Makanood sa ‘Kabilogan kan Katotoohan’
“Igwa [ka] kan kabilogan kan kaaraman asin kan katotoohan sa Ley.”—ROMA 2:20, NW.
1. Taano ta maninigo kitang magin interesado na masabotan an kahalagahan kan Ley ni Moises?
KUN bakong huli sa ipinasabong na kasuratan ni apostol Pablo, masasakitan kitang masabotan an kahalagahan kan dakol na aspekto kan Ley ni Moises. Halimbawa, sa saiyang surat sa mga Hebreo, lininaw nia kun paano si Jesus, bilang “maimbod na halangkao na sacerdote,” makakadolot nin sararoan sanang ‘pambayad’ o pampagian nin boot na atang na magpapagin posible na magkamit nin “pagtubos na dai nin katapusan” an mga nagtutubod dian. (Heb. 2:17; 9:11, 12) Ipinaliwanag ni Pablo na an tabernakulo saro sanang “anino kan magña bagay na lagñitnon” asin na si Jesus an nagin Parapangoltanan nin ‘tipan na orog karahay’ kisa kan tipan na si Moises an parapangoltanan. (Heb. 7:22; 8:1-5) Kan panahon ni Pablo, mahalagang marhay sa mga Kristiano an siring na mga paliwanag kan Ley, asin iyo pa man giraray ngonyan. Tinatabangan kita kaiyan na lubos na masabotan an kahalagahan kan mga probisyon na ginibo nin Dios para sa sato.
2. Ano an bentaha kan Judiong mga Kristiano sa mga Gentil?
2 Kan si Pablo magsurat sa mga Kristiano sa Roma, an nagkapira sa mga komento nia ipinanongod nia sa mga miembro kan kongregasyon na Judio an ginikanan asin natokdoan sa Ley ni Moises. Sinabi nia na huling pamilyar sinda sa Ley na iyan nin Dios, may bentaha sinda huling igwa sinda nin “kabilogan kan kaaraman asin kan katotoohan” mapadapit ki Jehova asin sa saiyang matanos na mga prinsipyo. An pakasabot sa siring na ‘kabilogan kan katotoohan’ asin an odok sa pusong paggalang dian nagpangyari sa Judiong mga Kristiano, arog kan maimbod na mga Judio na naenot sa sainda, na giyahan, tokdoan, asin paliwanagan an mga mayong pakaaram sa Ley na itinao ni Jehova sa saiyang banwaan.—Basahon an Roma 2:17-20.
MGA ANINO KAN ATANG NI JESUS
3. Paano kita nakikinabang sa pag-adal sa mga atang kan suanoy na mga Judio?
3 An kabilogan kan katotoohan na sinambit ni Pablo mahalaga pa man giraray tanganing masabotan niato an mga katuyohan ni Jehova. An mga prinsipyo sa likod kan Ley ni Moises dai nawaran nin ano man na halaga. Mantang nasa isip ini, estudyaran niato an saro sanang aspekto kan Ley na iyan—kun paano an manlaenlaen na atang asin dolot naggiya sa mapakumbabang mga Judio pasiring ki Cristo asin nakatabang na masabotan ninda an kahagadan nin Dios sa sainda. Asin huling an pangenot na mga kahagadan ni Jehova sa mga lingkod nia nungkang nagbabago, maheheling ta man na an mga ley nin Dios sa mga Israelita dapit sa mga atang asin dolot makakatabang sa sato na siyasaton an kalidad kan satong sagradong paglilingkod.—Mal. 3:6.
4, 5. (a) Ano an ipinagirumdom kan Ley ni Moises sa banwaan nin Dios? (b) Ano an ipinapanganino kan mga atang?
4 Dakol na aspekto kan Ley ni Moises an nagdoon sa suanoy na mga Judio na sinda makasalan. Halimbawa, an siisay man na nakaduta nin bangkay kaipuhan na mag-agi nin pagdalisay. Sa katuyohan na ini, sarong pulang baka na daing depekto an binubuno asin sinusulo. An abo kaiyan itinatago para sa “tubig” na panglinig, na iwiniwirik sa tawong dinadalisay sa ikatolo asin ikapitong aldaw pagkatapos siang maramogan. (Bil. 19:1-13) Asin bilang pagirumdom na an pagkabakong sangkap asin kasalan ikinakapasa paagi sa pangangaki, an nangaking babae magigin maati sa laog nin sarong peryodo nin panahon, dangan gigibohon nia an pagbayad sa kasalan paagi sa sarong atang.—Lev. 12:1-8.
