Papagdanayon na Bilog an Puso Para ki Jehova
Papagdanayon na Bilog an Puso Para ki Jehova
“Aki ko, midbida an Dios kan saimong ama asin maglingkod ka sa saiya na may bilog na puso.”—1 CRON. 28:9, NW.
HANAPON AN SIMBAG SA MGA HAPOT NA INI:
Ano an piguratibong puso?
Ano an sarong paagi na masiyasat niato an satong puso?
Paano niato mapagdadanay na bilog an puso niato para ki Jehova?
1, 2. (a) Anong kabtang kan hawak an pinakaparateng sinasambit sa Tataramon nin Dios sa piguratibong paagi? (b) Taano ta mahalaga na masabotan niato an kahulogan kan piguratibong puso?
SA Tataramon nin Dios, parateng sinasambit sa piguratibong paagi an mga kabtang kan hawak nin tawo. Halimbawa, an patriarkang si Job nagsabi: “Mayo nin kadahasan sa sakong mga palad.” Si Hadeng Salomon nagkomento: ‘An marahay na dangog nakakapataba sa mga tolang.’ Inasegurar ni Jehova si Ezequiel: ‘Matagas pa sa gapo ginibo ko an saimong angog.’ Asin may nagsabi ki apostol Pablo: ‘Ika nagdadara nin mga bagong bagay sa samong mga talinga.’—Job 16:17, NW; Tal. 15:30; Ezeq. 3:9; Gui. 17:20.
2 Pero, may sarong kabtang kan hawak nin tawo na pinakaparateng sinasambit sa Biblia sa piguratibong paagi. Sinambit iyan kan maimbod na si Anna sa saiyang pamibi: ‘Naoogma an sakuyang puso ki Jehova.’ (1 Sam. 2:1) Sa katunayan, haros sangribong beses na sinambit kan mga kagsurat kan Biblia an puso, na haros pirmeng sa piguratibong paagi. Mahalagang marhay na masabotan niato kun sa ano nagrerepresentar an puso huling sinasabi kan Biblia na kaipuhan tang ingatan iyan.—Basahon an Talinhaga 4:23.
AN PIGURATIBONG PUSO—ANO IYAN?
3. Paano niato masasabotan an kahulogan kan “puso” sa Biblia? Iilustrar.
3 Minsan ngani an Tataramon nin Dios dai nagtatao nin pakahulogan sa terminong “puso,” tinatabangan kita kaiyan na masabotan an kahulogan kan terminong iyan. Paano? Sa pag-ilustrar, isip-isipa an magayonon na mosaic sa lanob na gibo sa dakolon na pinagtaraedtaed na saradit na gapo. Kun an saro maatras tanganing helingon an bilog na mosaic, maheheling nia na an saradit na gapo na maingat na pinagtaraedtaed may nabilog na ladawan o retrato. Siring man, kun hehelingon niato an dakol na pagkagamit kan Biblia sa “puso,” masasabotan niato na kun pag-iiribanon iyan, makakabilog kita nin ladawan. Anong ladawan?
4. (a) Sa ano nagrerepresentar an “puso”? (b) Ano an kahulogan kan mga tataramon ni Jesus sa Mateo 22:37?
4 Ginagamit kan mga kagsurat kan Biblia an “puso” tanganing iladawan an bilog na panglaog na pagkatawo nin saro. Kaiba dian an satong mga kamawotan, kaisipan, disposisyon, atitud, kakayahan, motibasyon, asin pasohan. (Basahon an Deuteronomio 15:7; Talinhaga 16:9; Guibo 2:26.) Siring kan sinabi sa sarong reperensia, iyan an “kabilogan kan panglaog na pagkatawo.” Pero, may mga pagkakataon na espesipiko an kahulogan kan “puso.” Halimbawa, si Jesus nagsabi: “Mamotan mo an Kagurangnan mong Dios sa bilog mong puso, asin sa bilog mong kalag, patin sa bilog mong isip.” (Mat. 22:37) Sa halimbawang ini, an “puso” nanonongod sa emosyon, kamawotan, asin saboot nin saro. Paagi sa magkakasuhay na pagsambit sa puso, kalag, asin isip, idinoon ni Jesus na an pagkamoot niato sa Dios dapat tang ipahayag paagi sa satong mga saboot, pamumuhay, asin paggamit kan satong mental na kakayahan. (Juan 17:3; Efe. 6:6) Pero, kun “puso” sana an nasasambitan, nanonongod iyan sa bilog na panglaog na pagkatawo.
