Magtiwala ki Jehova—An Dios nin “mga Panahon Asin Kapanahonan”

“Sia an nagliliwat kan mga panahon asin kapanahonan, naghahale nin mga hade asin nagbubugtak nin mga hade.” —DAN. 2:21, NW.

ANO AN ISISIMBAG NINDO?

Paano ipinapahiling kan mga linalang asin kan naotob na mga hula na si Jehova an Dakulang Paratalaan nin Panahon?

An pakaaram niato na si Jehova an Dios nin “mga panahon asin kapanahonan” nagpapahiro sa sato na gibohon an ano?

Taano an iskedyul ni Jehova ta dai nakadepende sa mga pangyayari sa kinaban asin sa mga plano nin tawo?

1, 2. Ano an nagpapahiling na lubos na nasasabotan ni Jehova an panahon?

HALOY pa bago lalangon an tawo, itinao ni Jehova Dios an paagi tanganing masokol an panahon. Kan ikaapat na aldaw nin paglalang, an Dios nagsabi: ‘Mahamán an mga ilaw sa kahiwasan nin kalangitan tanganing magin laen an aldaw sa banggi; asin magin mga tanda, asin sa mga panahon, asin sa mga aldaw asin sa mga taon.’ (Gen. 1:14, 19, 26) Iyan mismo an nangyari, kaoyon kan kabotan ni Jehova.

² Minsan siring, pinagdedebatehan pa man giraray ngonyan kan mga sientista kun paano nagpupunsionar an oras o panahon. “An panahon an saro sa pinakahararom na mga misteryo sa kinaban,” an sabi nin sarong ensiklopedia. “Mayong makakapagsabi nin eksakto kun ano iyan.” Pero, lubos na nasasabotan ni Jehova an panahon. Ini huli ta sia an ‘Kaglalang kan kalangitan, an Kaghaman kan daga asin an Kaggibo’ kaiyan. Si Jehova man an Saro na ‘nagpapaisi kan maabot poon sa kapinonan, asin poon pa kan suanoy kan mga dai pa nahahaman.’ (Isa. 45:18; 46:10) Tanganing kumosog an satong pagtubod sa saiya asin sa Tataramon nia, an Biblia, pag-olayan niato kun paano ipinapahiling kan mga linalang asin kan naotob na mga hula na si Jehova an Dakulang Paratalaan nin Panahon.

AN MGA LINALANG NAGPAPAKOSOG NIN PAGTUBOD SA DAKULANG PARATALAAN NIN PANAHON

3. Paano mahihiling sa mga linalang an pagigin eksakto sa oras?

³ An pagigin eksakto sa oras parehong mahihiling sa saditon asin dakulaon na mga linalang. Halimbawa, an rikas nin pag-vibrate nin mga atomo dai lamang nagbabarobago. An espesyal na mga relo na ibinasar sa pag-vibrate nin mga atomo dai nanggad minasalto maski sarong segundo dawa pa lumihis an 80 milyones na taon. An paghiro nin mga planeta asin bitoon eksakto man sa oras. Huling patienot na  naaaraman an lokasyon kaiyan sa langit, naaaraman an mga kapanahonan (season) asin an tamang direksion sa pagnabigar. Tunay nanggad na si Jehova—an Kaggibo kan masasarigan na “mga relo” na ini—may ‘dakulang kapangyarihan’ asin maninigo sa satong pag-omaw.—Basahon an Isaias 40:26.

4. Paano nahihiling an kadonongan nin Dios sa pagigin eksakto sa oras kan mga linalang?

⁴ Mahihiling man sa mga bagay na may buhay an pagigin eksakto sa oras. Dakol na pananom asin hayop an garo baga may sinusunod na relo sa hawak ninda. Kaya, huli sa instinct aram nin dakol na gamgam kun noarin mapoon na magbalyo nin lugar. (Jer. 8:7) Siring man, an mga tawo garo baga may sinusunod na relo sa hawak ninda, na sa parate kontrolado kan 24 oras na siklo nin aldaw asin banggi. Kun mabiahe sakay nin eroplano pasiring sa ibang nasyon na laen na marhay an oras, tibaad kaipuhan an nagkapirang aldaw bago matuod an hawak sa bagong oras. Tunay nanggad, an dakol na linalang na nagpapahiling nin pagigin eksakto sa oras nagpapatunay sa kapangyarihan asin kadonongan kan Dios nin “mga panahon asin kapanahonan.” (Basahon an Salmo 104:24.) Iyo, pinakamadonong asin pinakamakapangyarihan an Dakulang Paratalaan nin Panahon. Makakapagtiwala nanggad kita na kaya niang gibohon an kabotan nia!