5 An atang na mga hayop kahagadan sa dakol na iba pang situwasyon sa pang-aroaldaw na buhay para sa pagbayad sa mga kasalan. Narerealisar man iyan kan parasamba o dai, an mga atang na ini—asin an mga iinatang kan huri sa templo ni Jehova—“anino” kan sangkap na atang ni Jesus.—Heb. 10:1-10.
AN TAMANG SABOOT SA PAG-ATANG
6, 7. (a) Ano an dapat na girumdomon kan mga Israelita kun sinda nagpipili nin idodolot, asin ano an ipinanganino kaini? (b) Ano an mga puede niatong ihapot sa satong sadiri?
6 An sarong pangenot na kahagadan dapit sa ano man na hayop na iaatang ki Jehova iyo na iyan “dai nin kaninan” o depekto sa gabos na aspekto—bakong buta, mayong lugad o diperensia, asin mayong helang. (Lev. 22:20-22) Kun an mga Israelita nagdodolot nin mga bunga o tipasi ki Jehova, dapat na iyan an “enot na mga bunga,” an “pinakamarahay na gayo” sa mga ani ninda. (Bil. 18:12, 29, NW) An hababang klase nin atang dai inaako ni Jehova. Ilinaladawan kan mahalagang kahagadan dapit sa mga atang na hayop na an atang ni Jesus magigin daing digta saka dai nin kaninan asin na an iaatang ni Jehova tanganing tuboson an katawohan iyo an pinakamarahay sa saiya asin pinakanamomotan nia.—1 Ped. 1:18, 19.
7 Kun an tawong nag-aatang tunay na nagpapasalamat ki Jehova sa gabos Niang karahayan, bako daw na maogma niang pipilion an pinakamarahay na yaon sa saiya? An kalidad kan dolot nakadepende sa indibiduwal. Minsan siring, aram niang dai maoogma an Dios sa dolot na may depekto huling ipaparisa kaiyan na an pag-atang ibinibilang niang pormalidad sana, o pagabat pa ngani. (Basahon an Malaquias 1:6-8, 13.) Huli kaini, maninigo niatong horophoropon an satong paglilingkod sa Dios: ‘Ano an saboot ko sa paglilingkod ki Jehova? Angay daw na siyasaton ko an kalidad kan sakong paglilingkod asin an sakong motibo sa paglilingkod sa saiya?’
8, 9. Taano ta maninigo niatong isip-isipon an saboot kan mga Israelita sa pag-atang?
8 Kun an atang nin sarong Israelita gikan sa boot na kapahayagan nin sinserong pasasalamat ki Jehova o paghagad kan saiyang pag-oyon paagi sa dolot na tinotong, posibleng marhay na dai sia madedepisilan sa pagpili nin iaatang na hayop. Maoogma an nagsasamba na itao ki Jehova an pinakamarahay na yaon sa saiya. An mga Kristiano ngonyan dai ginigibo an literal na pag-atang na sinabi sa Ley ni Moises; pero nag-aatang sinda paagi sa paggamit kan saindang panahon, kosog, asin materyal na mga rogaring tanganing paglingkodan si Jehova. Sinabi ni apostol Pablo na an ‘pagtuga,’ o pagpapahayag sa publiko kan Kristianong paglaom, asin “an pagguibo nin marahay” saka paghiras nin mga bagay sa iba mga atang na nakakapaogma sa Dios. (Heb. 13:15, 16) An saboot nin mga lingkod ni Jehova sa pakikikabtang sa siring na mga gibohon naghahayag kan rarom kan saindang pasasalamat asin pagpapahalaga sa gabos na itinao sa sainda nin Dios. Kaya, may pagkakaagid an saboot saka motibasyon kan mga nakikikabtang sa Kristianong paglilingkod ngonyan asin kan mga nagdodolot nin gikan sa boot na mga atang kan suanoy na mga panahon.
9 Pero, ano an masasabi nindo sa situwasyon kun saen kahagadan sa Ley ni Moises na an nagkasala magtao nin dolot manongod sa kasalan o dolot para sa pagkakasala? Sa paghona mo, may epekto daw iyan sa gikan sa boot na pag-atang nin saro huling obligado siang gibohon iyan? Posible daw na an siring na mga atang idinolot nin napipiritan sana? (Lev. 4:27, 28) Dai, kun an nag-atang sinserong nagmamawot na mapagdanay an marahay na relasyon ki Jehova.
