Tinitipon ni Jehova an Saiyang Pamilya
Tinitipon ni Jehova an Saiyang Pamilya
‘Nakikimaherak ako sa saindo na atamanon an pagkasararo dian sa espiritu.’—EFE. 4:1, 3.
PAANO NINDO IPAPALIWANAG?
Ano an katuyohan kan administrasyon nin Dios?
Paano niato ‘aatamanon an pagkasararo dian sa espiritu’?
Ano an makakatabang sa sato na “magin maboot sa lambang saro”?
1, 2. Ano an katuyohan ni Jehova para sa daga asin sa katawohan?
PAMILYA. Ano an naiisip mo kun nadadangog mo an tataramon na iyan? Pagkamoot? Kaogmahan? Pagtarabangan na may sarong katuyohan? Sarong ligtas na lugar para sa pagdakula, pakanood, asin pagpahayag nin mga ideya? Posibleng marhay na arog kaiyan an naiisip mo kun miembro ka nin pamilyang may pagmakolog. Si Jehova mismo an Kagtugdas kan pamilya. (Efe. 3:14, 15) Katuyohan nia na an gabos na linalang nia sa langit asin sa daga magkaigwa nin katiwasayan, pagtitiwala sa lambang saro, asin tunay na pagkasararo.
2 Pagkatapos na magkasala an mga tawo, sinda bako nang kabtang kan unibersal na pamilya nin Dios, alagad an katuyohan ni Jehova dai naolang. Seseguradohon nia na an Paraisong daga mapapano kan mga aki ni Adan asin Eva. (Gen. 1:28; Isa. 45:18) Ginibo nia an gabos na areglo tanganing otobon an katuyohan na ini. Dakol sa mga areglong ini an mahihiling niato sa libro sa Biblia na Efeso, na an pagkasararo an pinakatema. Pag-olayan niato an nagkapira sa mga bersikulo sa librong iyan asin aramon kun paano kita makikipagtabangan sa katuyohan ni Jehova na pagsararoon an mga linalang nia.
AN ADMINISTRASYON ASIN AN GINIGIBO KAIYAN
3. Ano an administrasyon nin Dios na sinambit sa Efeso 1:10, asin kasuarin nagpoon an enot na kabtang kaiyan?
3 Sinabihan ni Moises an mga Israelita: “Si Jehova satuyang Dios, si Jehova saro sana.” (Deut. 6:4) An mga gibo asin katuyohan ni Jehova magkaoroyon. Huli kaini, sa pinakasagkodan kan itinalaan na “kapanahonan,” pinonan nin Dios an sarong ‘pag-andam,’ o administrasyon—an areglo tanganing pagsararoon an gabos na intelihenteng linalang nia. (Basahon an Efeso 1:8-10.) Gigibohon kan administrasyon na ini an katuyohan kaiyan sa duwang kabtang. Sa enot na kabtang, iinaandam an kongregasyon nin mga linahidan para sa buhay sa langit sa pangengenot ni Jesu-Cristo bilang an espirituwal na Payo ninda. An kabtang na ini nagpoon kan Pentecostes 33 C.E. kan ponan ni Jehova na tiponon an mga mamamahala kaiba ni Cristo sa langit. (Gui. 2:1-4) Huling an mga linahidan ipinahayag na matanos para sa buhay basado sa atang na pantubos ni Cristo, aram nindang inampon sinda bilang ‘mga aki nin Dios.’—Roma 3:23, 24; 5:1; 8:15-17.
4, 5. Ano an ikaduwang kabtang kan administrasyon?
