Isinaysay ni Lois Didur

Pirang beses na daw sa buhay mo na nasabi mo an siring kaini, ‘Kutana dai ko ginibo idto’? Bueno, pakalihis nin 50 taon sa bilog na panahon na paglilingkod, mayo lamang akong maisip na permanenteng dai nakakagayagaya na minagikan sa pagigin nasa too ni Jehova. Togotan nindo akong iestorya kun taano.

NAMUNDAG ako kan 1939 asin nagdakula sa puerang lugar na Saskatchewan, Canada, kaiba kan apat kong tugang na babae asin sarong tugang na lalaki. Maogma an buhay sa kaplanodohan na oma. Sarong aldaw, nakipag-olay an mga Saksi ni Jehova sa sakong ama, asin hinapot ko sinda kun may ngaran an Dios. Ipinaheling ninda sa samo an ngaran na Jehova sa Salmo 83:18. Huli kaiyan, gusto kong makaaram pa manongod sa Dios asin sa Tataramon nia.

Kan mga taon na idto, an mga aki sa oma nag-eeskuela sagkod sa ikawalong grado sa sasaro sanang kuartong mga eskuelahan na nasa puerang lugar. Nagsasakay sinda sa mga kabayo o naglalakaw nin dakol na kilometro paeskuelahan. An mga pangangaipo kan maestro sinusustentohan kan mga pamilya sa distrito. Sarong taon kaidto, turno na kan mga magurang ko na asikasohon an bagong maestro, si John Didur.

Dai ko aram na an hoben na lalaking ini interesadong-interesado man palan sa Tataramon nin Dios. Sarong beses, inoomaw ko an komunismo asin sosyalismo, na sinusuportaran kaidto kan sakong ama. Si John kalmadong nagsimbag: “Mayong tawo na may deretsong pamahalaan an ibang mga tawo. Solamenteng an Dios an may arog kaiyan na deretso.” Nagbunga iyan nin dakol na interesanteng orolay.

Huling namundag kan 1931, nabaretaan ni John an mga kasakitan huli sa giera. Kan puminutok an Giera sa Korea kan 1950, manlaenlaen na klerigo an hinapot nia manongod sa pakikilabot ninda sa giera. An gabos nagsabi na an mga Kristiano puedeng makikabtang sa giera. Paghaloyhaloy, ihinapot man nia iyan sa mga Saksi ni Jehova. Ipinaheling ninda sa saiya an sono sa Kasuratan na paninindogan kan enot na mga Kristiano kun dapit sa giera. Si John nabautismohan kan 1955. Kan suminunod na taon, iyo man ako. Aram niamo  pareho na gusto ming gamiton an samong buhay asin kosog sa paglilingkod ki Jehova. (Sal. 37:​3, 4) Kan Hulyo 1957, nagpakasal kami ni John.

Dakol na taon na an samong anibersaryo nin kasal natatangod sa panahon nin kombension mi. Naoogma kami na makaibanan an rinibong iba pa na iginagalang an pag-agoman. Taon 1958 kan enot kaming mag-atender nin internasyonal na kombension. Lima kaming nagbiahe sakay nin auto pasiring sa Siudad nin Nueva York hale sa Saskatchewan. Sa laog nin sarong semana, nagbibiahe kami kun aldaw, asin kada banggi nagtotorog kami sa tolda. Imahinara na sana an samong pagkasorpresa kan imbitaran kami nin sarong brother na nakamidbid mi sa Bethlehem, Pennsylvania, na magdagos sa saindang harong kan bangging iyan! Huli sa saiyang gikan sa boot na kabootan, nakaabot kaming malinig asin areglado sa Siudad nin Nueva York. Ikinatadom sa isip mi an pambihirang kaogmahan sa paglilingkod ki Jehova huli sa dakulaon na kombension na iyan! Siring sa isinurat kan salmista, ‘may kagayagayahan sa too mo sagkod lamang.’​—⁠Sal. 16:⁠11.

PAGPAPAYUNIR

Pakalihis nin sarong taon, kan 1959, nagpapayunir kami asin nakaistar sa sarong sadit na harong na de rueda na nasa itaas nin sarong bulod sa kaplanodohan sa Saskatchewan. Hale duman, maheheling an sagkod sa distansiang dakol na kilometro, asin teritoryo mi an ibang sakop kaiyan.

