Paglingkodan an Dios nin Katalingkasan

‘Ini iyo an pagkamoot [sa] Dios, na kita mag-otob kan saiyang mga togon; asin an saiyang mga togon bakong magabat.’—1 JUAN 5:3.

MASISIMBAG DAW NINDO?

Paano pinagmamaigotan ni Satanas na palatawon na nakakapagabat an mga ley nin Dios?

Taano ta dapat kitang magin maingat na marhay manongod sa satong kairiba?

Ano an makakatabang sa sato na magdanay na maimbod sa Dios nin katalingkasan?

1. Paano minamansay ni Jehova an katalingkasan, asin paano nia iyan ipinahiling sa pagtratar nia ki Adan asin Eva?

SI Jehova sana an Persona na igwa nin lubos na katalingkasan. Pero, nungka niang inaabuso iyan; ni sinasadiri man nia an katalingkasan paagi sa pagkontrol pati sa lambang sadit na bagay na ginigibo kan mga lingkod nia. Imbes, tinawan nia sinda nin katalingkasan o libertad na magdesisyon, kaya puede sindang gumamit nin inisyatiba asin panigoan ninda an gabos na tamang kamawotan ninda. Halimbawa, tinawan nin Dios si Adan asin Eva nin saro sanang pagbabawal—dai magkakan kan bunga kan ‘kahoy nin pakamidbid kan karahayan asin karatan.’ (Gen. 2:17) Makangangalas nanggad an hiwas kan katalingkasan ninda mantang ginigibo an kabotan kan saindang Kaglalang!

2. Taano ta nawara kan enot niatong mga magurang an saindang katalingkasan na itinao nin Dios?

² Taano ta mahiwason an katalingkasan na itinao nin Dios sa enot niatong mga magurang? Linalang nia sinda oyon sa saiyang ladawan asin tinawan sinda nin konsensia, kaya angay sanang maglaom sia na an pagkamoot ninda sa saiya bilang saindang Kaglalang an magiya sa sainda sa tamang dalan. (Gen. 1:27; Roma 2:15) Makamomondo, dai pinahalagahan ni Adan asin Eva an saindang marahayon na Kagtao nin Buhay asin an katalingkasan na itinao nia sa sainda. Imbes, pinili ninda an bakong lehitimong katalingkasan na iinalok ni Satanas, an pagigin independiente sa moral. Alagad imbes na magin mas talingkas, ikinapabakal ninda sa kaoripnan sa kasalan an saindang sadiri asin an magigin mga aki ninda, na kapahapahamak an mga resulta.—Roma 5:12.

3, 4. Paano pinagmamaigotan ni Satanas na dayaon kita kun mapadapit sa mga pamantayan ni Jehova?

³ Kun nasutsutan ni Satanas an duwang perpektong tawo—pati na an dakol na espiritung linalang—na haboan an soberaniya nin Dios, puede man nia kitang madaya. Dai nagbago an estratehiya nia. Pinagmamaigotan nia kitang dayaon na isipon  ta na an mga pamantayan nin Dios nakakapagabat asin nakakahale kan satong kaogmahan. (1 Juan 5:3) Puedeng magin makosogon an impluwensia kan kaisipan na iyan kun paorootro kitang mababantad dian. “Dakulaon an impluwensia sa sako kan maraot na kairiba, lalo na ta takot akong mapalaen sa sainda,” an sabi kan 24 anyos na sister na nakakomiter nin seksuwal na imoralidad. Tibaad nakaeksperyensia na man kamo nin kaparehong panggigipit nin kairiba.

⁴ Makamomondo, may beses na an negatibong impluwensia nin kairiba puede man maggikan sa laog kan Kristianong kongregasyon. “May nakamidbid akong mga hoben na nakikipag-date sa bakong kapagtubod,” an sabi nin sarong hoben na Saksi. “Pero, pag-abot nin panahon, narealisar kong mantang mas nakakaibanan ko sinda, mas nagigin kapareho na man ninda ako. An espirituwalidad ko nagpoon na magluya. Dai na ako naoogma sa espirituwal na kakanon sa mga pagtiripon asin haros dai na ako nakikikabtang sa paghuhulit. Idto an nagin senyal na dai na ako dapat makiibaiba sa sainda, asin ginibo ko iyan!” Aram daw nindo kun gurano kakosog kan puedeng magin impluwensia sa saindo kan saindong kairiba? Isip-isipa an napapanahon na halimbawa sa Biblia.—Roma 15:4.

