Arogon an Pagigin Mapagbantay ni Jesus
Arogon an Pagigin Mapagbantay ni Jesus
“Magpuka kamo asin mamibi.”—MAT. 26:41.
ANO AN ISISIMBAG NINDO?
Paano maheheling sa satong mga pamibi na kita nagbabantay?
Sa anong mga paagi niato ikakapaheling na mapagbantay kita sa satong ministeryo?
Taano ta mahalagang magdanay kitang mapagbantay kun nag-aagi nin pagbalo, asin paano niato iyan magigibo?
1, 2. (a) Ano an mga posibleng ihapot mapadapit sa pagigin mapagbantay ni Jesus? (b) Makakatabang daw sa makasalan na mga tawo an perpektong halimbawa ni Jesus? Iladawan.
TIBAAD isip-isipon nindo: ‘Posible daw talagang maarog an pagigin puka, o mapagbantay, ni Jesus? Sia perpekto! Apuera kaiyan, may beses na aram na ni Jesus an mangyayari sa maabot na panahon—dawa rinibong taon pa! Kaipuhan daw talaga niang magin mapagbantay?’ (Mat. 24:37-39; Heb. 4:15) Pag-olayan nguna niato an mga hapot na iyan tanganing masabotan niato kun taano ta kaipuhan asin mahalaga an temang ini.
2 Makakatabang daw sa makasalan na mga tawo an perpektong halimbawa? Iyo, huli ta posibleng makanood sa marahay na paratokdo asin sa halimbawa kaini. Halimbawa, imahinara an saro na nagpopoon pa sanang mag-adal nin pagpana. Dai nanggad nia kayang patamaon an pana sa target, alagad padagos siang nag-aadal asin nagpoprobar. Tanganing umoswag, maingat niang pinag-aadalan an halimbawa kan nagtotokdo sa saiya, na ekspertong parapana. Inoobserbaran nia kun paano ini minatindog saka kun paano kaini ipinoposisyon an mga takyag asin kinakapotan an lubid kan búsog. Padikitdikit, nanonodan kan determinadong nag-aadal kun ano an tamang puersa sa pag-ignit kan lubid; kinokonsiderar nia an doros, asin padagos siang naghihingoa. Paagi sa pag-arog nia sa ginigibo kan nagtotokdo sa saiya, luway-luway siang nag-ooswag sagkod na kaya na niang patamaan an sentro kan target. Bilang mga Kristiano, padagos man kitang naghihingoa na umoswag paagi sa pagsunod sa mga instruksion ni Jesus asin pag-arog sa saiyang perpektong halimbawa.
3. (a) Paano ipinarisa ni Jesus na kaipuhan nia an kualidad na pagigin mapagbantay? (b) Ano an pag-oolayan niato sa artikulong ini?
3 Pero, kumusta man an pagigin mapagbantay? Talaga daw na kaipuhan ni Jesus an kualidad na ini? Iyo nanggad. Halimbawa, kan huring banggi kan buhay ni Jesus digdi sa daga, sinadol nia an maimbod niang mga apostol: “Magpuka sa kaiba ko.” Sinabi pa nia: ‘Magpuka kamo asin mamibi tanganing dai kamo makalaog sa sugot.’ (Mat. 26:38, 41) Minsan ngani dati na siang mapagbantay, nangorognang minawot ni Jesus na magin mapagbantay asin dayupot nanggad sa saiyang langitnon na Ama sa masakit na mga oras na idto. Aram nia na an mga parasunod nia kaipuhan man na magin mapagbantay—bako lang kaidto kundi sa maabot pang panahon. Kaya pag-olayan niato kun taano ta mawot ni Jesus na padagos kitang magbantay. Pagkatapos, sisiyasaton niato an tolong paagi na maaarog niato sa satong aroaldaw na buhay an pagigin mapagbantay ni Jesus.