Sarong aldaw, may nag-abot na interesanteng surat hale sa sangang opisina. Dali-dali kong dinumanan si John sa pinagtatrabahohan kaini na kun saen gamit nia an traktora. Sa surat, inimbitaran kami na magin espesyal payunir sa Red Lake, Ontario. Huling dai mi aram kun saen iyan, tolos ming ilinuwas an mga mapa tanganing hanapon iyan.

Dakula nanggad an kalaenan kaiyan sa mahiwas na mga kaplanodohan! Yaon na kami sa darakulaon na kadlagan asin saradit na banwaan na inestablisar harani sa mga minahan nin bulawan. Kan naghahanap kami nin madadagosan kan primerong aldaw, nadangog nin sadit na aking babae an pinag-oolayan mi kan kataed ninda. Nagdalagan sia papuli sa saiyang ina, na maboot na nag-alok sa samo nin madadagosan sa magdamlag. An higdaan yaon sa maating bodega. Kan sunod na aldaw, nakahanap kami nin gibo sa troso na harong, na may duwang kuarto, mayong instalasyon nin mga tubo, mayong muebles, asin an yaon sana iyo an sarong pampainit na lata na ginagatongan nin kahoy. Nakabakal kami nin pira sanang gamit sa tindahan nin mga segunda mano asin nakontento na kami.

An pinakaharaning kongregasyon nasa labing 209 kilometros an rayo. Dakol na trabahador sa mga minahan nin bulawan an hale sa Europa, asin naghapot sinda kun puede ming ikua sinda nin Biblia sa lenguahe ninda. Sa halipot na panahon, nagkaigwa kami nin 30 mahuhusay na tinotokdoan sa Biblia. Sa laog nin anom na bulan, may sadit na kongregasyon na naestablisar.

Inapodan kan agom nin sarong babaeng tinotokdoan mi an padi sa saiyang simbahan tanganing dumanan sinda asin paliwanagan an agom nia. Durante kan paghampangan, sinabi kan padi na maninigong iiba mi an Trinidad sa mga itinotokdo mi. Kinua kan babae an saindang Bibliang Katoliko asin sinabi sa padi na suportaran an mga sinasabi nia. Ibinaribad kan padi an Biblia sa ibong kan lamesa, na sinasabi na mayo siang kaipuhan na patunayan. Kan pahale na sia, sinabi nia sa lenguaheng Ukrainian na maninigo ninda kaming palayason sa harong asin nungka nang padagoson giraray. Dai nia aram na nasasabotan ni John an Ukrainian!

Dai nahaloy pagkatapos kaiyan, naghale kami sa Red Lake huling sasanayon si John para sa pansirkitong gibohon. Minsan siring, pakalihis nin mga sarong taon, durante kan pahayag ni John sa bautismo sa sarong pandistritong kombension, an agom na lalaking idto kabilang sa mga kandidato sa bautismo! An pangyayaring idto na imbuelto an padi nagin dahelan na magsiyasat sia mismo sa Biblia.

 SIBOT SA PANSIRKITONG GIBOHON

Sa pansirkitong gibohon, nagkaigwa kami nin daing kaagid na kaogmahan na makidagos sa dakol na manlaenlaen na pamilya. Nagin dayupot kaming marhay sa mga nagpadagos sa samo asin nakaibaiba mi. Sarong beses, nasa sarong kuarto kami sa itaas na mayong pampainit kun tiglipot. Kun amay na aga, madadangog mi an may edad nang sister na toninong na minalaog sa samong kuarto tanganing suloan an sadit na kalan. Paghaloyhaloy, minabalik sia na may planggana asin maimbong na tubig tanganing makapagpreparar na kami para sa bilog na aldaw. Dakol an nanodan ko sa saiyang pagigin toninong asin maboot.

