Papagdanayon an Saindong Pakamate nin Pag-apura
Papagdanayon an Saindong Pakamate nin Pag-apura
“Ihulit mo an tataramon, gibohon iyan na may pagkaapurado.” —2 TIM. 4:2, NW.
IKAKAPALIWANAG DAW NINDO?
Taano ta naghulit na may pagkaapurado an mga Kristiano kan enot na siglo?
Paano niato mapagdadanay an satong pakamate nin pag-apura?
Taano ta apurado ngonyan orog kisa kasuarin man an paghuhulit kan Kahadean?
1, 2. Anong mga hapot an minalataw manongod sa pagboot na ‘maghulit kita na may pagkaapurado’?
AN MGA tawo na an trabaho magligtas nin buhay parateng minahiro na may pagkaapurado. Halimbawa, an mga bombero marikas na minaresponde kun igwa nin emerhensia; aram nindang puedeng may namemeligrong mga buhay.
2 Bilang mga Saksi ni Jehova, gusto niatong tabangan an mga tawo na makaligtas. Sa katuyohan na iyan, sineseryoso niato an sugo sa sato na ihulit an maogmang bareta kan Kahadean. Siempre, dai niato iyan ginigibo na may pagkataranta. Kun siring, ano an boot sabihon ni apostol Pablo kan sia magsadol: “Ihulit mo an tataramon, gibohon iyan na may pagkaapurado”? (2 Tim. 4:2, NW) Paano kita makakapaghulit na may pagkaapurado? Asin taano ta apuradong marhay an satong gibohon?
TAANO TA APURADO AN SATONG PAGHUHULIT?
3. Ano an puedeng magin resulta kan pag-ako o pagsayuma nin mga tawo sa mensahe kan Kahadean?
3 Kun iniisip-isip nindo kun paano an paghuhulit makakapagligtas nin buhay, posibleng namamatean nindo an pangangaipong ipakipag-olay sa iba an maogmang bareta. (Roma 10:13, 14) An Tataramon nin Dios nagsasabi: ‘Kun sabihan ko an maraot: “Totoong gayong magagadan ka,” kun sia maghale sa saiyang kasalan, asin maggibo nin matanos asin kabanalan, totoong gayong sia mabubuhay asin dai magagadan. Dai saiya gigirumdomon an arin man kan saiyang mga kasalan na saiyang naginibo.’ (Ezeq. 33:14-16) Tunay nanggad, sinasabi kan Biblia sa mga nagtotokdo kan mensahe nin Kahadean: ‘Makakaligtas ka asin an mga naghihinanyog saimo.’—1 Tim. 4:16; Ezeq. 3:17-21.
4. Paanong dahel sa apostasiya nagin apurado an paghuhulit kan enot na siglo?
4 Tanganing masabotan kun taano ta sinadol ni Pablo si Timoteo na maghulit na may pagkaapurado, estudyare an konteksto kan satong pinakatemang teksto. Mababasa niato: “Ihulit mo an tataramon, gibohon iyan na may pagkaapurado sa marahay na panahon, sa masakit na panahon, magsagwe, magtuyaw, magsadol, na may bilog na pakatios asin abilidad sa pagtotokdo. Huli ta madatong an panahon na dai na sinda matagal sa nakakarahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga; asin irarayo ninda an saindang talinga sa katotoohan.” (2 Tim. 4:2-4, NW) Ihinula ni Jesus na magkakaigwa nin apostasiya. (Mat. 13:24, 25, 38) Kaya, dapat na apuradong ‘ihulit ni Timoteo an tataramon’ dawa sa laog kan kongregasyon tanganing an mga Kristiano dai ikalagalag kan nakakaakit alagad mapandayang falsong mga katokdoan. Buhay an nakataya. Kumusta man ngonyan?
5, 6. Anong popular na mga ideya an tibaad pinaniniwalaan nin mga nakakaolay niato sa ministeryo?
