Pagdanayon an Positibong Espiritu kan Kongregasyon

‘An biyaya nin Kagurangnan na Jesu-Cristo mapasaindong espiritu.’​—⁠FIL. 4:⁠23.

PAANO KITA MAKAKATABANG PARA SA MARAHAY NA ESPIRITU SA KONGREGASYON . . .

mantang nakikiibaiba sa mga tugang niato?

kun maigot kita sa ministeryo sa langtad?

kun isinusumbong niato an magabat na pagkakasala?

1. Sa ano kinomendaran an mga kongregasyon sa Filipos asin Tiatira?

AN MGA Kristiano sa Filipos kan enot na siglo dukha sa materyal. Minsan siring, sinda bukas-palad asin nagpaheling nin arogan na pagkamoot sa saindang mga kapagtubod. (Fil. 1:​3-5, 9; 4:​15, 16) Kaya, sa pagtatapos kan saiyang ipinasabong na surat sa sainda, si apostol Pablo makakapagsabi: ‘An biyaya nin Kagurangnan na Jesu-Cristo mapasaindong espiritu.’ (Fil. 4:23) Huling ikinapaheling kan mga Kristiano sa Tiatira an kaparehong espiritu, sinabihan sinda kan pinamuraway na si Jesu-Cristo: ‘Ako nakakaaram kan saindong mga gibo, asin kan saindong pagkamoot asin pagtubod asin paglingkod patin pakatios, asin na an mga gibo nindong nahuri anan orog ki kan mga naenot.’​—⁠Kap. 2:⁠19.

2. Ano an kabtang niato sa ipinapaheling na espiritu kan satong kongregasyon?

² An lambang kongregasyon nin mga Saksi ni Jehova ngonyan may ipinapaheling man na partikular na espiritu, o nangingibabaw na atitud. An nagkapirang kongregasyon nangorognang midbid sa pagpaheling nin maboot asin mamomoton na espiritu. An iba may pambihirang kaigotan sa pagsuportar sa paghuhulit kan Kahadean asin nagpapahalagang marhay sa bilog na panahon na ministeryo. Kun kita, bilang mga indibiduwal, nagpapatalubo nin positibong espiritu, nakakatabang kita sa pagkasararo kan kongregasyon asin sa espirituwal na pag-oswag kaiyan sa pangkagabsan. (1 Cor. 1:10) Sa ibong na lado, an pagkaigwa niato nin negatibong espiritu makakakontribwir sa espirituwal na pagkatungka, pagigin bakong mainit ni malipot, asin pagkonsinte pa ngani sa maraot na gibo sa kongregasyon. (1 Cor. 5:1; Kap. 3:​15, 16) Ano an espiritu kan saindong kongregasyon? Paano ka personalmenteng makakatabang na magkaigwa nin positibong espiritu sa kongregasyon?

 TUMABANG NA MAGKAIGWA NIN POSITIBONG ESPIRITU

3, 4. Paano niato mapapamuraway si Jehova sa dakulang katiriponan?

³ An salmista nag-awit: ‘Ipagbubuyboy [papamurawayon] taka Jehova sa dakulang katiriponan; pag-oomawon taka sa tahaw nin dakol na banwaan.’ (Sal. 35:18) An salmista dai nag-alangan na omawon si Jehova kan kaiba nia an iba pang mga lingkod nin Dios. An semanal na mga pagtiripon kan kongregasyon, kaiba an Pag-adal sa Torrengbantayan, nagtatao nin marahayon na mga oportunidad na ikapaheling niato an maigot na espiritu kun kita nagkokomento asin nagpapahayag nin pagtubod. Marahay na hapoton niato gabos an satong sadiri: ‘Lubos ko daw na inaaprobetsaran an pribilehiong makikabtang sa mga pagtiripon? Nag-aandam daw akong marhay para dian asin nagtatao nin makahulogan na mga komento? Bilang payo nin pamilya, tinatabangan ko daw an mga aki ko na patienot na mag-andam nin mga komento asin tinotokdoan ko daw sindang magsimbag sa sadiri nindang mga tataramon?’