AN MGA HULANG NAOTOB SA TAMANG PANAHON NAGPAPAKOSOG NIN PAGTUBOD

5. (a) Ano an solamenteng paagi na maaraman niato an kaaabtan kan katawohan? (b) Taano ta kayang sabihon ni Jehova kun ano an mangyayari asin kun noarin iyan maootob?

⁵ Dakol an itinotokdo sa sato kan mga linalang manongod sa “dai nahihiling na mga kualidad” ni Jehova, alagad dai kaiyan sinisimbag an mahahalagang hapot arog kan, Ano an kaaabtan kan katawohan pag-abot nin panahon? (Roma 1:20, NW) Para sa simbag, kaipuhan tang konsultahon an ihinayag nin Dios sa saiyang Tataramon, an Biblia. Kun sinisiyasat niato iyan, naaaraman ta na pirmeng naootob sa eksaktong panahon an mga hula! Kayang ihayag ni Jehova kun ano pa an mangyayari huling kaya niang patienot na aramon iyan nin eksakto. Dugang pa, nangyayari sa tamang panahon an ihinula kan Kasuratan huling kayang pangyarihon ni Jehova Dios an mga bagay-bagay segun sa saiyang katuyohan asin iskedyul.

6. Ano an nagpapahiling na gusto ni Jehova na masabotan ta an kaotoban nin mga hula sa Biblia?

⁶ Gusto ni Jehova na masabotan kan mga nagsasamba sa saiya an mga hula sa Kasuratan asin makinabang dian. Minsan ngani an pagmansay nin Dios sa panahon laen kan sa sato, kun ihinuhula nia na may mangyayari sa espesipikong panahon, naggagamit sia nin mga terminong masasabotan niato. (Basahon an Salmo 90:4.) Halimbawa, sinasambit sa libro nin Kapahayagan an ‘apat na anghel’ na ‘inandam manongod sa oras asin aldaw asin bulan patin taon’—mga yunit nin panahon na nasasabotan niato. (Kap. 9:14, 15) An pakaaram niato kun paano naotob an mga hula sa espesipikong panahon maninigong magpakosog kan satong pagtubod sa Dios nin “mga panahon asin kapanahonan” asin sa Tataramon nia. Estudyaran niato an pirang halimbawa.

7. Paano ipinapahiling kan kaotoban kan hula ni Jeremias mapadapit sa Jerusalem asin Juda na si Jehova an Dakulang Paratalaan nin Panahon?

⁷ Enot, balikan niato an nangyari kan ikapitong siglo B.C.E. “Kan ikaapat na taon ni Joacim na aking lalaki ni Josias, na hade sa Juda,” an tataramon kan Dakulang Paratalaan nin Panahon ‘uminabot ki Jeremias dapit kan gabos na banwaan sa Juda.’ (Jer. 25:1) Ihinula ni Jehova an grabeng pagkalaglag nin Jerusalem asin an pagdara sa mga Judio hale sa Juda pasiring sa Babilonya. Duman, ‘maglilingkod sinda sa hade nin Babilonya nin setentang taon.’ Kan 607 B.C.E., linaglag kan mga hukbo nin Babilonya an Jerusalem, asin an mga Judio sa Juda talagang dinara sa Babilonya. Alagad, ano an mangyayari sa katapusan kan 70 taon? Ihinula ni Jeremias: ‘Nagsabi si Jehova, “Kun matapos na sa Babilonya an [setentang] taon, pupukawon ko sa saindo an sakuyang  marahay na tataramon, tanganing ibalik ko kamo sa kamugtakan na ini.”’ (Jer. 25:11, 12; 29:10) Naotob sa eksaktong panahon an hulang ini—kan 537 B.C.E. pagkatapos na patalingkason kan mga Medo asin Persiano an mga Judio hale sa Babilonya.

