“Puede Tabing Retratohon Mo Kami?”

Pagkatapos kan ikaduwang aldaw nin pandistritong kombension, si Josue, Bethelite sa Mejico, naglakawlakaw sa siudad nin Querétaro. An mag-agom na turistang taga Colombia na si Javier asin Maru nakiolay sa saiya na kuanan sinda nin retrato. Huling sia asin an saiyang mga katood na Saksi posturado asin may badge kan kombension, hinapot sinda kan mag-agom kun baga sinda hale sa gradwasyon o sa ibang espesyal na okasyon. Ipinaliwanag ni Josue na may inaatenderan sindang kombension kan Mga Saksi ni Jehova, asin inimbitaran nia an mag-agom na mag-atender sa pan-Domingong sesyon.

Inisip kan mag-agom na makasupogon mag-atender huling mayo sinda nin angay na bado para sa siring na okasyon. Minsan siring, itinao ni Josue an saiyang ngaran asin an numero nin telepono kan sangang opisina kun saen sia naglilingkod.

Nasorpresa si Josue kan kontakon sia ni Javier pakalihis nin apat na bulan. An mag-agom nag-atender palan sa kombension asin gusto nindang dalawon sinda kan mga Saksi ni Jehova sa Siudad nin Mejico, kun saen sinda nakaistar kan panahon na iyan. Dai nahaloy, naponan nin pag-adal sa Biblia si Javier asin Maru, asin nagpoon tolos sindang umatender sa mga pagtiripon. Pakalihis nin sampulong bulan, sinda nagin mga parahayag. Minsan ngani buminalyo an mag-agom sa Toronto, Canada, sinda padagos na nag-oswag sa espirituwal asin nabautismohan.

Paghaloyhaloy, nakaresibi si Josue nin surat hale ki Javier na nagpapaliwanag kun ano an nakapahiro sa saiya na akoon an katotoohan. “Bago kami nag-atender sa kombension, pinag-olayan ming mag-agom na kaipuhan mi an paggiya nin Dios. Kan maheling niamo kun gurano kamo kaposturado, naisip mi na siertong hale kamo sa espesyal na marhay na okasyon. Sa kombension, naghanga kaming marhay sa mamomoton na pagtabang sa samo na makahanap nin matutukawan asin makasubaybay sa Biblia, saka sa paggawe kan mga nag-aatender. Garo baga mayo man nin problema dawa panturista an bado mi.”

An mga tataramon kan madonong na si Hadeng Salomon nagin totoo nanggad ki Josue! Si Salomon nagsurat: ‘Itanom mo pagkaaga an saimong banhi, asin pagkahapon dai mo pagpahingaloan an saimong kamot; huli ta dai ka nakakaisi kun arin an orog karahay, kun baga ini, kun baga idto, kun baga an duwa anas na marahay.’ (Par. 11:⁠6) Puede ka daw magtanom nin banhi kan katotoohan paagi sa pag-aprobetsar sa mga oportunidad na sabihon sa iba an manongod sa nagdadangadang na kombension o pampublikong pahayag? Puede kang gamiton ni Jehova tanganing dagkahon an mga nagugutom asin napapaha sa espirituwal na paggiya, siring ki Javier asin Maru.​—⁠Isa. 55:⁠1.

[Ritrato sa pahina 32]

Poon sa wala patoo: Alejandro Voeguelin, Maru Pineda, Alejandro Pineda, Javier Pineda, asin Josue Ramirez sa sangang opisina sa Mejico