‘Maglikay Kamo sa Lebadura nin mga Fariseo’

Pinatanidan ni Jesus an saiyang mga disipulo: ‘Maglikay kamo sa lebadura nin mga Fariseo, na iyo an pagsaginsagin.’ (Luc. 12:1) Sa kaagid na pagkasaysay kan mga tataramon ni Jesus, malinaw na kinondenar nia an katokdoan kan mga Fariseo.—Mat. 16:12.

Kun beses, ginagamit sa Biblia an ‘lebadura’ bilang simbolo nin karatan. Daing duda na an katokdoan asin kaisipan kan mga Fariseo parehong igwang maraot na epekto sa mga nagdadangog sa sainda. Taano ta peligroso an katokdoan kan mga Fariseo?

1 Ipinag-orgolyo kan mga Fariseo na sinda matanos, asin minenos ninda an ordinaryong mga tawo.

Ipinahiling an pagpakangmatanos na ini sa saro sa mga parabola ni Jesus. Sia nagsabi: “An Fariseo nagtindog asin nagpoon na mamibi kan mga bagay na ini sa boot nia, ‘O Dios, ako nagpapasalamat sa saimo na bako akong arog kan iba, mga parakikil, bakong matanos, parasambay, o arog ngani kan parasingil na ini nin buhis. Nag-aayuno ako nin duwang beses kada semana, itinatao ko an ikasampulong kabtang kan gabos na nakukua ko.’ Alagad an parasingil nin buhis na nakatindog sa harayo habo man lamang itingkalag an saiyang mga mata sa langit, kundi padagos na tinutubtob an saiyang daghan, na nagsasabi, ‘O Dios, magin maugayon ka sa sako na makasalan.’”—Luc. 18:11-13, NW.

Inomaw ni Jesus an kapakumbabaan kan parasingil nin buhis, na sinasabi: ‘Ako nagsabi sa saindo, An tawong ini nagpuli sa saiyang harong, pinakangbanal asin bako idtong [Fariseo]; huli ta an siisay man na mapalangkaw sa saiya man sana ibababa, alagad an mapakumbaba sa saiya man sana ilalangkaw.’ (Luc. 18:14) Dawa ngani an mga parasingil nin buhis midbid sa pandadaya, naghingoa si Jesus na tabangan an mga kabilang sa sainda na naghinanyog sa saiya. Kisiera duwang parasingil nin buhis—si Mateo asin Zaqueo—an nagin parasunod nia.

Paano kun iniisip tang mas matibay kita kisa sa iba huli sa satong mga abilidad na tao nin Dios o mga pribilehio o huling may mga pagkukulang asin kaluyahan an iba? Maninigo na tolos-tolos tang haleon sa isip an siring na mga bagay, huling sinasabi kan Kasuratan: ‘An pagkamoot matinios, asin maboot; an pagkamoot bakong maurihon; an pagkamoot bakong mapalangkaw, bakong mapaabhaw, dai naggigibo kan bakong maninigo, dai naghahanap kan manongod saiya, dai napapaanggot, dai naggigirumdom kan maraot; dai nag-oogma sa kabikoan [“dai ikinakaogmang may pag-orgolyo an mga kasalan nin ibang tawo,” The New English Bible], kundi nag-oogma sa katotoohan.’—1 Cor. 13:4-6.

Maninigo kitang magkaigwa nin saboot na pareho kan ki apostol Pablo. Pagkasambit nia na ‘si Cristo Jesus napadigdi sa kinaban sa pagligtas sa mga parakasala,’ idinagdag ni Pablo na mas parakasala sia kisa sa sainda.—1 Tim. 1:15.

Mga hapot para sa paghorophorop:

Nasasabotan ko daw na ako parakasala asin na an kaligtasan ko nakadepende sa dai na kutana maninigong kabootan ni Jehova? O minamansay ko daw na mas halangkaw ako kisa sa iba huli sa sakong dakol na taon nin maimbod na paglilingkod, mga pribilehio sa organisasyon nin Dios, o natural na mga abilidad?

  2 An mga Fariseo naghingoang pahangaon an iba paagi sa pagpahiling sa publiko kan saindang katanosan. Minawot ninda an pagkaprominente asin espesyal na mga titulo.

