“Ako Danay na Nasa Saindo”
“Ako Danay na Nasa Saindo”
“Dakol an magririlibot, asin magigin abunda an tunay na kaaraman.”—DAN. 12:4, NW.
ANO AN ISISIMBAG NINDO?
Paano ihinahayag sa presenteng panahon “an tunay na kaaraman”?
Paano ‘duminakol’ an mga nag-aako kan katotoohan?
Sa anong mga paagi nagigin “abunda” an tamang kaaraman?
1, 2. (a) Paano niato naaraman na si Jesus kaibanan kan mga sakop nia ngonyan asin makakaibanan ninda sa maabot na panahon? (b) Oyon sa Daniel 12:4, ano an magigin resulta kan maingat na pag-adal kan Kasuratan?
IMAHINARON na nasa Paraiso ka na. Pagmata mo kada aga, an pagmate mo nakapahingalo ka asin gustong-gusto mong ponan an mga gibohon mo sa aldaw na iyan. Mayo kang namamatean na kolog. Mayo na an ano man na dati mong kamatean. Perpekto na an saimong paghiling, pandangog, pamarong, pangmate, asin pangnamit. Makosog ka, maogma sa trabaho, dakol an mga katood, asin mayo na an gabos na ikinakahadit mo. Siring kaiyan an mga bendisyon na maeeksperyensiahan mo sa pamamahala kan Kahadean nin Dios. Bebendisyonan ni Cristo Jesus, na nombradong Hade, an saiyang mga sakop asin itotokdo nia sa sainda an kaaraman dapit ki Jehova.
2 Si Jehova makakaibanan kan maimbod na mga lingkod nia mantang nakikikabtang sinda sa maabot na pangglobong pagtotokdo. An Dios asin an saiyang Aki dakol na siglo nang kaibanan nin mga maimbod. Bago magsakat sa langit si Jesus, sinierto nia sa maimbod na mga disipulo nia na sia makakaibanan ninda. (Basahon an Mateo 28:19, 20.) Tanganing mapakosog an pagtubod niato sa pagsiertong ini, siyasaton niato an saro sanang sentence kan ipinasabong nin Dios na hula na isinurat sa suanoy na Babilonya labing 2,500 na taon na an nakaagi. Mapadapit “sa panahon kan katapusan” na kinabubuhayan niato, an propetang si Daniel nagsurat: “Dakol an magririlibot, asin magigin abunda an tunay na kaaraman.” (Dan. 12:4, NW) Kun mamansayon sa piguratibong paagi asin kaoyon kan mga katunayan sa satong panahon, an Hebreong termino digdi na trinadusir na “magririlibot” nangangahulogan nin maingat na pagsiyasat. Marahayon nanggad na mga bendisyon an magigin resulta kan siring na pagsiyasat! An mga maingat na nag-aadal kan Kasuratan bebendisyonan nin tunay o tamang kaaraman sa Tataramon nin Dios. Sinasabi man kan hula na dakol an maako kan “tunay na kaaraman.” Dugang pa, an siring na kaaraman magigin abunda. Iyan mahiwas na ipapalakop asin madaling makukua. Mantang sinisiyasat niato kun paano naootob an hulang ini, maaaraman niato na kaibanan si Jesus kan mga disipulo nia ngonyan asin na si Jehova lubos na may kakayahan na otobon an gabos na ipinanuga nia.
NAKUKUA “AN TUNAY NA KAARAMAN”
3. Ano an nangyari sa “tunay na kaaraman” pagkagadan kan mga apostol?
3 Pagkagadan kan mga apostol, naglataw an ihinulang apostasiya sa tunay na Kristianismo asin naglakop iyan na garo kalayo. (Gui. 20:28-30; 2 Tes. 2:1-3) Sa laog nin dakol na siglo pagkatapos kaiyan, “an tunay na kaaraman” bako nanggad abunda sa mga mayong aram sa Biblia asin pati sa mga naghihingakong Kristiano. Minsan ngani naghihingakong nagtutubod sa Kasuratan, an mga lider nin Kakristianohan nagtotokdo nin mga kaputikan sa relihion—‘mga katokdoan nin mga demonyo’ na dai nagtataong onra sa Dios. (1 Tim. 4:1) Sa pangkagabsan an mga tawo nagdanay na mayong aram sa espirituwal. Kaiba sa apostatang mga doktrina an falsong katokdoan na an Dios Trinidad, na an kalag dai nagagadan, asin na may mga kalag na pinapasakitan nin daing sagkod sa kalayo sa impierno.
