Isinaysay ni Elva Gjerde

Mga 70 taon na an nakaagi, may nagbisita sa harong mi na nagtao nin suhestion sa sakong ama na biyong nakapabago sa buhay ko. Poon kan makahulogan na aldaw na iyan, nagkapirang tawo pa an nakaimpluwensia man sa sako. Nagkaigwa man ako nin mahalagang marhay na katood na pinapahalagahan ko nin orog kisa siisay man. Boot kong isaysay iyan sa saindo.

IPINANGAKI ako sa Sydney, Australia, kan 1932. An sakong mga magurang nagtutubod sa Dios alagad dai nagsisimba. Itinokdo sa sako kan sakong ina na an Dios daa pirmeng nagbabantay, na andam akong padusahan kun magsinutil ako. Natakot ako sa Dios huli kaiyan. Pero, interesadong-interesado ako sa Biblia. Kun nagbibisita sa samo an tiya ko kun Sabado o Domingo, dakol na makawiwiling estorya sa Biblia an isinasaysay nia sa sako. Pirme kong maogmang hinahalat an pagbisita nia.

Kan tin-edyer ako, binasa kan sakong ama an mga libro na itinao sa sakong ina nin may edad nang babae na Saksi ni Jehova. Hanga siang marhay sa nabasa nia kaya nag-oyon siang makipag-adal sa mga Saksi. Sarong banggi mantang nag-aadal sinda sa Biblia, nahiling kan sakong ama na pasekreto akong nagdadangog. Kan papabalikon na nia ako sa kuarto, sinabi kan bisita, “Taano ta dai niato paibanon si Elva?” An suhestion na iyan an nagin kapinonan kan bagong paagi nin pamumuhay ko asin kan pakikikatood ko sa tunay na Dios—si Jehova.

Dai nahaloy pakatapos kaiyan, kami kan sakong ama nagpoon nang mag-atender sa mga pagtiripon. An mga nanodan nia nakapabago sa saiya. Dawa an saiyang pagigin aranggoton kinokontrol na nia. Nakapahiro ini sa sakong ina asin matuang tugang na si Frank na mag-atender na man sa mga pagtiripon. * Kaming apat nag-oswag sa espirituwal asin nabautismohan bilang mga Saksi ni Jehova. Poon kaidto, dakol na may edad na an nakaimpluwensia nin positibo sa sako sa manlaenlaen na kabtang kan buhay ko.

KAN NAGPIPILI NIN KARERA

Kan tin-edyer ako, naparani ako sa mga may edad na sa samong kongregasyon. Saro sa sainda an gurang nang si Sister Alice Place, an enot na naghulit sa samong pamilya. Garo ko na sia lola. Sinanay nia ako sa pampublikong ministeryo asin inenkaminar ako na maghingoang makapabautismo. Sa edad na 15, naabot ko an pasohan na iyan.

Nagin dayupot man ako sa gurang nang mag-agom na Percy asin Madge [Margaret] Dunham. An pakikiasosyar sa sainda nagkaigwa nin dakulaon na epekto sa sakong puturo. Aram nindo, paborito ko an matematika asin gustong-gusto kong magtokdo kaiyan. Durante kan dekada nin 1930, si Tata Percy asin Nana Madge nagmisyonero sa Latvia. Kan puminutok an Giera Mundial II sa Europa, inimbitaran sindang maglingkod sa Bethel sa Australia, na yaon sa luwas kan  sentro kan Sydney. Tunay na nagmakolog sa sako si Tata Percy asin Nana Madge. Nag-estorya sinda nin dakol na nakakaogmang eksperyensia ninda sa pagmimisyonero. Nasabotan kong marhay na an pagtotokdo dapit sa Biblia mas nakakakontento nanggad kisa sa pagtotokdo nin matematika. Kaya, nagdesisyon akong magmisyonero.

Inenkaminar ako kan mag-agom na Dunham na pag-andaman an pagmimisyonero paagi sa pagpapayunir. Kaya, kan 1948, sa edad na 16, uminiba ako sa sampulo pang hoben na maogmang nagpapayunir sa samong kongregasyon sa Hurstville, Sydney.

