“Kiisay Ako Matatakot?”
“Kiisay Ako Matatakot?”
‘Minsan magkaigwa nin giera tumang sa sako, magsasarig pa man giraray ako.’ —SAL. 27:3, NW.
OYON SA MINASUNOD NA MGA BERSIKULO, ANO AN MAKAKATABANG SA SAIMO NA MAGKAIGWA NIN KOSOG NIN BOOT?
1. Tatabangan kita kan ika-27 Salmo na masabotan an ano?
TAANO ta orog pa kitang naghuhulit sa ibong nin naggagrabeng kamugtakan sa kinaban? Taano ta lubos niatong itinatao an satong panahon asin kosog mantang dakol an nakakaeksperyensia nin mga problema sa pinansial? Paano kita makakapagdanay na makosog an boot dawa an dakol na iba pa natatakot sa mangyayari sa maabot na panahon? Sinisimbag iyan kan ipinasabong na awit ni Hadeng David sa Salmo 27.
2. Ano an epekto sa sarong tawo nin grabeng takot, alagad sa ano kita makakapagtiwala?
2 Pinonan ni David an salmong ini sa mga tataramon na ini: ‘Si Jehova iyo an sakuyang ilaw asin an sakuyang paraligtas. Siisay an kakatakotan ko? Si Jehova iyo an kasarigan nin sakuyang buhay. Kiisay ako matatakot?’ (Sal. 27:1) An grabeng takot nakakapaluya nanggad. Alagad an nagtitiwala ki Jehova dai pupurisawon nin grabeng takot. (1 Ped. 3:14) Kun kita magsasarig ki Jehova, kita ‘mag-oontok na tiwala, asin mabubuhay na may kahingaloan, na mayong katakotan sa karatan.’ (Tal. 1:33; 3:25) Taano man?
‘SI JEHOVA IYO AN SAKUYANG ILAW ASIN AN SAKUYANG PARALIGTAS’
3. Taano ta masasabi na si Jehova an satong ilaw, alagad ano an dapat niatong gibohon?
3 An piguratibong pananaram na ‘si Jehova iyo an sakuyang ilaw’ nangangahulogan na pinapatalingkas kita ni Jehova sa pagkadaing aram asin sa espirituwal na kadikloman. (Sal. 27:1) Paagi sa literal na liwanag, puede niatong mahiling an peligro o olang sa dalan, alagad dai iyan hinahale kan liwanag. Dapat kitang humiro nin may kadonongan segun sa nahihiling niato. Sa kaagid na paagi, ihinahayag sa sato ni Jehova an kahulogan kan mga pangyayari sa kinaban. Pinapatanidan nia kita dapit sa mga peligro kan sistemang ini nin mga bagay. Itinao nia sa sato an mga prinsipyo sa Biblia na pirmeng epektibo, alagad dapat niatong iaplikar an satong nanonodan. Kun gigibohon ta iyan, magigin mas madonong kita kisa sa mga kaiwal asin paratokdo niato.—Sal. 119:98, 99, 130.
4. (a) Taano ta marigon na nakapagsabi si David: “Si Jehova iyo an sakuyang . . . paraligtas”? (b) Noarin nangorognang magigin paraligtas niato si Jehova?
4 Ipinapahiling kan mga tataramon ni David sa Salmo 27:1 na siertong nagirumdoman nia kun paano sia ilinigtas ni Jehova kan nakaagi. Halimbawa, ilinigtas sia ni Jehova ‘sa mga kuko kan leon asin sa mga kuko kan oso.’ Tinawan man sia ni Jehova nin kapangganahan tumang sa higanteng si Goliat. Paghaloyhaloy, prinobaran ni Hadeng Saul na gadanon si David paagi sa budyak, alagad sa kada pagprobar na iyan ilinigtas sia ni Jehova. (1 Sam. 17:37, 49, 50; 18:11, 12; 19:10) Bakong makangangalas na marigon na nakapagsabi si David: “Si Jehova iyo an sakuyang . . . paraligtas”! Ililigtas man ni Jehova an mga lingkod nia arog kan ginibo nia ki David. Paano? Paagi sa pagsalbar sa mga parasamba nia sa maabot na “dakulang kahorasaan.”—Kap. 7:14; 2 Ped. 2:9.
