an mga Pagbabago

Isinaysay ni James A. Thompson

Kan ako mamundag kan 1928 sa sur na parte kan Estados Unidos, may ley kaidto dapit sa pagigin siblag nin mga puti asin itom. An padusa sa pagbalga dian, pagkapreso o mas grabe pa.

KAN panahon na iyan, may mga lugar sa Estados Unidos na dapat magkalaen an mga kongregasyon, sirkito, saka distrito nin mga puti asin mga itom na Saksi ni Jehova. Kan 1937, an sakong ama nagin company servant (inaapod ngonyan na parakoordinar kan grupo nin kamagurangan) kan kongregasyon nin mga itom sa Chattanooga, Tennessee. Si Henry Nichols an company servant kan kongregasyon nin mga puti.

Nagigirumdoman ko an maoogmang pangyayari kan ako hoben pa, arog kan pagtukaw kun banggi sa beranda sa likod kan harong mi asin paghinanyog sa pag-oolay ni Tatay asin ni Tugang na Nichols. Minsan ngani dai ko gabos nasasabotan an pinag-oolayan ninda, naoogma akong magtaed ki Tatay mantang pinag-oolayan kan duwa kun paano pinakamarahay na makakapaghulit sa ibong kan mga kamugtakan kaidto.

Bago kaiyan, may trahedyang nangyari sa pamilya mi kan 1930. Nagadan si Nanay, na 20 anyos pa sana. Si Tatay an nag-asikaso sa kuatro anyos na tugang kong si Doris, asin sa sako, na dos anyos pa sana. Minsan ngani bago pa sanang mabautismohan si Tatay, nagin marikas an pag-oswag nia sa espirituwal.

Mga Halimbawa na Nakatabang sa Sako

Kan 1933, namidbid ni Tatay an kahangahangang Kristiana na si Lillie Mae Gwendolyn Thomas, asin dai naghaloy nagpakasal sinda. Pareho sindang nagin marahay na halimbawa para sa samo ni Doris kun dapit sa maimbod na paglilingkod ki Jehova.

 Kan 1938, may kahagadan sa mga kongregasyon kan Mga Saksi ni Jehova na suportaran an sarong resolusyon na an mga elder sa lokal na mga kongregasyon dapat na nombrahan sa sangang opisina niato sa Brooklyn, New York, imbes na elehiron sa lokal na kongregasyon. Kan an nagkapira sa Chattanooga mag-alangan na akoon an pagbabagong iyan, ipinahayag ni Tatay an saiyang bilog na suporta sa pagliliwat na iyan sa organisasyon. Nakakatabang sa sako sagkod ngonyan an halimbawa nia nin kaimbodan, kaiba an bilog na pusong kooperasyon ni Nanay.

Bautismo Asin Bilog na Panahon na Ministeryo

Kan 1940, an nagkapira sa kongregasyon mi nag-arkila nin bus tanganing mag-atender nin kombension sa Detroit, Michigan. Duman nabautismohan an nagkapira sa grupo ming iyan. Nagngalas an nagkapira kun taano ta dai ako nagpabautismo, huling ako naghuhulit na poon pa kan singko anyos asin aktibong marhay sa ministeryo.

Kan hapoton ninda ako, an simbag ko, “Dai ko pang gayo nasasabotan an dapit sa bautismo.” Nadangog ako ni Tatay asin nagngalas sia. Poon kaidto, orog niang hiningoa na tabangan ako na masabotan an kahulogan kan bautismo asin an kahalagahan kaiyan. Pakalihis nin apat na bulan, nabautismohan ako kan malipoton na aldaw nin Oktubre 1, 1940 sa sarong sadit na danaw sa luwas kan Chattanooga.

Kan ako 14 anyos na, nagpapayunir ako kun bakasyon sa eskuelahan sa panahon nin tig-init. Naghuhulit ako sa saradit na banwaan sa Tennessee asin sa kataed na estado nin Georgia. Nagmamata ako nin amay, nagbabalon nin pangudtohan, asin nagsasakay sa pang alas 6 nin aga na tren o bus pasiring sa teritoryo. Minapuli ako nin mga alas 6 nin banggi. Sa parate, nauubos ko na an balon bago pa mangudto. Minsan ngani may kuarta ako, dai ako puedeng lumaog sa tindahan tanganing magbakal nin ano man na kakanon huli ta itom ako. Sarong beses, naglaog ako sa sarong tindahan tanganing magbakal nin ice cream na nasa cone, pero pinahale ako. Sarong babaeng puti an maboot na tinawan ako nin ice cream.