⁴ An karigonan kan satong puso ikinonektar ni salmistang David sa satong pagkanta. Sinabi nia: “An sakong puso marigon, O Dios, an sakong puso marigon. Ako makanta.” (Sal. 57:​7, NW) An mga kanta na ginagamit sa Kristianong mga pagtiripon nagtatao sa sato nin marahayon na oportunidad na ‘magkanta’ ki Jehova na igwa nin marigon na puso. Kun bako kitang pamilyar sa nagkapira sa mga kanta, taano ta dai iyan praktison sa Pampamilyang Pagsamba? Magin determinado logod kitang ‘mag-awit ki Jehova sa [bilog] niatong buhay asin mag-awit nin pag-omaw sa saiya mantang kita nabubuhay.’​—⁠Sal. 104:⁠33.

5, 6. Paano kita puedeng magin mapag-istimar asin bukas-palad sa iba, asin ano an napapatalubo kaini sa kongregasyon?

⁵ An pagkamapag-istimar sa satong mga tugang saro pang paagi na nakakatabang na ipaheling an mamomoton na espiritu sa kongregasyon. Sa huring kapitulo kan surat ni Pablo sa mga Hebreo, iiniba nia an sadol na ini: “Magpadagos logod an saindong pagkamoot na sa magturugang. Dai nindo paglingawan an pagkamapag-istimar.” (Heb. 13:​1, 2, NW) An pagpakakan sa nagbibiaheng mga paraataman asin sa saindang agom o sa bilog na panahon na mga lingkod sa kongregasyon sarong marahayon na paagi na ikapaheling an pagkamapag-istimar. Dai man paglingawan an mga babaeng balo, mga pamilya na may nagsosolong magurang, o iba pang mga indibiduwal na puedeng makinabang sa paminsanminsan na pag-iba sa sato sa pagkakan o pampamilyang pagsamba.

 ⁶ Sinabihan ni Pablo si Timoteo na sadolon an iba na ‘maggibo nin marahay, tanganing sinda magyaman sa mga marahay na gibo, na sinda magin andam sa pagwaras, na may boot sa pagdamay, na nagririmpos manongod sa sainda man sana nin marahay na pasisikadan [pundasyon] manongod sa panahon na madatong,’ tanganing sinda makapangapot nin marigon sa tunay na buhay. (1 Tim. 6:​17-19) Sinasadol ni Pablo an saiyang mga kapwa parasamba na pataluboon an pagigin bukas-palad. Dawa sa mga panahon na masakit an pagbuhay, ikakapaheling niato an espiritu nin pagkabukas-palad. An sarong marahayon na paagi na ikapaheling ini iyo an pag-imbitar sa iba na magsakay sa saindong lunadan kun maglilingkod sa langtad asin kun maatender sa mga pagtiripon. Asin kumusta man an mga nakikinabang sa siring na mga gibo nin mamomoton na kabootan? Makakatabang sinda na magkaigwa nin positibong espiritu sa kongregasyon kun sinda magpapaheling nin pagpapahalaga, tibaad paagi sa pag-alok na makatabang na mataparan an naglalangkaw na gastos sa gasolina. Dugang pa, bako daw na mamamatean kan satong espirituwal na mga tugang na sinda importante asin namomotan kun iaareglo niato na parate sindang makaibanan? Kun dakol kitang marahay na ginigibo ‘sa mga kapagtubod’ asin andam kitang magtao nin panahon saka materyal na mga bagay sa sainda, dai sana niato napapararom an satong pagkamoot sa sainda kundi nakakatabang man kita na mapatalubo an mamomoton asin positibong espiritu sa kongregasyon.​—⁠Gal. 6:⁠10.

7. Paano an dai paghayag nin personal na mga bagay nin iba nakakatabang na mapagdanay an marahay na espiritu sa kongregasyon?

