Taano ta Dapat Magpagiya sa Espiritu nin Dios?

‘Ika iyo an sakuyang Dios. An saimong marahay na espiritu ibahan logod ako.’​—SAL. 143:10.

1. Iilustrar kun paano an saro puedeng giyahan nin dai naheheling na puersa.

NAKAGAMIT na daw kamo nin kompas tanganing maaraman an tamang direksion? An kompas simpleng instrumento na saro sanang piesa an naghihiro​—an magnetikong dagom na nakatokdo panorte. Huli sa dai naheheling na puersa na inaapod na magnetism, an posisyon kan dagom kan kompas pirmeng nakaoyon sa magnetic field na nakapalibot sa daga sa pag-oltanan kan mga pole kaiyan. Sa dakol na siglo, an kompas ginagamit nin mga eksplorador asin biahero tanganing magin giya ninda sa daga asin dagat.

2, 3. (a) Anong makapangyarihan na puersa an ginamit ni Jehova haloyon nang panahon an nakaagi? (b) Taano ta maninigo tang asahan na an dai naheheling na aktibong puersa nin Dios gigiyahan an satong buhay ngonyan?

² May saro pang dai naheheling na puersa na mas mahalaga pa nganing giya para sa sato. Ano iyan? An ilinadawan sa enot na mga bersikulo kan Biblia. Dapit sa nahaman ni Jehova haloyon nang panahon an nakaagi, an Genesis nagsasabi: “Sa kaenotenote linalang nin Dios an kalagñitan asin an daga.” Tanganing magibo iyan, nagsugo sia nin makapangyarihan na puersa, huling an pagkasaysay kan paglalang nagsasabi pa: “An Espiritu [“aktibong puersa,” NW] nin Dios naghihiro.” (Gen. 1:​1, 2) Ano an puersang iyan? An banal na espiritu​—an dinamikong puersa na ginamit sa paglalang. Huli sa paggamit ni Jehova kan espiritung ini nagkaigwa kita nin buhay asin nalalang an gabos na bagay.​—Job 33:4; Sal. 104:30.

³ Bilang nabubuhay asin naghahangos na mga tawo, maninigo daw niatong asahan na an aktibong puersa nin Dios igwa nin dugang pang epekto sa satong buhay? Aram ni Jesus, an Aki nin Dios, na maninigo tang asahan iyan, huling sia nagsabi sa mga disipulo: “An [espiritu] an magñegñenot saindo sa gabos na katotoohan.” (Juan 16:13) Paano niato dapat saboton an espiritung ini, asin taano ta maninigo kitang magpagiya dian?

Kun Ano an Banal na Espiritu

4, 5. (a) Ano an salang paniniwala kan mga Trinitaryo dapit sa banal na espiritu? (b) Paano nindo ipapaliwanag kun ano talaga an banal na espiritu?

⁴ Posibleng marhay na an nagkapira sa mga tawong nakakaolay nindo sa ministeryo naniniwala sa inaapod na “Holy Ghost” kan King James Version asin iba pang traduksion sa Biblia. Sala an paniniwala nin mga Trinitaryo na ini sarong espiritung persona na kapantay kan Dios na Ama. (1 Cor. 8:6) Minsan siring, mahalagang mangnohon na sa bilog na The Webster Bible, na enot na ipinublikar kan 1833 asin rebisyon kan King James Version, an Amerikanong leksikograpo na si Noah Webster sinalidahan an “Holy Ghost” nin “Holy Spirit [Banal na Espiritu].” Ginibo iyan ni Webster huling aram nia na sa Kasuratan an pananaram na ini dai nangangahulogan nin “sarong aparisyon.” *