Kan maghaiskul na ako, orog na nagin aktibo sa Sur an mobimiento dapit sa deretso sibil. An mga estudyante inengganyar nin mga organisasyon, arog kan NAACP (National Association for the Advancement of Colored People), na magin aktibista. Dinagka kami na magin miembro kaiyan. An nagkapirang eskuelahan nin mga itom, kaiba na an eskuelahan mi, nagin pasohan na 100 porsiento kan mga estudyante an magin miembro kaiyan. Ginipit ako na “suportaran an samong rasa,” siring sa pagkasabi ninda. Alagad nagsayuma ako, na ipinaliwanag na an Dios mayong ipinapaorog asin mayong pinapaboran na rasa. Kaya nag-aasa ako na an Dios an maresolber sa siring na mga inhustisya.​—Juan 17:14; Gui. 10:​34, 35.

Dai nahaloy pagkagradwar ko sa haiskul, nagdesisyon akong magbalyo sa New York City. Minsan siring, mantang paduman, naghapit ako sa Philadelphia, Pennsylvania, tanganing bisitahon an mga katood na namidbid ko sa sarong kombension. An kongregasyon duman an enot na naatenderan ko na iribanan an mga puti asin itom. Durante kan pagdalaw kan nagbibiaheng paraataman, kinaolay nia ako nin solo asin sinabing tatawan nia ako nin kabtang sa sunod na pagtiripon. Huli kaiyan, nagin mas pasil para sa sako na magdesisyon na duman na pumirme.

Kaiba sa mga nagin katood ko sa Philadelphia iyo an hoben na sister na si Geraldine White, na inaapod kong Gerri. Pamilyar siang marhay sa Biblia asin eksperto sa pakikipag-olay sa mga kagharong  sa ministeryo. An nangorognang mahalaga para sa sako iyo na pareho ming pasohan na magin payunir. Nagpakasal kami kan Abril 23, 1949.

Inimbitaran sa Paadalan nin Gilead

Poon pa sa kapinonan, an pasohan mi iyo na mag-adal sa Gilead asin magin misyonero sa ibang nasyon. Ikinaogma ming gumibo nin mga pagbabago sa samong kamugtakan tanganing makualipikar sa Gilead. Dai naghaloy, pinabalyo kami sa Lawnside, New Jersey; dangan sa Chester, Pennsylvania; asin sa katapustapusi sa Atlantic City, New Jersey. Mantang nasa Atlantic City, nakualipikar kami na mag-aplay sa Gilead huling duwang taon na kaming kasal. Alagad dai kami tolos-tolos inapod. Ano an dahelan?

Durante kan enot na kabtang kan dekada nin 1950, dakol na hoben na lalaki an inaapod para sa serbisyo militar tanganing makipaglaban sa giera sa Korea. An junta sa serbisyo militar sa Philadelphia minalataw na may salang paghona sa Mga Saksi ni Jehova huli sa satong pagigin neutral. Sa katapustapusi, inimpormaran ako nin sarong huwes na an imbestigasyon sa sako kan FBI nagpatunay na neutral ako. Kaya kan Enero 11, 1952, tinawan ako kan Presidential Appeal Board nin eksemsion sa serbisyo militar (4-D classification) huli sa pagigin ministro.

Kan Agosto kan taon na iyan, nakaresibi kami ni Gerri nin imbitasyon na mag-adal sa ika-20 klase nin Gilead, na nagpoon nin Setyembre. Durante kan pag-adal mi, inaantisipar mi na idedestino kami sa ibang nasyon. An tugang kong si Doris naggradwar sa ika-13 klase nin Gilead asin naglilingkod kaidto sa Brazil. Ikinabigla nanggad niamo ni Gerri kan iasignar kami sa pansirkitong gibohon sakop an mga kongregasyon nin mga itom sa sur na parte kan estado nin Alabama! Medyo ikinamondo mi iyan, huli ta an talagang gusto mi maglingkod sa ibang nasyon.

