Makosog an Boot na Ibinalangibog Ninda an Tataramon nin Dios!

Kosog nin boot​—⁠pagkapusoan pa ngani​—⁠kun napapaatubang sa pagtumang. Igwa kan mga kualidad na ini an tunay na mga Kristiano, arog kan ipinapaheling sa mga publikasyon na “Bearing Thorough Witness” About God’s Kingdom asin Jehovah’s Witnesses​—⁠Proclaimers of God’s Kingdom. Arog kan satong mga kapagtubod kan enot na siglo, minadolok kita ki Jehova sa pag-arang kan saiyang espiritu asin tabang na ikataram na may pagkapusoan an saiyang tataramon.​—⁠Gui. 4:​23-31.

Mapadapit sa satong paghuhulit durante kan enot na guerra mundial, an sarong brother nagsurat: “Entusiastikong idinidistribwir kan mga lingkod nin Dios an ikapitong tomo kan Studies in the Scriptures, na may titulong The Finished Mystery. Iyan an may pinakadakol na kopya na ikinakadistribwir kaidto. Ilinuwas kan 1918 an Kingdom News No. 1. Suminunod an Kingdom News No. 2, na nagpapaliwanag kun taano ta ipinagbawal kan mga autoridad an The Finished Mystery. Sinundan ini kan Kingdom News No. 3. Mahiwas an pagkawaras kan maimbod na grupong linahidan sa mga publikasyon na ini. Kinaipuhan an pagtubod asin kosog nin boot tanganing ikadistribwir an Kingdom News.”

Ngonyan, an bagohan na mga parahayag kan Kahadean parateng sinasanay sa ministeryo, alagad bakong pirmeng arog kaiyan kaidto. Sa paghorophorop kan saiyang enot na eksperyensia sa paglilingkod sa langtad kan 1922, sarong brother na taga Polandia na nasa Estados Unidos an nagsurat: “Dawa dai ko aram kun paano ipepresentar an literatura asin maluyahon ako sa pagtaram nin Ingles, nagtindog akong solo sa atubangan kan klinika nin sarong doktor asin nagtuktok. Sarong nars an nagbukas kan pinto. Nungka kong malilingawan an eksperyensiang iyan, huling ganado ako pero natatakot. Mantang binubukasan ko an sakong bag, nagkahurulog an gabos na libro sa bitis kan nars. Dai ko aram kun ano an sakong sinabi, alagad nakapasakamot ako nin publikasyon sa saiya. Paghale ko, nagkosog an boot ko asin namatean ko na binendisyonan ako ni Jehova. Kan aldaw na idto, dakol na buklet an ikinapasakamot ko sa komersial na tinampong iyan.”

“Kan mga 1933, dakol na brother an naggamit nin mga autong may loudspeaker tanganing ikapalakop an mensahe kan Kahadean,” an sabi nin sarong sister. Sarong beses, sia asin an sarong mag-agom na Saksi naghuhulit sa mabukid na lugar kan California, E.U.A. “Dinara kan brother an autong may loudspeaker sa itaas sa kabukidan, asin nagdanay kami sa ibaba, sa may sentro kan banwaan,” an nagirumdoman nia. “Kan patanogon na nia an irinekord na mensahe, an tanog kaiyan garo baga hale sa langit. Pigparahanap kan mga taga duman an brother, alagad nungka nindang nahanap sia. Kan tapos na an pagpatanog, dinumanan mi an mga tawo asin nagpatotoo kami sa sainda. Nag-iba ako sa duwa pang autong may loudspeaker asin talagang an kadaklan na tawo habong magdangog sa mensahe. Alagad mayo na sindang magigibo kundi dangogon an mga pahayag mantang an mensahe hale sa mga autong may loudspeaker klarong nadadangog sa saindang mga harong. Pirme niamong naheheling na pinapangyari ni  Jehova na magamit an tamang paagi sa tamang panahon. An paaging iyan nangaipo nanggad nin kosog nin boot, alagad pirme kaiyan na naootob an katuyohan kaiyan, asin napapamuraway an ngaran ni Jehova.”