4 Sa ikaduwang kabtang, iinaandam an mga maistar sa Paraiso digdi sa daga na pamamahalaan kan Mesiyanikong Kahadean ni Cristo. An “dakulang kadaklan” an minakompuesto sa enot na mga maistar sa Paraiso. (Kap. 7:9, 13-17; 21:1-5) Durante kan Sangribong Taon na Paghade, makakaibanan ninda an binilyon na bubuhayon liwat. (Kap. 20:12, 13) Imahinaron nanggad kun paanong paagi sa pagkabuhay liwat orog pang mahihiling an satong pagkasararo! Sa katapusan kan sangribong taon, an ‘mga bagay na nasa daga’ maagi sa pangultimong pagbalo. An mga mapapatunayan na maimbod aamponon bilang daganon na ‘mga aki nin Dios.’—Roma 8:21; Kap. 20:7, 8.
5 Nagpapadagos ngonyan an duwang kabtang kan administrasyon nin Dios—an langitnon sagkod daganon. Alagad bilang mga indibiduwal, paano kita makikipagtabangan ngonyan sa administrasyon nin Dios?
‘ATAMANON AN PAGKASARARO DIAN SA ESPIRITU’
6. Paano ipinapahiling kan Kasuratan na dapat makiasosyar an mga Kristiano sa lambang saro?
6 Sinasabi kan Kasuratan na an mga Kristiano dapat na aktuwal na magtorotiripon. (1 Cor. 14:23; Heb. 10:24, 25) Kalabot dian bako sana an basta pagtagama nin panahon na iriba sa sarong lugar, arog kan ginigibo nin mga tawong nagduduman sa saodan o sa sarong istadyum sa isport. Labi pa dian an tunay na pagkasararo. Makakamtan niato an siring na pagkasararo kun iaaplikar ta an mga instruksion ni Jehova asin magpapamolde kita sa banal na espiritu nin Dios.
7. Ano an boot sabihon kan ‘atamanon an pagkasararo dian sa espiritu’?
7 Minsan ngani ipinahayag ni Jehova na matanos an mga linahidan bilang mga aki nia asin an ibang mga karnero bilang mga katood nia basado sa atang na pantubos ni Cristo, an personal na dai pagkakaoroyon malataw mantang kita nabubuhay sa sistemang ini nin mga bagay. (Roma 5:9; Sant. 2:23) Ta kun dai, dai na kaipuhan pa an ipinasabong na sadol na padagos kitang ‘magtiniriostiosan.’ Paano kita magigin kasaro kan mga kapagtubod? Kaipuhan niatong magkaigwa nin “bilog na kapakumbabaan asin kahoyoan.” Dugang pa, sinasadol kita ni Pablo na maigot na hingoahon na ‘atamanon an pagkasararo dian sa espiritu sa [bogkos] nin katoninongan.’ (Basahon an Efeso 4:1-3.) Kalabot sa pag-aplikar sa konsehong ini an pagpagiya sa espiritu nin Dios asin pagpatabang dian na ikapahiling niato an bunga kaiyan. Rineresolberan kan bungang iyan an mga dai pagkasinabotan nin mga indibiduwal; sa kabaliktaran, an mga gibo nin laman pirmeng nakakapabanga.
8. Sa anong paagi minaresulta sa dai pagkasararo an mga gibo nin laman?
8 Mangnohon kun paano ‘an mga gibo nin laman’ minaresulta sa dai pagkasararo. (Basahon an Galacia 5:19-21.) Huli sa pakikisaro napapasuhay ki Jehova asin sa kongregasyon an naggigibo kaiyan, asin huli sa pagsambay puedeng daing herak na ikasuway an mga aki sa mga magurang saka an inosenteng mga agom sa saindang agom. An karompotan o pagkamaati nakakaapektar sa pagkakasaro nin tawo sa Dios asin sa mga namomoot sa saiya. Kun gusto mong pagdukoton an duwang bagay, dapat parehong malinig iyan tanganing magdukotan iyan nin tama. An daing pakundangan na paggawe nagpapahiling nin biyong pagbasangbasang sa matanos na mga ley nin Dios. Pinagsusuruway kan iba pang mga gibo nin laman an mga tawo sa lambang saro asin sa Dios. An siring na paggawe biyong bakong kaoyon kan personalidad ni Jehova.
