Marigon na Manindogan Asin Likayan an mga Silo ni Satanas!

‘Tumindog kamo tumang sa mga katusohan kan Diablo.’—EFE. 6:11.

ANO AN ISISIMBAG NINDO?

Paano malilikayan nin sarong lingkod ni Jehova na masilo nin materyalismo?

Ano an makakatabang sa sarong Kristianong may agom na dai mahulog sa kalot nin pagsambay?

Taano ta nagtutubod ka na kapakipakinabang na marigon na manindogan tumang sa materyalismo asin seksuwal na imoralidad?

1, 2. (a) Taano ta mayo nin pagmalasakit si Satanas sa mga linahidan asin sa ‘ibang mga karnero’? (b) Anong mga silo ni Satanas an pag-oolayan sa artikulong ini?

SI Satanas na Diablo mayo nin pagmalasakit sa mga tawo, nangorogna sa mga naglilingkod ki Jehova. Sa katunayan, nakikipaglaban si Satanas sa linahidan na mga natatada. (Kap. 12:17) Pinangengenotan kan marigon na mga Kristianong iyan an paghuhulit kan Kahadean sa presenteng panahon asin ibinubuyagyag si Satanas bilang an namamahala sa kinaban na ini. An Diablo mayo man nin pagkamoot sa ‘ibang mga karnero,’ na nagsusuportar sa mga linahidan asin igwa kan paglaom na buhay na daing katapusan—an oportunidad na mayo na ki Satanas. (Juan 10:16) Bako nanggad makangangalas na grabe an saiyang kaanggotan! Baga man sa langit o sa daga an paglaom niato, bako nanggad interesado si Satanas sa ikakarahay niato. An katuyohan nia iyo na biktimahon kita.—1 Ped. 5:8.

² Tanganing magibo an saiyang katuyohan, naggagamit si Satanas nin manlaenlaen na silo, o siod. Huling ‘binubuta nia an isip’ kan mga dai nagtutubod, dai ninda inaako an maogmang bareta asin dai nahihiling an mga silong ini. Minsan siring, nasisiod man kan Diablo an nagkapirang nag-ako kan mensahe kan Kahadean. (2 Cor. 4:3, 4) Ipinahiling sa sinundan na artikulo kun paano niato malilikayan an tolo sa mga silo ni Satanas: (1) daing kontrol na pagtaram, (2) takot asin panggigipit, asin (3) labi-labing pakamate nin kasalan. Pag-olayan niato ngonyan kun paano kita marigon na makakapanindogan tumang sa duwa pang silo o siod ni Satanas—an materyalismo asin sugot na magsambay.

MATERYALISMO—AN SILO NA NAKAKAPUOT

3, 4. Paano puedeng magresulta sa materyalismo an mga kahaditan sa sistemang ini nin mga bagay?

³ Sa saro sa mga ilustrasyon ni Jesus, sinambit nia an banhi na isinabwag sa mga tunok. Sinabi nia na puedeng dangogon  nin sarong tawo an tataramon, alagad ‘an kahaditan kan kinaban asin an kadayaan nin kayamanan minalamos kan tataramon, asin sia dai nagbubunga.’ (Mat. 13:22) Iyo, an materyalismo sarong siod na ginagamit kan satong kaiwal na si Satanas.

⁴ Duwang bagay an magkasabay na minalamos o minapuot kan tataramon. An saro iyo “an kahaditan kan kinaban,” o sistemang ini nin mga bagay. Sa ‘mga panahon na makahahandal,’ dakol an puedeng makapahadit sa saimo. (2 Tim. 3:1) Huli sa mahal na barakalon asin pagdakol nin mga daing trabaho, tibaad madepisilan kang pagkanigoon an ginaganar mo. Puedeng nahahadit ka man sa mangyayari sa maabot na panahon asin naiisip mo, ‘Igwa pa daw ako nin igong kuarta kun gurang na ako asin dai na makatrabaho?’ Huli sa siring na kahaditan, an nagkapira nagmamaigot na yumaman, na iniisip na an kuarta minagarantiya nin seguridad.