KUN TAANO TA MAWOT NI JESUS NA MAGIN MAPAGBANTAY KITA
4. Taano ta kaipuhan kitang magin mapagbantay?
4 Sa halipot na pagtaram, mawot ni Jesus na magdanay kitang mapagbantay huli sa mga bagay na dai pa niato aram manongod sa maabot na panahon asin sa mga bagay na aram na niato. Kan si Jesus tawo digdi sa daga, aram daw nia an gabos na mangyayari sa maabot na panahon? Dai, huling mapakumbaba niang inako: ‘Dapit kan aldaw asin kan oras na iyan, daing nakakaisi, minsan an mga anghel sa langit, ni an Aki, kundi an Ama sana.’ (Mat. 24:36) Kan panahon na iyan, dai aram nin eksakto ni Jesus, “an Aki,” kun noarin maabot an katapusan kan maraot na kinaban na ini. Kumusta man kita ngonyan? Limitado daw an aram niato dapit sa maabot na panahon? Siempre! Dai niato aram kun noarin man nanggad isusugo ni Jehova an saiyang Aki tanganing taposon an maraot na sistemang ini nin mga bagay. Kun aram niato, talaga daw na kaipuhan niatong padagos na magbantay? Arog kan ipinaliwanag ni Jesus, an katapusan maabot nin bigla asin dai inaasahan, kaya kaipuhan na pirme kitang magin mapagbantay.—Basahon an Mateo 24:43.
5, 6. (a) Paanong an kaaraman niato dapit sa maabot na panahon asin sa mga katuyohan nin Dios konektado sa pangangaipo niatong magin mapagbantay? (b) Taano ta an kaaraman niato manongod ki Satanas nagmomotibar sa sato na magin mas determinadong magin mapagbantay?
5 Sa ibong na lado, may aram si Jesus na dakol na makangangalas na bagay manongod sa maabot na panahon—mga katotoohan na dai man lamang aram kan kadaklan na tawo sa palibot nia. An kaaraman niato dai makakapareho sa kaaraman ni Jesus, alagad sa tabang nia, dakol kitang aram manongod sa Kahadean nin Dios asin sa madali nang gibohon kaiyan. Kun inoobserbaran niato an mga tawo sa palibot niato, baga man sa eskuelahan, trabaho, o teritoryo na hinuhulitan niato, bako daw na an kadaklan sa sainda nabubuhay sa grabeng kadikloman mapadapit sa magayonon na mga katotoohan na ini? Kaya, iyan an saro pang dahelan na magin mapagbantay. Arog ni Jesus, kaipuhan niatong magin pirmeng alerto, na nag-aabang nin mga oportunidad na masabi sa iba an aram niato manongod sa Kahadean nin Dios. Mahalagang marhay an lambang arog kaiyan na oportunidad, asin habo niatong may masayang dawa saro kaiyan. Buhay an nakataya!—1 Tim. 4:16.
6 May iba pang aram si Jesus na nagmotibar sa saiya na padagos na magbantay. Aram nia na determinado si Satanas na tentaran asin persegiron sia, patin raoton an saiyang integridad. An maraoton na kaiwal na iyan pirmeng nagbabantay nin “ibang kombenyenteng panahon” tanganing baloon si Jesus. (Luc. 4:13, NW) Nungkang nagin pabaya si Jesus. Gusto niang magin andam para sa ano man na pagbalo, iyan man pagtentar, pagkontra, o pagpersegir. Bako daw na totoong-totoo man iyan sa sato? Aram niato na sagkod ngonyan, si Satanas “siring sa nagngangarob na leon, na naghahanap nin masisiba.” Kaya, sinasadol kan Tataramon nin Dios an gabos na Kristiano: “Papagdanayon nindo an toltol na pag-iisip, magin mapagbantay.” (1 Ped. 5:8, NW) Pero, paano niato iyan magigibo?
KUN PAANO MAGIGIN MAPAGBANTAY SA PAMIMIBI
7, 8. Anong konseho mapadapit sa pamimibi an itinao ni Jesus, asin anong halimbawa an ipinaheling nia?
7 Ipinapaheling kan Biblia na an pagigin alerto o mapagbantay sa espirituwal konektadong marhay sa pamimibi. (Col. 4:2; 1 Ped. 4:7) Dai nahaloy pagkatapos pakiolayan ni Jesus an saiyang mga parasunod na padagos na magbantay kaiba nia, sia nagsabi: ‘Magpuka kamo asin mamibi tanganing dai kamo makalaog sa sugot.’ (Mat. 26:41) An konseho daw niang iyan aplikado sana sa masakit na kamugtakan ninda kaidto? Bako, saro iyan na prinsipyo na dapat niatong iaplikar aroaldaw.