5 An pag-apostata hale sa tunay na pagsamba nagtatalubo asin naglalakop ngonyan. (2 Tes. 2:3, 8) Anong mga katokdoan an nagpapagirok o garo nagkikitik sa talinga nin mga tawo ngonyan? Sa dakol na lugar, an entusiasmo sa pagtotokdo dapit sa ebolusyon siring kan sa relihion. Minsan ngani an ebolusyon sa parate ipinapaliwanag paagi sa siensia, iyan haros nagin nang relihion na mayong Dios, asin nakakaapektar iyan sa pagmansay nin mga tawo sa Dios asin sa kapwa. An saro pang popular na katokdoan iyo na an Dios bakong interesado sa sato; kaya, mayong dahelan na magin interesado kita sa saiya. Taano ta nakakaakit na marhay an mga katokdoan na ini, na huli kaiyan minilyon an napapatorog sa espirituwal? An duwang iyan parehong nagtotokdo na, ‘Puede mong gibohon an ano man na gusto mo huling dai ka man papanimbagon.’ Tunay nanggad na an mensaheng ini nagpapagirok sa talinga nin dakol.—Basahon an Salmo 10:4.
6 Alagad may iba pang mga nagpapagirok sa talinga nin mga tawo. An nagkapira na nagsisimba pa gustohon madangog an mga paratokdo na nagsasabi sa sainda na, ‘Ano man an ginigibo mo, namomotan ka nin Dios.’ Pinapagirok nin mga padi asin pastor an talinga nin iba paagi sa pagkombensir sa sainda na an mga seremonya, Misa, piesta, asin imahen may bendisyon nin Dios. Tibaad dai narerealisar kan mga parasimbang ini an peligro kan saindang situwasyon. (Sal. 115:4-8) Pero, kun mapupukaw niato sinda sa espirituwal tanganing masabotan ninda an tunay na mensahe kan Biblia, makikinabang sinda sa Kahadean nin Dios.
ANO AN BOOT SABIHON NIN APURADONG PAGHUHULIT?
7. Paano niato ikakapaheling an satong pakamate nin pag-apura?
7 An sarong maingat na siruhano dapat na magkonsentrar sa saiyang trabaho huling buhay an nakataya. Sa satong Kristianong ministeryo, ikakapaheling niato an pakamate nin pag-apura paagi sa pagkonsentrar sa satong gibohon, arog baga nin paghorophorop kun anong mga isyu, hapot, o impormasyon an puedeng makapukaw sa interes kan mga nakakaolay niato. An pakamate nin pag-apura tibaad makapahiro man sa sato na liwaton an iskedyul niato tanganing madalaw an mga tawo sa panahon na mas andam sindang makipag-olay sa sato.—Roma 1:15, 16; 1 Tim. 4:16.
8. Ano sa parate an kalabot sa paghiro na may pagkaapurado?
8 Kalabot man sa pakamate nin pag-apura an pagkaigwa nin mga prioridad. (Basahon an Genesis 19:15.) Halimbawa, imahinara na pagkakua mo kan mga resulta kan pagpaeksamin, ipinaapod ka kan doktor sa saiyang opisina asin seryoso niang sinabi sa saimo: “Sa situwasyon mo, kaipuhan an apuradong paghiro! Sa laog nin sarong bulan, dapat na may gibohon kang aksion sa helang mo.” Posibleng marhay na dai ka maluwas tolos sa saiyang opisina siring sa bombero na naghihidali huli sa emerhensia. Imbes, posibleng dadangogon mo an saiyang mga rekomendasyon, mapuli, asin seryosong pag-iisipan an saimong mga prioridad.