KUN TAANO TA KAIPUHAN NIATONG INGATAN AN SATONG PUSO
5. Taano ta gusto niatong gibohon an satong pinakamakakaya na paglingkodan si Jehova nin bilog na puso?
5 Kun dapit sa puso, ipinagirumdom ni Hadeng David ki Salomon: “Aki ko, midbida an Dios kan saimong ama asin maglingkod ka sa saiya na may bilog na puso asin may nakakaogmang marhay na kalag; huli ta an gabos na puso sinisiyasat ni Jehova, asin an gabos na tendensia kan mga kaisipan saiyang namamansayan.” (1 Cron. 28:9, NW) Tunay nanggad, si Jehova an Parasiyasat sa gabos na puso, pati na kan sa sato. (Tal. 17:3, NW; 21:2) Asin an naheheling nia sa puso niato may dakulang epekto sa satong relasyon sa saiya asin sa puturo niato. Kaya, may marahay na dahelan kita na sunodon an ipinasabong na konseho ni David paagi sa paggibo kan satong pinakamakakaya na paglingkodan si Jehova nin bilog na puso.
6. Ano an maninigo tang masabotan manongod sa determinasyon niato na paglingkodan si Jehova?
6 Ipinapaheling kan kaigotan niato sa satong mga gibohon bilang banwaan ni Jehova na igwa nanggad kitang hararom na pagmawot na paglingkodan an Dios nin bilog na puso. Alagad, nasasabotan niato na an mga panggigipit kan maraot na kinaban ni Satanas asin an makasalan na mga tendensia kan sato mismong laman makosogon na mga impluwensia na makakapaluya sa determinasyon tang maglingkod sa Dios nin bilog na puso. (Jer. 17:9; Efe. 2:2) Kaya, tanganing masegurado na dai nagluluya an determinasyon niato na paglingkodan an Dios—an boot sabihon, dai niato pinapabayaan an satong pagigin mapagbantay—kaipuhan tang regular na siyasaton an satong puso. Paano niato magigibo iyan?
7. Paano maheheling an kamugtakan kan satong puso?
7 Siempre, an panglaog niatong personalidad dai naheheling—kun paanong an pinakatahaw na parte, o ubod, nin kahoy dai naheheling. Sa ibong kaiyan, arog kan sinambit ni Jesus sa Sermon sa Bukid, kun paanong ihinahayag kan mga bunga an kamugtakan nin sarong kahoy, ipinapaheling man kan mga ginigibo niato an tunay na kamugtakan kan satong puso. (Mat. 7:17-20) Pag-olayan ta an saro sa siring na mga gibo.
SARONG PAAGI NA MASIYASAT NIATO AN SATONG PUSO
8. Paano masasabi na an mga tataramon ni Jesus sa Mateo 6:33 konektado sa nasa puso niato?
8 Sa Sermon sa Bukid, sinabi ni Jesus sa mga nagdadangog sa saiya kun anong espesipikong gibo an magpapaheling kan panglaog na kamawotan nindang paglingkodan si Jehova nin bilog na puso. Sia nagsabi: ‘Hanapa nguna nindo an kahadean nin Dios asin an saiyang katanosan, asin ining gabos na bagay idadagdag na sana sa saindo.’ (Mat. 6:33) Iyo, maheheling sa mga bagay na ineenot niato sa satong buhay kun ano an minamawot, iniisip, asin pinaplano niato sa kairairaromi kan satong puso. Kaya, an sarong paagi na maaraman kun baga bilog na puso kitang naglilingkod sa Dios iyo an pagsiyasat sa mga prioridad niato sa buhay.