8 Nagtao si Jesus nin marahayon na halimbawa sa pamimibi. Tibaad magirumdoman nindo na magdamlag siang namibi kaidto sa saiyang Ama. Probaran niatong imahinaron an eksena. (Basahon an Lucas 6:12, 13.) Tigsoli (springtime) kaidto, posibleng marhay na harani sa banwaan na dakol nin parasira, an Capernaum, na pinakadagosan ni Jesus sa rehion. Kan pabanggi na, si Jesus nagtukad sa saro sa kabukidan na duman natatanaw an Dagat nin Galilea. Mantang tinatanaw nia an nagdidiklom nang palibot, tibaad naheheling nia an pagkimatkimat nin mga gasera sa Capernaum sa may ibaba asin sa iba pang kaharaning mga baryo. Pero, kan kinakaolay ni Jesus si Jehova, sia nakapokus na marhay sa saiyang pamibi. Luminihis an mga minuto, dangan mga oras. Dai nia namamangnohan mantang an mga ilaw sa ibaba saro-sarong napapalsok, o mantang an bulan garo nag-aagi sa kalangitan, o mantang naghahanap nin makakakan an mga hayop na nagluluwas kun banggi. Posibleng marhay na an saiyang pamibi nakasentro sa dakulang desisyon na gigibohon nia—an pagpili kan 12 apostol nia. Maiimahinar niato si Jesus na nagkokonsentrar sa pagsabi sa saiyang Ama kan gabos niang nasa isip asin ikinakahadit manongod sa lambang disipulo mantang odok siang nakikimaherak para sa paggiya asin kadonongan.
9. Ano an manonodan niato sa magdamlag na pamimibi ni Jesus?
9 Ano an manonodan niato sa halimbawa ni Jesus? Na maninigo kitang mamibi nin dakol na oras? Dai, huling may kabootan niang inadmitir manongod sa saiyang mga parasunod: ‘An espiritu nagmamawot nanggad, alagad an laman maluya.’ (Mat. 26:41) Minsan siring, maaarog niato si Jesus. Halimbawa, kinokonsulta daw niato an satong Ama sa langit bago magdesisyon nin ano man na puedeng makaapektar sa espirituwalidad niato, kan satong pamilya, o kan satong mga kapagtubod? Kaiba daw sa mga pamibi niato an mga ikinakahadit niato dapit sa satong mga kapagtubod? Gikan sa puso daw kitang namimibi imbes na inoorootro an iyo man sanang mga tataramon? Mangnoha man na pinahalagahan ni Jesus an dayupot na pakikipag-olay sa saiyang Ama. Huli sa sibot-sibot na kinaban ngonyan, madalion sana kitang magin okupadong marhay kaya nalilingawan na niato an pinakamahalaga. Kun tatawan niato nin igong panahon an hararom asin personal na pamimibi, magigin mas alerto kita sa espirituwal. (Mat. 6:6, 7) Magigin mas harani kita ki Jehova, asin mamawoton nanggad niatong pakosogon an satong relasyon sa saiya saka likayan na gumibo nin ano man na makakapaluya dian.—Sal. 25:14, NW.
KUN PAANO MAGIGIN MAPAGBANTAY SA PAGHUHULIT
10. Anong halimbawa an nagpapaheling kun paano si Jesus nagdanay na alerto sa mga oportunidad na makapagpatotoo?
10 Nagin mapagbantay si Jesus sa gibohon na itinao sa saiya ni Jehova. Tibaad may mga trabaho na puedeng maglagawlagaw an isip nin saro alagad mayo nin seryosong mga konsekuensia. Pero, dakol na trabaho an nangangaipo nin pagigin pokus na marhay saka alerto, asin siring nanggad kaiyan an Kristianong ministeryo. Si Jesus pirmeng nagin alerto sa gibohon nia, na nagbabantay sa mga oportunidad na ikapaabot an maogmang bareta. Halimbawa, kan sia asin an saiyang mga disipulo mag-abot sa siudad nin Sicar pagkatapos nin bilog na agang pagbaklay, an mga disipulo naghale tanganing magbakal nin pagkakan. Nagpahingalo si Jesus harani sa bubon kan siudad, alagad nagdanay siang alerto, asin nakaheling sia nin oportunidad na makapagpatotoo. Sarong Samaritana an nag-abot tanganing magsakdo. Puede kutanang magtorog na sana nin kadikit si Jesus. Puede kutana siang mag-isip nin mga rason na dai makipag-olay. Minsan siring, kinaolay nia an babae, inengganyar na makipag-olay sa saiya, asin tinawan nin mapuersang patotoo na nagkaigwa nin epekto sa dakol na tawo sa siudad na iyan. (Juan 4:4-26, 39-42) Puede daw niatong arogon nin mas maingat an pagigin mapagbantay ni Jesus, tibaad paagi sa paghihingoang magin orog na alerto sa mga oportunidad na ikapaabot an maogmang bareta sa mga tawong nanonompongan niato sa aroaldaw?