8, 9. Paano ipinapahiling kan mga hula ni Daniel dapit sa pag-abot kan Mesiyas asin pagkaestablisar kan langitnon na Kahadean na si Jehova an Dios nin “mga panahon asin kapanahonan”?

⁸ Estudyare an saro pang hula may koneksion sa banwaan nin Dios kan suanoy. Mga duwang taon bago maghale sa Babilonya an mga Judio, ihinula nin Dios paagi ki propeta Daniel na malataw an Mesiyas 483 na taon pagkatao kan pagboot na itogdok liwat an Jerusalem. Kan 455 B.C.E., itinao kan hade kan Medo-Persia an pagboot na iyan. Pakalihis nin eksaktong 483 na taon—kan 29 C.E.—si Jesus na taga Nazaret linahidan kan banal na espiritu kan bautismohan sia asin sa siring nagin an Mesiyas. *—Neh. 2:1, 5-8; Dan. 9:24, 25; Luc. 3:1, 2, 21, 22.

⁹ Ngonyan, mangnoha an ihinula kan Kasuratan mapadapit sa Kahadean. Ipinaparisa kan hula sa Biblia na eestablisaron sa langit an Mesiyanikong Kahadean sa taon 1914. Halimbawa, ihinula kan Biblia an dapit sa “tanda” kan presensia ni Jesus, na itinotokdo an panahon kun noarin papalayason si Satanas sa langit, na maresulta sa grabeng sakit sa daga. (Mat. 24:3-14; Kap. 12:9, 12) Dugang pa, itinotokdo man kan hula sa Biblia an eksaktong panahon—1914—na matatapos ‘an mga panahon kan mga Gentil’ asin mapoon an pamamahala kan Kahadean sa langit.—Luc. 21:24; Dan. 4:10-17. *

10. Ano an mga seguradong mangyayari sa eksaktong panahon?

¹⁰ Dai mahahaloy, mangyayari an ihinula ni Jesus na “dakulang kahorasaan.” Susundan iyan kan Sangribong Taon na Paghade nia. Daing duwa-duwa na mangyayari an mga bagay na ini sa eksaktong panahon. Kan si Jesus nasa daga, may itinalaan na si Jehova na ‘aldaw asin oras’ na mangyayari an mga ini.—Mat. 24:21, 36; Kap. 20:6.

“TUBOSON AN PANAHON”

11. An pakaaram niato na nabubuhay na kita sa panahon nin katapusan maninigong magkaigwa nin anong epekto sa sato?

¹¹ Ano an maninigong magin epekto sa sato kan pakaaram na namamahala na an Kahadean asin nabubuhay na kita sa “panahon nin katapusan”? (Dan. 12:4) Naririsa nin dakol an paggrabe nin mga kamugtakan sa kinaban pero dai ninda nasasabotan na an mga pangyayaring ini kaotoban kan hula sa Biblia dapit sa huring mga aldaw. Tibaad inaasahan ninda na sarong aldaw mabagsak an sistemang ini o tibaad naniniwala sinda na minsan paano maresulta sa ‘katoninongan asin katiwasayan’ an mga paghihingoa nin tawo. (1 Tes. 5:3, An Banal na Biblia) Alagad, kumusta kita? Kun naniniwala kita na nabubuhay na kita sa poro kan huring mga aldaw kan kinaban  ni Satanas, bako daw na maninigo kitang maghingoang gamiton an natatadang panahon tanganing paglingkodan si Jehova asin tabangan an iba na mamidbid sia? (2 Tim. 3:1) Dapat kitang gumibo nin madonong na mga desisyon sa paggamit niato kan satong panahon.—Basahon an Efeso 5:15-17.

