Magin Madonong—Humanap nin “Ekspertong Paggiya”

An buhay ikinokomparar sa pagbiahe sa dagat. Pero, sa parate, an kadonongan nin tawo limitado kun dapit sa pagtabang sa mga tawo na mapangganang giyahan an buhay. Dakol an napapahamak sa garo mabagyóng mga kamugtakan sa buhay. (Sal. 107:23, 27) Taano ta angay an pagkokomparar na iyan?

Kan suanoy na mga panahon, an pagbiahe sa dagat depisil asin nangangaipo nin eksperyensia. Saro ining abilidad na nanonodan sa haloy nang mga paralayag, tibaad sa sarong timonel. (Gui. 27:9-11) Dakol na suanoy na ipininta an nagdodoon kan kahalagahan kan papel kan timonel paagi sa pagladawan sa saiya na mas dakula kisa sa iba. Tanganing makalayag sa katahawan nin dagat, pinag-aadalan kan mga paradagat an mga bitoon, doros, asin iba pang giya. Ilinaladawan kan Biblia an nagkapirang paralayag bilang “madodonong.”—Ezeq. 27:8.

Ngonyan, an pag-atubang sa mga problema sa buhay garo siring kadepisil kan paglayag kan suanoy. Ano an makakatabang sa sato?

PAANO KITA MAGKAKAMIT NIN “EKSPERTONG PAGGIYA”?

Mantang isinasaisip na an buhay garo pagbiahe sa dagat, horophoropa an katotoohan na ini na nasa Biblia: “An tawong madonong maghihinanyog asin maglalaog sa isip nin dagdag na tokdo, asin an tawong may pakasabot iyo an nagkakaigwa nin ekspertong paggiya.” (Tal. 1:5, 6, NW) An Hebreong termino na itrinadusir na “ekspertong paggiya” puedeng magladawan sa ginigibo kan kapitan kan suanoy na barko. Ipinaparisa kaiyan an abilidad na ekspertong maggiya asin magdirehir.

Minsan ngani nangangaipo iyan nin paghihingoa, puede kitang magkamit nin “ekspertong paggiya” asin makanood na mapangganang “maglayag” sa dagat nin buhay. Arog kan ipinaparisa kan Talinhaga, kaipuhan ta an ‘kadonongan,’ “pakasabot,” asin “pakanood.” (Tal. 1:2-6; 2:1-9) Asin dai niato puedeng baliwalaon an paghanap nin paggiya nin Dios, huling dawa an mga maraot may paggiya man alagad para sa salang katuyohan.—Tal. 12:5.

Kaya, importanteng marhay na magin mahigos kita sa pag-adal kan Tataramon nin Dios. Sa siring na pag-adal, puede kitang makakua nin mahalagang impormasyon manongod ki Jehova asin sa saro na pinakanangongorog sa pagpabanaag sa Saiya, si Jesu-Cristo. (Juan 14:9) Nag-aako kita nin dakol na madonong na konseho sa Kristianong mga pagtiripon. Dugang pa, makakanood kita sa eksperyensia nin iba, kaiba na an satong mga magurang.—Tal. 23:22.

MAG-ANTISIPAR ASIN MAGPLANO

Nangorognang mahalaga an “ekspertong paggiya” kun kita garo baga nasa maalon na katubigan. Sa depisil na situwasyon, tibaad mayo na kitang magibo huli sa pagduwaduwa, asin puedeng kapahapahamak an resulta.—Sant. 1:5, 6.

 Interesante nanggad, an terminong itrinadusir na “ekspertong paggiya” ginagamit man manongod sa pakikigiera. Mababasa niato: “Paagi sa ekspertong paggiya [“ekspertong estratehiya,” The Revised English Bible] ipagpapadagos mo an saimong pakikilaban asin sa kadakolan nin parakonseho yaon an kaligtasan.”—Tal. 20:18; 24:6, NW.

Siring sa sarong matibay mag-organisar nin pakikilaban, dapat tang antisiparon an posibleng mga peligro sa satong espirituwalidad. (Tal. 22:3) Halimbawa, tibaad kaipuhan mong magdesisyon kun baga aakoon an bagong trabaho o paglangkaw kan posisyon sa trabaho. Siempre, kokonsideraron mo an sueldo, an lawig nin pagbiahe, asin an iba pang detalye. Pero, igwa pang ibang bagay na dapat pag-isipan: May nababalga daw na prinsipyo sa Biblia an klase kan trabahong iyan? Paano makakaapektar sa sakong Kristianong mga aktibidad an oras kan trabaho, arog baga nin pabarobagong oras nin trabaho?—Luc. 14:28-30.

Si Loretta, na sarong Saksi ni Jehova, may magayon na trabaho sa kompanya nin kakanon. Kan ibabalyo na sa ibang lugar an kompanya, inalokan si Loretta nin halangkaw na posisyon sa bagong lugar: “Pagkakataon mo na ini,” an sabi sa saiya kan mga direktor. “May Kingdom Hall man duman.” Alagad, gusto ni Loretta na pasimplehon an saiyang buhay tanganing mas lubos na mapaglingkodan an Kaglalang. Aram niang mababawasan an oras nia sa Kristianong mga aktibidad sa bagong trabahong idto. Kaya, nag-resign sia, minsan ngani inadmitir sa saiya kan direktor na sia sana an empleyado na gusto talaga nindang magdanay. Kombensido si Loretta, na ngonyan mga 20 taon nang regular payunir, na nakamit nia an marahay na mga resulta huli mismo sa pagplano nia na may “ekspertong paggiya,” na kaoyon kan sadol kan Tataramon nin Dios. Pinakosog nia an relasyon nia ki Jehova asin nagkapribilehio sia na matabangan an nagkapira na akoon an katotoohan sa Biblia.

An “ekspertong paggiya” kaipuhan nanggad sa pamilya. Halawig na panahon an kaipuhan sa pagpadakula nin mga aki, asin an mga desisyon dapit sa espirituwal asin materyal na mga bagay may epekto sa puturo kan gabos sa pamilya. (Tal. 22:6) Halimbawa, puedeng ihapot kan mga magurang sa saindang sadiri: ‘Sa samong pakikipag-olay asin halimbawa, tinotokdoan mi daw an mga aki na magpahalaga sa espirituwal na mga bagay na makakatabang sa sainda na atubangon nin madonong an mga problema kun adulto na sinda? Nakakatabang daw an samong estilo nin pamumuhay tanganing masabotan ninda na magigin kontento sinda kun an saindang buhay simple asin nakapokus sa Kristianong ministeryo?’—1 Tim. 6:6-10, 18, 19.

An tunay na kapangganahan dai nakadepende sa mga pasohan na umasenso asin magin bantog, na parateng inaabot kan mga tawo sa kinaban. Nasabotan ini ni Hadeng Salomon. Sia pinasabngan na magsurat: ‘An mga natatakot sa Dios mapaparahay, [huling sinda] nagkakatarakot sa atubangan nia.’ (Par. 8:12) Pinatunayan kaiyan na kadonongan nanggad an paghanap nin “ekspertong paggiya” na basado asin kaoyon kan Tataramon nin Dios.—2 Tim. 3:16, 17.

[Ritrato sa pahina 30]

Sa pagdoon sa kahalagahan kan papel kan timonel, sa parate ilinaladawan sia na mas dakula kisa sa ibang paralayag

[Credit Line]

Su concessione del Ministero per i Beni e le Attività Culturali. Dai itinotogot an pagreprodusir kan retratong ini sa ano man na paagi.