Iniingatan Kita ni Jehova Para sa Kaligtasan

‘Huli kan kapangyarihan nin Dios iniingatan kamo huli sa pagtubod manongod sa kaligtasan na andam na ipahayag sa huring panahon.’​—⁠1 PED. 1:​4, 5.

ANO AN ISISIMBAG NINDO?

Paano kita dinagka ni Jehova sa tunay na pagsamba?

Paano kita nagpapagiya sa konseho ni Jehova?

Paano kita tinatawan ni Jehova nin pamparigon sa boot?

1, 2. (a) Ano an garantiya niato na tatabangan kita nin Dios na papagdanayon an satong integridad? (b) Gurano kamidbid ni Jehova an kada saro sa sato?

“AN MINATAGAL sagkod sa katapusan, sia an makakaligtas.” (Mat. 24:13) Sa mga tataramon na iyan, lininaw ni Jesus na tanganing maingatan kitang buhay kun isagibo na nin Dios an paghokom sa kinaban ni Satanas, kaipuhan niatong mapagdanay an satong integridad sagkod sa katapusan. Alagad dai ini nangangahulogan na inaasahan kita ni Jehova na makatagal paagi sa satong sadiring kadonongan o kosog. Sinisierto sa sato kan Biblia: ‘An Dios maimbod, na dai kamo itotogot na masugotan nin labi kan maaagod [o makakaya] nindo; kundi matao sia, kaiba kan sugot, nin luluwasan, tanganing makatagal kamo.’ (1 Cor. 10:13) Ano an ipinaparisa kan mga tataramon na iyan?

² Tanganing makasierto si Jehova na dai kita matetentaran nin labi sa satong makakaya, dapat na aram nia an gabos manongod sa sato, pati na an mga problema na inaatubang niato, an pagkagibo sa sato, asin kun gurano sana an makakaya ta. Talaga daw na aram nin Dios an mga detalyeng iyan manongod sa sato? Iyo. Ihinahayag kan Kasuratan na midbid na marhay ni Jehova an kada saro sa sato. Pamilyar sia sa satong pang-aroaldaw na rutina asin mga ugale. Aram nia dawa an satong mga kaisipan asin intension kan puso niato.​—⁠Basahon an Salmo 139:​1-6.

3, 4. (a) Paano ipinaparisa kan eksperyensia ni David na tinatawan ni Jehova nin atension an mga indibiduwal? (b) Anong pambihirang gibohon an hinahaman ni Jehova ngonyan?

³ Harayo daw na mangyari na magpaheling an Dios nin siring na interes sa hamak na mga tawo? Inisip-isip ni salmistang David an hapot na ini, na sinasabi ki Jehova: ‘Kun tinitingkalag ko an saimong kalangitan, an gibo nin saimong mga moro, an bulan patin an mga bitoon na hinaman mo, ano an tawo ta nagigirumdoman mo?’ (Sal. 8:​3, 4) An eksperyensia mismo ni David an tibaad dahelan kan hapot na ini. Sa  saiya, an kangudhan na aking lalaki ni Jese, nanompongan ni Jehova an sarong ‘lalaking suno kan Saiyang puso’ asin kinua sia hale sa pagsunod sa aripompon tanganing magin lider sa banwaan nin Israel. (1 Sam. 13:14; 2 Sam. 7:⁠8) Imahinara an siertong namatean ni David kan marealisar nia na tinawan nin atension kan Kaglalang kan uniberso an saiyang personal na mga paghorophorop, an kaisipan nin sarong solteritong pastor!

⁴ Makangangalas man na horophoropon an pambihirang personal na interes ni Jehova sa sato ngonyan. Tinitipon nia sa tunay na pagsamba “an kawiliwiling mga bagay kan gabos na nasyon” asin tinatabangan nia an saiyang mga lingkod na mapagdanay an saindang integridad. (Hag. 2:​7, NW) Tanganing mas masabotan kun paano kita tinatabangan ni Jehova na mapagdanay an satong integridad, horophoropon nguna niato kun paano nia dinadagka sa tunay na pagsamba an mga tawo.