12. Ano an manonodan niato sa sinabi ni Jesus mapadapit sa panahon ni Noe?

¹² Sa kinaban na ini na pano nin mga bagay na nakakalingling, bakong madali na “tuboson an panahon.” Si Jesus nagpatanid: ‘Siring kan mga aldaw ni Noe, siring man an pagpadigdi kan Aki nin tawo.’ Ano an kamugtakan kan panahon ni Noe? Ihinula na an kinaban kan panahon na idto matatapos. An mga maraot magkakaralamos sa delubyo na lakop sa globo. Bilang “parahulit nin katanosan,” may kaimbodan na ihinayag ni Noe an mensahe nin Dios sa mga tawo kan panahon nia. (Mat. 24:37; 2 Ped. 2:5) Alagad, sinda ‘nagkakarakan asin nag-iirinom, nag-aaragom asin nagpapaaragom, asin sinda dai nakaisi [‘dai nagmangno,’ NW] sagkod na uminabot an baha, asin nadara sinda gabos.’ Sa dahelan na iyan, pinatanidan ni Jesus an mga parasunod nia: ‘Magin andam, huli ta sa oras na dai nindo pinaghohona an Aki nin tawo madigdi.’ (Mat. 24:38, 39, 44) Dapat kitang magin arog ni Noe, bakong arog kan mga tawo kan panahon nia. Ano an makakatabang sa sato na magdanay na andam?

13, 14. Mantang hinahalat niato an pag-abot kan Aki nin tawo, ano an dapat tang girumdomon manongod ki Jehova na matabang sa sato na maimbod Siang mapaglingkodan?

¹³ Minsan ngani maabot an Aki nin tawo sa oras na dai niato inaasahan, dapat tang girumdomon na si Jehova an Dakulang Paratalaan nin Panahon. An saiyang iskedyul dai nakadepende sa mga pangyayari sa kinaban asin sa mga plano nin tawo. Kinokontrol ni Jehova kun noarin mangyayari an mga bagay-bagay asin kun ano an kaaabtan kaiyan tanganing maotob an kabotan nia. (Basahon an Daniel 2:21.) Sa katunayan, an Talinhaga 21:1 nagsasabi sa sato: “An isip kan hade sarong sapa nin tubig sa kamot nin KAGURANGNAN; siya an nagboboot kan direksion kaiyan.” (BPV *)

¹⁴ Kayang maniobrahon ni Jehova an mga pangyayari tanganing maotob an katuyohan nia sa tamang panahon. An dakol na darakulang pagbabago sa kinaban kaotoban kan hula, partikularmente na an dapit sa paghuhulit kan maogmang bareta kan Kahadean nin Dios sa bilog na kinaban. Isip-isipa an pagbagsak kan Unyon Sobyet asin an mga epekto kaiyan. Dai inisip nin dakol na biglang mangyayari an arog kaiyan kadakulang mga pagbabago sa politika. Pero, bilang resulta kan siring na mga pagbabago, an maogmang bareta ihinuhulit na ngonyan sa dakol na nasyon na dating bawal an gibohon. Kaya, tuboson nanggad niato an angay na panahon tanganing maimbod na mapaglingkodan an Dios nin “mga panahon asin kapanahonan.”

MAGTUBOD NA OOTOBON NI JEHOVA SA TAMANG PANAHON AN KATUYOHAN NIA

15. Paano kita makakapahiling nin pagtubod kun dapit sa mga pagliliwat sa organisasyon?

¹⁵ Tanganing padagos na makapaghulit sa huring mga aldaw na ini, dapat kitang magtubod na ootobon ni Jehova sa tamang panahon an katuyohan nia. Huli sa nagbabagong kamugtakan sa kinaban, tibaad kaipuhan tang gumibo nin mga pagbabago sa satong paagi nin paghuhulit. Kun minsan, an organisasyon tibaad gumibo nin mga pagliliwat tanganing tabangan kitang ihulit an maogmang bareta. Nagpapahiling kita nin pagtubod sa Dios nin “mga panahon asin kapanahonan” paagi sa lubos na pakikikooperar sa siring na mga pagliliwat mantang maimbod niatong kinukuyog an saiyang Aki, an “payo kan [kongregasyon].”—Efe. 5:23.