9. Paano niato sisiyasaton an satong sadiri kun baga ‘maigot na inaataman niato an pagkasararo dian sa espiritu’?
9 Kaya, kaipuhan na hapoton kan kada saro sa sato an saiyang sadiri: ‘Gurano daw ako kaigot sa paghihingoa na “atamanon an pagkasararo dian sa espiritu sa [bogkos] nin katoninongan”? Ano an reaksion ko kun minalataw an mga problema? Iineestorya ko daw sa dakol na tawo an sakong mga hinanakit, na naglalaom na makakakua nin suporta sa nagkapirang katood? Inaasahan ko daw na bahala na an mga elder na mag-asikaso kaiyan para sa sako imbes na maghingoa nanggad akong ibalik sa dati an matoninong na relasyon? Linilikayan ko daw an iba tanganing dai ninda magirumdoman an ano man na kolog nin boot ninda sa sako, na tibaad sineseguradong magkarayo kami?’ Ipinapahiling daw kan siring na gawe-gawe na naghihiro kita kaoyon kan katuyohan ni Jehova na tiponon giraray ki Cristo an gabos na bagay?
10, 11. (a) Gurano kaimportante an pakikipagkatoninongan sa satong mga tugang? (b) Ano an makakatabang sa pagkaigwa nin katoninongan asin espirituwal na kaginhawahan?
10 Si Jesus nagsabi: ‘Kaya kun ika nag-aatang sa altar asin dian marumdoman mo na an saimong tugang igwa nin ano man tumang sa saimo, bayaan mo an atang dian sa atubang nin altar, asin paduman ka, makipag-ulian ka nguna sa saimong tugang dangan padigdi ka, idolot mo an saimong atang. Makipag-ulian ka nin madali.’ (Mat. 5:23-25) Si Santiago nagsurat na ‘an bunga nin katanosan itinatanom sa katoninongan manongod sa mga naggigibo nin katoninongan.’ (Sant. 3:17, 18) Sa siring, dai niato mapagdadanay an matanos na paggawe kun mayo nin katoninongan.
11 Sa pag-ilustrar, kinakarkulo na sa mga nasyon na dinestroso nin giera, 35 porsiento pang daga an puedeng kultibaron kun an mga nag-iistar dai na kaipuhan maghadit dapit sa pagkaigwa nin nakatalbong na mga bomba. Kun magputok an sarong bomba, an kaomahan binabayaan kan mga paraoma, nawawaran nin hanap-buhay an mga nasa baryo, asin nagkukulang nin suplay nin kakanon sa mga siudad. Kaagid kaiyan, maoolang an pagtalubo niato sa espirituwal kun igwa kita nin personal na mga ugale na makakaraot kan katoninongan sa satong mga tugang. Alagad paagi sa pagigin madaling magpatawad asin sa paggibo para sa ikakarahay nin iba, nakakatabang kita na magkaigwa nin tunay na kaginhawahan.
12. Paano kita matatabangan kan mga elder na magkasararo?
12 Apuera kaini, an “balaog” na mga lalaki puedeng makatabang na marhay sa pagkasararo. Itinao sinda tanganing tabangan kitang “makaabot sa pagkasararo sa pagtubod.” (Efe. 4:8, 13) Kun an mga elder kaiba niato sa sagradong paglilingkod asin nagtatao nin konsehong basado sa Tataramon nin Dios, tinatabangan ninda kitang umoswag sa pagsulot kan bagong personalidad. (Efe. 4:22-24) Nahihiling mo daw sa konseho ninda an mga paghihingoa ni Jehova na andamon ka sa buhay sa bagong kinaban sa pamamahala kan saiyang Aki? Kamong mga elder, hinihingoa daw nindong pakarhayon giraray an iba mantang nasa isip an obhetong iyan?—Gal. 6:1.