Sa suminunod na apat na taon, nagpayunir ako sa apat pang banwaan—gabos sa New South Wales asin Queensland. An saro sa enot na mga tinotokdoan ko sa Biblia iyo si Betty Law (Betty Remnant na ngonyan). An mapagmakolog na si Betty matua sa sako nin duwang taon. Kan huri, nagin kapartner ko sia sa pagpapayunir sa banwaan nin Cowra, mga 230 kilometros sa solnopan kan Sydney. Minsan ngani halipot na panahon sana kaming magkapartner ni Betty, mag-amiga pa man giraray kami sagkod ngonyan.

Pakaresibi ko kan asignasyon bilang espesyal payunir, buminalyo ako sa Narrandera—sarong banwaan na 220 kilometros sa timog-solnopan nin Cowra. An bago kong kapartner iyo si Joy Lennox (Joy Hunter na ngonyan), sarong maigot na payunir na matua man sa sako nin duwang taon. Kami lang an Saksi sa banwaan kan panahon na iyan. Nakiistar kami ni Joy sa mapag-istimar na mag-agom na Ray asin Esther Irons. Interesado sinda sa katotoohan, pati na an saindang aking lalaki asin tolong aking babae. Durante kan semana, si Ray asin an aki niang lalaki nasa atamanan nin karnero asin tanoman nin trigo sa may luwas kan banwaan, mantang si Esther asin an mga aking babae nag-aasikaso kan saindang paarkilahan na harong. Kada Domingo, nagluluto kami ni Joy nin dakol na pamanggihan para sa pamilyang Irons asin sa mga 12 lalaking nag-aarkila sa sainda—gabos gutom-gutom na trabahador sa riles. An pagtabang ming iyan kabtang kan bayad mi sa arkila. Pakapanaray mi, sineserbihan mi an pamilyang Irons nin masiram na espirituwal na pagkakan—an semanal na pag-adal sa Torrengbantayan. Si Ray, Esther, asin an apat nindang aki nagin Saksi asin nagin enot na mga miembro kan Kongregasyon nin Narrandera.

Kan 1951, nag-atender ako sa kombension kan mga Saksi ni Jehova sa Sydney. Duman, nag-iba ako sa miting para sa mga payunir na interesado sa pagmimisyonero. Labing 300 an nag-atender sa miting na iyan na ginibo sa dakulang tolda. Si Nathan Knorr na hale sa Brooklyn Bethel an nakipagmiting sa grupo asin lininaw nia na kaipuhan na apuradong ipaabot an maogmang bareta sa gabos na parte kan kinaban. Atentibo kami sa lambang tataramon nia. Kan huri, dakol sa mga payunir na presente sa miting na iyan an nagbukas kan gibohon na pang-Kahadean sa Timog Pasipiko asin sa iba pang lugar. Kan 1952, ikinaogma ko nanggad na magin 1 sa 17 Australiano na inimbitaran sa ika-19 klase kan Paadalan nin Gilead. Sa edad lang na 20, naootob na an pangarap kong magin misyonera!

KAN MAY KAIPUHAN NA BAGOHON

An mga itinokdo asin an pakikiasosyar sa Gilead bako sanang nagpaoswag kan kaaraman ko sa Biblia asin nagpakosog kan pagtubod ko kundi dakulaon man an epekto kaiyan sa sakong personalidad. Hoben pa ako asin bakong realistiko saka may tendensiang magin perpeksionista sa sadiri ko siring man sa iba. An nagkapirang pagmansay ko sobra kaestrikto. Halimbawa, nabigla ako kan mahiling ko si Brother Knorr na nakikikawat sa grupo nin hoben na mga Bethelite.

Siertong nahiling kan mga instruktor sa Gilead—na gabos lalaking may pakabatid asin dakol nang taon an eksperyensia—na nadedepisilan ako. Nagmakolog sinda sa sako asin tinabangan akong itanos an kaisipan ko. Luway-luway kong nasabotan na si Jehova mamomoton asin mapagmakolog, bakong estrikto asin mapaghanap na Dios. Tinabangan man ako kan iba kong kaklase. Nagigirumdoman ko an saro sa sainda na nagsabi: “Elva, si Jehova dai nagbabantay sa sato na  may kapot na latigo. Dai pakaestrikto sa sadiri mo!” Napahiro an puso ko kan prangkang mga tataramon nia.