⁷ Isip-isipa an iba pang bagay na nakakapakosog sa bogkos nin pagkamoot sa satong mga kapagtubod: an pakikiamigo asin pagtago nin sekreto. (Basahon an Talinhaga 18:24. *) Dai iineestorya sa iba nin tunay na mga mag-amigo an personal na mga bagay. Kun sinasabi sa sato kan satong mga tugang an saindang kairairaroming kaisipan asin pagmate saka nakakasegurado sindang dai iyan maaaraman nin iba, orog na minakosog an bogkos nin pagkamoot na tibaad dati nang yaon. Logod na paoswagon niato an mamomoton asin garo sa pamilyang espiritu sa kongregasyon paagi sa pagigin mapagtitiwalaan na amigo na kayang magtago nin sekreto.​—⁠Tal. 20:⁠19.

MAGIN MAIGOT SA MINISTERYO

8. Anong sadol an itinao sa mga taga Laodicea, asin taano?

⁸ Sinabi ni Jesus sa kongregasyon sa Laodicea: ‘Ako nakakaaram kan saimong mga gibo, na ika bakong malipot, ni mainit! Logod na ika malipot o mainit. Kaya huling ika gabinhod [maimbong], asin bakong mainit ni malipot, itutupga taka.’ (Kap. 3:​15, 16) An mga taga Laodicea bakong maigot sa Kristianong ministeryo. Posibleng marhay na nakaapektar man iyan sa saindang personal na relasyon sa lambang saro. Kaya, mamomoton na sinadol sinda ni Jesus: ‘An gabos na namomotan ko, sinasagwe ko asin hinahampak [dinidisiplina]; kaya mag-ingat ka asin magsolsol.’​—⁠Kap. 3:⁠19.

9. Paano an satong atitud sa ministeryo sa langtad may epekto sa espiritu kan kongregasyon?

 ⁹ Tanganing makatabang para sa marahay asin positibong espiritu sa kongregasyon, maninigo kitang magin maigot sa paglilingkod sa langtad. An kongregasyon inorganisar sa katuyohan na hanapon an arog-karnerong mga indibiduwal sa teritoryo asin pakosogon sinda sa espirituwal. Huli kaini, dapat kitang entusiastikong makikabtang sa paggibo nin mga disipulo, arog ni Jesus. (Mat. 28:​19, 20; Luc. 4:43) Mientras na mas maigot kita sa ministeryo, mas magigin sararo kita bilang ‘mga katabang nin Dios.’ (1 Cor. 3:⁠9) Mantang naoobserbaran niato an iba sa paglilingkod sa langtad, na idinedepensa an saindang pagtubod asin ipinapahayag an pagpapahalaga sa espirituwal na mga bagay, napapahiro kitang orog sindang kamotan asin igalang. Siring man, an daramay na paglilingkod sa ministeryo nagbubunga nin nagkakasararong espiritu sa kongregasyon.​—⁠Basahon an Sofonias 3:⁠9.

10. Ano an epekto sa ibang miembro kan kongregasyon kan pagmamaigot niatong paoswagon an kalidad kan satong paglilingkod sa langtad?

¹⁰ An mga paghihingoa niato na paoswagon an kalidad kan satong ministeryo may marahay na epekto man sa iba. Mantang nagpapaheling kita nin orog na pagmakolog sa mga nakakaolay niato, asin mantang naghihingoa kitang magin mas epektibo sa pag-abot sa puso kan mga nagdadangog sa sato, nag-oorog an entusiasmo niato sa ministeryo. (Mat. 9:​36, 37) An entusiasmo puedeng makaimpluwensia sa satong kairiba. Isinugo ni Jesus an saiyang mga disipulo na maghulit nin manduwaduwa imbes na magsolo. (Luc. 10:⁠1) Dai sana ini nagtao nin pamparigon sa boot asin pagsasanay kundi nakapakosog man ini sa saindang kaigotan sa ministeryo. Bako daw na pinapahalagahan niato na nakakaibanan ta sa paglilingkod an maigot na mga parahayag kan Kahadean? An pagigin entusiastiko ninda nakakadagka asin nakakapahiro sa sato na magpadagos sa paghuhulit.​—⁠Roma 1:⁠12.