GIRUMDOMON AN LAMBANG KAPANGGANAHAN
5, 6. (a) Paano nakakatabang an paggirumdom sa mga naeksperyensiahan niato na kumosog an boot niato? (b) Paano orog na napakosog an boot mo kan rekord dapit sa pagtabang ni Jehova sa mga lingkod nia?
5 An sarong mahalagang bagay sa pagpatalubo nin kosog nin boot mahihiling niato sa Salmo 27:2, 3. * Nagirumdoman ni David an mga pangyayari na nakaligtas sia sa tabang ni Jehova. (1 Sam. 17:34-37) An paggirumdom kaiyan nagtao sa saiya nin kompiansa na atubangon dawa an pinakamasakit na mga problema. Arog man daw kaiyan an namatean mo base sa mga eksperyensia mo? Halimbawa, maigot ka daw na namibi manongod sa makamomondong problema dangan nahiling mo kun paano ka tinawan ni Jehova nin kadonongan o kosog na makaya an pagbalong iyan? O nagigirumdoman mo daw kun paano nahale an mga olang sa saimong magayagayang paglilingkod o kun paano binukasan sa saimo an sarong dakulang pinto nin gibohon? (1 Cor. 16:9) Ano an epekto sa saimo ngonyan kan paggirumdom kan siring na mga pangyayari? Bako daw na an paggirumdom kaiyan padagos na nakakakombensir sa saimo na matatabangan ka ni Jehova na mapangganahan o matagalan dawa an mas depisil na mga olang o problema?—Roma 5:3-5.
6 Paano kun may makapangyarihan na gobyerno na magplanong pohoon an Mga Saksi ni Jehova bilang organisasyon? Prinobaran iyan nin dakol na tawo sa presenteng mga panahon alagad dai nagin mapanggana. An paggirumdom kun paano tinabangan ni Jehova an banwaan nia kaidto matao sa sato nin kompiansa na atubangon an maabot na panahon.—Dan. 3:28.
PAHALAGAHAN AN DALISAY NA PAGSAMBA
7, 8. (a) Oyon sa Salmo 27:4, ano an hinagad ni David ki Jehova? (b) Ano an dakulang espirituwal na templo ni Jehova, asin paano isinasagibo an pagsamba dian?
7 Mahalaga man an pagkamoot niato sa tunay na pagsamba tanganing makapatalubo nin kosog nin boot. (Basahon an Salmo 27:4.) Kan panahon ni David, an “harong ni Jehova” iyo an tabernakulo. Si David mismo an naggibo kan mga areglo para sa detalyadong estruktura kan templo na itotogdok kan aki niang si Salomon. Pakalihis nin mga siglo, ihinayag ni Jesus na an pagsambang inaako ni Jehova dai na madepende sa sarong dakulang estruktura na binendisyonan nin Dios. (Juan 4:21-23) Ipinarisa ni apostol Pablo sa Hebreo kapitulo 8 sagkod 10 na nagkaigwa nin dakulang espirituwal na templo kan bautismohan si Jesus kan 29 C.E., kan ipresentar nia an saiyang sadiri na gibohon an kabotan ni Jehova. (Heb. 10:10) An dakulang espirituwal na templong ini iyo an areglong ginibo ni Jehova tanganing kita, paagi sa pagtubod niato sa atang na pantubos ni Jesus, makadolok sa Dios sa paagi na inaako nia. Paano niato ginigibo an pagsamba dian? Paagi sa pagpamibi “na may tunay na puso, sa kapanoan nin pagtubod”; sa mayong pag-urong-sulong na pagpahayag sa publiko kan satong paglaom; asin sa pagkonsiderar, pagdagka, saka pagparigon sa mga kapwa parasamba kun kita nagtitiripon sa kongregasyon asin durante kan pampamilyang pagsamba. (Heb. 10:22-25) An pagpahalaga sa areglo nin tunay na pagsamba nagpapakosog sa sato sa delikadong huring mga aldaw na ini.
