‘Boot kan Aki na Ihayag an Ama’

‘Dai nin siisay man na nakakamidbid kun siisay an Ama, kundi an Aki, asin an siisay man na boot kan Aki na pahayagan.’​—⁠LUC. 10:⁠22.

ANO AN ISISIMBAG NINDO?

Taano ta nasa pambihirang kamugtakan si Jesus na ihayag an Ama sa iba?

Paano ihinayag ni Jesus sa iba an saiyang Ama?

Sa anong mga paagi mo maaarog si Jesus sa paghayag kan Ama?

1, 2. Anong hapot an nagpapaisip sa dakol, asin taano?

‘SIISAY an Dios?’ Dakol an napapaisip sa hapot na ini. Halimbawa, minsan ngani an kadaklan na naghihingakong Kristiano naniniwala na an Dios sarong Trinidad, aakoon nin dakol na imposibleng masabotan an doktrinang ini. Sarong autor asin klerigo an nag-admitir: “Saro ining doktrina na dai kayang saboton kan limitadong isip nin tawo. Iyan bako nang sakop kan pangangatanosan o lohika kan tawo.” Sa ibong na lado, an kadaklan na naniniwala sa teoriya nin ebolusyon dai nagtutubod na may Dios. Para sa sainda, nagkanorongod sana an gabos na makangangalas na linalang. Dawa siring, imbes na negaran an pag-eksister nin Dios, si Charles Darwin nagsabi: “Para sa sako, an pinakamarahay na kongklusyon iyo na an bilog na temang ini dai kayang saboton kan intelihensia nin tawo.”

² Ano man an paniniwala kan kadaklan na tawo, iniisip-isip ninda an mga hapot may koneksion sa pag-eksister nin Dios. Minsan siring, kun dai sinda nakakakua nin nakakakontentong simbag, pag-abot nin panahon dakol an minapondo na sa paghanap sa Dios. Tunay nanggad, ‘binuta ni Satanas an isip kan mga dai minatubod.’ (2 Cor. 4:⁠4) Bakong makangangalas na an mayoriya kan katawohan mayong aram asin ribaraw kun dapit sa katotoohan manongod sa Ama, an Kaglalang kan uniberso!​—⁠Isa. 45:⁠18.

3. (a) Siisay an naghayag sa sato kan Kaglalang? (b) Anong mga hapot an pag-oolayan niato?

³ Pero, mahalagang marhay na manodan kan mga tawo an katotoohan manongod sa Dios. Taano? Huling solamenteng an mga nag-aapod “sa ngaran ni Jehova” an maliligtas. (Roma 10:​13, NW) Kalabot sa pag-apod sa ngaran nin Dios an pagmidbid ki Jehova bilang Persona. Ihinayag ni Jesu-Cristo sa mga disipulo nia an mahalagang marhay na kaaraman na ini. Ihinayag nia an Ama sa sainda. (Basahon an Lucas 10:22.) Taano ta ikinahayag ni Jesus an Ama sa paaging  dai magigibo nin siisay pa man? Paano iyan ginibo ni Jesus? Asin paano niato maaarog si Jesus sa paghayag kan Ama sa iba? Pag-olayan niato an mga hapot na ini.

SI JESU-CRISTO​—AN PINAKAKUALIPIKADONG MAGHAYAG

4, 5. Taano ta nasa pambihirang kamugtakan si Jesus na ihayag an Ama sa iba?

⁴ Si Jesus an pinakakualipikadong maghayag kan saiyang Ama. Taano? Huling bago pa lalangon an gabos na iba pang klase nin buhay, an espiritung linalang na kan huri nagin an tawong si Jesus, nag-eeksister na sa langit bilang an ‘Aking bugtong nin Dios.’ (Juan 1:14; 3:18) Pambihira nanggad na posisyon iyan! Mantang mayo pang ibang linalang na nag-eeksister, ikinaogmang marhay kan Aki an mamomoton na atension sa saiya kan saiyang Ama asin nakanood sia manongod sa Saiya asin sa mga kualidad Nia. Sa halawigon na panahon, siertong kadakol nin napag-olayan an Ama asin Aki saka nagrarom an kapadangatan ninda sa lambang saro. (Juan 5:20; 14:31) Siertong dakolon an nanodan kan Aki sa personalidad kan saiyang Ama!​—⁠Basahon an Colosas 1:​15-17.