9. Ano an pangagda ni Jesus sa nagkapirang lalaki, asin ano an ihinayag kan saindang reaksion?
9 Dai nahaloy pagkasadol ni Jesus sa mga parasunod nia na ‘hanapon nguna an kahadean nin Dios,’ may nangyari na nag-iilustrar kun paano nanggad nahahayag an kamugtakan kan puso nin saro paagi sa mga ineenot nia sa saiyang buhay. Pinonan kan kagsurat nin Ebanghelyo na si Lucas an pag-estorya kan pangyayari sa pagsabing marigon na nagdesisyon si Jesus na magpa-Jerusalem dawa aram niang marhay an mangyayari sa saiya duman. Mantang sinda kan mga apostol nia “nasa dalan,” may mga lalaking nasabat si Jesus na inagda niang sumunod sa saiya. Andam an mga lalaking idto na akoon an pangagda ni Jesus—alagad may mga kondisyon sinda. An sarong lalaki nagsimbag: ‘Togoti akong pumaduman nguna asin ilobong an sakong ama.’ An saro pa nagsabi: ‘Ako masunod saimo, Kagurangnan; alagad, togoti akong magpaaram nguna sa mga nasa harong ko.’ (Luc. 9:51, 57-61) An reaksion kan mga lalaking idto na may kondisyon saka bakong desidido laen nanggad sa marigon saka bilog na pusong determinasyon ni Jesus! Paagi sa pag-enot kan saindang mga kamawotan kisa sa intereses kan Kahadean, ihinayag ninda na bakong bilog an puso ninda para sa Dios.
10. (a) Ano an reaksion niato sa pangagda ni Cristo na magin parasunod nia? (b) Anong halipot na ilustrasyon an isinaysay ni Jesus?
10 Bakong arog kan mga lalaking idto, may kadonongan niatong inako an pangagda ni Jesus na magin mga parasunod nia asin naglilingkod na kita ki Jehova aroaldaw. Sa paaging ini, ipinapaheling ta kun ano an namamatean niato manongod ki Jehova. Pero, dawa aktibo kita sa kongregasyon, kaipuhan pa man giraray kitang mag-ingat sa sarong posibleng peligro sa kamugtakan kan satong puso. Ano iyan? Sa iyo man sanang pakikipag-olay ni Jesus sa mga inagda niang magin disipulo, ihinayag nia an peligrong iyan sa pagsabi: “Mayo nin tawo na nagkapot sa arado asin nagsalingoy sa mga bagay na nasa hudian an angay sa kahadean nin Dios.” (Luc. 9:62, NW) Anong leksion an manonodan niato sa ilustrasyon na iyan?
NANGANGAPOT DAW KITA SA MARAHAY?
11. Ano an nangyari sa trabaho kan paraoma sa ilustrasyon ni Jesus, asin taano?
11 Tanganing mas masabotan niato an halipot na ilustrasyon ni Jesus, dagdagan niato ini nin nagkapirang detalye. Sarong paraoma an sibot na nag-aarado. Pero, mantang nag-aarado pigpaparaisip nia an saiyang harong, na duman yaon an saiyang pamilya asin mga katood, may kakanon, musika, ngirisihan, saka sirongan. Hinahanaphanap nia an mga iyan. Pagkatapos nin harohalawig na pag-arado, kuminosog an pagmawot kan trabahador sa nakakaogmang mga bagay na idto kaya suminalingoy sia sa “mga bagay na nasa hudian.” Minsan ngani dakol pang dapat na gibohon bago matanoman an oma, nawara na an konsentrasyon kan trabahador asin naapektaran an saiyang trabaho. Siempre, desganado an among kan trabahador huli sa kawaran kaini nin pagtitiaga.
12. Ano an pagkakaagid kan trabahador sa ilustrasyon ni Jesus asin kan nagkapirang Kristiano ngonyan?
12 Ngonyan, estudyare an sarong pagkakaagid sa satong panahon. An paraoma puedeng magrepresentar sa siisay man na Kristiano na garo baga marahay man alagad an totoo namemeligro sa espirituwal. Bilang pagkomparar, imahinaron niato an sarong brother na regular na nag-aatender sa mga pagtiripon asin nakikikabtang sa ministeryo. Alagad, pigpaparaisip man nia an nagkapirang bagay sa kinaban na kaakit-akit sa saiya. Sa kairairaromi kan puso nia, hinahanaphanap nia an mga iyan. Pag-abot nin panahon, pagkatapos niang maglingkod sa Dios nin nagkapirang taon, kuminosog an pagmawot nia sa nagkapirang bagay kan kinaban na ini kaya suminalingoy sia sa “mga bagay na nasa hudian.” Minsan ngani dakol pa an dapat gibohon sa ministeryo, dai sia ‘nangangapot nin marigon sa tataramon nin buhay,’ asin naaapektaran an pakikikabtang nia sa teokratikong mga aktibidad. (Fil. 2:16, NW) Si Jehova, an ‘Kagurangnan nin pag-ani,’ namomondo sa siring na kawaran nin pakatagal.—Luc. 10:2.