10. Anong “mga atang” an tibaad kaipuhan gibohon kan mga Kristiano tanganing pakarhayon an naraot na relasyon?
10 Ngonyan, tibaad marealisar man nindo na nakolgan nindo an boot nin sarong tugang huling tibaad dai kamo nagin mataktika o maingat. Tibaad sabihon sa saindo kan konsensia nindo na may nagibo kamong sala. Kun an saro seryoso sa saiyang paglilingkod ki Jehova, bako daw na gigibohon nia an saiyang pinakamakakaya tanganing itanos an saiyang pagkukulang? Iyan puedeng mangahulogan nin seryosong paghagad nin dispensa sa nakolgan o, kun magabat an pagkakasala, paghagad nin espirituwal na tabang sa mamomoton na Kristianong mga paraataman. (Mat. 5:23, 24; Sant. 5:14, 15) Kaya, may kalabot na pagsasakripisyo tanganing ikatanos niato an pagkakasala sa kapwa o sa Dios mismo. Pero, huli sa siring na “mga atang” niato, ikinakabalik ta an satong relasyon ki Jehova asin sa satong tugang saka nagkakaigwa kita nin malinig na konsensia. Huli kaini, nasisierto niato na an paagi ni Jehova iyo an pinakamarahay.
11, 12. (a) Ano an mga atang para sa pakikikabtang? (b) Paano an atang para sa pakikikabtang konektado sa dalisay na pagsamba sa presenteng panahon?
11 May mga atang na sinabi sa Ley ni Moises na ibinibilang na mga dolot para sa pakikikabtang. Ini nangangahulogan nin pakikipagkatoninongan ki Jehova. An nagdodolot nin arog kaiyan asin an saiyang pamilya makakan kan karne kan iinatang na hayop, tibaad sa saro sa mga kuartong kakanan kan templo. An saserdote na nangengenot sa seremonya nag-aako nin kabtang kan karne, siring man an iba pang saserdote na naglilingkod sa templo. (Lev. 3:1; 7:31-33) An dahelan kaya nag-aatang an saro iyo na gusto niang magkaigwa nin marahay na relasyon sa Dios. An parasamba, an saiyang pamilya, an mga saserdote, asin si Jehova mismo garo man sana iribang nagkakakan na magayagaya asin may katoninongan.
12 May maorog pa daw sa pribilehio na imbitaran si Jehova sa simbolikong paagi na umiba sa sato sa siring na pagkakan, asin na akoon nia an satong imbitasyon? Natural sana, mawot kan kag-imbitar na ialok an pinakamarahay sa siring na kagalanggalang na bisita. An probisyon na atang para sa pakikikabtang, na parte kan kabilogan kan katotoohan na nasa Ley, nagpapaheling na paagi sa mas dakulang atang ni Jesus, an gabos na gustong magkaigwa nin dayupot asin matoninong na relasyon sa saindang Kaglalang puedeng magkamit kaiyan. Ngonyan, puede kitang magin katood asin kaibaiba ni Jehova kun gikan sa boot niatong ginagamit an satong kosog asin materyal na mga rogaring sa paglilingkod sa saiya.
MGA PATANID DAPIT SA MGA ATANG
13, 14. Taano ta dai inako ni Jehova an gusto kutanang iatang ni Hadeng Saul?
13 Natural sana, tanganing akoon ni Jehova an mga atang na ipinagboot sa Ley ni Moises, kaipuhan na idolot iyan na may tamang saboot asin kamugtakan nin puso. Minsan siring, an Biblia igwa nin nagpapatanid na mga halimbawa nin mga atang na dai inaako ni Jehova. Taano ta dai nia iyan inako? Pag-olayan niato an duwang situwasyon.
14 Sinabihan ni propeta Samuel si Hadeng Saul na uminabot na an panahon ni Jehova tanganing gadanon an mga Amalecita. Kaya, dapat na pohoon ni Saul an kaiwal na nasyon na ini kaiba an ataman na mga hayop kaiyan. Minsan siring, pakapanggana ni Saul, tinogotan nia an saiyang mga soldados na itadang buhay si Agag, an hade kan mga Amalecita. Itinada man ni Saul an pinakamarahay sa mga hayop ninda tanganing iatang ki Jehova. (1 Sam. 15:2, 3, 21) Ano an reaksion ni Jehova? Isinikwal nia si Saul huli sa dai pagkuyog kaini. (Basahon an 1 Samuel 15:22, 23.) Ano an manonodan niato digdi? An atang dapat na may kaibang pagkuyog sa mga pagboot nin Dios tanganing akoon nia iyan.
