Hapot Hale sa mga Parabasa
Hapot Hale sa mga Parabasa
Kasuarin an Anglo-Amerika nagin an ikapitong pambilog na kinaban na kapangyarihan na ihinula sa Biblia?
▪ An higanteng metal na imahen na nahiling ni Hadeng Nabucodonosor dai nagrerepresentar sa gabos na pambilog na kinaban na kapangyarihan. (Dan. 2:31-45) An ilinaladawan sana kaiyan iyo an limang namahala poon kan panahon ni Daniel na nakipaglaban sa banwaan nin Dios.
An deskripsion ni Daniel sa metal na imahen nagtatao nin ideya na an Pambilog na Kinaban na Kapangyarihan na Anglo-Amerikano magikan sa Roma, imbes na mananakop kaiyan. Sa imahen, nahiling ni Daniel na an batbat minapoon sa mga tabay asin minasagkod sa mga bitis asin moro. (Sa mga bitis saka moro, an batbat may salak na dalipay.) * Ipinaparisa kan deskripsion na iyan na an Pambilog na Kinaban na Kapangyarihan na Anglo-Amerikano magikan sa mga tabay na batbat. Pinapatunayan kan kasaysayan an pagigin eksakto kan deskripsion na iyan. An Britania, na dating kabtang kan Imperyo nin Roma, nagpoon na magin prominente kan huring parte kan ika-18 siglo. Kan huri, nagin makapangyarihan na nasyon an Estados Unidos nin Amerika. Pero, dai pa nabilog an ihinula kan Biblia na ikapitong pambilog na kinaban na kapangyarihan. Taano ta dai? An Britania asin Estados Unidos dai pa naghiro na magkaibanan sa pambihirang paagi. Nangyari ini kan Giera Mundial I.
Kan panahon na iyan, ‘an mga aki kan kahadean’ aktibo lalo na sa Estados Unidos. An saindang pambilog na kinaban na opisina nasa Brooklyn, Nueva York. (Mat. 13:36-43) An mga miembro kan grupong linahidan aktibong naghuhulit sa mga nasyon na kontrolado kan Imperyo nin Britania. Kan Giera Mundial I, nagkaigwa nin espesyal na alyansa an Britania asin Amerika kan iyan makipaglaban sa mga kaiwal kaiyan sa politika. Sa pagkosog kan nasyonalismo na resulta kan giera, ikinaongis man kan mga iyan an mga kabtang kan banhi kan simbolikong “babae” nin Dios, na ipinagbabawal an mga publikasyon kaini asin ibinibilanggo an mga nangengenot sa paghuhulit.—Kap. 12:17.
Kaya, basado sa hula sa Biblia, an ikapitong pambilog na kinaban na kapangyarihan dai naglataw kan huring parte kan ika-18 siglo kan enot na magin prominente an Britania. Imbes, nakamtan kaiyan an posisyon na iyan sa kapinonan kan aldaw kan Kagurangnan. *
[Mga Nota sa Ibaba]
^ par. 4 An dalipay na isinalak sa batbat nagrerepresentar sa mga elemento na nasa irarom kan garo batbat na pamamahala kan Pambilog na Kinaban na Kapangyarihan na Anglo-Amerikano. Sa paglihis nin panahon, an dalipay na ini nagpadepisil sa kapangyarihan na iyan na makamtan an kakosogan na minamawot kaiyan.
^ par. 6 An paliwanag na ini pagbabago sa impormasyon na tinokar sa pahina 57, parapo 24, kan librong Daniel’s Prophecy asin sa ilinadawan sa mga tsart sa pahina 56 asin 139.
[Ritrato sa pahina 19]
Walong brother hale sa pambilog na kinaban na opisina kan Watchtower an ibinilanggo kan Hunyo 1918