9. Taano ta masasabi niato na naghulit si Pablo na may pagkaapurado mantang nasa Efeso?
9 Makakanood kita sa pakamate ni Pablo nin pag-apura paagi sa pagtao nin atension sa sinabi nia sa kamagurangan sa Efeso manongod sa paghuhulit nia kan maogmang bareta sa distrito nin Asia. (Basahon an Guibo 20:18-21.) Minalataw na poon kan enot na aldaw pag-abot nia, nagin sibot sia sa pagdalaw sa mga tawo sa harong-harong na dara an maogmang bareta. Dugang pa, sa laog nin duwang taon, may regular siang iskedyul nin pagpahayag o ‘pakikipag-olay aroaldaw sa eskuelahan ni Tiranno.’ (Gui. 19:1, 8-10) Malinaw nanggad na ginibo ni Pablo an rutinang iyan huli sa saiyang pakamate nin pag-apura. An pangapodan na ‘gibohon an satong ministeryo na may pagkaapurado’ mayo nin katuyohan na pagabatan kita sa sugo sa sato. Minsan siring, an paghuhulit maninigong magin prioridad sa satong buhay.
10. Taano ta ikinakaogma niato na huminiro na may pagkaapurado an mga Kristiano kaidtong mga 100 na taon na an nakaagi?
10 Bago kan 1914, pinonan kan sadit na grupo nin Mga Estudyante sa Biblia an paghuhulit kan maogmang bareta. An halimbawa ninda malinaw na nagpapaheling kun ano an boot sabihon kan pakamate nin pag-apura. Minsan ngani pirang ribo sana sinda, nasabotan ninda an pagkaapurado kan panahon asin entusiastiko nindang pinonan an paghuhulit kan Kahadean. May mga sermon sindang ipinublikar sa dakolon na diaryo asin nagpresentar sinda nin programa na may mga de kolor na slide asin pelikula na inaapod na “Photo-Drama of Creation.” Sa paaging ini, minilyon an napaabotan ninda kan maogmang bareta. Kun mayo sinda nin pakamate nin pag-apura, pira sana daw kutana sa sato an nakadangog kan mensahe kan Kahadean?—Basahon an Salmo 119:60.
MAGMAAN NA DAI MAWARA AN SAINDONG PAKAMATE NIN PAG-APURA
11. Taano ta nawara nin nagkapira an saindang pakamate nin pag-apura?
11 An mga pandisturbo nakakaolang sa saro na pag-isipan kun gurano kaimportante an paghuhulit. An sistema ni Satanas dinisenyo tanganing mabangkag kita sa personal na mga aktibidad asin sa mga bagay na bakong importante. (1 Ped. 5:8; 1 Juan 2:15-17) Nawara nin nagkapira, na dating ineenot an paglilingkod ki Jehova, an saindang pakamate nin pag-apura. Halimbawa, an Kristiano kan enot na siglo na si Demas nagin ‘kapwa paralingkod’ ni Pablo, alagad nawara an pokus ni Demas huli sa bakong diosnon na sistema nin mga bagay. Imbes na padagos na magin prioridad an pagpakosog sa tugang nia sa panahon nin kadepisilan, binayaan ni Demas si Pablo.—Filem. 23, 24; 2 Tim. 4:10.
12. Ano an oportunidad niato ngonyan, asin anong mga oportunidad an makakamtan niato sagkod lamang?
12 Tanganing mapagdanay niato an satong pakamate nin pag-apura, kaipuhan niatong labanan an pagmawot na orog na magpasiramsiram sa buhay. Dapat kitang magmaigot tanganing “makapangapot nin marigon sa tunay na buhay.” (1 Tim. 6:18, 19, NW) Posibleng marhay na dai ka nagduduwaduwa na an buhay na daing katapusan sa daga, sa pamamahala kan Kahadean nin Dios, matao nin daing sagkod na mga oportunidad na ikaogma an interesanteng mga aktibidad. Alagad ngonyan, igwa kita nin dai na maootrong oportunidad na tabangan an iba na makaligtas sa Armagedon.