8 Sa bilog na daga, an maimbod na mga lingkod ni Jehova orog na nakikikabtang sa ministeryo, nag-aadal nin ibang mga lenguahe, asin nagbabalyo sa mga lugar kun saen mas kaipuhan an mga parahulit kan Kahadean. Ihinahayag kan saindang mga ginigibo na, arog kan salmista, may sarong bagay sindang hinahagad ki Jehova. Gusto nindang maeksperyensiahan an pagigin nakakagayagaya ni Jehova asin makikabtang sa sagradong paglilingkod ano man an mangyari.—Basahon an Salmo 27:6.
MAGTIWALA SA TABANG NIN DIOS
9, 10. Ano an boot sabihon kan garantiya na nasa Salmo 27:10?
9 Mapuersang ipinahayag ni David an pagtitiwala nia sa tabang ni Jehova paagi sa pagsabing: “Minsan an sakuyang ama asin sakuyang ina pabayaan ako, si Jehova minsan siring poponponon [‘aamponon,’ NW] ako.” (Sal. 27:10) Basado sa mga pangyayaring nasambitan sa 1 Samuel kapitulo 22, makakapagkongklusyon kita na dai pinabayaan si David kan mga magurang nia. Minsan siring, dakol sa ngonyan an kinaipuhan na magtagal nin grabeng pagsikwal kan pamilya ninda. Pero, an dakol na pinabayaan nakakua nin tabang asin proteksion paagi sa pagkamoot kan Kristianong kongregasyon.
10 Mantang andam si Jehova na suportaran an mga lingkod nia kun sinda pabayaan kan iba, bako daw na sususteniran man nia sinda kun umagi sinda nin iba pang klase nin kadepisilan? Halimbawa, kun ikinakahadit niato an pagsustento sa satong pamilya, bako daw na makakasegurado kita na tatabangan kita ni Jehova? (Heb. 13:5, 6) Nasasabotan nia an mga kamugtakan asin pangangaipo kan gabos na maimbod na lingkod nia.
11. Ano an epekto sa iba kan satong pagtitiwala ki Jehova? Magtao nin halimbawa.
11 Estudyare an kamugtakan ni Victoria, sarong tinotokdoan sa Biblia sa Liberia. Kan nag-ooswag na sia pasiring sa bautismo, sia asin an tolo niang aki binayaan kan kasaroan nia. Minsan ngani mayong harong asin trabaho, padagos siang nag-oswag sa espirituwal. Pagkatapos kan bautismo ni Victoria, an saiyang 13 anyos na aking babae nakakua nin sadit na bag na pano nin kuarta. Tanganing dai matentaran, nagdesisyon sindang dai na pagbilangon an kuarta. Imbes, tolos nindang kinontak an soldados na kagsadiri kan sadit na bag. Sinabi kaini sa sainda na kun an gabos na tawo siring kaonesto kan Mga Saksi ni Jehova, an bilog na kinaban magigin mas marahay asin matoninong. Gamit an Biblia, ipinahiling ni Victoria sa soldados an panuga ni Jehova na bagong kinaban. Huling napahangang marhay sa integridad nia, tinawan kan soldados si Victoria nin darudakulang balos hale sa ibinalik na kuarta. Tunay nanggad, huli sa lubos na pagtubod sa kakayahan ni Jehova na itao an materyal na mga pangangaipo, an mga Saksi ni Jehova igwa nin ekselenteng reputasyon sa pagigin onesto.
12. Ano an ipinapahiling niato kun padagos kitang naglilingkod ki Jehova sa ibong nin pagkawara nin hanap-buhay? Magtao nin halimbawa.