⁵ Kun siring, ano talaga an banal na espiritu? An sarong nota sa ibaba kan Genesis 1:2 sa New World Translation of the Holy Scriptures​—With References nagsasabi: “An ruʹach [Hebreo], na trinadusir na ‘espiritu,’ trinadusir man na ‘doros’ asin sa iba pang mga tataramon na nangangahulogan nin dai naheheling na aktibong puersa.” (Helingon an mga nota sa ibaba kan Genesis 3:8 asin 8:1 sa NW.) Kun paanong an doros dai naheheling alagad may puersa, an banal na espiritu na bakong persona dai man naheheling alagad  risang-risa an mga epekto. An espiritung ini puersa na hale sa Dios na itinatao asin ginagamit nia sa mga tawo o mga bagay tanganing magibo an kabotan nia. Masakit daw tubodon na an siring na makangangalas na puersa hale sa banal na Gikanan, an Makakamhan sa Gabos na Dios? Dai nanggad!​—Basahon an Isaias 40:​12, 13.

6. Ano an mahalagang ipinakiolay ni David ki Jehova?

⁶ Padagos daw na gagamiton ni Jehova an espiritu nia tanganing giyahan kita sa buhay? Nanuga sia ki salmistang David: “Ipapasabot ko saimo, asin itotokdo ko saimo an dalan na maninigo mong lakauan.” (Sal. 32:8) Gusto daw iyan ni David? Iyo, huling nakiolay sia ki Jehova: ‘Tokdoan mo ako kan pag-otob kan saimong kabotan, huli ta ika iyo an sakuyang Dios. An saimong marahay na espiritu ibahan logod ako.’ (Sal. 143:10) Maninigo na magkaigwa kita kan kaparehong pagmawot asin pagigin andam na magpagiya sa espiritu nin Dios. Taano man? Pag-olayan niato an apat na dahelan.

Bako Kitang Kualipikado na Giyahan an Satong Sadiri

7, 8. (a) Taano ta dai niato kayang giyahan an satong sadiri na siblag sa Dios? (b) Iilustrar kun taano ta dai nanggad niato poprobaran na maglakaw sa maraot na sistemang ini nin mga bagay na mayo kan paggiya nin Dios.

⁷ Enot, maninigo kitang magpagiya sa espiritu nin Dios huling mayo kitang kakayahan na giyahan an satong sadiri. An “giyahan” nangangahulogan na “itokdo sa sarong direksion o ipaheling an dalan na dapat sundan.” Minsan siring, dai kita linalang ni Jehova na may kakayahan na magibo iyan na kita sana, nangorogna huling bako kitang perpekto. An saiyang propeta na si Jeremias nagsurat: “Aram ko, KAGURANGNAN, na mayo sa tawo an saiyang dalan, asin mayo sa naglalakaw an pagpatanos kan saiyang lakad.” (Jer. 10:​23, An Banal na Biblia) Asin taano man? Nadangog ni Jeremias an pag-analisar nin Dios kun taano ta dai niato kayang giyahan an satong sadiri. Dapit sa pagkatawo niato sa laog, si Jehova nagsabi: “Madaya an puso nin labi sa gabos na bagay, asin maraot: Siisay an makakamidbid kaiyan?”​—Jer. 17:9; Mat. 15:19.

⁸ Bako daw peligroso para sa saro na daing eksperyensia na magbaklay sa kadlagan na bako siang pamilyar, na mayo nin kaibang matibay na giya asin mayo lamang nin kompas? Huling dai nia aram kun paano sia makakatagal sa masakit na mga kamugtakan sa kadlagan asin kun paano sia makakaabot nin ligtas sa destinasyon, namemeligro an buhay nia. Iyo man an saro na naniniwala na kaya niang giyahan an saiyang dalan sa maraot na kinaban na ini na dai nagpapagiya sa Dios pasiring sa tamang dalan. An solamenteng paagi tanganing mapangganang makalakaw sa sistemang ini nin mga bagay iyo na mapagngayongayong makimaherak ki Jehova, arog ki David: “[Antabayi] an sakuyang magña lakad dian sa saimong magña dalan, tagñaning an sakuyang magña bitis [dai] madalinas.” (Sal. 17:5; 23:3) Paano posibleng mag-ako nin siring na paggiya?

