Nagigirumdoman Mo daw?

Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Bueno, helinga kun masisimbag mo an minasunod na mga hapot:

• Siisay si Olivétan, asin taano ta maninigo kitang magin interesado sa ginibo nia?

Midbid sa ngaran na iyan an Pranses na si Pierre Robert. Durante kan Reporma kan ika-16 na siglo, an Biblia trinadusir nia sa Pranses. Ginamit nia an “paraataman” imbes na “obispo” asin an “kongregasyon” imbes na “simbahan.” Sa nagkapirang bersikulo, trinadusir nia an ngaran nin Dios na “Jehova.”​—9/1-E, pahina 18-20.

• Ano an boot sabihon nin Dios kan sabihon nia sa mga Levita: “Ako an [saindong] kahirasan”?

An lambang ibang mga tribo kan Israel hinirasan nin daga, alagad an mga Levita si Jehova an “kahirasan.” (Bil. 18:​20, NW) Mayo sindang mamanahon na daga, alagad tinawan sinda nin espesyal na pribilehio nin paglilingkod. Sa ibong kaiyan, itinao ni Jehova an pangenot na mga pangangaipo ninda sa materyal. Ngonyan, an mga may pribilehio na paoswagon an intereses kan Kahadean makakapagtiwala na itatao sa sainda an mga pangangaipo ninda sa buhay.​—9/15, pahina 7-8, 13.

• Paano niato naaraman kun kasuarin nasakop kan mga Babilonio an suanoy na Jerusalem?

An klasikong mga historyador nagtatao nin magkakalaen na detalye manongod sa mga hade kan Babilonia asin sa paghade ninda. Pero, an mga iskolar nagkakaoyon na nasakop ni Ciro II an Babilonia kan 539 B.C.E., na sarong importanteng marhay na petsa. An mga Judio pinatalingkas, asin nakaabot sinda sa dagang tinuboan ninda kan 537 B.C.E. An Biblia nagsasabi na an pagkadistiero ninda inabot nin 70 taon. Kaya seguradong buminagsak an Jerusalem kan 607 B.C.E. (2 Cron. 36:​21, 22; Jer. 29:10; Dan. 9:​1, 2)​—10/1, pahina 26-31.

• Ano an makakatabang sa sarong Kristiano sa pagdesisyon kun baga kapakipakinabang o bako an partikular na aling-alingan?

Tanganing maaraman kun baga kapakipakinabang asin nakakaogma sa Dios an partikular na aling-alingan, makakatabang na maghapot: Ano an kaiba dian? Noarin ko iyan ginigibo? Sairisay an kaiba ko?​—10/15, pahina 9-12.

• Taano ta sala na magpaaborsion?

Para sa Dios sagrado an buhay asin ibinibilang nia an embryo nin tawo na sarong buhay na linalang. (Sal. 139:16) Masasabi na tuyong paggadan an pagpalaglag sa omboy na nasa matris pa, huling segun sa Ley maninimbag an saro na nakakolog sa omboy na nasa matris pa. (Ex. 21:​22, 23)​—11/1-E, pahina 6.

• Paano an pagkasaysay sa Talinhaga 7:​6-23 makakatabang sa sato na likayan an pagheling nin pornograpiya?

Sinasambit dian an dapit sa hoben na lalaking naglakaw sa lugar na aram niang gayo na nagpipirme an imoral na babae. Inakit sia kaini. Ngonyan, marahay na likayan niato an mga site sa Internet na may mga retratong nakakapukaw sa sekso, asin mahalaga na hagadon an tabang nin Dios paagi sa pamibi bago pa ngani makaheling nin siring na mga retrato sa Internet.​—11/15, pahina 9-10.

• Paano niato maaaraman kun baga magdadanay pa an daga sa 2012?

Huli sa mga siklo sa sarong suanoy na kalendaryo kan mga Maya, naniniwala an nagkapira na matatapos an daga sa taon 2012. Alagad imposible iyan, huling an daga linalang ni Jehova tanganing istaran. An Biblia nagsasabi na an daga magdadanay sagkod lamang. (Par. 1:4; Isa. 45:18)​—12/1-E, pahina 10.

• Sairisay na kagsurat sa Biblia an presente kan Pentecostes 33 C.E.?

Minalataw na presente an anom sa mga kagsurat sa Kristianong Griegong Kasuratan. Tolong apostol an presente duman​—si Mateo, Juan, asin Pedro. Presente man an duwa sa mga tugang ni Jesus sa ina​—si Santiago asin Judas. Asin posibleng marhay na presente an hoben na si Marcos.​—12/1-E, pahina 22.