11, 12. (a) Ano an nagin reaksion ni Jesus sa mga naghingoang irayo an atension nia sa saiyang gibohon? (b) Paano ipinaheling ni Jesus an pagigin timbang sa saiyang gibohon?
11 Kun beses, hiningoa nin mga indibiduwal na may marahay na intension na irayo an atension ni Jesus sa saiyang gibohon. Sa Capernaum, napahirong marhay an mga tawo huli sa mga milagro nin pagpaomay ni Jesus kaya gusto nindang pugolan siang maghale. Natural sana iyan. Minsan siring, an sugo ki Jesus iyo na maghulit sa gabos na ‘karnerong nalagalag sa harong ni Israel,’ bako sanang sa mga nasa sarong siudad o banwaan. (Mat. 15:24) Kaya, sinabihan nia an mga tawong idto: ‘Ako kaipuhan na maghulit kan mga marahay na bareta kan kahadean nin Dios sa ibang mga banwa man, huli ta dahel kaini ako sinugo.’ (Luc. 4:40-44) Malinaw nanggad, nakapokus an buhay ni Jesus sa saiyang ministeryo. Dai nia tinogotan na may makadisturbo sa saiya.
12 An pagigin pokus daw ni Jesus sa saiyang gibohon uminabot sa punto na sia nagin nang panatiko o dai na nag-oogma sa buhay? Sibot-sibot daw sia sa saiyang ministeryo sagkod sa puntong mayo na siang pakilabot sa praktikal na mga pangangaipo nin mga pamilya? Bako, si Jesus nagpaheling nin perpektong halimbawa nin pagigin timbang. Ikinaogma nia an buhay asin an pakikiiba sa saiyang mga katood. Pinahalagahan nia an mga pamilya, na ipinaheling na nasasabotan nanggad nia an saindang mga pangangaipo asin problema, asin lubos siang nagpaheling nin kapadangatan sa mga aki.—Basahon an Marcos 10:13-16.
13. Sa paghuhulit niato kan Kahadean, paano niato maaarog an pagigin timbang asin mapagbantay ni Jesus?
13 Mantang inaarog niato an pagigin mapagbantay ni Jesus, paano kita magmamaigot na magin timbang man? Dai niato tinotogotan an kinaban na ini na irayo an satong atension sa satong gibohon. Dawa an may marahay na intension na mga katood asin paryente tibaad magsadol sa sato na dai pakaigot sa satong ministeryo o na mamuhay sa iniisip nindang normal na paagi. Minsan siring, kun inaarog niato si Jesus, mamansayon niato an satong ministeryo na siring sa pagkakan. (Juan 4:34) An satong gibohon nagpapakosog sa sato sa espirituwal asin nakakapaogma man na marhay sa sato. Pero, nungka niatong mamawoton na magin panatiko, na nagpapakangmatanos o dai na nag-oogma sa buhay. Arog ni Jesus, gusto niatong magin magayagaya asin timbang na mga lingkod kan “maogmang Dios.”—1 Tim. 1:11, NW.
KUN PAANO MAGIGIN MAPAGBANTAY SA MGA PANAHON NIN PAGBALO
14. Sa mga panahon nin pagbalo, anong tendensia an kaipuhan niatong paglabanan, asin taano?
14 Arog kan naheling niato, itinao ni Jesus an nagkapira sa pinakakaipuhan na mga sadol na magdanay na mapagbantay kan sia napapaatubang sa grabeng pagbalo. (Basahon an Marcos 14:37.) Sa panahon nin mga kasakitan, kaipuhan niato an saiyang halimbawa orog kisa kasuarin man. Kun nasa pagbalo, dakol an may tendensiang malingawan an sarong katotoohan, na mahalagang marhay kaya duwang beses iyan na sinambit sa libro nin Talinhaga: ‘Igwa nin dalan na sa tawo garo tanos, alagad ta an saiyang kasagkodan mga dalan nin kagadanan.’ (Tal. 14:12; 16:25) Kun magsasarig kita sa sadiri tang kaisipan, nangorogna kun may seryoso kitang mga problema, posibleng marhay na isapeligro niato an satong sadiri asin an mga namomotan niato.