15. Ano an ipinaheling kan maraot na paggawe kan nagkapirang Israelita na nag-aatang kan panahon ni Isaias?
15 May kaagid na halimbawa sa libro nin Isaias. Kan panahon ni Isaias, an mga Israelita nag-aatang ki Jehova. Minsan siring, maraot an saindang mga ginigibo kaya an saindang pag-atang daing saysay. ‘Anong kamanungdanan sa sakuya kan kadakolan kan saindong mga atang?’ an ihinapot ni Jehova. ‘Omoy na ako sa mga atang na pinagtototong na mga karnero, asin sa taba nin mga matatabang hayop; habo ko nin dugo nin mga baka, minsan nin mga lalaking kanding. Dai na kamo magdara sa sakuya nin mayong kahulogan na dolot. An pahamot karumpotan sa sakuya.’ Ano an nagin problema? Sinabi sa sainda nin Dios: “Kun papagdakolon nindo an pamibi, dai ako maghihinaniog: pano nin dugo an saindong magña kamot. Panghugas kamo, paglinig kamo; halea nindo an kaliuagan [“karatan,” NW] sa saindong magña guibo sa atubagñan nin sakuyang magña mata; pabayae [‘iontok,’ NW] nindo an pagguibo kan maraot.”—Isa. 1:11-16.
16. Ano an nagdedeterminar kun baga an sarong atang inaako nin Dios?
16 Dai si Jehova naoogma sa mga atang na idinodolot nin habong magsolsol na mga parakasala. Minsan siring, inaako nin Dios an mga pamibi asin dolot kan mga sinserong nagmamaigot na mamuhay kaoyon kan mga pagboot nia. An kabilogan kan Ley nagtokdo sa siring na mga indibiduwal na sinda makasalan asin nangangaipo nin kapatawadan. (Gal. 3:19) Huli sa pakarealisar na iyan, tama sanang makamate nin pagbasol an saro. Ngonyan, dapat man niatong midbidon na kaipuhan niato an atang ni Cristo, na talagang nakakabayad nin mga kasalan. Kun nasasabotan asin pinapahalagahan niato ini, ‘maoogma’ nanggad si Jehova sa gabos na idinodolot niato sa saiya sa satong dusay na paglilingkod.—Basahon an Salmo 51:17, 19.
MAGTUBOD SA ATANG NI JESUS!
17-19. (a) Paano niato ikakapaheling ki Jehova sa tamang paagi an satong pasasalamat sa atang na pantubos ni Jesus? (b) Ano an pag-oolayan sa masunod na artikulo?
17 An bentaha niato sa mga nabuhay bago an panahon kan mga Kristiano iyo na bako sanang “anino” kan mga katuyohan nin Dios an naheheling niato. (Heb. 10:1) Huli sa mga ley dapit sa mga atang, nadagka an mga Judio na pataluboon an tamang saboot tanganing magkamit nin marahay na relasyon sa Dios—tunay na pagpasalamat sa saiya, pagmawot na itao sa saiya an pinakamarahay, asin pagmidbid na kaipuhan an pantubos. Sa tabang kan mga paliwanag kan Kristianong Griegong Kasuratan, nasasabotan niato na paagi sa pantubos, permanenteng hahaleon ni Jehova an mga epekto nin kasalan asin na tinotogotan nia kitang magkaigwa nin marahay na konsensia sa atubangan nia dawa ngonyan. An atang na pantubos ni Jesus sarong marahayon na probisyon!—Gal. 3:13; Heb. 9:9, 14.
18 Siempre, tanganing makinabang kita sa atang na pantubos, orog pa an kaipuhan kisa sa pakasabot sana kaiyan. “An katogonan naguin satong paraaling [“paratokdo,” NW] sa pagdara sato ki Cristo, tagñaning kita pakangmatanoson huli sa pagtubod,” an isinurat ni apostol Pablo. (Gal. 3:24) Asin an siring na pagtubod dai puedeng mayong gibo. (Sant. 2:26) Huli kaini, dinagka ni Pablo an mga Kristiano kan enot na siglo, na igwa kan kabilogan kan kaaraman na sinabi sa Ley ni Moises, na iaplikar an kaaraman na iyan. Sa paggibo kaiyan, an saindang paggawe magigin kaoyon kan mga prinsipyo nin Dios na itinokdo ninda.—Basahon an Roma 2:21-23.
19 Minsan ngani bakong kahagadan sa mga Kristiano ngonyan na sunodon an Ley ni Moises, kaipuhan pa man giraray nindang magdolot nin mga atang na inaako ni Jehova. Pag-oolayan niato sa masunod na artikulo kun paano niato ini magigibo.
[Mga Hapot Para sa Pag-adal]
[Blurb sa pahina 17]
Nungkang nagbabago an pangenot na mga kahagadan ni Jehova sa saiyang mga lingkod
[Ritrato sa pahina 18]
Arin kutana sa duwang ini an idodolot mo ki Jehova?
[Ritrato sa pahina 19]
An mga nagdodolot nin mga atang na inaako ni Jehova nagkakamit kan saiyang pag-oyon