“MAGIN MABOOT SA LAMBANG SARO”
13. Ano an magigin resulta kun dai niato hihimateon an konseho sa Efeso 4:25-32?
13 Sinambit sa Efeso 4:25-29 an mga gawe-gawe na maninigo niatong likayan. Kaiba digdi an pagputik, pagigin aranggoton o hugakon, asin pagsabi nin maraot na mga tataramon imbes na marahay saka nakakapakosog. Kun dai hihimateon nin saro an konsehong ini, mapapamondo nia an espiritu nin Dios, huli ta an banal na espiritu sarong puersa na nagpapaoswag sa pagkasararo. (Efe. 4:30) An pag-aplikar kan sunod na isinurat ni Pablo mahalagang marhay man sa katoninongan asin pagkasararo: ‘An gabos na kapaitan, asin kaanggotan, asin kaongisan, asin karibokan, patin rilibakan magkaharale sa saindo, sagkod kan gabos na karatan. Asin magpahererakherakan kamo [“magin maboot sa lambang saro,” NW], mga mamomoton, na magpatarawadtawadan kamo, siring na an Dios man nagpatawad saindo dian ki Cristo.’—Efe. 4:31, 32.
14. (a) Ano an isinusuherir kan mga tataramon na “magin maboot”? (b) Ano an makakatabang sa sato na magin maboot?
14 An mga tataramon na “magin maboot” nagsusuherir na minsan paano tibaad bako kitang maboot sa ibang paagi asin tibaad may kaipuhan pa kitang paoswagon. Angay nanggad na sanayon niato an satong sadiri na isipon nguna an pagmate nin iba bago an sa sato! (Fil. 2:4) Tibaad may naiisip kitang sabihon na puedeng makapangisi o magparisa na kita intelihente, alagad kabootan daw iyan? Kun patienot niatong pag-iisipan ini, matatabangan kita na “magin maboot.”
MAKANOOD NIN PAGKAMOOT ASIN PAGGALANG SA LAOG NIN PAMILYA
15. Anong aspekto kan pagtratar ni Cristo sa kongregasyon an pinanonongdan ni Pablo sa Efeso 5:28?
15 An relasyon ni Cristo sa kongregasyon ikinokomparar kan Biblia sa relasyon kan agom na lalaki sa agom nia. Maninigo na tolos kaining itadom sa isip niato an pagdirehir na dapat gibohon nin agom na lalaki asin an pagkamoot saka pag-asikaso na kaipuhan niang ipahiling—pati na an pagpasakop na dapat ipahiling kan agom na babae—sa relasyon ninda bilang mag-agom. (Efe. 5:22-33) Kan nagsurat si Pablo: ‘Siring man an mga agom na lalaki maninigong mamoot sa saindang sadiring mga agom na babae siring sa saindang sadiring mga hawak,’ ano an boot niang sabihon kan “siring man”? (Efe. 5:28) An naenot niang mga tataramon nagdadara kan atension niato sa ‘pagkamoot ni Cristo sa kongregasyon, na nag-atang kan saiya man sana dahel kaiyan, na linilinigan iyan sa paghugas sa tubig paagi sa tataramon.’ Iyo, tanganing makipagtabangan sa katuyohan ni Jehova na tiponon giraray ki Cristo an gabos na bagay, dapat na magin alisto an agom na lalaki na pakakanon sa espirituwal an saiyang pamilya.