4. Paano nagpoon na maghanap kan “tunay na kaaraman” an sadit na grupo nin mga Kristiano kan dekada nin 1870?
4 Minsan siring, kan dekada nin 1870—mga apat na dekada bago nagpoon an ‘huring mga aldaw’—sarong sadit na grupo nin sinserong mga Kristiano sa Pennsylvania, E.U.A., an nagtiripon tanganing maigot na pag-adalan an Biblia asin hanapon an “tunay na kaaraman.” (2 Tim. 3:1) Inapod ninda an saindang sadiri na mga Estudyante sa Biblia. Bako sinda an sinabi ni Jesus na ‘mga madonong asin may pakasabot’ na dai makakakua nin kaaraman. (Mat. 11:25) Sinda mapakumbabang mga tawo na sinserong nagmamawot na gibohon an kabotan nin Dios. Maingat asin mapagngayongayo nindang binabasa, pinag-oolayan, asin hinohorophorop an Kasuratan. Pinagkokomparar man ninda an mga teksto sa Biblia asin pinag-aadalan an mga isinurat nin iba na nagsiyasat man arog ninda. An mga katotoohan na dakol na siglo nang dai aram luway-luway na nabatid kan mga Estudyante sa Biblia na ini.
5. Ano an katuyohan kan serye nin mga tract na inaapod na The Old Theology?
5 Minsan ngani ogmahon an mga Estudyante sa Biblia sa mga bagay na nanonodan ninda, dai sinda nagin orgolyoso huli kaiyan; ni naghingako man sinda na bagong bagay an ibinabalangibog ninda. (1 Cor. 8:1) Imbes, nagpublikar sinda nin sarong serye nin mga tract na inaapod na The Old Theology. An katuyohan iyo na tabangan an mga parabasa na magin pamilyar sa sono sa Kasuratan na mga katotoohan na nasa Biblia. An enot sa mga tract na ini nagtao nin “dugang pang impormasyon tanganing makatabang sa pag-adal sa Biblia, sa katuyohan na haleon an gabos na falsong tradisyon nin mga tawo asin lubos na ikabalik an daan na teolohiya kan satong Kagurangnan saka kan mga apostol.”—The Old Theology, No. 1. Abril 1889, p. 32.
6, 7. (a) Poon kan dekada nin 1870 tinabangan kita na masabotan an anong mga katotoohan? (b) Anong mga katotoohan an partikularmenteng naapresyar mong manodan?
6 Kadakol nanggad na makangangalas na katotoohan an nanodan poon kaidtong labing 100 na taon na an nakaagi! * An mga katotoohan na ini bakong nakakasawa asin bakong mga teoriya sana na pinagdedebatehan kan mga teologo. Iyan mga katotoohan na nakakapukaw sa boot asin nakakapatalingkas, na nagtataong kahulogan sa satong buhay asin may darang kaogmahan saka paglaom. Tinatabangan kita kaiyan na mamidbid si Jehova kaiba na an saiyang mamomoton na personalidad asin masabotan an mga katuyohan nia. Linilinaw man kaiyan an papel ni Jesus, ipinapaliwanag kun taano ta sia nabuhay saka nagadan, asin itinotokdo kun ano an ginigibo nia ngonyan. Ihinahayag kan mahalagang mga katotoohan na ini kun taano ta tinotogotan nin Dios an karatan, taano ta nagagadan kita, paano kita mamimibi, asin paano kita magigin tunay na maogma.