9. Arog kan ipinapaheling sa pahina 17, paano an espiritu nin Dios magigin masasarigan na giya para sa sato?

⁹ Kun kita mapakumbaba asin andam na magsarig ki Jehova, tatawan nia kita nin banal na espiritu bilang masasarigan na giya sa satong mga lakad. Paano kita matatabangan kan aktibong puersang iyan? Ipinaliwanag ni Jesus sa mga disipulo:  “An paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na sinabi ko sa saindo.” (Juan 14:​26, NW) Mantang regular asin mapagngayongayo tang pinag-aadalan an Tataramon nin Dios, kaiba na an gabos na sinabi ni Cristo, tatabangan kita kan banal na espiritu na orog na masabotan an hararom na kadonongan ni Jehova, tanganing makasunod kita nin maingat sa kabotan nia. (1 Cor. 2:10) Saro pa, sa ano man na dai inaasahan na pagbabago sa dalan pasiring sa buhay, ipapaheling sa sato kan espiritu kun ano an dapat tang gibohon. Ipapagirumdom kaiyan sa sato an mga prinsipyo sa Biblia na nanodan na niato asin tatabangan kita na masabotan kun paano an mga prinsipyong iyan ikakaaplikar bilang giya sa sunod tang gigibohon.

Giniyahan si Jesus kan Espiritu nin Dios

10, 11. Ano an inasahan kan bugtong na Aki nin Dios kun dapit sa banal na espiritu, asin ano an naeksperyensiahan nia?

¹⁰ An ikaduwang dahelan kun taano ta maninigo kitang magpagiya sa banal na espiritu iyo na huling giniyahan nin Dios an Aki nia paagi kaiyan. Bago magdigdi sa daga, aram kan bugtong na Aki nin Dios an hulang ini: “Matogdon sa saiya an espiritu ni Jehova; an espiritu nin kadonogñan asin pakasabot, an espiritu nin hatol asin nin kakosogan, an espiritu nin pakamidbid asin pagkatakot ki Jehova.” (Isa. 11:2) Imahinara na sana kun gurano an nagin pagmawot ni Jesus na tabangan sia kan espiritu nin Dios durante kan pag-istar nia sa daga!

¹¹ Naotob an sinabi ni Jehova. An rekord kan Ebanghelyo nagsasabi kun ano an tolos-tolos na nangyari pakabautismo ki Jesus: “Asin si Jesus, pano nin [banal na espiritu] naghale sa Jordan, asin dinara [kan espiritu] sa patag.” (Luc. 4:1) Mantang si Jesus nag-aayuno, namimibi, asin naghohorophorop duman, posibleng marhay na ininstruksionan asin ipinasabot ni Jehova sa Aki nia an mangyayari sa saiya. An aktibong puersa nin Dios an nag-iimpluwensia sa isip asin puso ni Jesus, na naggigiya sa kaisipan asin mga desisyon nia. Bilang resulta, aram ni Jesus kun ano an gigibohon nia sa kada situwasyon, asin sinunod nia nanggad an ipinapagibo sa saiya kan saiyang Ama.

12. Taano ta kaipuhan na kita magpagiya sa espiritu nin Dios?

¹² Huling aram ni Jesus an kahalagahan kan espiritu nin Dios sa saiya mismong buhay, idinoon nia sa mga disipulo an importansia kan paghagad nin banal na espiritu asin pagpagiya dian. (Basahon an Lucas 11:​9-13.) Taano ta mahalagang marhay iyan para sa sato? Huling puede kaiyan na bagohon an satong kaisipan tanganing magin kapareho kan ki Cristo. (Roma 12:2; 1 Cor. 2:16) Paagi sa pagpagiya niato sa espiritu nin Dios, makakapag-isip kita arog ni Cristo asin maaarog niato an halimbawa nia.​—1 Ped. 2:21.