DINAGKA NIN DIOS

5. Paano dinadagka ni Jehova sa saiyang Aki an mga tawo? Iilustrar.

⁵ Si Jesus nagsabi: ‘Dai nin makakadolok sa sako, kun dai sia dagkahon kan Ama na nagsugo sako.’ (Juan 6:44) Ipinaparisa kan mga tataramon na iyan na tanganing magin disipulo ni Cristo, kaipuhan niato an tabang nin Dios. Paano dinadagka ni Jehova sa saiyang Aki an mga arog-karnero? Paagi sa paghuhulit kan maogmang bareta asin sa paghiro kan banal na espiritu. Halimbawa, kan si Pablo asin an saiyang kairiba sa pagmimisyonero yaon sa Filipos, namidbid ninda an babaeng si Lidia asin sinabi ninda sa saiya an maogmang bareta. An ipinasabong na rekord nagsasabi: ‘An saiyang puso binukas nin Kagurangnan, tanganing magdangog kan mga bagay na itinaram ni Pablo.’ Iyo, itinao nin Dios an saiyang espiritu tanganing tabangan si Lidia na masabotan an mensahe, kaya sia asin an kairiba nia sa harong nabautismohan.​—⁠Gui. 16:​13-15.

6. Paano kita gabos dinagka nin Dios sa tunay na pagsamba?

⁶ Napapalaen daw an eksperyensia ni Lidia? Dai nanggad. Kun ika nagdusay na Kristiano, ika dinagka man nin Dios sa tunay na pagsamba. Kun paanong an satong langitnon na Ama may naheling na mahalagang bagay sa puso ni Lidia, may naheling man siang marahay sa saimo. Kan ika nagpoon na maghinanyog sa maogmang bareta, tinabangan ka ni Jehova na masabotan iyan paagi sa pagtao nin banal na espiritu. (1 Cor. 2:​11, 12) Kan maghingoa kang iaplikar an nanodan mo, binendisyonan nia an saimong mga paghihingoa na gibohon an kabotan nia. Kan idusay mo sa saiya an saimong buhay, naggayagaya an saiyang puso. Iyo, poon pa kan ika enot na maglakaw sa dalan pasiring sa buhay, kaibahan mo na si Jehova sa gabos mong lakad.

7. Paano niato naaraman na tatabangan kita nin Dios na magdanay na maimbod?

⁷ Mantang tinabangan na kita ni Jehova na pumoon na maglakaw kaiba nia, makakasierto kita na dai nia kita papabayaan ngonyan sa satong pagmamaigot na magdanay na maimbod. Aram nia na kun sa sadiring paghihingoa sana niato, dai niato manonodan an katotoohan asin dai kita makakapagdanay dian. Sa surat ni apostol Pedro sa linahidan na mga Kristiano, sia nagsabi: ‘Huli kan kapangyarihan nin Dios iniingatan kamo huli sa pagtubod manongod sa kaligtasan na andam na ipahayag sa huring panahon.’ (1 Ped. 1:​4, 5) An  prinsipyo kan mga tataramon na iyan aplikado sa gabos na Kristiano asin maninigong magin interesado dian an kada saro sa sato ngonyan. Taano? Huli ta kaipuhan niato gabos an tabang nin Dios tanganing magdanay na maimbod sa saiya.

PINUGOLAN NA MAKAGIBO NIN SALA

8. Taano ta kaipuhan niatong magmaan na makagibo nin sala?

⁸ Huli sa mga problema sa buhay asin sa sato mismong pagkabakong perpekto, puedeng mawara an satong pokus sa espirituwal asin mamugtak kita sa peligro na makagibo nin sala na dai ngani niato naririsa. (Basahon an Galacia 6:⁠1.) Iiniilustrar ini nin sarong pangyayari sa buhay ni David.

9, 10. Paano pinugolan ni Jehova si David na makagibo nin sala, asin ano an ginigibo Nia para sa sato ngonyan?