⁵ Ninombrahan kan Ama an Aki na magin tagapagtaram Nia, “An Tataramon nin Dios.” (Kap. 19:13) Kun siring, nasa pambihirang kamugtakan si Jesus na ihayag an Ama sa iba. An kagsurat nin Ebanghelyo na si Juan angay sanang ilinadawan si Jesus, “an Tataramon,” na “nasa daghan nin Ama.” (Juan 1:​1, 18) Sa pananaram na iyan, tibaad nasa isip ni Juan an sarong kostumbre na kan panahon nia parateng ginigibo sa oras nin pagkakan. Pinapatukaw an bisita harani sa saro pang bisita. Huling magkaharani sinda, an duwang ini madaling makakapag-olay. Kaya, sa pagsabing “nasa daghan” an Aki, nangangahulogan iyan na nagkaigwa sinda nin dayupot na pag-oolay kan saiyang Ama.

6, 7. Paano padagos na nagkosog an relasyon kan Ama asin Aki?

⁶ An relasyon kan Ama asin Aki padagos na nagkosog. An Aki ‘an nagin kaogmahan [nin Dios] sa gabos na mga aldaw.’ (Basahon an Talinhaga 8:​22, 23, 30, 31.) Kun siring, tama sanang isipon na mas nagkosog an relasyon kan duwa mantang magkaibanan sindang nagtatrabaho asin mientras na nanonodan kan Aki na arogon an mga kualidad kan saiyang Ama. Kan gibohon an iba pang mga linalang na may intelihensia, naheling kan Aki kun paano ni Jehova trinatar an lambang saro sa sainda, asin seguradong nagrarom an pagpapahalaga nia sa personalidad nin Dios.

⁷ Dawa an pagkuestion ni Satanas kan huri sa deretso ni Jehova bilang Soberano nagtao sa Aki nin oportunidad na manodan kun paano si Jehova mapaheling nin pagkamoot, hustisya, kadonongan, asin kapangyarihan kan Sia mapaatubang sa depisil na situwasyon. Daing duwa-duwa na inandam kaiyan si Jesus na atubangon an mga kadepisilan na naeksperyensiahan nia mismo kan huri sa saiyang ministeryo sa daga.​—⁠Juan 5:⁠19.

8. Paano kita tinatabangan kan mga pagkasaysay sa Ebanghelyo na makanood na marhay manongod sa mga kualidad kan Ama?

⁸ Huling an Aki may dayupot na relasyon ki Jehova, ikinapaliwanag nia an Ama sa mas detalyadong paagi na dai magigibo nin siisay pa man. Igwa pa daw nin mas marahay na paagi na mamidbid niato an Ama kisa sa pag-estudyar sa itinokdo asin ginibo kan bugtong na Aki nia? Sa pag-ilustrar, isip-isipa kun gurano kadepisil na masabotan niato nin lubos an tataramon na “pagkamoot” paagi sana sa pagbasa kan kahulogan kaiyan sa diksionaryo. Pero, paagi sa paghorophorop sa buhay na marhay na mga pagkasaysay kan mga kagsurat kan Ebanghelyo manongod sa ministeryo ni Jesus asin sa pagmalasakit nia sa iba, masasabotan tang marhay an mga tataramon na “an Dios pagkamoot.” (1 Juan 4:​8, 16) Totoo man iyan sa iba pang mga kualidad nin Dios na ihinayag ni Jesus sa mga disipulo nia kan sia yaon sa daga.

 KUN PAANO IHINAYAG NI JESUS AN SAIYANG AMA

9. (a) Sa anong duwang pangenot na paagi ihinayag ni Jesus an saiyang Ama? (b) Magtao nin halimbawa kun paano ihinayag ni Jesus an saiyang Ama paagi sa katokdoan nia.