Ilalagalag Kita kan Espiritu kan Kinaban

13. Ano an espiritu kan kinaban, asin ano an ibinubunga kaiyan?

¹³ An ikatolong dahelan na gusto tang magpagiya sa espiritu nin Dios iyo na huling kun mayo iyan puede kitang ilagalag kan maraot na espiritung nakakaimpluwensia sa buhay kan kadaklan ngonyan. An kinaban igwa nin makapangyarihan  nanggad na puersa na nagtutulod sa sato na mamuhay na biyong kontra sa paggiya kan banal na espiritu. Imbes na dagkahon an mga tawo na magkaigwa kan kaisipan ni Cristo, an kaisipan asin paggawe ninda iniimpluwensiahan kan espiritu kan kinaban na magin arog kan namamahala sa kinaban, si Satanas. (Basahon an Efeso 2:​1-3; Tito 3:3.) Kun an saro nagpapadaog sa espiritu kan kinaban asin naggigibo kan mga gibo kan laman, grabe an magigin resulta huling sia dai magmamana kan Kahadean nin Dios.​—Gal. 5:​19-21.

14, 15. Paano kita makakapanggana sa paglaban sa espiritu kan kinaban?

¹⁴ Itinatao sa sato ni Jehova an kaipuhan niato tanganing malabanan an espiritu kan kinaban. Si Pablo nagsabi na “magpakakosog kamo dian sa Kagurangnan, asin dian sa kakosogan nin saiyang kapangyarihan . . . tagñaning makapanumang kamo sa maraot na aldao.” (Efe. 6:​10, 13) Paagi sa espiritu ni Jehova, pinapakosog nia kita tanganing mapaglabanan an paghihingoa ni Satanas na ilagalag kita. (Kap. 12:9) Makosog an espiritu kan kinaban, kaya dai niato iyan biyong malilikayan. Minsan siring, malalabanan niato iyan. Mas makosog nanggad an banal na espiritu, asin tatabangan kita kaiyan!

¹⁵ Sa mga nagbaya sa Kristianismo kan enot na siglo, si Pedro nagsabi: “Sa pagbaya sa dalan na matanos, sinda nalagalag.” (2 Ped. 2:15) Kita nagpapasalamat nanggad na kita nag-ako, “bako kan espiritu nin kinaban, kundi kan espiritu na hale sa Dios”! (1 Cor. 2:12) Sa tabang kan impluwensia kaiyan asin paagi sa lubos na pag-aprobetsar sa gabos na probisyon ni Jehova tanganing papagdanayon kita sa tamang dalan sa espirituwal na paagi, makakapanggana kita sa paglaban sa espiritu ni Satanas na nasa maraot na kinaban na ini.​—Gal. 5:16.

An Banal na Espiritu Nagbubunga nin Marahay

16. Anong bunga an ikakapaheling niato paagi sa banal na espiritu?

¹⁶ An ikaapat na dahelan na gusto tang magpaimpluwensia sa espiritu nin Dios iyo na huling iyan nagbubunga nin marahay sa buhay kan mga ginigiyahan kaiyan. (Basahon an Galacia 5:​22, 23.) Siisay sa sato an habong magin mas mamomoton, maogma, asin mapagpatoninong? Siisay sa sato an habong magkaigwa nin orog na pakatios, kabootan, asin karahayan? Siisay sa sato an dai makikinabang sa pagpatalubo nin orog na kahoyoan, mas makosog na pagtubod asin pagpupugol sa sadiri? Paagi sa espiritu nin Dios ikinakapaheling niato an mararahay na kualidad na magtatao nin pakinabang sa sato asin sa kapamilya niato saka sa mga kapwa niato naglilingkod. Kaipuhan tang padagos na pataluboon an bungang ini, huling mayo nin limitasyon sa kun gurano kadakol na bunga kan espiritu an kaipuhan asin puede tang ipaheling.