⁹ Mantang linalapag ni Hadeng Saul, nagpaheling si David nin kahangahangang pagpupugol paagi sa dai pagbalos sa nauuring hade na iyan. (1 Sam. 24:​2-7) Alagad dai nahaloy, nangibabaw ki David an saiyang salang mga pagmawot. Nangaipo sia nin pagkakan asin tubig para sa saiyang mga tawohan asin magalang na nagpatabang sa kapwa Israelitang si Nabal. Kan suminimbag si Nabal nin may pang-iinsulto, si David naanggot asin nag-andam na magbalos sa kalalakihan kan gabos na kasararo sa harong ni Nabal, asin dai naisip ni David na an paggadan nin inosenteng mga tawo pagkakasala sa dugo sa atubangan nin Dios. Alagad paagi sa napapanahon na pag-interbenir ni Abigail, an agom ni Nabal, nakalikay si David sa paggibo nin kapahapahamak na pagkakasala. Huling narealisar na si Jehova mismo an nagmaniobra sa bagay na iyan, si David nagsabi ki Abigail: ‘Pag-omawon logod si Jehova na Dios kan Israel, na suminobol saimo tanganing sabaton mo ako ngonyan. Asin pag-omawon logod an saimong mga katanosan, asin pag-omawon ka, na sinagang mo ako ngonyan na lumakaw sa pagpabolos nin dugo, asin magbalos ako kan sa sakuyang sadiring kamot.’​—⁠1 Sam. 25:​9-13, 21, 22, 32, 33.

¹⁰ Anong leksion an manonodan niato sa pagkasaysay na ini? Ginamit ni Jehova si Abigail tanganing pugolan si David na makagibo nin sala. Arog man kaiyan an ginigibo nia para sa sato ngonyan. Siempre, maninigong dai kita mag-asa na an Dios may isusugo na mainterbenir tanganing dai kita makagibo nin sala; ni ipapamugtak niato na aram ta nin eksakto kun paano mahiro an Dios sa ano man na partikular na situwasyon o kun ano an itotogot nia sa pagkaotob kan saiyang katuyohan. (Par. 11:⁠5) Minsan siring, makakapagtiwala kita na pirmeng aram ni Jehova an satong mga kamugtakan asin tatabangan nia kitang magdanay na maimbod sa saiya. Sinisierto nia sa sato: ‘Ipapasabot ko saimo, asin itotokdo ko saimo an dalan na maninigo mong lakawan. Dian sa saimo ituturuhok ko an sakuyang mga mata.’ (Sal. 32:⁠8) Paano nagtatao si Jehova sa sato nin sadol? Paano kita makikinabang dian? Asin taano ta makakasierto kita na ginigiyahan ni Jehova an banwaan nia ngonyan? Mangnoha kun paano sinisimbag an mga hapot na iyan sa libro nin Kapahayagan.

ININGATAN PAAGI SA KONSEHO

11. Paano masasabing aram na gayo ni Jehova an nangyayari sa mga kongregasyon kan banwaan nia?

¹¹ Sa bisyon sa Kapahayagan kapitulo 2 asin 3, sinisiyasat kan pinamuraway na si Jesu-Cristo an pitong kongregasyon sa Asia Minor. An bisyon naghahayag na naheheling ni Cristo bako sana an pangkagabsan na situwasyon kundi pati an espesipikong mga situwasyon. Sa nagkapirang pangyayari, nagsambit pa ngani sia nin mga indibiduwal, asin sa kada kamugtakan, nagtao sia nin angay na komendasyon o konseho. Ano an ipinaparisa kaini? Sa kaotoban kan bisyon, an pitong kongregasyon nagrerepresentar sa linahidan na mga Kristiano pagkatapos kan 1914, asin an konseho sa pitong kongregasyon minaaplikar sa gabos na kongregasyon kan banwaan nin Dios ngonyan sa bilog na daga. Sa siring, angay na magkongklusyon na aktibong ginigiyahan ni Jehova an banwaan nia paagi sa saiyang Aki. Paano kita makikinabang sa paggiyang iyan?