Pakagradwar sa Gilead, ako asin apat sa mga kaklase ko an idinestino sa Namibia, Aprika. Dai nahaloy, igwa na kami nin 80 tinotokdoan sa Biblia. Nagustohan ko an Namibia asin an buhay misyonero, alagad nahulog an boot ko sa sarong kaklase sa Gilead na nadestino sa Switzerland. Pakatapos nin sarong taon sa Namibia, nagbalyo ako sa Switzerland, na lugar kan katrato ko. Pakakasal mi, inibanan ko an sakong agom sa pansirkitong gibohon.

KAN MAPAATUBANG SA MAGABATON NA PROBLEMA

Pakatapos nin limang maogmang taon sa pansirkitong gibohon, inimbitaran kaming maglingkod sa Bethel sa Switzerland. Sa pamilyang Bethel duman, ikinaogma ko nanggad na makaibanan an dakol na tugang na maygurang sa espirituwal asin may edad na.

Dai nahaloy pakatapos kaiyan, may naaraman ako na nakakabigla nanggad. Nadiskobre ko na an sakong agom dai nagin maimbod sa sako asin ki Jehova. Dangan, binayaan nia ako. Nakolgan akong marhay! Dai ko aram kun paano ko makakayanan ini kun mayo an pagkamoot asin suporta kan sakong namomotan na may edad nang mga katood sa pamilyang Bethel. Nagdadangog sinda sa sako kun kaipuhan ko nin makakaolay asin pinapabayaan ninda akong magpahingalo kun kaipuhan ko iyan. An saindang nakakarangang mga tataramon asin kabootan nakasuportar sa sako kan grabe an kolog na namamatean ko asin nakatabang sa sako na mas dumayupot pa ki Jehova.

Nagigirumdoman ko man an sinabi, mga pirang taon na an nakaagi, nin madonong na mga may edad na, na nagin mas makosog huli sa mga pagbalo. Kabilang digdi an sinabi ni Nana Madge Dunham. Sarong beses, sinabi nia sa sako: “Elva, sa paglilingkod mo ki Jehova, mapapaatubang ka sa dakol na pagbalo, alagad an pinakamasakit puedeng hale sa mga dayupot sa saimo. Sa mga panahon na iyan, rumani ka ki Jehova. Girumdoma na sa saiya ka naglilingkod, bako sa mga tawong bakong perpekto!” An konseho ni Nana Madge nakatabang sa sako sa mga panahon nin kamondoan. Nagin determinado akong dai pagtogotan na maparayo ako ki Jehova huli sa pagkakasala kan agom ko.

Pag-abot nin panahon, nagdesisyon akong bumalik sa Australia tanganing magpayunir harani sa pamilya ko. Durante kan pagbiahe sa dagat papuli, ikinaogma ko an regular asin interesanteng pakikipag-olay dapit sa Biblia sa mga kapwa ko pasahero. Yaon sa grupo an silensiong lalaki na taga Norway na si Arne Gjerde. Nagustohan nia an nadangog nia. Dai nahaloy nagbisita si Arne sa sako asin sa pamilya ko sa Sydney. Marikas an pag-oswag nia sa espirituwal asin sia nagin Saksi. Kan 1963, nagpakasal kami ni Arne, asin pakalihis nin duwang taon, namundag an aki ming si Gary.

KAN MAPAATUBANG SA SARO PANG PAGBALO

Ikinaogma ming marhay ni Arne asin Gary an nakakakontentong buhay pampamilya. Dai nahaloy, pinahiwas ni Arne an samong harong tanganing paistaron an may edad nang mga magurang ko. Pero, pakalihis nin anom na taon ming pag-ibanan, napaatubang kami sa naiibang mamondoon na situwasyon. Si Arne na-diagnose na may kanser sa hotok. Aroaldaw ko siang binibisita sa ospital mantang nag-aagi sia sa halawigon na sesyon nin radiation therapy. Sa halipot na panahon nagrahay sia; dangan gruminabe an saiyang kondisyon asin naistrok sia. Sinabihan ako na pirang semana na sana an buhay nia. Minsan siring, nalampasan iyan ni Arne. Paghaloyhaloy, sia nakapuli asin inataman ko sagkod na magrahayrahay. Nag-abot an panahon na nakalakaw sia giraray asin nakapagpadagos sa  gibohon bilang elder. Sia maogmang tawo asin mapagpangisi, kaya nakatabang iyan na medyo magrahay sia asin mas nagin pasil sa sako na padagos na atamanon sia.