⁹ Paano ihinayag ni Jesus an Ama sa mga disipulo nia asin sa magigin mga parasunod nia? Ginibo nia iyan sa duwang pangenot na paagi: paagi sa saiyang mga katokdoan asin paggawe. Enot, estudyaran niato an mga katokdoan ni Jesus. Sa mga itinokdo ni Jesus sa mga parasunod nia, mababanaag an hararom na pakasabot nia sa mga kaisipan, saboot, asin pamamaagi kan saiyang Ama. Halimbawa, iinagid ni Jesus an saiyang Ama sa mapagmalasakit na kagsadiri nin aripompon na huminale tanganing hanapon an sarong nalagalag na karnero. Sinabi ni Jesus na kan manompongan kan kagsadiri an nalagalag na karnero, ‘naogma sia dapit kaiyan nin orog pa sa [nobenta y nuebe] na dai nagkaralagalag.’ Ano an aplikasyon kan ilustrasyon na iyan? “Siring man,” an paliwanag ni Jesus, ‘bakong kabotan nin Ama sa langit na mapahamak an saro sa mga saradit na ini.’ (Mat. 18:​12-14) Ano an manonodan mo sa ilustrasyon na ini manongod ki Jehova? Dawa kun beses namamatean mong bako kang gayong mahalaga asin nalilingawan ka na, an saimong langitnon na Ama interesado asin nagmamalasakit sa saimo. Para sa saiya, saro ka sa mga ‘saradit na ini.’

10. Paano masasabing ihinayag ni Jesus an saiyang Ama paagi sa paggawe nia?

¹⁰ Ikaduwa, ihinayag ni Jesus an Ama sa mga disipulo nia paagi sa saiyang paggawe. Kaya, kan hagadon ni apostol Felipe ki Jesus: ‘Pahelingan samo an Ama,’ si Jesus tama sanang makakapagsabi: ‘An nakaheling sako, nakaheling sa Ama.’ (Juan 14:​8, 9) Isip-isipa an nagkapirang halimbawa kun paano ipinaheling ni Jesus an mga kualidad kan saiyang Ama. Kan an sarong may lepra makimaherak ki Jesus na paomayan sia, dinutaan ni Jesus an tawong “pano nin daot [lepra]” asin sinabihan ini: “Boot ko, luminig ka.” Kan maomayan, daing duwa-duwa na nasabotan kan may lepra na si Jehova an nagtao nin kapangyarihan ki Jesus na paomayan sia. (Luc. 5:​12, 13) Siring man, kan magadan si Lazaro, siertong namatean kan mga disipulo an pagmalasakit kan Ama kan si Jesus ‘nag-agrangay sa espiritu’ asin napurisaw saka ‘nagtangis.’ Minsan ngani aram ni Jesus na bubuhayon nia liwat si Lazaro, namatean nia an kolog na namamatean kan pamilya asin mga katood ni Lazaro. (Juan 11:​32-35, 40-43) Seguradong may paborito kang estorya sa Biblia manongod sa mga ginibo ni Jesus na nakakatabang sa saimo na masabotan an pagkaherak kan Ama.

11. (a) Ano an ihinayag ni Jesus manongod sa saiyang Ama kan linigon nia an templo? (b) Taano ta nakakapakosog sa sato an pagkasaysay dapit sa paglinig ni Jesus sa templo?

¹¹ Minsan siring, ano an puede mong ikongklusyon dapit sa paglinig ni Jesus sa templo? Imahinara an eksena: Naggibo si Jesus nin latigo na gibo sa mga lubid, asin pinalayas nia an mga nagpapabakal nin mga baka asin karnero. Winararak nia an mga sinsilyo kan mga pararibay nin kuarta asin ibinalintong an saindang  mga lamesa. (Juan 2:​13-17) Huli kaiyan, nagirumdoman kan mga disipulo an makahulang mga tataramon ni Hadeng David: ‘Napano ako nin kaigotan para sa saimong harong.’ (Sal. 69:​9, NW) Paagi sa marigon na paghiro ni Jesus, nagpaheling sia nin makosog na pagmawot na idepensa an tunay na pagsamba. Naheheling mo daw sa pagkasaysay na iyan an personalidad kan Ama? Ipinapagirumdom kaiyan sa sato na apuera sa daing sagkod na kapangyarihan nin Dios na paraon an karatan sa daga, dakula man an pagmawot nia na gibohon iyan. An mapuersang reaksion na ini ni Jesus sa maraot na gibo naghahayag kan seguradong namamatean kan Ama mantang naheheling nia an karatan na lakop ngonyan sa daga. Nakakapakosog nanggad iyan sa sato kun napapaatubang kita sa mga inhustisya!