12. Paano kita puedeng magpagiya ki Jehova sa satong mga lakad?

 ¹² An sarong paagi na makikinabang kita sa mamomoton na pagdirehir ni Jehova iyo an personal na pag-adal. Paagi sa mga publikasyon kan grupong maimbod asin mapagmansay na oripon, nagtatao si Jehova nin abundang konseho hale sa Kasuratan. (Mat. 24:45) Minsan siring, tanganing makinabang dian, kaipuhan na magtao nin panahon na pag-adalan iyan asin iaplikar an satong nanonodan. An personal na pag-adal sarong paagi na ‘iniingatan kita [ni Jehova] sa pagkasingkog.’ (Jud. 24) May napag-adalan ka na daw sa satong mga babasahon na garo baga isinurat para nanggad sa saimo? Akoon iyan bilang pagtatanos ni Jehova. Siring sa katood na puedeng tapion ka sa abaga tanganing darahon an atension mo sa sarong bagay, puedeng gamiton ni Jehova an espiritu nia tanganing darahon an saimong atension sa sarong aspekto nin paggawe o personalidad na kaipuhan na paoswagon mo asin siertong kan dakol na iba pa. Paagi sa pagigin andam na sumunod sa pagdirehir kan espiritu, nagpapagiya kita ki Jehova sa satong mga lakad. (Basahon an Salmo 139:​23, 24.) Sa bagay na ini, marahay na siyasaton niato an satong mga ugale sa pag-adal.

13. Taano ta madonong na siyasaton niato an satong mga ugale sa pag-adal?

¹³ An labi-labing panahon sa pag-aling-aling puedeng makakua kan panahon niato na kaipuhan para sa personal na pag-adal. An sarong brother nagsabi: “Madalion na mapalampas an personal na pag-adal. An aling-alingan mas madaling makua asin mas barato ngonyan kisa kasuarin man. Yaon na iyan sa TV, sa kompyuter, asin sa cellphone. Napapalibotan kita kaiyan.” Kun bako kitang maingat, luway-luway na maiinaan an panahon na kaipuhan para sa hararom na personal na pag-adal sagkod na haros mawara na iyan. (Efe. 5:​15-17) Marahay na ihapot kan kada saro sa sato: ‘Gurano kaparate kong tinatawan nin panahon an hararom na pag-adal sa Tataramon nin Dios? Kun igwa sana daw ako nin pahayag o kabtang sa pagtiripon na kaipuhan na iandam?’ Kun iyo, tibaad mas epektibo niatong magagamit an banggi na itinagama sa pampamilyang pagsamba o personal na pag-adal tanganing pahalagahan an espirituwal na kadonongan na itinatao ni Jehova na mag-iingat sa sato para sa kaligtasan.​—⁠Tal. 2:​1-5.

SINUSTENIRAN PAAGI SA PAMPARIGON SA BOOT

14. Paano ipinapaheling kan Kasuratan na tinatawan ni Jehova nin atension an satong namamatean?

¹⁴ Napaatubang si David sa dakol na masakit na pangyayari sa buhay nia. (1 Sam. 30:​3-6) Ihinahayag kan ipinasabong na mga tataramon nia na aram ni Jehova an namamatean nia. (Basahon an Salmo 34:18; 56:⁠8.) Aram man nin Dios an namamatean niato. Minarani sia sa sato kun kita mamondoon, o may ‘laglag na puso,’ o nangluluya an boot. Ini mismo puedeng makaranga sa sato, arog kan namatean ni David, na nag-awit: ‘Mag-oogma ako asin mararanga ako dian sa saimong pagkaherak, huli ta naheling mo an sakuyang kamondoan; namidbid mo an sakuyang kalag sa mga kahorasaan.’ (Sal. 31:⁠7) Alagad dai sana basta naririsa ni Jehova an satong kasakitan. Sinususteniran man nia kita paagi sa pagranga asin pagparigon sa boot niato. An sarong paagi na ginigibo nia ini iyo an Kristianong mga pagtiripon.

