Gibohon na Mas Nakakaogma Asin Mabunga an Panahon nin Pag-adal

Paano kita magkakaigwa nin orog na kaogmahan sa pag-adal sa Biblia? Paano niato magigibong mas mabunga an satong pag-adal? Konsideraron niato nin halipot an tolong mahalagang lakdang na matabang sa sato na makinabang nin lubos sa satong personal na pag-adal kan Biblia.

1 MAMIBI: An enot na lakdang na dapat gibohon iyo an mamibi. (Sal. 42:⁠8) Taano? Maninigo niatong ibilang na kabtang kan satong pagsamba an pag-adal sa Tataramon nin Dios. Kun siring, kaipuhan niatong hagadon ki Jehova na andamon an satong isip asin tawan kita kan saiyang banal na espiritu. (Luc. 11:13) Si Barbara, na haloy nang misyonera, nagsabi: “Pirme akong namimibi bago ko basahon o pag-adalan an Biblia. Pagkatapos kaiyan, namamatean kong kaibanan ko si Jehova asin inooyonan nia an sakong ginigibo.” An pagpamibi bago mag-adal nagbubukas kan satong isip asin puso na akoon nin lubos an abundang espirituwal na pagkakan na itinatao sa sato.

2 HOROPHOROPON: Huli sa kakulangan nin panahon, an nagkapira binabasa sana nin hababaw an Tataramon nin Dios. Minsan siring, dai ninda nakakamtan an mga pakinabang na puedeng makua sa pag-adal sa Biblia. Narealisar ni Carlos, na labi nang 50 taon na naglilingkod ki Jehova, an importansia nin pagtagama nin panahon sa paghorophorop tanganing magin mas mabunga an saiyang pag-adal. Sinabi nia: “Mas dikit na sanang pahina kan Biblia an binabasa ko ngonyan​—⁠mga duwang pahina kada aldaw. Dangan nakakatao ako nin mas dakol na panahon sa paghorophorop kan binabasa ko tanganing makanood nin mahalagang mga leksion.” (Sal. 77:12) Kun nagtatao kita nin panahon na maghorophorop, pinapaoswag niato an satong kaaraman asin pakasabot sa kabotan nin Dios.​—⁠Col. 1:​9-11.

3 IAPLIKAR: Kun nasasabotan niato an praktikal na kahalagahan nin sarong aktibidad, orog kitang nakikinabang dian. Totoo nanggad iyan sa pag-adal sa Biblia. “Tinatabangan ako kan pag-adal na mapangganahan an mga problema sa pang-aroaldaw na buhay, asin inaandam ako kaiyan na tabangan an iba,” an sabi ni Gabriel, sarong hoben na brother na igwa nin regular na rutina sa pag-adal sa Biblia. Sinabi pa nia: “Pinagmamaigotan kong iaplikar sa sakong personal na buhay an gabos na nanonodan ko.” (Deut. 11:18; Jos. 1:⁠8) Iyo, dakol na diosnon na kaaraman an puede niatong masabotan asin iaplikar.​—⁠Tal. 2:​1-5.

REPASO: Dakula nanggad an pribilehio niato na siyasaton an kaaraman na itinatao ni Jehova, an Burabod nin gabos na kadonongan! (Roma 11:33) Kun siring, sa sunod na pag-adal nindo, seguradohon na mamibi nguna ki Jehova asin hagadon sa saiya na andamon an saindong isip asin tawan kamo kan saiyang banal na espiritu. Dangan pumondo nguna paminsanminsan tanganing horophoropon an saindong binabasa. Siring man, iaplikar sa saindong pang-aroaldaw na buhay an mga nanonodan nindo. Kun gigibohon nindo an mahalagang mga lakdang na ini, maheheling nindo na an saindong pag-adal sa Biblia magigin nanggad nakakaogma asin mabunga.