An pansirkitong gibohon nakatabang sa sako na magin mas harani ki Jehova. Kaiba sa sarong sirkito sa Alberta an sarong banwaan na may minahan sa Harayong Amihanan, na may nakaistar na sister. Paano minansay kan organisasyon ni Jehova an napapasuway na sister na iyan? Kada anom na bulan, nag-eeroplano kami paduman tanganing maglingkod nin sarong semana asin gibohon an mga pagtiripon kaiba nia, arog kan ginigibo sa dakulang kongregasyon sa siudad. Ipinapagirumdom kaiyan an mamomoton na pagmakolog ni Jehova sa kada sarong sadit na arog-karnero.

Padagos an komunikasyon mi sa dakol na nag-alok sa samo nin madadagosan. Nagigirumdoman ko logod an saro sa enot na mga regalo ni John sa sako​—⁠sarong makolor na kahon na pano nin suratan na papel. Lubos ming ikinaogma an pakikikomunikar sa mga katood paagi sa koreo, na ginagamit an siring na suratan. Iniingatan ko pa man giraray an kahon na iyan.

Mantang yaon kami sa sarong sirkito sa Toronto, may brother hale sa Bethel sa Canada na nag-apod sa telepono asin naghapot kun gusto ming maglaog sa Bethel. Noarin nia kaipuhan an simbag? “Kun posible, sa aga!” Inako mi iyan kan sunod na aldaw.

PAGLILINGKOD SA BETHEL

Sa kada pagbago nin asignasyon, naheling mi an manlaenlaen na aspekto kan kagayagayahan na minagikan ki Jehova. Nagpadagos iyan kan maglaog kami sa Bethel kan 1977. Huli sa pakikiasosyar sa nagkapira sa mga linahidan, naheling mi bako sana an saindang laen-laen na personalidad kundi pati an halangkaw na pagpahalaga ninda sa Tataramon nin Dios.

Nakakaogma an bagong rutina sa Bethel. Halimbawa, an samong mga bado yaon na ngonyan sa sulong-sulong imbes na sa maleta, asin kabilang kami sa sarong kongregasyon. Apuera sa trabaho ko, an pagigin tour guide nin mga grupong nagpapasyar pirmeng nakakaogmang eksperyensia para sa sako. Ipinapaliwanag ko an mga ginigibo sa Bethel, dinadangog an komento kan mga tugang na nagpapasyar, asin sinisimbag an mga hapot ninda.

Marikas na nag-agi an mga taon, asin kan 1997, inimbitaran si John na mag-adal sa School for Branch Committee Members sa Patterson, Nueva York. Pagkatapos kaiyan, hinapot kami kun gusto ming bumalyo sa Ukraine. Dinagka kami na pag-isipan na marhay asin mapagngayongayong ipamibi iyan. Bago matapos an bangging iyan, segurado na kaming iyo an simbag mi.

SARO PANG PAGBABAGO​—⁠UKRAINE

Nakaatender kami sa dakulang internasyonal na kombension sa St. Petersburg, Russia, kan 1992, dangan sa Kiev, Ukraine, kan 1993. Huli sa mga kombension na idto, namotan mi an samong mga tugang sa Sirangan na Europa. An bagong dagosan mi sa Lviv, Ukraine, nasa ikaduwang eskalon nin lumang harong. Sa pagdungaw sa mga bintana, maheheling an natad na may sadit na hardin, dakulang lalong na kolor pula, asin mga siyo. An pagmate ko garo yaon ako sa oma sa Saskatchewan. Dose kaming nakaistar sa harong na iyan. Kada amay na aga kaipuhan ming umagi sa siudad tanganing magtrabaho sa Bethel.

Ano an namatean mi na yaon kami sa Ukraine? An makaibanan an dakol na nag-agi nin mga pagbalo, pagbabawal, asin pagkabilanggo nakakatabang sa samo na magin mapakumbaba. Pinagdanay nindang makosog  an saindang pagtubod. Kun inoomaw mi sinda, sinasabi ninda, “Ginibo mi iyan para ki Jehova.” Nungka nindang namatean na pinabayaan sinda. Dawa ngonyan, kun may papasalamatan ka huli sa kabootan nia, puedeng magsimbag sia, “Pasalamatan mo si Jehova,” na paagi kaiyan minimidbid nia an Gikanan kan gabos na marahay na bagay.