HINABON NIA AN SAINDANG PUSO

5, 6. Paano dinaya ni Absalom an iba, asin nagin mapanggana daw an pakana nia?

⁵ An Biblia igwa nin dakol na halimbawa nin mga nagin maraot na impluwensia sa iba. Saro sa sainda si Absalom na aki ni Hadeng David. Si Absalom guapong marhay. Minsan siring, pag-abot nin panahon, arog ni Satanas, pinabayaan niang mapano an saiyang puso nin mahanab na ambisyon, huling minawot niang mapasaiya an trono kan saiyang ama, kun saen mayo sia nin deretso. * Sa tusong pagprobar na agawon an pagkahade, si Absalom sagin na nagmakolog nin hararom sa mga kapwa nia Israelita mantang tuso niang pinapalataw na an hade saka an mga opisyal kaini mayo nin tunay na pagmakolog sa sainda. Iyo, arog kan Diablo kaidto sa hardin nin Eden, ipinahiling ni Absalom na sia paratabang, mantang maringis na pinapakaraot an saiyang ama.—2 Sam. 15:1-5.

⁶ Nagin mapanggana daw an tusong pakana ni Absalom? Sa sarong kabtang, iyo, huling sinasabi kan Biblia: ‘Hinabon ni Absalom an puso kan mga taga Israel.’ (2 Sam. 15:6) Pero sa katapustapusi, an pagpaabaw-abaw ni Absalom an nagpabagsak sa saiya. Asin makaturotriste, nagresulta man iyan sa kagadanan nia asin kan ribo-ribong nadaya nia.—2 Sam. 18:7, 14-17.

7. Anong mga leksion an manonodan niato sa pagkasaysay manongod ki Absalom? (Hilingon an retrato sa pahina 14.)

⁷ Taano ta madalion na nadaya an mga Israelitang idto? Posibleng minawot ninda an mga bagay na ipinangako sa sainda ni Absalom. O tibaad nadara sinda kan saiyang pisikal na itsura. Ano man an dahelan, makakasierto kita sa bagay na ini: Bako sindang maimbod ki Jehova asin sa ninombrahan niang hade. Ngonyan, padagos na naggagamit si Satanas nin “mga Absalom” sa pagprobar na habonon an puso kan mga lingkod ni Jehova. Tibaad sabihon ninda, ‘Sobra man kaestrikto kan mga pamantayan ni Jehova. Hilinga an mga dai naglilingkod ki Jehova. Maogmahon sinda!’ Marerealisar daw nindo na iyan maraoton na kaputikan sana asin kamo daw magdadanay na maimbod sa Dios? Mimidbidon daw nindo na solamenteng an “sangkap na katogonan” ni Jehova, an katogonan kan Cristo, an makakatao sa saindo nin tunay na katalingkasan? (Sant. 1:25) Kun iyo, pakamahalon an katogonan na iyan, asin nungkang matentaran na abusohon an saindong Kristianong katalingkasan.—Basahon an 1 Pedro 2:16.

8. Anong aktuwal na mga halimbawa an nagpapahiling na an kaogmahan dai makukua sa pagbaliwala sa mga pamantayan ni Jehova?

⁸ An mga hoben partikularmente an target ni Satanas. Sarong brother na labing 30 anyos na ngonyan an nagsaysay dapit sa pagkatin-edyer nia: “Minansay ko an mga pamantayan ni Jehova sa moral bilang restriksion, bakong proteksion.” An resulta, nakakomiter sia nin seksuwal  na imoralidad. Alagad dai ini nakapaogma sa saiya. “Dakol na taon akong nakamate nin grabeng pagkakonsensia asin pagbasol,” an sabi nia. Sa paghorophorop sa pagkatin-edyer nia, nagsurat an sarong sister: “Pakakomiter nin imoralidad, an pagmate mo mamondoon ka asin daing halaga. Maski ngonyan pakalihis nin 19 taon, nagigirumdoman ko pa an maraot na mga pangyayari.” An saro pang sister nagsabi: “Grabe an epekto sa sakong isip, espirituwalidad, asin emosyon pag naiisip ko na dahel sa paggawe ko nakolgan kong gayo an mga tawong namomotan kong marhay. Masakiton mabuhay na mayo kan pag-oyon ni Jehova.” Habo ni Satanas na isipon mo an mga resultang iyan nin kasalan.