7 Masasabotan na niato ngonyan an kahulogan kan mga hula na haloyon na panahon nang nagdanay na “hilom” alagad naootob na ngonyan sa panahon na ini kan katapusan. (Dan. 12:9, NW) Kaiba digdi an mga nasa bilog na Kasuratan, nangorogna sa mga Ebanghelyo asin sa libro nin Kapahayagan. Tinatabangan pa ngani kita ni Jehova na masabotan an mga pangyayari na dai kayang mahiling kan mga mata niato—an pagpatukaw ki Jesus sa trono, an giera sa langit, asin an pag-apon ki Satanas digdi sa daga. (Kap. 12:7-12) Tinawan man kita nin Dios nin pakasabot sa kahulogan kan nahihiling niato—mga giera, linog, peste, kakulangan nin kakanon, asin mga tawong bakong diosnon na nakakakontribwir sa ‘mga panahon na makahahandal.’—2 Tim. 3:1-5; Luc. 21:10, 11.
8. Kiisay niato itinatao an onra huli sa mga bagay na nahiling asin nadangog niato?
8 Madali sana para sa sato na mamatean an sinabi ni Jesus sa mga disipulo nia: ‘Paladan [“maogma,” NW] an mga mata na nakahiling kan mga nahihiling nindo. Huli ta ako nagsasabi saindo, na dakol an mga propeta asin mga hade na nagmarawot na makahiling kan mga nahihiling nindo, asin dai ninda nagkahiriling; asin makadangog kan mga nadadangog nindo, asin dai ninda nagkadarangog.’ (Luc. 10:23, 24) Itinatao niato an onra ki Jehova Dios huling tinabangan nia kita na mahiling asin madangog an siring na mga bagay. Asin nagpapasalamat nanggad kita na ‘an pararanga’ o paratabang, an banal na espiritu nin Dios, isinugo tanganing giyahan an mga parasunod ni Jesus “sa gabos na katotoohan”! (Basahon an Juan 16:7, 13.) Logod na pirme niatong pakamahalon an “tunay na kaaraman” asin daing kaimotan na ipaabot iyan sa iba!
“DAKOL” AN NAG-AAKO KAN “TUNAY NA KAARAMAN”
9. Anong pangapodan an nasa isyu kan magasin na ini na Abril 1881?
9 Kan Abril 1881, mayo pang duwang taon pagkapublikar kan enot na isyu kan Watch Tower, may pangapodan sa magasin na ini para sa 1,000 parahulit. Mababasa sa artikulo: “Sa mga nasa kamugtakan na makatao nin kabanga o labi pa kan panahon ninda nin eksklusibo para sa gibohon kan Kagurangnan, igwa kaming planong isuherir . . . , an boot sabihon: Na pumaduman kamo sa darakula o saradit na siudad, segun sa kakayahan nindo, bilang mga Colporteur o Ebanghelisador, hanapon sa kada lugar an sinserong mga Kristiano, na dakol sa sainda an igwa nin kaigotan para sa Dios, alagad bakong oyon sa kaaraman; sa mga ini hingoahon na ipaisi an abundang biyaya kan Satong Ama, asin an kagayonan kan Saiyang tataramon.”
10. Ano an nagin reaksion nin mga tawo sa pangapodan para sa bilog na panahon na mga parahulit?
10 An pangapodan na iyan nagpapahiling na aram kan Mga Estudyante sa Biblia na an sarong mahalagang marhay na gibohon kan tunay na mga Kristiano iyo an paghulit kan maogmang bareta. Alagad an pangapodan para sa 1,000 bilog na panahon na parahulit garo baga sobra kisa sa dapat na asahan, huling pirang gatos sana an nag-aatender sa mga pagtiripon kan Mga Estudyante sa Biblia kan panahon na idto. Minsan siring, pagkabasa nin tract o magasin, narealisar nin dakol na tawo an katotoohan asin naghimate tolos sa pangapodan. Halimbawa, pagkabasa nin isyu kan Watch Tower asin buklet na ipinublikar kan Mga Estudyante sa Biblia, kan 1882 sarong parabasa sa Londres, Inglatera an nagsurat: “Tabi tokdoan nindo ako kun paano maghuhulit asin kun ano an ihuhulit tanganing maotob ko an sagradong gibohon na mawot nin Dios na mahaman.”
11, 12. (a) Ano an katuyohan niato na kapareho kan sa mga colporteur? (b) Paano nag-establisar nin mga “klase,” o kongregasyon, an mga colporteur?