16. Taano ta makakapagtiwala kita na tatabangan kita ni Jehova sa tamang panahon?

¹⁶ Gusto ni Jehova na mamibi kita sa saiya ano man na oras, na lubos na nagtitiwala na itatao nia an ‘tabang sa panahon nin pangangaipo.’ (Heb. 4:16) Bako daw na ipinapahiling kaiyan an mamomoton  na pagmakolog nia sa sato bilang mga indibiduwal? (Mat. 6:8; 10:29-31) Ipinapahiling ta na nagtutubod kita ki Jehova Dios paagi sa regular na pamimibi para sa tabang nia, dangan paghiro kaoyon kan satong mga pamibi asin paggiya nia. Apuera kaini, ipinapamibi man niato an satong mga kapagtubod.

17, 18. (a) Ano an madali nang gibohon ni Jehova sa mga kaiwal nia? (b) Anong siod an dapat niatong likayan?

¹⁷ Bako ngonyan an panahon na ‘magduwaduwa huli sa dai pagtubod’; panahon nang magin makosog paagi sa pagtubod. (Roma 4:20) Nagmamaigot an mga kaiwal nin Dios—si Satanas asin an mga sakop nia—na papondohon an gibohon na iinasignar ni Jesus sa mga parasunod Nia, kaiba na kita. (Mat. 28:19, 20) Sa ibong kan mga pagsalakay kan Diablo, aram niato na si Jehova ‘buhay na Dios, na Paraligtas nin gabos na tawo, orog na kan mga nagtutubod.’ Sia ‘tataong magkalda kan mga banal’ hale sa pagbalo.—1 Tim. 4:10; 2 Ped. 2:9.

¹⁸ Madali nang taposon ni Jehova an maraot na sistemang ini nin mga bagay. Minsan ngani dai itinao sa sato an gabos na detalye asin an eksaktong panahon kun noarin ini mangyayari, aram nanggad niato na sa tamang panahon, lalaglagon ni Cristo an mga kaiwal nin Dios, asin mabibindikar an soberaniya ni Jehova. Kaya, sala nanggad kun babaliwalaon ta an kahulogan kan “mga panahon asin mga kapanahonan” na kinabubuhayan niato ngonyan! Nungka logod kitang mahulog sa siod, na iniisip na ‘an gabos na bagay nagdadanay siring sa dati, poon sa kapinonan kan paglalang.’—1 Tes. 5:1, NW; 2 Ped. 3:3, 4.

MAGIN MAPAGHALAT

19, 20. Taano ta maninigo kitang magin mapaghalat ki Jehova?

¹⁹ Kan lalangon ni Jehova an mga tawo, gusto niang mabuhay sinda nin daing katapusan tanganing padagos na makanood manongod sa saiya asin sa magayon na mga linalang nia. An Eclesiastes (Parahulit) 3:11 nagsasabi: ‘An gabos ginibong magayon ni Jehova sa kapanahonan kaiyan. Minsan an panahon na daing talaan ibinugtak nia sa saindang puso, tanganing an katawohan dai noarin man makarorop sa ginibo kan tunay na Dios poon sa kapinonan sagkod sa katapusan.’ (NW)

²⁰ Naoogma nanggad kita na nungkang liniliwat ni Jehova an saiyang katuyohan para sa katawohan! (Mal. 3:6) Sa Dios mayo lamang nin pagkaliwat maski magbago an anino. (Sant. 1:17) An saiyang iskedyul bakong kontrolado kan paagi nin tawo sa pagsokol kan panahon, arog baga kan pag-itok kan daga. Si Jehova an ‘Hadeng daing katapusan.’ (1 Tim. 1:17) Kaya, maghalat o ‘maglaom kita sa Dios’ nin satong kaligtasan. (Miq. 7:7) Iyo, “pagmakosog kamo; pasariga an saindong boot, kamo gabos na naglalaom sa KAGURANGNAN.”—Sal. 31:24, BPV.

[Mga Nota sa Ibaba]

[Mga Hapot Para sa Pag-adal]

[Ritrato sa pahina 19]

Nagtubod si Daniel na maootob an hula na itinao nin Dios

[Ritrato sa pahina 21]

Inaaprobetsaran mo daw an panahon tanganing gibohon an kabotan ni Jehova?