9. (a) Anong mga hapot an makakatabang sa sato sa pag-analisar kan satong pagmansay ki Jehova asin sa saiyang mga ley asin prinsipyo? (b) Taano ta mahalagang mamidbid na marhay an Dios?

⁹ Makamomondo na an dakol na hoben na Saksi—asin pati an dakol na mas maedad na—nag-agi pa nin kolog bago makanood na grabe an epekto kan pag-ogma sa kasalan! (Gal. 6:7, 8) Kaya hapoton an saimong sadiri: ‘Nasasabotan ko daw na an mga pakana ni Satanas talagang maringis na pandadaya? Minamansay ko daw si Jehova bilang pinakadayupot kong Katood, na pirmeng nagsasabi nin totoo asin an gusto iyo an pinakamarahay para sa sako? Talaga daw na kombensido ako na nungka niang ipapanguri sa sako an sarong bagay na talagang marahay asin matao sa sako nin pinakadakulang kaogmahan?’ (Basahon an Isaias 48:17, 18.) Tanganing odok sa pusong makasimbag nin iyo, bako sanang hababaw na kaaraman manongod ki Jehova an kaipuhan mo. Kaipuhan na mamidbid mo siang marhay asin masabotan na an mga ley asin prinsipyo sa Biblia nagpapabanaag kan pagkamoot nia sa saimo, bako kan kagustohan na kontrolon ka.—Sal. 25:14, NW.

 MAMIBI NA MAGKAIGWA NIN MADONONG ASIN MAKINUYOG NA PUSO

10. Taano ta dapat kitang magmaigot na arogon an hoben na si Hadeng Salomon?

¹⁰ Kan hoben pa si Salomon, sia mapakumbabang namibi: ‘Ako sadang pang aki; dai ako tataong magluwas minsan maglaog.’ Dangan namibi sia na magkaigwa nin madonong asin makinuyog na puso. (1 Ha. 3:7-9, 12) Sinimbag ni Jehova an sinserong kahagadan na iyan, asin siring man kaiyan an gigibohon nia sa saimo, hoben ka man o gurang. Siempre, dai ka tatawan ni Jehova nin milagrosong pakasabot asin kadonongan. Alagad gigibohon ka niang madonong kun ika maigot na mag-aadal kan saiyang Tataramon, mamimibi na logod tawan ka nin banal na espiritu, asin kun lubos mong aaprobetsaran an espirituwal na mga probisyon na itinatao paagi sa Kristianong kongregasyon. (Sant. 1:5) Sa katunayan, paagi kaini, ginigibo ni Jehova dawa an saiyang hoben na mga lingkod na magin mas madonong kisa sa gabos na nagbabaliwala kan saiyang hatol, pati sa inaapod na ‘madonong asin nakakasabot’ na mga tawo kan kinaban na ini.—Luc. 10:21; basahon an Salmo 119:98-100.

11-13. (a) Anong mahalagang mga leksion an manonodan niato sa Salmo 26:4, Talinhaga 13:20, asin 1 Corinto 15:33? (b) Paano nindo iaaplikar an mga prinsipyong iyan sa Kasuratan?

¹¹ Tanganing ipahiling an halaga nin pag-adal kan Biblia asin paghorophorop kan nababasa niato tanganing mamidbid na marhay si Jehova, isip-isipon an minasunod na mga teksto. An kada saro kaiyan igwa nin importanteng prinsipyo manongod sa pagpili niato nin kairiba: ‘Dai ako nagtukaw sa kaibahan nin mga tawong putikon; dai man ako luminaog sa kaibahan kan mga naggigibo nin hilom.’ (Sal. 26:4) ‘An nag-iibaiba sa mga madonong magigin madonong; an minasaro sa mga mangmang matutunaw.’ (Tal. 13:20) ‘An maraot na pag-iriba nakakaraot kan marahay na mga ugale.’—1 Cor. 15:33.