11 Kan 1885, mga 300 na Estudyante sa Biblia an naglilingkod bilang colporteur. An bilog na panahon na mga ministrong idto igwa nin katuyohan na kapareho kan sa sato ngonyan—an paggibo nin mga disipulo ni Jesu-Cristo. Minsan siring, an mga pamamaagi ninda laen kan sa sato. Ngonyan, parateng saro sana an tinotokdoan niato kada magkondukta kita nin pag-adal sa Biblia. Dangan iniimbitaran niato an tinotokdoan sa Biblia na makiasosyar sa kongregasyon na establisado na. Kaidto, an mga colporteur nagpapasakamot nin mga libro dangan tinitiripon ninda an mga interesado tanganing pag-adalan an Kasuratan bilang grupo. Imbes na magtokdo sa kada indibiduwal, nag-establisar sinda nin mga “klase,” o kongregasyon.
12 Halimbawa, kan 1907, an sarong grupo nin mga colporteur nagduman sa sarong siudad tanganing hanapon an mga igwa nang kopya kan Millennial Dawn (na inaapod man na Studies in the Scriptures). An Watch Tower nagsabi: “Tinitipon an mga ini [an mga interesado] sa sadit na pagtiripon sa harong kan saro sa sainda. Ipinapakipag-olay sa sainda kan Colporteur an “Divine Plan of the Ages” sa bilog na aldaw nin Domingo, asin sa sunod na Domingo dinadagka nia sinda na magkaigwa nin regular na mga pagtiripon.” Kan 1911, an mga brother may ginibong kadikit na pagliliwat sa pamamaaging ini. Singkuenta y otsong espesyal na nagbibiaheng ministro an nagtatao nin pampublikong mga pahayag sa bilog na Estados Unidos asin Canada. Kinukua kan mga brother na ini an mga ngaran asin adres kan mga interesado na nag-atender sa mga pahayag asin inoorganisar sinda na magtiripon sa pribadong mga harong tanganing bumilog nin bagong mga “klase.” Kan 1914, igwa nang 1,200 na kongregasyon nin Mga Estudyante sa Biblia sa bilog na kinaban.
13. Ano an hinahangaan nindo sa hiwas kan “tunay na kaaraman” ngonyan?
13 Ngonyan, may mga 109,400 na kongregasyon sa bilog na kinaban, asin may mga 895,800 na payunir. Haros walong milyon na ngonyan an nag-aako kan “tunay na kaaraman,” na iinaaplikar iyan sa saindang buhay. (Basahon an Isaias 60:22.) * Ini nangorognang kahangahanga, huling ihinula ni Jesus na an mga disipulo nia ‘ikakaongis kan gabos na tawo’ huli sa saiyang ngaran. Sinabi pa nia na an mga parasunod nia pepersegiron, ibibilanggo, asin gagadanon pa ngani. (Luc. 21:12-17) Sa ibong kan pagkontra ni Satanas, kan saiyang mga demonyo, asin kan mga tawong paratumang, an banwaan ni Jehova igwa nin pambihirang kapangganahan sa pag-otob kan sugo sa sainda na gumibo nin mga disipulo. Ngonyan, naghuhulit sinda “sa bilog na kinaban,” sa mga kadlagan sa tropiko sagkod sa malipoton saka daing kahoy na kapatagan o tundra, sa kabukidan, sa mga desierto, sa mga siudad, asin sa pinakahararayong probinsia. (Mat. 24:14) Nungka ining magigibo kun mayong pagsuportar nin Dios.
“AN TUNAY NA KAARAMAN” NAGIGIN “ABUNDA”