12 Imahinaron man an seguradong namatean ni Thomas, sarong dai pa bautisadong parahayag sa Sierra Leone. Nagpoon siang magtrabaho bilang maestro sa haiskul, alagad dai nia nareresibi an sueldo nia sa laog nin haros sarong taon sagkod na dai pa kompleto an papeles. Ano an ultimong kahagadan ki Thomas bago maresibi an sueldo asin back pay nia? Iinterbiohon sia kan administrador kan eskuelahan—na sarong padi. Ipinaliwanag kan padi na an mga tinutubod kan Mga Saksi ni Jehova dai inaako sa eskuelahan. Iininsistir kaini na pumili si Thomas—an trabaho nia o an basado sa Biblia na mga tinutubod nia. Si Thomas nagpondo sa trabahong iyan na dai naresibi an sueldo sa laog nin haros sarong taon asin nakakua nin ibang trabaho, an paghirahay nin mga radio saka cellphone. Ipinapahiling kaini asin nin dakol na kaagid na halimbawa na minsan ngani ikinakatakot na marhay nin ibang tawo an mawaran nin hanap-buhay, mapapangganahan iyan kan satong makosog na tiwala sa Kaglalang kan gabos na bagay asin Paraprotektar kan saiyang banwaan.
13. Paano nag-ooswag an paghuhulit kan Kahadean sa nagtitios na kadagaan?
13 Sa dakol na kadagaan na masakit an mga kamugtakan sa pagbuhay, parateng hiling-hiling an pagigin aktibo kan mga parabalangibog kan Kahadean. Taano? An sarong sangang opisina nagsurat: “Dakol na kagharong na nag-ako nin pag-adal sa Biblia an mayong trabaho kaya mas dakol an panahon nindang mag-adal kun aldaw. Mas dakol man an panahon kan mga tugang na makapaghulit. An mga tawo, nangorogna sa pinakatios na mga lugar, dai na kaipuhan na sabihan na nabubuhay kita sa huring mga aldaw; nahihiling na ninda an mga kamugtakan sa palibot ninda.” An sarong misyonero na naglilingkod nin labing 12 taon sa nasyon na sa kabilogan an kada parahayag nagkokondukta nin labi sa tolong pag-adal sa Biblia nagsurat: “Huling dakol sa mga parahayag an simple an estilo nin pamumuhay asin dikit an mga disturbo, sa pangkagabsan mas dakol an panahon ninda sa ministeryo sa langtad asin pagtotokdo sa Biblia.”
14. Sa anong mga paagi makakamtan kan dakulang kadaklan an pagprotektar nin Dios?
14 Nanuga si Jehova na tatabangan, poprotektaran, asin ililigtas nia an banwaan nia bilang grupo, sa pisikal saka espirituwal, asin nagtitiwala kita sa saiya. (Sal. 37:28; 91:1-3) Siertong dakulang grupo nanggad an makakaligtas “sa dakulang kahorasaan.” (Kap. 7:9, 14) Sa siring an kadaklan na iyan, bilang grupo, iingatan na dai mapoho sa natatada pang kabtang kan huring mga aldaw. Itatao sa sainda an gabos nindang kaipuhan tanganing matagalan an mga pagbalo asin maingatan an saindang relasyon ki Jehova. Asin sa bilog na ultimong kabtang kan dakulang kahorasaan, poprotektaran ni Jehova an banwaan nia.
‘TOKDOAN SA SAKUYA, O JEHOVA, AN SAIMONG DALAN’
15, 16. Paano kita nakikinabang kun hinihimate niato an pagtotokdo nin Dios? Magtao nin halimbawa.
15 Tanganing magdanay na makosog an boot, kaipuhan niato an padagos na pagtotokdo sa dalan nin Dios. Risang-risa ini sa pakiolay ni David: ‘Tokdoan sa sakuya, O Jehova, an saimong dalan, asin daraha ako sa aagihan na matanos, dahelan kan sakuyang mga kaiwal.’ (Sal. 27:11) An paghiro kaoyon kan pamibing ini nangangahulogan nin pagtao nin maingat na atension sa ano man na basado sa Biblia na pagdirehir, na itinatao sa sato paagi sa organisasyon ni Jehova, asin tolos na pag-aplikar kaiyan. An dakol iinaplikar an madonong na konseho na pasimplehon an buhay asin binayadan an dai kaipuhan na utang ninda. Makakapatunay sinda na nakatabang iyan sa sainda kan magkaigwa nin krisis sa ekonomiya. Imbes na magabatan huli sa mga rogaring na dai na ninda kayang gastosan, libre na sindang pahiwason an ministeryo ninda. An kada saro sa sato marahay na hapoton an saiyang sadiri, ‘Tolos ko daw na iinaaplikar an gabos kong nababasa sa Biblia saka sa mga publikasyon kan grupong maimbod asin mapagmansay na oripon, dawa kun kaipuhan kong magsakripisyo?’—Mat. 24:45.