Pakalihis nin dakol na taon, kan 1986, gruminabe na naman an kamugtakan ni Arne. Kan panahon na iyan, gadan na an sakong mga magurang, kaya nagbalyo kami sa magayon na Blue Mountains sa luwas kan Sydney, na huli kaiyan naparani kami sa mga katood mi. Dai nahaloy, naagom ni Gary an sarong magayon asin espirituwal na sister, si Karin, asin isinuherir ninda na mag-iribanan kami sa sarong harong. Pakalihis nin nagkapirang bulan, kami gabos buminalyo sa sarong harong na harani sana sa dating istaran mi ni Arne.

Sa huring 18 bulan kan saiyang buhay, dai na nakakabangon si Arne asin kaipuhan an danay na pag-ataman. Huling haros dai ako makahale sa harong kan panahon na iyan, kada aldaw duwang oras akong nag-aadal kan Biblia asin kan mga publikasyon na basado sa Biblia. Sa mga pag-adal na iyan, nanodan ko an dakol na madonong na sadol kun paano makakayanan an sakong situwasyon. Nagbibisita man an mamomoton na may edad nang mga kakongregasyon mi, na an nagkapira sa sainda nagtagal nin kaparehong mga pagbalo. Napakosog nanggad ako kan mga pagbisita ninda! Nagadan si Arne kan Abril 2003, na may makosog na paglaom sa pagkabuhay liwat.

AN PINAKANANGONGOROG NA SUPORTA SA SAKO

Kan hoben pa ako, bako akong realistiko. Alagad narealisar ko na sa satong buhay, bihirang mangyari an mga bagay-bagay sa paaging linalaoman niato. Nakamtan ko an dakol na bendisyon asin nakayanan man an duwang magabat na pagbalo—an bayaan nin agom huli sa kadaihan nin kaimbodan asin an magadanan nin agom huli sa helang. Sa mga panahon na iyan, nakakua ako nin giya asin karangahan sa manlaenlaen na paagi. Pero an pinakanangongorog na suporta sa sako iyo pa man giraray ‘an Suanoy kan mga Aldaw’—si Jehova Dios. (Dan. 7:9) Paagi sa hatol nia, namolde an personalidad ko asin nagkaigwa ako nin nakakakontentong mga eksperyensia sa pagmimisyonero. Kun nagkakaproblema ako, ‘pinangangatamanan ako kan pagkaherak [o mamomoton na kabootan] ni Jehova asin an saiyang mga pagranga nakakaranga sa sakuyang kalag.’ (Sal. 94:18, 19) Nakamtan ko man an pagkamoot asin suporta kan pamilya ko asin kan ‘mga tugang na minadamay sa oras nin kasakitan.’ (Tal. 17:17, An Marahay na Bareta Biblia) Dakol sa mga ini an madonong na mga may edad na.

“Bako daw na igwa nin kadonongan sa mga gurang asin nin pakasabot sa lawig nin mga aldaw?” an hapot kan patriarkang si Job. (Job 12:12, NW) Kun hinohorophorop ko an buhay ko, masasabi kong iyo. Nakakatabang sa sako an sadol kan madonong na mga may edad na, nagigin suporta sa sako an pagranga ninda, asin napaparahay an buhay ko huli sa pakikikatood sa sainda. Nagpapasalamat ako na naparani ako sa sainda.

Ngonyan na ako 80 na, ako mismo may edad na man. Huli sa eksperyensia ko, mas nagin mapagrisa ako sa mga pangangaipo kan ibang mga may edad na. Gustong-gusto ko pa man giraray na bisitahon asin tabangan sinda. Pero naoogma man ako na makiibaiba sa mga hoben. Nakakapukaw an kaliksihan ninda, asin nakakaimpluwensia an entusiasmo ninda. Kun naririsa ko na gusto nin mga hoben na magpagiya asin magpatabang sa sako, nakakakontento nanggad na matabangan sinda.

[Nota sa Ibaba]

[Ritrato sa pahina 14]

Pagpapayunir kaiba ni Joy Lennox sa Narrandera

[Ritrato sa pahina 15]

Si Elva kaiba an mga miembro kan pamilyang Bethel sa Switzerland kan 1960

[Ritrato sa pahina 16]

Pag-ataman ki Arne kan may helang sia