12, 13. Ano an manonodan mo manongod ki Jehova sa pagtratar ni Jesus sa saiyang mga disipulo?

¹² Estudyaran niato an saro pang halimbawa​—⁠an pagtratar ni Jesus sa saiyang mga disipulo. Padagos na nagdidiriskutiran an mga ini kun siisay sa sainda an nangongorog. (Mar. 9:​33-35; 10:43; Luc. 9:46) Sa halawig niang eksperyensia kaiba an Ama, aram ni Jesus kun ano an namamatean ni Jehova manongod sa siring na mga tendensiang magin mapalangkaw. (2 Sam. 22:28; Sal. 138:⁠6) Dugang pa, naheling ni Jesus an siring na atitud ki Satanas na Diablo. An saro na iyan na makasadiri interesado sana sa posisyon asin sa pagkaprominente. Huli kaini, siertong namondo nanggad si Jesus na maheling na nagpapadagos an pagkaambisyoso kan mga disipulo na sinanay nia! Naheling pa ngani nia an atitud na ini dawa sa mga pinili niang apostol! Nagin ambisyoso sinda sagkod sa kahurihurihing aldaw kan buhay ni Jesus digdi sa daga. (Luc. 22:​24-27) Pero, padagos sindang sinagwe ni Jesus nin may kabootan, na dai noarin man nawaran nin paglaom na pag-abot nin panahon manonodan nindang arogon an mapakumbabang kaisipan nia.​—⁠Fil. 2:​5-8.

¹³ Naheheling mo daw an personalidad kan Ama sa mapasensiang pagtanos ni Jesus sa salang mga tendensia kan saiyang mga disipulo? Sa mga ginibo asin sinabi ni Jesus, naheheling mo daw an Ama, na dai pinapabayaan an saiyang banwaan dawa paorootro sindang nagkukulang? Mantang aram niato an mga kualidad na iyan nin Dios, dai daw kita namomotibar na dumolok sa saiya tanganing ipahayag an satong pagsolsol kun nakakagibo kita nin mga sala?

BOOT KAN AKI NA IHAYAG AN SAIYANG AMA

14. Paano ipinaheling ni Jesus na boot niang ihayag an saiyang Ama?

¹⁴ Dakol na diktador an nagmamaigot na padagos na kontrolon asin papagdanayon na mayong aram an mga tawo paagi sa dai pagtao nin impormasyon sa sainda. Sa kabaliktaran, gustong sabihon ni Jesus an kaaraman nia manongod sa Ama, na lubos Siang ihinahayag sa iba. (Basahon an Mateo 11:27.) Dugang pa, tinawan ni Jesus an mga disipulo nia nin kakayahan na ‘makasabot tanganing mamidbid idtong saro na totoo,’ si Jehova Dios. (1 Juan 5:20) Ano an boot sabihon kaiyan? Binukasan ni Jesus an isip kan mga parasunod nia tanganing masabotan ninda an mga katokdoan nia manongod sa Ama. Dai nia itinago an saiyang Ama paagi sa pagtokdo na kabtang Sia nin misteryong Trinidad.