MAG-INGAT TUMANG SA PAGGUMODGUMOD ASIN MARAOT NA GIBO

11. Anong klaseng atitud an napatalubo nin nagkapirang Israelita kan panahon ni Moises, asin ano an nagin epekto kaini sa sainda?

¹¹ Nagkapirang semana sana pakatapos na magin sarong bagong nasyon an mga Israelita, sinda nagin diskontento asin naggurumodgumod. Nagresulta ini sa pagrebelde ki Jehova asin sa saiyang mga representante. (Ex. 16:​1, 2) Dikit sanang Israelita na naghale sa Egipto an nakalaog sa Dagang Panuga. An totoo, dawa si Moises dai pinalaog sa dagang iyan huli sa saiyang reaksion sa maraot na atitud kan kongregasyon nin Israel! (Deut. 32:​48-52) Ano an magigibo niato ngonyan tanganing dai magkaigwa nin negatibong espiritu?

12. Paano kita makakapag-ingat na dai magin mapagreklamo?

¹² Dapat kitang mag-ingat na dai magin mapaggumodgumod. Apuera sa kapakumbabaan asin paggalang sa autoridad, makakatabang man sa sato an pagigin mapamili sa mga kaibaiba niato. An salang pagpili nin aling-alingan o paggamit nin labi-labing panahon sa pakikiiba sa mga katrabaho o kaeskuela na mayong pagpahalaga sa matanos na mga prinsipyo igwa nin grabeng epekto. Sarong kadonongan na limitaran niato an pakikiibaiba sa mga mapagreklamo o sa mga nagpapalakop nin independienteng atitud.​—⁠Tal. 13:⁠20.

13. An nakakaraot na impluwensia nin paggumodgumod puedeng magresulta sa anong iba pang bagay na nakakadanyar sa espirituwalidad kan kongregasyon?

¹³ An nakakaraot na impluwensia nin paggumodgumod puedeng magresulta sa iba pang mga bagay na nakakadanyar sa espirituwal. Halimbawa, an paggumodgumod puedeng makaapektar sa katoninongan asin pagkasararo nin kongregasyon. Dugang pa, an pagpahayag kan satong mga reklamo tumang sa mga kapagtubod tibaad dai sana makakolog sa sainda, kundi tibaad sumagkod man iyan sa pagpakaraot asin panglalait. (Lev. 19:16; 1 Cor. 5:11) An nagkapirang paragumodgumod sa kongregasyon kan enot na siglo “nagbabasangbasang sa pagkakagurangnan patin nagtataram na may panglilibak sa  mga mamuraway.” (Jud. 8, 16, NW) An siring na paggumodgumod tumang sa mga lalaking may katongdan sa kongregasyon siertong dai inooyonan nin Dios.

14, 15. (a) Kun papabayaan sana an maraot na gibo, ano an puedeng magin epekto kaini sa bilog na kongregasyon? (b) Ano an maninigo niatong gibohon kun maaraman niato na an saro may ginigibong hilom na kasalan?

¹⁴ Paano kun maaraman niato na an saro may ginigibong hilom na kasalan, na tibaad nag-aabuso nin inomon na de alkohol, nagheheling nin pornograpiya, o namumuhay nin imoral? (Efe. 5:​11, 12) An pagbutabutahan niato sa magabat na kasalan puedeng makaolang sa pagbolos kan banal na espiritu ni Jehova asin magsapeligro kan katoninongan kan bilog na kongregasyon. (Gal. 5:​19-23) Kun paanong kinaipuhan kan enot na mga Kristiano sa Corinto na haleon an karatan, kaipuhan man ngonyan na haleon sa kongregasyon an ano man na nakakaraot na impluwensia tanganing mapagdanay an marahay asin positibong espiritu kaiyan. Ano an magigibo mo tanganing makakontribwir sa katoninongan kan kongregasyon?