An enot na dinalaw mi iyo an kongregasyon sa Huntsville. Pag-abot mi, nagduman kami sa harong nin sarong sister, na iyo an dadagosan mi. Mantang ilinalaog mi sa harong an samong mga gamit, nadangog mi sia na may kaolay sa telepono, “Yaon na an mga aki.” An edad mi 24 pa sana alagad mas hoben pa ngani an itsura mi. Mga Aki (The Children) an apod sa samo mantang naglilingkod sa sirkitong iyan.

An Sur parateng inaapod na Bible Belt huling an kadaklan duman may dakulang pagpahalaga sa Biblia. Kaya, parate ming pinoponan an pakikipag-olay paagi sa presentasyon na ini na may tolong punto:

(1) Halipot na komento dapit sa mga kamugtakan sa kinaban.

(2) Solusyon na itinatao kan Biblia.

(3) Kun ano an sinasabi kan Biblia na dapat tang gibohon.

Dangan, nag-aalok kami nin angay na pantabang sa pag-adal sa Biblia. Huling epektibo an paaging ini, tinawan ako nin kabtang sa 1953 na New World Society Assembly sa New York. Idinemonstrar ko duman an presentasyon na iyan na may tolong punto.

 Dai nahaloy, kan tig-init nin 1953, iinasignar ako bilang paraataman nin distrito sa mga sirkito nin mga itom sa Sur. Sakop kan teritoryo mi an mga lugar poon Virginia sagkod Florida asin sagkod pa ngani sa solnopan arog kan Alabama saka Tennessee. Iyo, an nagbibiaheng mga paraataman kaipuhan na madaling makibagay. Halimbawa, parate kaming nagdadagos sa mga harong na mayo nin gripo sa laog asin nagkakarigos kami sa bathtub na gibo sa lata sa may likod kan kalan sa kusina. Marahay sana ta iyan an pinakamainit na parte kan harong!

Mga Kadepisilan Huli sa Pagigin Siblag nin mga Puti Asin Itom

Sa paglilingkod sa Sur, kaipuhan an pagigin maingat asin pagkamapamaagi tanganing magibo an mga bagay-bagay. Bawal sa mga itom na maglaba sa mga Laundromat. Kaya kun nasa shop si Gerri, sinasabi nia na naglalaba sia para ki “Mrs. Thompson.” Dakol an naghohona na sia katabang asin na si “Mrs. Thompson” an among nia. Kan an mga paraataman nin distrito nagpapasale kaidto kan pelikulang The New World Society in Action, inaapodan ko an rental shop tanganing magpareserba nin dakulang screen para ki “Mr. Thompson.” Dangan, minaduman ako sa shop tanganing kuanon iyan. Pirme kaming magalang asin parate ming nagigibo an samong ministeryo na mayong problema.

May sala pang atitud an mga taga Sur, habo ninda sa mga taga Norte. Sarong beses, ibinareta nin lokal na diaryo na mapahayag sa sarong asamblea si James A. Thompson, Jr., kan Watchtower Bible and Tract Society of New York. Paghona kan nagkapira na nakabasa kaini taga New York ako, kaya kinanselar ninda an kontrata mi sa paggamit kan auditoryum nin sarong eskuelahan. Dangan, nagduman ako sa junta kan eskuelahan tanganing ipaliwanag na nag-eskuela ako sa Chattanooga. Huli kaiyan, tinawan kami nin permiso na gamiton iyan para sa samong pansirkitong asamblea.

An kariribokan huli sa rasa naggrabe kan kabangaan kan dekada nin 1950, asin kun minsan igwa nin kadahasan. Kan 1954, may mga Saksi na nagsentir huling mayo nin mga ispiker na itom sa programa sa nagkapirang pandistritong asamblea. Dinagka mi an mga tugang na itom na magin mapasensia. Kan sunod na tig-init, inasignaran ako bilang ispiker. Pagkatapos kaiyan, dakol na tugang na itom sa Sur an nagin ispiker sa mga programa.

Pag-abot nin panahon, nabawasan sa Sur an kadahasan huli sa rasa, asin luway-luway nang nag-iribanan sa kongregasyon an mga puti asin itom. Huli kaini, kaipuhan na iasignar sa manlaenlaen na kongregasyon an nagkapirang parahayag asin liwaton an mga teritoryo kan kongregasyon saka an mga paninimbagan nin mga tugang na nangangataman. An nagkapira, itom man o puti, bakong oyon sa bagong areglo. Minsan siring, mayong ipinapaorog an kadaklan, siring kan satong langitnon na Ama. An totoo, dakol an dayupot na magkakatood ano man an kolor ninda. Mantang nagdadakula ako, naeksperyensiahan na iyan kan pamilya mi kan mga dekada nin 1930 asin 1940.