Sa Ukraine, dakol an naglalakaw pasiring sa mga pagtiripon, kaya may panahon sindang mag-orolay asin magparinigonan. An paglakaw puedeng sarong oras o labi pa. Igwa nin labing 50 kongregasyon sa Lviv, na 21 sa mga ini an naggagamit nin dakulang edipisyo nin Kingdom Hall. Kun Domingo, magayonon paghelingon an dagos-dagos na pag-arabot nin mga tugang para sa mga pagtiripon.

Madali kaming nagin komportable sa mga tugang, na maboot asin andam na magpaheling nin pagmakolog sa iba. Mapasensiang marhay sinda kun nasasakitan akong saboton an lenguahe, na problema ko pa sagkod ngonyan. Maheheling ini sa maboot na pananaram ninda asin ekspresyon nin lalawgon.

Sarong halimbawa kan tunay na tiwala sa tahaw kan satong mga tugang an naheling durante kan internasyonal na kombension sa Kiev kan 2003. Nagbaba pa sana kami kaidto sa platform kan matawong istasyon nin tren sa irarom kan daga kan an sarong aking babae magrani sa samo asin kalmadong magsabi, “Nawawara po ako. Dai ko po mahanap an lola ko.” Naheling kan aki an badge card mi asin aram niang Saksi kami. Pusoanon sia asin dai naghibi. An agom nin paraataman nin sirkito na kaibanan mi may kabootan na dinara an aking babae sa Lost and Found Department sa istadyum. Dai nahaloy, an aking babae nakaibanan giraray kan lola nia. Napahiro akong marhay kan pambihirang tiwala kan aking ini, dawa rinibong tawo an nakapalibot sa saiya.

An mga tugang hale sa dakol na nasyon nag-abot sa Ukraine kan Mayo 2001 para sa dedikasyon kan samong bagong mga pasilidad kan sangang opisina. Pagkatapos kan espesyal na pahayag sa sarong istadyum kan Domingong aga, sarong dakulaon na grupo nin mga tugang an nagraralakaw sa tinampo tanganing magpasyar sa bagong Bethel. Dai nanggad malilingawan na eksena iyan! Napahiro nanggad ako na maheling an mga tugang na ini, na toninong asin areglado na marhay. Pinararom kaiyan an sakong pag-apresyar sa kagayagayahan na minagikan sa paglilingkod sa Dios.

SARONG DAKULANG PAGBABAGO

Makamomondo, kan 2004, nadiskobreng may kanser si John. Nagpa-Canada kami para sa pagpabolong nia. An enot na sesyon kan chemotherapy haros dai kinaya kan hawak nia, asin nagkapirang semana sia sa intensive care. Marahay sana ta napagmata sia. Minsan ngani nasasakitan nanggad siang magtaram, pirmeng maheheling sa mata nia an pag-apresyar sa gabos na nagbibisita sa saiya.

Alagad dai sia naomayan, asin nagadan sia kan panahon na idto nin tigrakdag (fall). Namatean ko na dakulaon na kabtang kan buhay ko an nawara. Ipinaggayagaya ming marhay ni John an paglilingkod ki Jehova na magkaibanan. Ano an gigibohon ko? Nagdesisyon akong magbalik sa Ukraine. Nagpapasalamat akong marhay sa mainit na pagkamoot kan pamilyang Bethel asin kan kongregasyon duman.

Nungka ming pinagbasolan an mga desisyon mi. Nakakaogma an buhay mi, na may pinakamarahay na pag-iriba. Aram ko na kadakol pa man giraray nin manonodan manongod sa karahayan ni Jehova, asin naglalaom ako na makapagpadagos sa paglilingkod sa saiya sagkod lamang huling nanompongan ko nanggad an ‘kagayagayahan sa too ni Jehova.’

[Blurb sa pahina 6]

“Nungka ming pinagbasolan an mga desisyon mi”

[Ritrato sa pahina 3]

Kan magpakasal kami ni John

[Ritrato sa pahina 4]

Kan espesyal payunir ako sa Red Lake, Ontario

[Ritrato sa pahina 5]

Kaiba ko si John sa Ukraine, kan 2002