13. Ngonyan na mga Kristiano na kita, paano niato mapagdadanay an satong pakamate nin pag-apura?
13 Huling an kadaklan sa kinaban na nakapalibot sa sato bakong madonong na nagtotorog sa espirituwal, ano an makakatabang sa sato na dai mawara an pakamate nin pag-apura? Girumdomon niato na kaidto garo baga nagtotorog man kita sa kadikloman. Alagad napagmata na kita, asin suminirang sa sato si Cristo, arog kan sinabi ni Pablo. Igwa na kita kan pribilehio na magin paradara nin liwanag. (Basahon an Efeso 5:14.) Pagkasabi kaiyan ni Pablo, sia nagsurat: ‘Maanan nindong marhay kun paano an saindong paglakaw, bakong siring sa mangmang, kundi siring sa madonong, na tinutubos an panahon, huli ta an mga aldaw maraot.’ (Efe. 5:15, 16) Sa maraot na kinaban na ini, ‘tuboson niato an panahon’ para sa mga aktibidad na makakapagpadanay sa sato na mata sa espirituwal.
NABUBUHAY KITA SA IMPORTANTENG MARHAY NA PANAHON
14-16. Taano ta apurado ngonyan orog kisa kasuarin man an paghuhulit kan Kahadean?
14 An Kristianong ministeryo apurado na poon pa kaidto, alagad apurado iyan ngonyan orog kisa kasuarin man. Poon kan 1914, nagin mas malinaw an ilinadawan sa Tataramon nin Dios na tanda na kompuesto nin laen-laen na aspekto. (Mat. 24:3-51) Namemeligro an buhay nin katawohan orog kisa kasuarin man. Sa ibong kan dai pa sana nahahaloy na mga kasundoan, an pinakamakapangyarihan na mga nasyon igwa pa man giraray nin mga 2,000 na bomba nuklear na puede nindang pasabogon ano man na oras. Sinabi nin mga autoridad an dapit sa ginatos na pangyayari na “nawara” an mga materyal sa paggibo nin bomba nuklear. Nasa mga terorista daw an nagkapira kaiyan? Sinasabi nin mga nagmamasid na madali sanang mapopoho an katawohan kun ponan nin terorista an giera. Minsan siring, bako sanang giera an nagtataong peligro sa pag-eksister nin tawo.
15 “An pagbago nin klima iyo an pinakadakulang peligro sa salud sa bilog na kinaban sa ika-21 siglo,” an sabi sa report kan The Lancet asin University College London kan 2009. Sinabi kaiyan: “An mga epekto sa salud kan pagbago nin klima makakaapektar sa kadaklan na tawo sa masurunod na dekada asin masapeligro sa buhay asin kamugtakan kan binilyon na tawo.” Puede ining magresulta sa lakop na pagkadestroso huli sa paglangkaw kan kapantayan kan dagat, dai pag-oran, baha, epidemya, bagyo, asin giera huli sa pag-aragawan sa nagdidikit nang natural na kayamanan. Iyo, namemeligro an buhay nin katawohan huli sa mga giera asin kalamidad.
16 Tibaad iniisip nin nagkapira na an posibilidad na magkaigwa nin nuklear na giera puedeng magin causa kan mga pangyayaring kaotoban kan “tanda.” Minsan siring, dai nasasabotan kan kadaklan an tunay na kahulogan kan tanda. Dakol na dekada nang naheheling iyan, na nagpaparisa kan presensia ni Cristo asin kan marikas na pagdangadang kan katapusan kan sistemang ini nin mga bagay. (Mat. 24:3) Ngonyan sana nagin risang-risa an dakol na kabtang kan tanda. Panahon nang magmata an mga tawo sa espirituwal na pagkatorog. Makakatabang an satong ministeryo na mapagmata sinda.
17, 18. (a) Mantang nabubuhay na kita sa huring mga aldaw, ano an epekto kaini sa sato? (b) Ano an puedeng magpabago sa pagmansay nin mga tawo sa mensahe kan Kahadean?
17 Dikit na panahon na sana an natatada tanganing patunayan an satong pagkamoot ki Jehova asin taposon an paghuhulit na iinasignar sa sato sa huring mga aldaw. Mas makahulogan ngonyan an sinabi ni Pablo sa mga Kristiano sa Roma kan enot na siglo: ‘[Aram nindo] an panahon, na maninigo na kitang magmata sa pagtorog, huli ta ngonyan an kaligtasan harani na sa sato kisa kan tumubod kita.’—Roma 13:11.