17. Paano niato mapapatalubo nin orog pa an sarong aspekto kan bunga kan espiritu?

¹⁷ Madonong na siyasaton niato an satong sadiri tanganing masierto na an satong mga pananaram asin paggawe nagpapatunay na kita ginigiyahan kan banal na espiritu saka nagpapaheling kan bunga kaiyan. (2 Cor. 13:5a; Gal. 5:25) Kun marisa niato na kaipuhan tang pataluboon an nagkapirang aspekto kan bunga kan espiritu, puede kitang makikooperar sa banal na espiritu tanganing orog na ikapaheling an siring na mga kualidad. Ginigibo niato ini paagi sa pag-adal sa kada aspekto gamit an Biblia asin mga publikasyon niato. Sa siring, mababatid niato kun paano maninigong ipabanaag sa satong pang-aroaldaw na buhay an bunga kan espiritu dangan maghingoang pataluboon iyan nin orog pa. * Mantang naheheling niato an mga resulta kan pagpunsionar kan espiritu nin Dios sa buhay niato saka kan mga kapwa Kristiano, malinaw tang nasasabotan kun taano ta dapat kitang magpagiya dian.

Nagpapagiya daw Kamo sa Espiritu nin Dios?

18. Paano niato maaarog si Jesus kun dapit sa paghimate sa espiritu nin Dios?

¹⁸ Bilang “ekspertong trabahador” nin Dios sa paglalang kan pisikal na uniberso, aram ni Jesus an gabos na manongod sa magnetic field kan daga, na ginagamit nin tawo sa pagbiahe o pagbaklay sa daga. (Tal. 8:​30, NW; Juan 1:3) Minsan  siring, mayo nin prueba sa Biblia na ginamit ni Jesus an puersang iyan tanganing magiyahan sia sa dalan kan sia nasa daga pa. An Biblia nagsasabi na bilang tawo, naeksperyensiahan nia sa saiyang buhay kun gurano kamakapangyarihan kan banal na espiritu nin Dios. Maogma niang inako an impluwensia kaiyan, asin kun pinapahiro sia kaiyan, sia nagpapagiya asin minagawe oyon dian. (Mar. 1:​12, 13; Luc. 4:14) Iyo man daw ika?

19. Ano an dapat tang gibohon tanganing an banal na espiritu magin naggigiyang puersa sa buhay niato?

¹⁹ An aktibong puersa nin Dios nagpupunsionar pa sa isip asin puso na andam na magpagiya asin humiro oyon dian. Paano ka makakapagiya dian pasiring sa tamang direksion? Daing ontok na mamibi ki Jehova na logod sugoon nia sa saimo an saiyang espiritu asin tabangan ka na magpagiya dian. (Basahon an Efeso 3:​14-16.) Humiro kaoyon kan mga pamibi mo paagi sa pagsiyasat sa sadol na nasa Tataramon nin Dios, an Biblia, na isinurat paagi sa pagpasabong kan banal na espiritu. (2 Tim. 3:​16, 17) Kuyogon an madonong na instruksion kaiyan, dangan maghimate nanggad sa paggiya kan banal na espiritu. Gumawe na may pagtubod sa kakayahan ni Jehova na magiyahan ka nin tama mantang ika nasa maraot na kinaban na ini.

[Mga Nota sa Ibaba]

Nasabotan daw Nindo an Pangenot na mga Punto?

• Ano an puedeng magin epekto kan banal na espiritu sa buhay niato?

• Ano an apat na dahelan kun taano ta maninigo kitang magpagiya sa espiritu nin Dios?

• Ano an dapat tang gibohon tanganing lubos na makinabang sa paggiya kan banal na espiritu?

[Mga Hapot Para sa Pag-adal]

[Ritrato sa pahina 15]

An espiritu nin Dios an nagin nagpapahirong puersa sa buhay ni Jesus

[Ritrato sa pahina 17]

An espiritu nin Dios nagpupunsionar sa mga isip asin puso na andam na magpagiya asin humiro oyon dian