16 Kun kita nagpapatokdo asin nagpapagiya ki Jehova sa dalan nin katanosan, mayo kitang dahelan na matakot. Kan an sarong regular payunir sa Estados Unidos mag-aplay nin trabaho na makakatabang sa saiya asin sa bilog niang pamilya na magdanay sa bilog na panahon na paglilingkod, sinabihan sia kan superbisor nia na nungkang mapapasaiya an posisyon na iyan kun dai sia nagtapos sa kolehio. Kun sa saimo ini nangyari, mabasol ka daw na naglaog ka sa bilog na panahon na paglilingkod asin dai nagkua nin halangkaw na edukasyon? Pakalihis nin duwang semana, sinisante an superbisor na iyan, dangan hinapot nin saro pang manedyer an brother dapit sa mga pasohan nia. Ipinaliwanag nia tolos na sindang mag-agom bilog na panahon na ministro kan Mga Saksi ni Jehova asin gustong magpadagos na arog kaiyan. Bago pa makapadagos sa pagtaram an brother, an manedyer nagsabi: “Sabi ko na, naiiba ka! Kan madali nang magadan an sakong ama, duwa sa mga kapagtubod nindo an nagbibisita asin binabasahan sia nin Biblia aroaldaw. Nangako ako sa sadiri ko na kun magkaoportunidad man ako na tabangan an saro sa Mga Saksi ni Jehova, gigibohon ko iyan.” Kan suminunod na aga, itinao sa brother na ini an mismong trabaho na habong itao sa saiya kan dating superbisor. Iyo, kun ineenot ta sa satong buhay an intereses kan Kahadean, ootobon ni Jehova an pag-asegurar nia na dai kita magkukulang sa materyal na mga pangangaipo.—Mat. 6:33.
MAHALAGA AN PAGTUBOD ASIN PAGLAOM
17. Ano an makakatabang sa sato na atubangon na may pagtitiwala an mga mangyayari sa maabot na panahon?
17 Sunod na idinoon ni David an kahalagahan nin pagtubod asin paglaom paagi sa pagsabi: ‘Kun dai ako nagtubod na mahihiling ko an pagkamarahayon ni Jehova digdi sa daga nin mga nabubuhay.’ (Sal. 27:13) Sa katunayan, ano daw an kamugtakan niato kun mayo an itinao nin Dios na paglaom asin an pagpahalaga niato sa mga tinokar sa Salmo 27? Kun siring, padagos logod kitang may pagtitiwalang mamibi na kita tawan nin kosog asin iligtas sagkod sa Armagedon.—Basahon an Salmo 27:14.
[Nota sa Ibaba]
^ par. 5 Salmo 27:2, 3 (NW): “Kan an mga paragibo nin maraot rumani tumang sa sakuya tanganing kakanon an sakuyang laman, huling sinda sakuyang mga kalaban asin sakuyang mga kaiwal, sinda nagkadarasmag asin nagkaturumba. Minsan may magpatindog nin kampamento tumang sa sakuya, dai matatakot an sakuyang puso. Minsan magkaigwa nin giera tumang sa sako, magsasarig pa man giraray ako.”
[Mga Hapot Para sa Pag-adal]
[Ritrato sa pahina 23]
Napakosog si David sa paggirumdom nia sa mga pagliligtas ni Jehova
[Ritrato sa pahina 25]
Minamansay daw niato an kasakitan sa pinansial bilang oportunidad na pahiwason an satong ministeryo?