15. Anong leksion an manonodan niato sa eksperyensia ni Asaf?

¹⁵ Iiniilustrar kan eksperyensia kan salmistang si Asaf an sarong pakinabang kan pag-atender sa  mga pagtiripon. An pagparaisip ni Asaf sa mga inhustisya nagin dahelan na kuestionon nia an halaga nin paglilingkod sa Dios. Pinangluyahan nin boot si Asaf. Arog kaini an pagkaladawan nia sa saiyang namatean: “An sakong puso puminait asin sa sakuyang mga bato ako nakolgan na gayo.” Bilang resulta, haros nagpondo na sia sa paglilingkod ki Jehova. Ano an nakatabang ki Asaf na magin timbang giraray? “Naglaog ako sa kahangahangang santuaryo nin Dios,” an sabi nia. Duman, kaiba kan mga kapwa parasamba ki Jehova, nagkaigwa giraray sia kan tamang pagmansay. Naheling nia na an kapangganahan kan mga maraot temporaryo sana, na siertong itatanos ni Jehova an mga bagay-bagay. (Sal. 73:​2, 13-22, NW) Tibaad totoo man iyan sa sato. Puede kitang pangluyahan nin boot huli sa nakakatension na mga inhustisya sa kinaban ni Satanas. An pakikipagtipon sa satong mga tugang nakakarepresko asin nakakatabang sa sato na magdanay na magayagaya sa paglilingkod ki Jehova.

16. Paano kita makikinabang sa halimbawa ni Anna?

¹⁶ Pero, paano kun nadedepisilan kang mag-atender sa mga pagtiripon huli sa sarong situwasyon sa kongregasyon? Tibaad kinaipuhan mong butasan an sarong pribilehio nin paglilingkod asin nasusupog ka, o may dai kamo pinagkaoyonan nin sarong tugang. Kun iyo, makakatabang sa saimo an halimbawa ni Anna. (Basahon an 1 Samuel 1:​4-8.) Girumdomon na sia uyam na gayo huli sa situwasyon sa pamilya nia may koneksion ki Penina, na karibal nia sa saiyang agom. Naggagrabe an situwasyon kada taon kun an pamilya nagduduman sa Silo tanganing magdolot nin mga atang ki Jehova. Makologon iyan sa boot ni Anna kaya “naghihibi sia asin dai nagkakakan.” Pero, dai ini nakaolang sa saiya na mag-atender sa mga okasyon para sa pagsamba ki Jehova. Nariparo ni Jehova an saiyang kaimbodan asin binendisyonan sia.​—⁠1 Sam. 1:​11, 20.

17, 18. (a) Sa anong mga paagi nag-aako kita nin pamparigon sa boot sa mga pagtiripon sa kongregasyon? (b) Ano an pagmate mo sa mamomoton na pag-ataman na itinatao ni Jehova tanganing tabangan kitang makamtan an kaligtasan?

¹⁷ An mga Kristiano ngonyan may marahay na dahelan na arogon an halimbawa ni Anna. Kaipuhan kitang magin regular sa pag-atender sa mga pagtiripon. Arog kan naeksperyensiahan ta gabos, an mga pagtiripon nagtatao nin mahalagang marhay na pamparigon sa boot. (Heb. 10:​24, 25) Nakakaranga sa sato an mamomoton na pag-iribanan nin mga Kristiano. Puedeng makataros sa satong puso an nadangog niato sa sarong pahayag o komento. Sa pag-orolay bago o pagkatapos nin pagtiripon, an sarong kapagtubod puedeng maghinanyog sa sato o magsambit nin nakakarangang mga tataramon. (Tal. 15:23; 17:17) Mantang kinokosogan niato an satong boses sa pag-awit ki Jehova, minarahay an pagmate niato. Nangorogna kun igwa kita nin nakakapurisaw na mga kaisipan, kaipuhan ta an pamparigon sa boot hale sa mga pagtiripon, na dian sinususteniran kita ni Jehova kan ‘mga karangahan’ nia asin sinusuportaran kita sa determinasyon niato na magdanay na maimbod.​—⁠Sal. 94:​18, 19.

¹⁸ Sa mamomoton na pag-ataman kan satong Dios, ligtas an pagmate niato arog kan salmistang si Asaf, na nag-awit ki Jehova: “Kinapotan mo an too kong kamot. Paagi sa saimong hatol gigiyahan mo ako.” (Sal. 73:​23, 24, NW) Nagpapasalamat nanggad kita na iniingatan kita ni Jehova para sa kaligtasan!

[Mga Hapot Para sa Pag-adal]

[Ritrato sa pahina 28]

Dinagka ka man ni Jehova

[Ritrato sa pahina 30]

Naiingatan kita paagi sa pag-aplikar kan konseho nin Dios

[Ritrato sa pahina 31]

Sinususteniran kita paagi sa inaako niatong pamparigon sa boot