¹⁵ Arog kan nasambitan sa enotan, may mga bagay na mahalagang pagdanayon na sekreto, nangorogna kun sinabi sa sato nin iba an saindang mga pagmate asin kaisipan. Sala asin nakakakolog nanggad na ipang-estorya an kompidensial na impormasyon manongod sa saro! Dawa siring, kun magabat na kasalan an nakomiter, maninigong sabihon iyan sa mga elder sa kongregasyon, na may maka-Kasuratan na paninimbagan na mag-asikaso kaiyan. (Basahon an Levitico 5:⁠1.) Kaya, kun may aram kitang tugang na nakagibo nin siring na kasalan, maninigo niato siang dagkahon na dumolok sa mga elder asin magpatabang sa sainda. (Sant. 5:​13-15) Pero, kun dai nia iyan gigibohon sa laog nin rasonableng peryodo nin panahon, maninigo niatong isumbong an pagkakasala.

16. Paano an pagsumbong niato nin magabat na kasalan nakakatabang na maingatan an espiritu kan kongregasyon?

¹⁶ An Kristianong kongregasyon sarong espirituwal na pailihan, asin dapat kitang tumabang na protehiran iyan paagi sa pagsumbong nin magabat na pagkakasala. Kun matabangan kan mga elder an nagkasala na makapag-isip-isip asin may pagsolsol niang akoon an pagsagwe asin pagtatanos, dai na nia isinasapeligro an espiritu kan kongregasyon. Alagad, paano kun an nakagibo nin magabat na kasalan dai nagsosolsol asin dai naghihimate sa mamomoton na konseho kan mga elder? An pagtiwalag sa saiya sa kongregasyon minaresulta sa “paglaglag,” o paghale, kan nakakaraot na impluwensia sa tahaw niato, asin naiingatan an espiritu kan kongregasyon. (Basahon an 1 Corinto 5:⁠5.) Iyo, tanganing maingatan an espiritu kan kongregasyon, an lambang saro sa sato kaipuhan na gumibo nin tamang aksion, makikooperar sa grupo nin kamagurangan, asin protehiran an kapakanan kan mga kapagtubod niato.

TUMABANG PARA SA ‘PAGKASARARO KAN ESPIRITU’

17, 18. Ano an makakatabang sa sato na ‘pangatamanan an pagkasararo kan espiritu’?

¹⁷ Paagi sa pagigin ‘maigot sa katokdoan kan mga apostol,’ an enot na mga parasunod ni Jesus nakatabang na magkaigwa nin espiritu nin pagkasararo sa laog kan kongregasyon. (Gui. 2:42) Pinahalagahan ninda an sono sa Kasuratan na konseho asin paggiya na inako ninda hale sa kamagurangan na lalaki. Huling an mga elder sa presenteng panahon nakikikooperar sa grupong maimbod asin mapagmansay na oripon, an gabos sa kongregasyon nadadagka asin natatabangan na magdanay na sararo. (1 Cor. 1:10) Kun kita nagpapasakop sa basado sa Bibliang instruksion hale sa organisasyon ni Jehova asin nagsusunod sa paggiya kan mga elder, nagtatao kita nin prueba na ‘maigot kita sa pangangataman kan pagkasararo kan espiritu sa gapos [bogkos] nin katoninongan.’​—⁠Efe. 4:⁠3.

¹⁸ Kun siring, magmaigot nanggad kita na pagdanayon an marahay asin positibong espiritu sa kongregasyon. Kun gigibohon niato iyan, makakasierto kita na an dai na kutana maninigong kabootan o ‘an biyaya nin Kagurangnan na Jesu-Cristo mapapasa espiritu’ na ipinapaheling niato.​—⁠Fil. 4:⁠23.

[Nota sa Ibaba]

[Mga Hapot Para sa Pag-adal]

[Ritrato sa pahina 19]

Nakakatabang ka daw na ipaheling an positibong espiritu paagi sa pag-andam nin makahulogan na mga komento?

[Ritrato sa pahina 20]

Tumabang na ipaheling an positibong espiritu paagi sa pagigin pamilyar sa mga kanta niato