14. Paanong “an tunay na kaaraman” naglalakop na marhay paagi sa inimprentang mga babasahon?
14 Nagigin abunda “an tunay na kaaraman” paagi sa dakol na nagbabalangibog kan maogmang bareta. Nagigin abunda man iyan paagi sa inimprentang mga babasahon. Kan Hulyo 1879, ipinublikar kan Mga Estudyante sa Biblia an enot na isyu kan magasin na ini, na may titulong Zion’s Watch Tower and Herald of Christ’s Presence. An isyung iyan, na inimprenta nin komersial na kompanya, may 6,000 na kopya sa Ingles sana. An 27 anyos na si Charles Taze Russell an napiling editor, kaiba an lima pang maygurang na Estudyante sa Biblia bilang regular na parasurat nin artikulo. Ipinupublikar ngonyan an Watchtower sa 195 lenguahe. An magasin na iyan an may pinakamahiwas na sirkulasyon sa daga, na may 42,182,000 na kopya kada isyu. Panduwa an kapadis kaiyan na magasin na Awake!, na may sirkulasyon na 41,042,000 sa 84 lenguahe. Apuera dian, mga 100 na milyon na libro asin Biblia an iniimprenta kada taon.
15. Saen hale an pondo para sa pag-imprenta niato?
15 An pondo para sa dakulang gibohon na ini minagikan sa boluntad na mga donasyon. (Basahon an Mateo 10:8.) Pinagngangalasan iyan kan mga nasa industriya nin pag-imprenta na nakakaaram kan presyo kan makinang pang-imprenta, papel, tinta, asin iba pang materyales. Sarong brother na nagbabakal nin materyales para sa mga imprentahan kan Bethel an nagsabi: “Kun [sinda] nagbibisita sa satong mga imprentahan, sinda nagngangalas na puedeng suportaran nin boluntad na mga donasyon an pasilidad na siring kamoderno an teknolohiya asin may halangkaw na produksion. Napapahanga man sinda na an mga nagtatrabaho sa Bethel hoben pa asin maogmahon.”
AN DAGA MAPAPANO NIN KAARAMAN DAPIT SA DIOS
16. Ano an katuyohan kan paghayag kan “tunay na kaaraman”?
16 Nagin abunda “an tunay na kaaraman” huli sa marahay na katuyohan. Kabotan nin Dios na ‘an gabos na [klase nin] tawo makaligtas asin makaabot sa pakasabot kan katotoohan.’ (1 Tim. 2:3, 4) Gusto ni Jehova na maaraman kan mga tawo an katotoohan tanganing sinda makasamba sa saiya sa tamang paagi asin mag-ako kan saiyang bendisyon. Paagi sa paghayag kan “tunay na kaaraman,” tinitipon ni Jehova an maimbod na natatada kan linahidan na mga Kristiano. Hale sa ‘gabos na nasyon, asin sa gabos na tribo asin banwaan patin tataramon,’ tinitipon man nia an “sarong dakulang kadaklan,” na igwa nin paglaom na mabuhay nin daing sagkod sa daga.—Kap. 7:9.
17. Ano an ipinapahiling kan paghiwas kan tunay na pagsamba?
17 An paghiwas kan tunay na pagsamba sa nakaaging 130 taon malinaw na nagpapahiling na an Dios asin an saiyang nombradong Hade, si Jesu-Cristo, kaibanan kan mga lingkod ni Jehova sa daga—na ginigiyahan, pinoprotektaran, inoorganisar, asin tinotokdoan sinda. Idinodoon man kan pagdakol ninda na siertong maootob sa maabot na panahon an mga panuga ni Jehova. ‘An daga mapapano kan pakamidbid ki Jehova, siring kan pakatahob sa dagat kan katubigan.’ (Isa. 11:9) Kanigoan na mga bendisyon an maeeksperyensiahan kan katawohan sa panahon na iyan!
[Mga Nota sa Ibaba]
^ par. 6 Makikinabang kamo sa pagdalan kan mga presentasyon sa DVD na Jehovah’s Witnesses—Faith in Action, Part 1: Out of Darkness asin Jehovah’s Witnesses—Faith in Action, Part 2: Let the Light Shine.
^ par. 13 Hilingon an Isaiah’s Prophecy—Light for All Mankind II, pahina 320.
[Mga Hapot Para sa Pag-adal]
[Ritrato sa pahina 6]
An enot na mga Estudyante sa Biblia mapakumbabang mga tawo na sinserong nagmamawot na gibohon an kabotan nin Dios
[Ritrato sa pahina 7]
Pinapahalagahan ni Jehova an saindong paghihingoa sa pagpalakop kan “tunay na kaaraman” dapit sa Dios