15. Anong pagtentar an tibaad mapaatubang sa payo nin pamilya sa mga panahon na masakit an pagbuhay?
15 Halimbawa, tibaad nasasakitan na marhay an sarong payo nin pamilya na itao an materyal na pangangaipo kan “mga sadiri nia.” (1 Tim. 5:8, NW) Tibaad matentaran siang akoon an sarong trabaho na magigin dahelan na dai sia makaatender sa Kristianong mga pagtiripon, makapangenot sa pampamilyang pagsamba, o makapakikabtang sa ministeryo. Kun magsasarig sana sia sa kaisipan nin tawo, an pag-ako kaiyan garo baga rasonable, o tama pa ngani. Minsan siring, tibaad magresulta nanggad iyan sa espirituwal na helang o kagadanan. Mas marahay nanggad na sunodon an konseho sa Talinhaga 3:5, 6! Si Salomon nagsabi: ‘Manarig ka ki Jehova sa bilog mong puso, asin dai ka manarig sa saimong pagkatatao. Midbidon mo sia sa gabos mong dalan, asin sia an magtatanos kan saimong mga dana.’
16. (a) Anong halimbawa an ipinaheling ni Jesus dapit sa pagtitiwala sa kadonongan ni Jehova imbes na sa sadiri? (b) Paano inaarog nin dakol na payo nin pamilya an pagtitiwala ni Jesus ki Jehova durante nin kasakitan?
16 Kan si Jesus napaatubang sa pagbalo, dai nanggad sia nagtiwala sa sadiring pakasabot. Isip-isipa iyan! An pinakamadonong na tawo na nabuhay sa daga kasuarin man dai nagsarig sa sadiri niang kadonongan. Halimbawa, kan tentaran sia ni Satanas, paorootrong nagsimbag si Jesus: “Nasusurat.” (Mat. 4:4, 7, 10) Nagsarig sia sa kadonongan kan saiyang Ama tanganing malabanan an pagtentar, na ipinapaheling an kapakumbabaan na mayo nanggad ki Satanas asin ikinakauyam kaini. Iyan man daw an ginigibo ta? An payo nin pamilya na nag-aarog sa pagigin mapagbantay ni Jesus nagpapagiya sa Tataramon nin Dios, nangorogna sa mga panahon nin pagbalo. Sa bilog na kinaban, iyan nanggad an ginigibo nin rinibo na payo nin pamilya. Marigon nindang ineenot sa saindang buhay an Kahadean nin Dios asin dalisay na pagsamba kisa sa materyal na mga pangangaipo. Paagi kaiyan, naaasikaso ninda sa pinakamarahay na paagi an saindang pamilya. Dangan, binebendisyonan ni Jehova an saindang mga paghihingoa na ikatao an materyal na mga pangangaipo, arog kan ipinanuga sa saiyang Tataramon.—Mat. 6:33.
17. Ano an nagpapahiro sa saindo na arogon an pagigin mapagbantay ni Jesus?
17 Mayong duda na si Jesus an pinakamarahay na halimbawa nin pagigin mapagbantay. An saiyang halimbawa praktikal, kapakipakinabang, asin nagliligtas-buhay pa ngani. Girumdomon na gustong-gusto ni Satanas na mapatorog kamo sa espirituwal—magluya an pagtubod, magin paramas an pagsamba, asin ikompromiso an saindong integridad. (1 Tes. 5:6) Dai pagtogotan na magin mapanggana sia! Arog ni Jesus, magdanay na mapagbantay—sa saindong pamimibi, ministeryo, asin pag-atubang sa mga pagbalo. Sa paggibo kaiyan, magigin mabunga, maogma, asin nakakakontento an saindong buhay dawa sa panahon na ini na patapos na an sistemang ini nin mga bagay. Siring man, masisierto nindo na kun dumatong an saindong Kagurangnan tanganing taposon an sistemang ini, manonompongan nia kamong alerto asin aktibong naggigibo kan kabotan kan saiyang Ama. Maoogma nanggad si Jehova na tawan kamo nin balos sa kaimbodan nindo!—Kap. 16:15.
[Mga Hapot Para sa Pag-adal]
[Ritrato sa pahina 6]
Si Jesus naghulit sa babae sa may bubon. Ano an ginigibo mo tanganing magkaoportunidad na maghulit aroaldaw?
[Ritrato sa pahina 7]
An pag-asikaso sa espirituwalidad kan saimong pamilya nagpapaheling na ika mapagbantay