16. Ano an resulta kun inootob kan mga magurang an sono sa Kasuratan na mga paninimbagan ninda sa pamilya?
16 Maninigong girumdomon kan mga magurang na may responsabilidad sinda hale ki Jehova. Makamomondo, sa kinaban ngonyan, dakol an “dai nin pagkamoot.” (2 Tim. 3:1, 3) Linilikayan nin dakol na ama an mga paninimbagan ninda—na ikinakadesganar asin ikinakapahamak kan saindang mga aki. Alagad nagkonseho si Pablo sa Kristianong mga ama: ‘Dai nindo pagpaanggoton an saindong mga aki kundi padakulaon sinda sa pagsagwe asin sa hatol nin Kagurangnan.’ (Efe. 6:4) Sa pamilya enot na nanonodan kan mga aki an manongod sa pagkamoot asin paggalang sa autoridad. An mga magurang na mapangganang nagtokdo kan mga bagay na ini nakipagtabangan sa administrasyon ni Jehova. Kun an satong harong gigibohon niatong lugar nin pagkamoot kun saen hinahale niato an gabos na kaanggotan asin pagkaongis saka mapanglibak na pagtaram, tinotokdoan ta an satong mga aki nin mahalagang mga leksion manongod sa pagpahiling nin pagkamoot asin paggalang sa autoridad. Aandamon sinda kaini sa buhay sa bagong kinaban nin Dios.
17. Ano an kaipuhan tanganing malabanan niato an Diablo?
17 Mantang an Diablo an enot na nagraot kan katoninongan sa uniberso, kaipuhan niatong maaraman na makosog niang kokontrahon an satong mga paghihingoang gibohon an kabotan nin Dios. Daing duda na nangyayari an mga katuyohan ni Satanas huli sa pagdakol nin mga nagdidiborsio, pagsasaro imbes na magpakasal, asin pagkonsinte sa pagpakasal nin mga homoseksuwal. Dai niato inaarog an gawe-gawe o kaisipan na nauuso sa kinaban ngonyan. Si Cristo an arogan niato. (Efe. 4:17-21) Kaya, sinasadol kita na ‘isulot an bilog na pangalasag hale sa Dios’ tanganing mapangganang malabanan an Diablo asin an saiyang mga demonyo.—Basahon an Efeso 6:10-13.
PADAGOS NA ‘MAGLAKAW SA PAGKAMOOT’
18. Ano an liabe sa satong Kristianong pagkasararo?
18 An tunay na liabe sa satong Kristianong pagkasararo iyo an pagkamoot. Huling an satong puso pano nin pagkamoot sa “sarong Kagurangnan” niato, sa “sarong Dios” niato, asin sa lambang saro, determinado kitang ‘atamanon an pagkasararo dian sa espiritu sa [bogkos] nin katoninongan.’ (Efe. 4:3-6) Namibi si Jesus dapit sa siring na pagkamoot: ‘Bako sanang manongod kan mga ini ako nakikimaherak, kundi kaidto man na mga nagtuturubod sa sako huli kan saindang tataramon; na sinda gabos magin saro; siring Ama, na ika nasa sako, asin ako sa saimo, na sinda man mapasato. Asin ipinamidbid ko sa sainda an saimong ngaran, asin ipapamidbid ko iyan; tanganing an pagkamoot mo sa sako mapasainda, asin ako sa sainda.’—Juan 17:20, 21, 26.
19. Ano an determinado mong gibohon?
19 Kun may linalabanan kitang kaluyahan huli sa satong pagkabakong perpekto, logod mapahiro kita nin pagkamoot na mamibi arog kan ginibo kan salmista: ‘Parigona an sakong puso tanganing matakot sa saimong ngaran.’ (Sal. 86:11) Magin determinado kitang labanan an mga paghihingoa kan Diablo na irayo kita sa satong mamomoton na Ama asin sa mga tugang niato. Magmaigot na ‘magin mga paraarog sa Dios, siring sa mga aking namomotan; asin maglakaw sa pagkamoot’—sa pamilya, sa satong ministeryo, asin sa kongregasyon.—Efe. 5:1, 2.
[Mga Hapot Para sa Pag-adal]
[Ritrato sa pahina 29]
Babayaan nia nguna an saiyang atang sa altar tanganing makipag-ulian sa saiyang tugang
[Ritrato sa pahina 31]
Mga magurang, tokdoan an saindong mga aki na magpahiling nin paggalang