¹² Anong mahalagang mga leksion an manonodan niato sa mga tekstong iyan? (1) Gusto ni Jehova na magin mapamili kita sa satong kairiba. Gusto niang protektaran kita sa moral asin espirituwal. (2) An satong kairiba may marahay o maraot na impluwensia sa sato; iyan sarong malinaw na katunayan sa buhay. An mga tataramon sa mga teksto sa enotan nagpapahiling na gusto ni Jehova na aboton an satong puso. Paano man? Mangnoha na an mga tekstong iyan dai isinurat bilang mga reglamento, arog baga kan “dai ka mag. . . ” Imbes, iyan isinurat bilang malinaw na pagpahayag nin katotoohan. Garo man sana sinasabi sa sato ni Jehova: ‘Uya an mga katunayan. Ano an gigibohon nindo? Ano an nasa puso nindo?’

¹³ Ultimo, huling an tolong teksto isinurat bilang pundamental na mga katotoohan, iyan dai naluluma asin mahiwason an aplikasyon. Sa pag-ilustrar, hapoton an saimong sadiri: Paano ko malilikayan na makaasosyar an mga ‘naggigibo nin hilom’ o nagtatago kan saindang tunay na pagkatawo? Sa anong mga situwasyon daw posibleng makaibanan ko sinda? (Tal. 3:32; 6:12) Sairisay an ‘mga madonong’ na gusto ni Jehova na makaibaiba ko? Sairisay an ‘mga mangmang’ na gusto niang likayan ko? (Sal. 111:10; 112:1; Tal. 1:7) Anong ‘marahay na mga ugale’ an mararaot ko sa pagpili nin maraot na kairiba? Sa kinaban sana daw ako mapapaatubang sa maraot na kairiba? (2 Ped. 2:1-3) Paano mo sisimbagon an mga hapot na iyan?

14. Paano nindo mapapaoswag an kalidad kan saindong banggi nin Pampamilyang Pagsamba?

¹⁴ Pakatapos na mangatanosan basado sa mga tekstong iyan, taano ta dai siyasaton an iba pang teksto sa Biblia na naghahayag kan kaisipan nin Dios sa mga bagay-bagay na kalabot kamo o an saindong pamilya? * Mga magurang, puede nindong pag-olayan an siring na mga tema sa saindong banggi nin Pampamilyang Pagsamba. Mantang ginigibo iyan, girumdomon na an pasohan nindo iyo na tabangan an kada miembro kan pamilya na mas lubos na maapresyar an rarom kan pagkamoot nin Dios sa sato siring kan pagkahayag kaiyan  sa saiyang mga ley asin prinsipyo. (Sal. 119:72) Tunay nanggad, paagi sa siring na pag-adal an gabos na miembro kan pamilya nindo magigin mas harani ki Jehova asin sa lambang saro.

15. Paano nindo masasabing igwa kamo nin madonong asin makinuyog na puso?

¹⁵ Paano nindo masasabing igwa kamo nin madonong asin makinuyog na puso? An sarong paagi iyo an pagkomparar kan kaisipan nindo sa kaisipan kan iba pang mga maimbod kan suanoy, arog ni Hadeng David, na nagsurat: ‘An paggibo kan saimong kabotan, Dios ko, nakaoyon sa sakuya; asin an saimong togon uya sa laog nin sakuyang puso.’ (Sal. 40:8) Siring man, an kagsurat kan Salmo 119 nagsabi: ‘Kanigoan an pagkamoot ko sa saimong pagboot! Sa bilog na aldaw iyo iyan an sakuyang pinaghohorophorop.’ (Sal. 119:97) An siring na pagkamoot dai nagtatalubo sa hababaw na daga nin piguratibong puso. Imbes, resulta iyan nin hararom na pag-adal, pamimibi, paghorophorop, asin eksperyensia—mantang nahihiling nin saro sa buhay nia an dakol na bendisyon huli sa pagsunod sa mga pamantayan nin Dios.—Sal. 34:8.