18 Huli sa ihinulang mga mangyayari sa huring mga aldaw, puedeng marealisar nin mga tawo an saindang espirituwal na pangangaipo. Narerealisar nin iba na kaipuhan nin tawo an tabang kun hinohorophorop ninda an pagkadaing maginibo kan mga gobyerno nin tawo na solusyonan an pagbagsak nin ekonomiya, huma nin mga armas nuklear, madahas na krimen, o pagkaraot kan kapalibotan. An iba pa nakakamate kan saindang espirituwal na pangangaipo huli sa mga nangyayari sa sainda mismong pamilya, arog baga nin problema sa salud, diborsio, o pagkagadan nin namomotan. Mantang nakikikabtang kita sa ministeryo, matatabangan niato an siring na mga tawo.
NAPAHIRO HULI SA PAKAMATE NIN PAG-APURA
19, 20. Huli sa pakamate nin pag-apura, paano napahiro an dakol na Kristiano na bagohon an saindang estilo nin pamumuhay?
19 Huli sa pakamate nin pag-apura, dakol na Kristiano an napahiro na orog na makikabtang sa ministeryo. Halimbawa, sarong hoben na mag-agom na taga Ecuador an nagdesisyon na pasimplehon an saindang buhay pakadangog ninda kan programa sa aldaw nin espesyal na asamblea kan 2006 na “Papagdanayon na Simple an Saindong Mata.” Ilinista ninda an mga bagay na dai na ninda kaipuhan, asin sa laog nin tolong bulan sinda nagbalyo hale sa apartment na may tolong kuarto pasiring sa apartment na may saro sanang kuarto, nagpabakal nin nagkapirang gamit, asin nagbayad kan gabos nindang utang. Dai nahaloy, nag-auxiliary payunir sinda asin nagsunod sa suhestion kan paraataman nin sirkito na maglingkod sa kongregasyon na may orog na pangangaipo.
20 Sarong brother sa Amerika del Norte an nagsurat: “Kan mag-atender kaming mag-agom sa sarong asamblea kan 2006, treintang taon na kaming bautisado. Mantang nagmamaneho papuli hale sa asamblea, pinag-olayan mi kun paano ikakaaplikar an konseho na pasimplehon an satong buhay. (Mat. 6:19-22) Igwa kaming tolong harong, daga, mamahalon na mga auto, sarong motorboat, asin motor home. Huling an pagmate mi bako kaming madonong na mga Kristiano, nagdesisyon kaming gibohon na pasohan an bilog na panahon na ministeryo. Kan 2008, inibanan mi an aki ming babae sa pagregular payunir. Nakakaogma nanggad na mas parateng makaibanan sa paglilingkod an mga tugang! Nakapaglingkod kami kun saen may orog na pangangaipo. Mas naparani man kami ki Jehova huling mas dakol kaming ginigibo para sa saiya. Nangorognang nakakakontento an pribilehiong maheling an maogmang reaksion nin mga tawo kun nadadangog asin nasasabotan ninda an katotoohan kan Tataramon nin Dios.”
21. Anong kaaraman an nakakamotibar sa sato na humiro?
21 Aram niato kun ano an madali nang umabot sa maraot na sistemang ini nin mga bagay—‘an aldaw nin paghokom asin paglaglag sa mga tawong maraot.’ (2 Ped. 3:7) An kaaraman niato sa Tataramon nin Dios nagpapahiro sa sato na maigot na ipahayag an maabot na dakulang kahorasaan dangan an bagong kinaban. Pirme kitang may hararom na pakamate nin pag-apura na ipaabot sa mga tawo an tunay na paglaom. Paagi sa lubos na pakikikabtang sa apuradong gibohon na ini, ipinapaheling niato na tunay niatong namomotan an Dios asin an satong kapwa.
[Mga Hapot Para sa Pag-adal]