Sarong Bagong Asignasyon

Kan Enero 1969, nakaresibi kami ni Gerri nin imbitasyon na magduman sa Guyana, South America, asin maogma ming inako iyan. Nagduman nguna kami sa Brooklyn, New York, tanganing sanayon ako sa pag-organisar kan paghuhulit sa Guyana. Nag-abot kami duman kan Hulyo 1969. Pagkatapos nin 16 na taon sa gibohon  na nagbibiahe, dakulang pagbabago an mamirmehan sa saro sanang lugar. Ginamit ni Gerri an kadaklan kan panahon nia sa ministeryo sa langtad bilang misyonera, asin nagtrabaho ako sa sangang opisina.

Kaiba sa trabaho ko an pagtabas nin doot, pag-asikaso sa mga literaturang kaipuhan kan 28 kongregasyon, asin pagsurat sa opisina prinsipal sa Brooklyn. Nagtatrabaho ako nin 14 sagkod 15 oras kada aldaw. Masakit an trabaho ming duwa, alagad ikinaogma mi an samong asignasyon. Pag-abot mi, may 950 parahayag sa Guyana; ngonyan labi nang 2,500.

Minsan ngani ikinakaogma mi an marahay na klima asin mga prutas saka gulay duman, an tunay na kagayagayahan mi iyo an mapakumbabang mga tawo na gustong-gustong makanood kan katotoohan sa Biblia manongod sa Kahadean nin Dios. Sa parate, si Gerri may 20 inaadalan sa Biblia kada semana, asin dakol sa mga inaadalan mi an nag-oswag sagkod na mabautismohan. Pag-abot nin panahon, an nagkapira nagin payunir, elder, asin nag-adal pa ngani sa Gilead tanganing magin misyonero.

Mga Kadepisilan, Nangorogna sa Salud

Kan 1983, nangaipo nin tabang an mga magurang ko sa Estados Unidos. Kami ni Gerri, kaiba si Doris, nag-orolay bilang pamilya. Si Doris, na 35 taon nang misyonera sa Brazil, nagdesisyon na magpuli tanganing atamanon sinda. ‘Taano ta makua nin duwang misyonero sa langtad,’ an sabi nia, ‘kun magigibo iyan nin saro?’ Pagkagadan kan mga magurang mi, si Doris nagdanay sa Chattanooga bilang espesyal payunir.

Kan 1995, na-diagnose ako na may kanser sa prostate kaya kaipuhan kong magbalik sa Estados Unidos. Nag-istar kami sa Goldsboro, North Carolina, huling haros nasa pag-oltanan iyan kan pamilya ko sa Tennessee asin kan pamilya ni Gerri sa Pennsylvania. Kontrolado na an kanser ko, asin naglilingkod kami sa kongregasyon nin Goldsboro bilang infirm na espesyal payunir.

Kun ginigirumdom ko an labing 65 taon sa bilog na panahon na ministeryo, nagpapasalamat nanggad ako na kami ni Gerri binendisyonan ni Jehova huli sa ginibo ming mga pagbabago tanganing paglingkodan sia. Totoo nanggad an sinabi ni David: “Sa sarong maimbod [si Jehova] mahiro na may kaimbodan”!​—2 Sam. 22:​26, NW.

[Mga Ritrato sa pahina 3]

An sakong ama asin si Tugang na Nichols nagin marahay na halimbawa para sa sako

[Mga Ritrato sa pahina 4]

Kami ni Gerri, kan andam na para sa Gilead kan 1952

[Mga Ritrato sa pahina 5]

Pagkagradwar sa Gilead, iinasignar kami sa gibohon na nagbibiahe sa Sur

[Ritrato sa pahina 6]

An nagbibiaheng mga paraataman asin an saindang agom bago an 1966 na pandistritong kombension na magkaibanan an mga puti asin itom

[Ritrato sa pahina 7]

Nakakagayagaya an pagmimisyonero sa Guyana