KAN 1886, sanggatos na kopya nin Millennial Dawn, Volume I, an ipinadara hale sa Bible House sa Allegheny, Pennsylvania, E.U.A., pasiring sa Chicago, Illinois. Naglalaom si Charles Taze Russell na ikakadistribwir an bagong tomo sa mga tindahan nin libro. An saro sa pinakadakulang mga kompanya sa Estados Unidos na nagdidistribwir nin mga libro manongod sa relihion uminoyon na ipabakal an Millennial Dawn, alagad ibabalik ninda an matatadang mga libro. Pero, pakalihis nin duwang semana, ibinalik sa Bible House an gabos na ipinadarang libro.

Sinasabi na sarong midbid na marhay na ebanghelista an naanggot kan mahiling an Millennial Dawn na naka-display kaiba kan saiyang mga libro. Anggot niang sinabi na kun dai hahaleon an mga libro sa estante, kukuanon nia patin kan gabos na bantog na amigo niang ebanghelista an saindang libro asin ibabalyo sa ibang lugar an negosyo ninda. Magabat an boot na ibinalik kan distributor an mga Dawn. Saro pa, may mga anunsio na sa diaryo manongod sa libro, alagad sinegurado kan mga nagkokontra na makanselar an mga kontratang iyan sa pag-anunsio. Kun siring, paano makakaabot an bagong publikasyon na ini sa mga naghahanap kan katotoohan?

An mga colporteur an nagin kasimbagan. * Kan 1881, may pangapodan sa Zion’s Watch Tower para sa 1,000 parahulit na bilog na panahon na makakadistribwir nin mga literatura sa Biblia. Minsan ngani pipirang gatos sana an mga colporteur kaidto, mahiwason nindang ikinapalakop an mga banhi nin katotoohan paagi sa imprentadong mga literatura. Kan 1897, haros sarong milyon na Dawn an ikinadistribwir na, kadaklan kan mga colporteur. An kadaklan sa sainda napapanigoan an pangenot na mga pangangaipo paagi sa dikit na reimbursement na inaako ninda para sa kada subskripsion nin Watch Tower o libro na ikinakapasakamot ninda.

Sairisay an daing takot na mga colporteur na ini? An nagkapira sa sainda nagpoon kan sinda tin-edyer pa, an iba kan sinda may edad na. Dakol sa sainda an daing agom o may agom alagad mayong aki, alagad medyo dakol na pamilya man an kaiba dian. Haros maghapon sa gibohon an mga regular colporteur, asin an mga auxiliary colporteur naggagamit nin saro o duwang oras kada aldaw. Huli sa salud o sa mga kamugtakan, bakong gabos makakagibo kaini. Alagad sa sarong kombension kan 1906, an mga makakalaog sa gibohon na iyan sinabihan na dai man ninda kaipuhan na magin “edukado, o matibayon, o siring sa anghel magtaram.”

Sa haros gabos na kontinente, pambihira an nagibo nin ordinaryong mga tawo. Sa pagkarkulo nin sarong brother, nakapasakamot sia nin 15,000 na libro sa laog  nin pitong taon. Pero, sinabi nia, “Dai ako nag-colporteur tanganing magpabakal nin libro, kundi tanganing magin saksi para ki Jehova asin sa saiyang katotoohan.” Saen man magduman an mga colporteur, nakagamot an mga banhi nin katotoohan asin duminakol an mga grupo nin Mga Estudyante sa Biblia.

Tinuya nin mga klerigo an mga colporteur, na inaapod an mga ini na mga paratinda sana nin libro. Kan 1892, an Watch Tower nagkomento: “Dikit sana an nakakamidbid sa [sainda] bilang tunay na mga representante kan Kagurangnan, o nakakasabot kan pagpahalaga sa sainda kan Kagurangnan huli sa saindang kapakumbabaan asin pagsasakripisyo.” An saro sa sainda nagsabi na an buhay nin mga colporteur “bakong pasil.” Matagal na sapatos asin bisikleta an pangenot na ginagamit ninda tanganing makaabot sa saindang mga dudumanan. Sa mga lugar na tios an mga tawo, iriniribay ninda nin kakanon an mga libro. Pagkatapos nin maghapon na paglilingkod, pagal alagad maogmang minabalik an mga parahulit sa saindang mga tolda asin inaarkilang mga kuarto. Dangan, nagkaigwa nin Colporteur Wagon, pasadyang harong na de rueda, na nagin paagi na makatipid sinda nin dakol na oras asin kuarta. *

Poon kan 1893 na kombension sa Chicago, iiniba sa programa an espesyal na mga sesyon para sa mga colporteur. Sa mga ini, itinatampok an maogmang pagsaysay nin mga eksperyensia, pagsuherir nin pamamaagi sa paghuhulit, asin praktikal na mga sadol. Sinadol kaidto ni Brother Russell an mahigos na mga parahulit na mamahaw nin masustansia, dangan aroatyan mag-inom nin sarong basong gatas, asin magkakan nin ice cream soda pag mainit an panahon.

An mga colporteur na naghahanap nin makakaibaiba o makakapartner sa paghuhulit may ikinakabit sa bado ninda na yellow na laso. An bagohan na mga colporteur ipinapartner sa mga mas eksperyensiado. Minalataw na kaipuhan talaga an siring na pagsasanay huling sarong bagohan na colporteur an, huli sa nerbios, nag-alok kan mga libro na sinasabi, “Bakong habo mo kaini?” Marahay sana ta gusto kan kagharong an mga libro, asin nagin Saksi sia kan huri.

Sarong brother an nag-isip-isip, ‘Magdadanay daw ako sa presenteng kamugtakan ko na may dakulang ginaganar asin madonar nin $1,000 (U.S.) kada taon sa gibohon, o ma-colporteur ako?’ May nagsabi sa saiya na pareho iyan papahalagahan kan Kagurangnan, alagad kun itatao nia an saiyang panahon sa Kagurangnan mas dakol na bendisyon an makakamtan nia. Ibinilang ni Mary Hinds an gibohon nin colporteur na “pinakamarahay na paagi tanganing matabangan an pinakadakol na tawo.” Asin an masusupgon na si Alberta Crosby nagsabi, “Kada aldaw, lalo kong namomotan an gibohon ko bilang Colporteur.”

Ngonyan, ipinapadagos pa man giraray kan dakol na literal asin espirituwal na mga makoapo kan maiigot na colporteur an saindang espirituwal na mana. Kun mayo pang nagin colporteur o payunir sa saindong pamilya, taano ta dai ngonyan ponan an tradisyon na ini sa saindong pamilya? Kada aldaw, lalo mo man na mamomotan an bilog na panahon na paghuhulit.

[Mga nota sa ibaba]

[Blurb sa pahina 32]

Dai man ninda kaipuhan na magin “edukado, o matibayon, o siring sa anghel magtaram”

[Ritrato sa pahina 31]

An colporteur na si A. W. Osei sa Ghana, kan mga 1930

[Mga Ritrato sa pahina 32]

Itaas: An mga colporteur na si Edith Keen asin Gertrude Morris sa Inglatera, kan mga 1918; ibaba: Si Stanley Cossaboom asin Henry Nonkes sa Estados Unidos, kataed an mga karton na pinaglagan kan mga librong ikinapasakamot ninda