13. Ano an kalabot sa bilog na pusong paglilingkod ki Jehova?
13 Malinaw an leksion. Kaomaw-omaw kun regular kita sa kapakipakinabang asin nakakakontentong mga aktibidad siring kan pag-atender sa mga pagtiripon kan kongregasyon asin paglilingkod sa langtad. Alagad orog pa an kalabot sa bilog na pusong paglilingkod ki Jehova. (2 Cron. 25:1, 2, 27) Kun sa kairairaromi kan puso nin sarong Kristiano padagos niang namomotan an “mga bagay na nasa hudian”—an boot sabihon, an nagkapirang bagay sa kinaban—namemeligrong mawara nia an saiyang marahay na relasyon sa Dios. (Luc. 17:32) Magigin ‘angay sana kita sa kahadean nin Dios’ kun talagang ‘ikinakaongis niato an maraot’ asin nangangapot kita sa marahay. (Luc. 9:62, NW; Roma 12:9) Kun siring, kaipuhan ta gabos na seguradohon na mayong ano man sa kinaban ni Satanas, minsan ngani garo baga kapakipakinabang o nakakaogma iyan, an makakapapondo sa sato sa bilog na pusong paglilingkod sa Dios.—2 Cor. 11:14; basahon an Filipos 3:13, 14.
MAGDANAY NA ALERTO!
14, 15. (a) Paano hinihingoa ni Satanas na paluyahon an kaigotan niato sa paglilingkod ki Jehova? (b) Iilustrar kun taano ta peligrosong marhay an pamamaagi ni Satanas.
14 Pagkamoot ki Jehova an nagpahiro sa sato na idusay an satong sadiri sa saiya. Sa laog nin dakol na taon poon kaidto, pinatunayan kan dakol sa sato na determinado kitang papagdanayon an bilog na pusong paglilingkod ki Jehova. Minsan siring, dai pa minasuko si Satanas. Punteriya pa man giraray nia an puso niato. (Efe. 6:12) Siempre, aram niang dai niato basta-basta babayaan si Jehova. Kaya, may katusohan niang ginagamit an “kinaban” na ini tanganing luway-luway na paluyahon an odok sa pusong kaigotan niato para sa Dios. (Basahon an Marcos 4:18, 19.) Taano ta epektibong marhay an pamamaaging iyan ni Satanas?
15 Tanganing masimbag iyan, imahinara na nagbabasa ka nin libro gamit an bombilyang 100 watts, alagad napundir iyan. Huling nagdiklom, aram mo tolos kun ano an nangyari asin rinibayan mo nin bago an pundidong bombilya. Nagliwanag giraray an kuarto. Kan sunod na banggi, nagbabasa ka giraray gamit an bombilyang iyan. Minsan siring, mayo kang kaaram-aram na an bagong bombilyang 100 watts rinibayan nin bombilyang 95 watts. Maririsa mo daw an pagkakaiba? Posibleng dai. Asin paano kun sa sunod na aldaw, an ilaw na iyan ribayan giraray nin bombilyang 90 watts? Posibleng marhay na dai mo man giraray maririsa iyan. Taano ta dai? Huling luway-luway nanggad an pagluya kan liwanag kaini. Kaagid kaiyan, tibaad dikit-dikit na lumuya an satong kaigotan huli sa mga impluwensia kan kinaban ni Satanas. Kun mangyari iyan, garo man sana nagin mapanggana si Satanas sa pagpaluya sa satong 100 watts na odok sa pusong kaigotan sa paglilingkod ki Jehova. Kun dai magigin alerto an sarong Kristiano, tibaad dai ngani nia marisa an luway-luway na pagbabago.—Mat. 24:42; 1 Ped. 5:8.
MAHALAGANG MARHAY AN PAMIBI
16. Paano niato maiingatan an satong sadiri sa mga pakana ni Satanas?
16 Paano niato maiingatan an satong sadiri sa siring na mga pakana ni Satanas asin mapagdadanay an bilog na pusong paglilingkod ki Jehova? (2 Cor. 2:11) Mahalagang marhay an pamibi. Dinagka ni Pablo an mga kapagtubod na ‘marigon na manindogan tumang sa mga pakana kan Diablo.’ Dangan sinadol nia sinda: ‘Kaiba an gabos na klase nin pamibi asin pagngayongayo, padagos kamong mamibi sa gabos na panahon.’—Efe. 6:11, 18, NW; 1 Ped. 4:7.