IPAKIPAGLABAN AN SAINDONG KRISTIANONG KATALINGKASAN!

16. Ano an dapat niatong maaraman kun gusto niatong manggana sa pakikipaglaban para sa tunay na katalingkasan?

¹⁶ Sa bilog na kasaysayan, an mga nasyon madahas na nakikipaglaban para sa katalingkasan. Kun siring, lalo na nanggad na dapat na andam kamo sa espirituwal na pakikipaglaban para sa saindong Kristianong katalingkasan! Dapat man nindong maaraman na an kalaban nindo bako sanang si Satanas, an kinaban, asin an nakakahilong espiritu kaiyan. Kaipuhan man nindong paglabanan an saindong pagkabakong perpekto, pati an madayang puso. (Jer. 17:9; Efe. 2:3) Pero, sa tabang ni Jehova puede kamong manggana sa laban. Dugang pa, an kada kapangganahan—dakula man o sadit—magkakaigwa nin kisiera duwang positibong epekto. Enot, mapapagayagaya nindo an puso ni Jehova. (Tal. 27:11) Ikaduwa, mantang nananamitan nindo an nakakapatalingkas na kapangyarihan kan ‘sangkap na katogonan nin Dios, an katogonan nin libertad,’ magigin orog pa kamong determinadong magdanay sa ‘hayakpit na dalan’ pasiring sa buhay na daing katapusan. Pag-abot nin panahon, makakamtan nindo an mas mahiwas na katalingkasan na nakatagama sa mga maimbod ki Jehova.—Sant. 1:25; Mat. 7:13, 14.

17. Taano ta dai kita maninigong pangluyahan nin boot huli sa satong pagkabakong perpekto, asin anong tabang an itinatao ni Jehova?

¹⁷ Siempre, kun beses, kita gabos nasasala. (Par. 7:20) Kun mangyari iyan, dai mag-isip na mayo kamong halaga o madesganar nin labi-labi. Kun matumba kamo, sabi ngani, bumuhat asin umabante—dawa mangahulogan iyan nin paghagad nin tabang sa lokal na mga elder. Si Santiago nagsurat na an saindang ‘pamibi nin pagtubod maligtas sa naghehelang, asin babangonon sia nin Kagurangnan; asin kun sia nakaginibo nin mga kasalan, iyan ipapatawad sa saiya.’ (Sant. 5:15) Iyo, nungkang lingawan na an Dios totoong maheherakon asin na dinara nia kamo sa kongregasyon huli ta nahiling nia an saindong potensial. (Basahon an Salmo 103:8, 9.) Kaya kun magdadanay kamo na bilog an puso para ki Jehova, nungka nia kamong babayaan.—1 Cron. 28:9.

18. Paano kita makakahiro kaoyon kan pamibi ni Jesus sa Juan 17:15?

¹⁸ Mantang namimibi kan huri niang banggi kaiba kan saiyang 11 maimbod na apostol, sinabi ni Jesus an dai malilingawan na mga tataramon na ini para sa sainda: “Ilikay mo sinda sa maraot.” (Juan 17:15) Bako lang sa mga apostol nagmamakolog si Jesus, kundi pati sa gabos niang parasunod. Huli kaini, makakasierto kitang sisimbagon ni Jehova an pamibi ni Jesus paagi sa pagbantay sa sato sa delikadong mga panahon na ini. ‘Si Jehova an kalasag kan mga naglalakaw sa katanosan. Iniingatan nia an dalan kan saiyang mga banal.’ (Tal. 2:7, 8) Iyo, an dalan nin integridad may mga kadepisilan, alagad iyan an solamenteng dalan pasiring sa buhay na daing katapusan asin sa tunay na katalingkasan. (Roma 8:21) Dai pagtogotan an siisay man na akiton kamo parayo dian!

[Mga Nota sa Ibaba]

[Mga Hapot Para sa Pag-adal]

[Mga Ritrato sa pahina 14]

Paano niato mamimidbid an mga Absalom sa presenteng panahon asin paano kita makakalikay sa sainda?