15. Taano ta dai nguna sinabi ni Jesus an gabos na aram nia manongod sa saiyang Ama?

¹⁵ Ihinayag daw ni Jesus an gabos na aram nia manongod sa saiyang Ama? Dai, nagpaheling sia nin kadonongan paagi sa dai pagsabi kan gabos na aram nia. (Basahon an Juan 16:12.) Taano? Huling kan panahon na idto, an mga disipulo nia “dai makakatagal” o dai pa kaya an siring na kaaraman. Pero, arog kan ipinaliwanag ni Jesus, dakol pang kaaraman an ihahayag pag-abot kan ‘pararanga’ o paratabang, an banal na espiritu, na magiya sa sainda ‘sa gabos na katotoohan.’ (Juan 16:​7, 13) Kun paanong an madonong na mga magurang may dai nguna sinasabi sa mga aki sagkod na nasa edad na an mga ini na makasabot, hinalat man nguna ni Jesus an mga disipulo na magin maygurang asin may kakayahan  nang saboton an nagkapirang bagay manongod sa Ama. Maboot na kinonsiderar ni Jesus an saindang mga limitasyon.

AROGON SI JESUS PAAGI SA PAGTABANG SA IBA NA MAMIDBID SI JEHOVA

16, 17. Taano ta nasa kamugtakan kang ihayag sa iba an Ama?

¹⁶ Kun namimidbid mong marhay an sarong tawo asin naaapresyar an mamomoton na personalidad nia, dai ka daw napapahiro na iestorya iyan sa iba? Kan si Jesus nasa daga, ipinakipag-olay nia an manongod sa saiyang Ama. (Juan 17:​25, 26) Maaarog daw niato sia paagi sa paghayag ki Jehova sa iba?

¹⁷ Arog kan tinokar niato, mas hararom nanggad an kaaraman ni Jesus dapit sa saiyang Ama kisa sa kiisay man. Pero, gusto niang sabihon sa iba an nagkapira sa mga aram nia, na tinatawan pa ngani an saiyang mga parasunod nin kakayahan na masabotan an mas hararom na mga aspekto kan personalidad nin Dios. Sa tabang ni Jesus, bako daw na an pakamidbid niato sa Ama nakakalabi kisa sa kadaklan na tawo ngonyan? Nagpapasalamat nanggad kita na paagi sa mga katokdoan asin paggawe ni Jesus, gikan sa boot niang ihinayag sa sato an saiyang Ama! Sa katunayan, puede tang ipaghambog sa tamang paagi na midbid niato an Ama. (Jer. 9:24; 1 Cor. 1:31) Mantang nagmamaigot kitang rumani ki Jehova, minarani man sia sa sato. (Sant. 4:⁠8) Sa dahelan na iyan, nasa kamugtakan kita ngonyan na sabihon sa iba an aram niato. Paano niato iyan magigibo?

18, 19. Sa anong mga paagi mo ikakahayag an Ama sa iba? Ipaliwanag.

¹⁸ Paagi sa satong mga tataramon asin gibo, kaipuhan niatong arogon si Jesus sa paghayag kan Ama. Girumdomon na dakol kitang nakakaolay sa ministeryo na dai nakakaaram kun siisay an Dios. Tibaad sala an pagmansay ninda sa Dios huli sa falsong mga katokdoan. Puede tang sabihon sa sainda an ngaran nin Dios, an katuyohan nia para sa mga tawo, asin an personalidad nia siring kan pagkahayag kaiyan sa Biblia. Dugang pa, puede tang ipakipag-olay sa mga kapagtubod niato an nagkapirang pagkasaysay sa Biblia na naghahayag nin mga bagay dapit sa personalidad nin Dios na dai pa niato nasasabotan kaidto. Sa paaging iyan, puede man sindang makinabang.

¹⁹ Ikakahayag man daw nindo an Ama paagi sa saindong paggawe mantang hinihingoa nindong arogon si Jesus? Kun naheheling kan mga tawo sa paggawe niato an pagkamoot ki Cristo, mapaparani sinda sa Ama saka ki Jesus. (Efe. 5:​1, 2) Dinadagka kita ni apostol Pablo na ‘magin mga paraarog sa saiya, siring na sia paraarog ki Cristo.’ (1 Cor. 11:⁠1) May marahayon nanggad kitang pribilehio na tabangan an mga tawo na mamidbid si Jehova paagi sa paggawe niato! Iyo, logod na kita gabos magpadagos sa pag-arog ki Jesus paagi sa paghayag kan Ama sa iba.

[Mga Hapot Para sa Pag-adal]