17. Anong leksion an itinotokdo sa sato kan mga pamibi ni Jesus?
17 Tanganing marigon na makapanindogan tumang ki Satanas, madonong na arogon niato an atitud ni Jesus sa pamimibi, na nagpaheling kan saiyang hararom na pagmawot na paglingkodan si Jehova nin bilog na puso. Halimbawa, mangnoha an isinurat ni Lucas manongod sa kun paano namibi si Jesus kan banggi bago sia magadan: “Huling nasa dakulang kamondoan, namibi sia nin odok pa.” (Luc. 22:44) Si Jesus dati nang namimibi nin odok, alagad sa pangyayaring ini, mantang napapaatubang sa pinakagrabeng pagbalo sa buhay nia digdi sa daga, sia namibi nin “odok pa”—asin sinimbag an saiyang pamibi. Ipinapaheling sa halimbawa ni Jesus na laen-laen an intensidad nin mga pamibi. Sa dahelan na iyan, mientras na mas magabat an mga pagbalo sa sato asin mas tuso an mga pakana ni Satanas, maninigong mas “odok pa” an pamimibi niato para sa proteksion ni Jehova.
18. (a) Ano an maninigo niatong ihapot sa satong sadiri manongod sa pamibi, asin taano? (b) Anong mga bagay an may epekto sa satong puso, asin sa anong mga paagi? (Helingon an kahon sa pahina 16.)
18 Ano an epekto sa sato kan siring na mga pamibi? Si Pablo nagsabi: ‘Sa gabos na bagay, sa pamibi asin pagngayongayo na may pagpasalamat, ipahayag nindo sa Dios an saindong mga hinahagad. Asin an katoninongan nin Dios, na minalampas sa gabos na pakasabot, mag-iingat kan saindong mga puso.’ (Fil. 4:6, 7) Iyo, dapat na odok asin parate kitang mamibi tanganing mapagdanay na bilog an puso para ki Jehova. (Luc. 6:12) Huli kaini, hapoton an saimong sadiri, ‘Gurano kaodok asin kaparate an mga pamibi ko?’ (Mat. 7:7; Roma 12:12) An simbag mo maghahayag kan rarom kan saimong odok sa pusong pagmawot na paglingkodan an Dios.
19. Ano an gigibohon mo tanganing mapagdanay na bilog an puso mo ki Jehova?
19 Arog kan napag-olayan niato, maheheling nanggad sa mga prioridad niato sa buhay kun ano an kamugtakan kan satong puso. Gusto niatong seguradohon na an mga bagay na binayaan niato ni an mga tusong pakana ni Satanas dai makakapaluya kan satong determinasyon na paglingkodan si Jehova nin bilog na puso. (Basahon an Lucas 21:19, 34-36.) Kun siring, arog ni David, padagos kitang nagngangayongayo ki Jehova: “Parigona an sakong puso.”—Sal. 86:11.
[Mga Hapot Para sa Pag-adal]
[Kahon sa pahina 16]
TOLONG BAGAY NA MAY EPEKTO SA SATONG PUSO
Kun paanong may magigibo kita na makakatabang sa kamugtakan kan satong literal na puso, may magigibo man kita na makakatabang na mapagdanay na marahay an kamugtakan kan satong piguratibong puso. Estudyare an tolong mahalagang bagay na ini:
1 Kakanon: Kaipuhan kan satong literal na puso an supisyente asin masustansiang kakanon. Kaagid kaiyan, kaipuhan niatong seguradohon na nag-aako kita nin supisyente asin nakakarahay na espirituwal na kakanon paagi sa regular na personal na pag-adal, paghorophorop, asin pag-atender sa mga pagtiripon.—Sal. 1:1, 2; Tal. 15:28; Heb. 10:24, 25.
2 Ehersisyo: Tanganing magin marahay an salud, may mga panahon na kaipuhan kan literal tang puso na magbomba nin mas makosog. Kaagid kaiyan, an kaigotan sa ministeryo—tibaad paagi sa paghihingoang orog na makikabtang dian—makakatabang na mapagdanay na nasa marahay na kamugtakan an piguratibong puso niato.—Luc. 13:24; Fil. 3:12.
3 Kapalibotan: Huli sa bakong diosnon na kapalibotan na kinabubuhayan niato, puedeng masakitan na marhay an satong literal asin piguratibong puso. Minsan siring, mababawasan niato an siring na problema paagi sa pirmeng pakikiasosyar sagkod sa mapupuede sa mga kapagtubod, na tunay na nagmamakolog sa sato asin bilog an puso na naglilingkod sa Dios.—Sal. 119:63; Tal. 13:20.