Kan dekada nin 1930 asin enot na mga taon kan dekada nin 1940, ginamit sa satong ministeryo an mga ponograpo asin nakarekord na mga pahayag sa Biblia. Nagirumdoman nin sarong Kristiana: “Sarong hoben na sister an naghaharongharong na may darang ponograpo. Kan patanogon na nia an ponograpo sa sarong pinto, an lalaking kagharong naanggot na gayo kaya sinikadan kaini an ponograpo paluwas sa beranda. Mayo ni sarong plaka na naraot. Tolong lalaki na nangungudto sa sarong nakaparadang trak an nakaheling kan nangyari, inimbitaran ninda an sister na ipadangog sa sainda an nakarekord na mensahe, asin nagkua sinda nin literatura sa saiya. Nakapagian iyan sa bakong magayon na pagtrato sa saiya.” Kinaipuhan an kosog nin boot tanganing tagalan an siring na mga pagbalo.

An iyo man sanang sister nagsabi pa: “Natatandaan ko kan ponan an pag-alok nin mga magasin sa tinampo kan 1940. Bago kaiyan, igwa nin mga martsa para sa pagtao nin impormasyon. Mantang surunodan na nakalinya, an mga tugang minalakaw sa mga gilid nin tinampo dara an mga karatula na an nakasurat ‘An Relihion Sarong Siod Asin Raket’ asin ‘Maglingkod sa Dios Asin ki Cristo na Hade.’ Kadungan kaiyan, may mga tract na ipinapanao nin libre sa mga tawo. Kinaipuhan an kosog nin boot sa pagpartisipar sa mga kabtang na ini kan gibohon, alagad naotob kaiyan an katuyohan na padagos na magin hayag sa publiko an ngaran asin banwaan ni Jehova.”

“Depisilon an pag-alok nin mga magasin sa saradit na banwaan,” an sabi nin saro pang sister. “Nangyari ini kan grabe an pagkontra sa mga Saksi. . . . Talagang kaipuhan an kosog nin boot na tumindog sa kanto kapot an mga magasin mantang sinasabi an mga sarabihon na isinusuherir na gamiton mi. Pero, bihira kaming magpalta nin Sabado. Kun beses an mga tawo mainamigo. May mga panahon man na minatiripon an anggot na mga grupo, asin kun minsan kaipuhan ming dumulag tanganing malikayan mi na pagsururogan ninda.”

Sa ibong kan persekusyon kan Guerra Mundial II, makosog an boot na ginibo kan mga Saksi ni Jehova an saindang ministeryo. Sa 43 na aldaw na kampanya poon Disyembre 1, 1940, sagkod Enero 12, 1941, mga 50,000 na parahayag sa Estados Unidos an nakapagdistribwir nin haros walong milyon na buklet durante kan inaapod na “Kosog nin Boot” na Peryodo nin Pagpapatotoo.

Malinaw na nagigirumdoman nin dakol na may edad na sa organisasyon nin Dios an nakaaging mga kadepisilan na nangaipo kan kosog nin boot ninda. Natatandaan nin nagkapira na sa laog nin dakol na taon, ipinaheling ninda an saindang kosog nin boot paagi sa paorootrong pagsambit kan sarabihon na ini: Padagos kitang maghulit nin maigot sagkod sa katapusan! Maaaraman pag-abot nin panahon kun ano pang paagi nin paghayag kan satong mensahe hale sa Dios an gagamiton bago matapos an presenteng maraot na sistema. Minsan siring, sa tabang nin Dios, padagos niatong ibabalangibog an tataramon ni Jehova na may pagtubod asin kosog nin boot.

[Blurb sa pahina 9]

An kosog nin boot pirmeng kaipuhan sa pakikikabtang sa paghuhulit kan Kahadean