Alagad nagpatanid si Jesus: ‘An gabos nindang mga gibo ginigibo ninda sa pagpahiling sa mga tawo; huli ta pinapahalakbang ninda an saindang mga filacterias [mga lalagan na may laog na kasuratan], asin pinapadakula an gayad kan saindang mga gubing. Sinda namoot sa haralangkaw na kamugtakan sa mga kakanan, asin sa enotan na mga tukawan sa mga sinagoga, asin sa mga paggalang sa mga sadan, asin na pag-apodon sinda nin mga tawo na Rabi.’ (Mat. 23:5-7) An saboot ninda kabaliktaran nanggad kan ki Jesus. Minsan ngani sia an perpektong Aki nin Dios, mapakumbaba sia. Kan apodon siang “marahay” nin sarong lalaki, sinabi ni Jesus: ‘Ta daw ta inaapod mo akong marahay? Mayong marahay kundi saro, an Dios.’ (Mar. 10:18) Sa saro pang pangyayari, hinanawan ni Jesus an bitis kan saiyang mga disipulo, na paagi kaiyan, ipinahiling nia sa mga parasunod nia an halimbawa nin kapakumbabaan.—Juan 13:1-15.

An tunay na Kristiano maninigong maglingkod sa mga kapagtubod. (Gal. 5:13) Ini nangorognang totoo sa mga nagmamawot na magin paraataman sa kongregasyon. Tama sana na ‘maghingoang maabot an katongdan nin paraataman,’ alagad an paghihingoang ini maninigo na gikan sa kamawotan na tabangan an iba. An “katongdan” na ini bakong posisyon nin pagkaprominente o kapangyarihan. An mga naglilingkod bilang paraataman kaipuhan na “mapakumbaba sa puso,” arog ni Jesus.—1 Tim. 3:1, 6, NW; Mat. 11:29.

Mga hapot para sa paghorophorop:

May tendensia daw ako na paboran an mga may katongdan sa kongregasyon, na tibaad naglalaom na magin sikat o magkaigwa nin dagdag na mga pribilehio? May tendensia daw akong magpokus sa mga aspekto nin paglilingkod sa Dios na huli kaiyan garo baga mamimidbid ako asin maoomaw? Sa totoo lang, nagmamaigot daw akong magin prominente?

  3 An pag-aplikar kan Ley nakapagabat sa ordinaryong mga tawo huli sa mga susundon asin tradisyon kan mga Fariseo

Sinasabi sa Ley ni Moises an pangkagabsan na areglo may koneksion sa pagsamba kan Israel ki Jehova. Alagad, dai kaiyan sinambit an saradit na detalye. Halimbawa, ipinagbawal kan Ley an pagtrabaho kun Sabbath, alagad dai kaiyan espesipikong sinabi kun ano an dapat o dai dapat gibohon sa aldaw na iyan. (Ex. 20:10) Kaya hiningoa kan mga Fariseo na dagdagan iyan kan sadiri nindang mga ley, pakahulogan, asin tradisyon. Minsan ngani dai sinunod ni Jesus an bakong makatanosan na mga susundon kan mga Fariseo, talagang inotob nia an Ley ni Moises. (Mat. 5:17, 18; 23:23) Nasabotan ni Jesus an mga dahelan kan ley nin Dios, asin aram nia na gusto nin Dios na an mga tawo magpahiling nin pagkaherak asin pagmalasakit. Rasonable si Jesus minsan ngani dai nagibo kan mga parasunod nia an inaasahan nia sa sainda. Halimbawa, minsan ngani pinakiolayan nia an tolo sa mga apostol nia na magdanay na puka asin padagos na magbantay kan bangging aarestaron sia, paorootrong napatorog sinda. Minsan siring, nagtaram sia sa madinamayon na paagi: ‘An espiritu nagmamawot nanggad, alagad an laman maluya.’—Mar. 14:34-42.

Mga hapot para sa paghorophorop:

Naggigibo daw ako nin bakong makatanosan saka estriktohon na mga susundon asin gusto ko daw na pirmeng sunodon nin iba an personal kong opinyon? Ako daw makatanosan sa linalaoman ko sa iba?

Isip-isipon an pagkakalaen kan katokdoan ni Jesus asin kan mga Fariseo. May nahihiling ka daw na paagi na puede kang umoswag? Kun igwa, taano ta dai magin determinadong gibohon iyan?

[Ritrato sa pahina 28]

An mga Fariseo nagsusulot nin mga lalagan na may laog na kasuratan.—Mat. 23:2, 5

[Mga Ritrato sa pahina 29]

Bakong arog kan mapalangkaw na mga Fariseo, naglilingkod sa iba an mapakumbabang Kristianong mga elder

[Ritrato sa pahina 30]

Arog ni Jesus, makatanosan ka daw sa linalaoman mo sa iba?