Nagigirumdoman Mo daw?

Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Helinga kun masisimbag mo an minasunod na mga hapot:

Sa anong paagi puedeng magin nagpapatanid na halimbawa sa sato si Salomon?

Binendisyonan asin ginamit nin Dios si Hadeng Salomon. Minsan siring, durante kan saiyang pamamahala, sinuway ni Salomon an hatol nin Dios. Inagom nia an paganong aki ni Faraon, kuminua nin dakol na agom, asin tinogotan an paganong mga babae na luway-luway na makaimpluwensia sa saiya sa falsong pagsamba. Kaipuhan kitang maglikay na luway-luway na makapatalubo nin salang ugale o tendensia. (Deut. 7:​1-4; 17:17; 1 Ha. 11:​4-8)​—12/15, pahina 10-12.

Taano ta masasabi niato na si Sara makidios na babae asin mahal na marhay na agom?

Kan pagbotan nin Dios si Abraham na humale sa Ur, iyan nangahulogan nin pagbaya sa mga kapamilya, katood, asin sarong klase nin pamumuhay tanganing magduman sa lugar na dai aram. Pero nakikooperar si Sara, na nagtitiwalang bebendisyonan sia nin Dios. Iginalang nia si Abraham asin nagpaheling sia nin marahay na mga karakteristiko.​—1/1, pahina 8.

Taano ta ipinapaatang kaidto ni Jehova ki Abraham an namomotan na aki kaini?

Mahalagang girumdomon na dai man talaga tinogotan nin Dios si Abraham na iatang si Isaac. Saro ining paagi tanganing ipaheling nin Dios kun gurano kadakulang sakripisyo para sa saiya an pag-atang sa saiyang Aki, si Jesus.​—1/1, pahina 23.

Ano an nagpaparisa na poon kan enot na siglo, pirmeng may tunay na linahidan na mga Kristiano sa daga?

Sa parabola ni Jesus manongod sa mga “trigo” asin mga “doot,” “an marahay na banhi” nanonongod sa ‘mga aki nin kahadean.’ (Mat. 13:​24-30, 38) Matubo an mga doot kaibanan kan mga trigo sagkod sa pag-ani. Huli kaini, minsan ngani dai niato masisierto kun sairisay an kabilang sa grupong trigo, masasabi niato na pirmeng igwa nin nagkapira sagkod sa satong panahon.​—1/15, pahina 7.

Anong mga pangyayari an masagkod sa Armagedon?

An mga nasyon mapaluwas nin makahulogan na deklarasyon na “Katoninongan asin katiwasayan!” (1 Tes. 5:​3, NW) Mahiro an mga gobyerno tumang sa falsong relihion. (Kap. 17:​15-18) Sasalakayon an tunay na mga parasamba. Dangan maabot an katapusan.​—⁠2/1-E, pahina 9.

Ano an magigibo niato tanganing malabanan an tendensiang mauri?

Makakatabang sa sato an mga minasunod: Magmaigot na pataluboon an pagkamoot asin kapadangatan na sa magturugang, makiasosyar sa diosnon na mga tawo, maghingoang gumibo nin marahay, ‘makiogma sa mga nag-oogma.’ (Roma 12:15)​—2/15, pahina 16-17.

Sairisay an nagtataram kan lenguaheng Nahuatl, asin ano an ginigibo para sa sainda?

Iyan an lenguahe kan suanoy na mga Aztec, asin 1.5 milyones katawo pa an nagtataram kaiyan sa Mejico. Naghuhulit an mga Saksi sa Nahuatl, asin an nagkapira sa mga literatura niato makukua sa lenguaheng iyan.​—⁠3/1-E, pahina 13-14.

Kun nagtatao nin sadol, anong mga prinsipyo an maninigo niatong girumdomon?

Aramon an tunay na situwasyon. Likayan an pabiglabiglang pagsimbag. Mapakumbabang iaplikar an Tataramon nin Dios. Kun posible, gamiton an teokratikong libreriya. Likayan an pagdesisyon para sa iba.​—3/15, pahina 7-9.

Sinadol ni Jesus an mga nagdadangog sa saiya na umiba nin duwang milya. (Mat. 5:41) Ano an punto nia?

Kan panahon na idto sa Israel, an sarong tawo puedeng puersahan na patrabahohon kan nananakop na mga Romano. Sa pagsadol sa mga nagdadangog sa saiya na umiba nin duwang milya, an boot sabihon ni Jesus iyo na dapat nindang gibohon na mayong pagreklamo an oyon sa ley na mga kahagadan kan nasa autoridad.​—4/1, pahina 9.