5. Sa anong paagi puedeng magin mapandaya an kayamanan?

⁵ Sinambit ni Jesus an saro pang bagay—“an kadayaan nin kayamanan.” Ini, kaiba kan kahaditan, puedeng makapuot kan tataramon. Sinasabi kan Biblia na proteksion o “kalasag an pirak.” (Par. 7:12) Minsan siring, an pagmamaigot na yumaman bakong madonong. Naaraman nin dakol na mantang mas naghihingoa sindang yumaman, mas nasisilo sinda nin materyalismo. An nagkapira nagin oripon pa ngani nin kayamanan.—Mat. 6:24.

6, 7. (a) Paano posibleng magin peligro an materyalismo sa pinagtatrabahohan nin saro? (b) Anong mga bagay an maninigong isipon nin Kristiano kun pinapa-overtime sia?

⁶ An pagmawot na yumaman puedeng magpoon na dai naririsa. Halimbawa, isip-isipa an eksenang ini. Nagrani sa saimo an among mo dangan nagsabi: “May maogma akong bareta! Nakakua an kompanya nin dakulang kontrata. An boot sabihon kaini parate kang ma-overtime sa trabaho sa masunod na pirang bulan. Pero sinesegurado ko sa saimo na sulit nanggad an sueldo.” Ano an magigin reaksion mo sa siring na alok? Siempre, an pagsustento sa saimong pamilya sarong seryosong paninimbagan, alagad bako sana iyan an paninimbagan mo. (1 Tim. 5:8) Igwa pa nin nagkapirang bagay na dapat mong konsideraron. Gurano kadakol na overtime an kalabot? Makakaolang daw an trabaho mo sa saimong espirituwal na mga aktibidad, kaiba na an mga pagtiripon kan kongregasyon asin an saindong banggi nin Pampamilyang Pagsamba?

⁷ Kun tinuturotimbang an saimong desisyon, ano an ibibilang mong pangenot—an dagdag na deposito mo sa bangko huli sa pag-overtime o an puedeng magin epekto kaiyan sa saimong espirituwalidad? Huli sa pagmawot na magkaigwa nin dakol na kuarta, dai mo na daw eenoton sa buhay an intereses kan Kahadean? Aram mo daw kun paano ka maaapektaran nin materyalismo kun papabayaan mo an espirituwal na salud mo asin kan saimong pamilya? Kun siring kaini an situwasyon mo, paano ka marigon na makakapanindogan  asin makakalikay na mapuot nin materyalismo?—Basahon an 1 Timoteo 6:9, 10.

8. Anong mga halimbawa sa Kasuratan an makakatabang sa sato na siyasaton an satong estilo nin pamumuhay?

⁸ Tanganing malikayan na mapuot nin materyalismo, siyasaton sa panapanahon an saimong estilo nin pamumuhay. Nungka mong gugustohon na magin arog ni Esau, na ipinahiling paagi sa saiyang mga ginibo na pigmenos nia an espirituwal na mga bagay! (Gen. 25:34; Heb. 12:16) Asin siertong dai ka dapat magin arog kan lalaking mayaman na dinagka na ipabakal an mga rogaring nia, itao sa mga dukha, asin sumunod ki Jesus. Imbes na gibohon iyan, an lalaki ‘naghale na mamondo; huli ta sia igwa nin darakulang pagsadiri.’ (Mat. 19:21, 22) Huling nasiod kan kayamanan, dai nakamtan kan lalaking iyan an sarong dakulang pribilehio—na magin parasunod kan pinakadakulang tawo na nabuhay kasuarin man! Mag-ingat na dai mawara an pribilehio bilang disipulo ni Jesu-Cristo.

9, 10. Sono sa Kasuratan, ano an maninigo niatong magin pagmansay sa materyal na mga bagay?

⁹ Tanganing malabanan an sobrang paghadit sa materyal na mga bagay, himateon an konseho ni Jesus: ‘Dai kamo mahadit, na magsabi, “Ano an samong kakakanon?” o, “Ano an samong iinomon?” o, “Ano an samong gugubingon?” Huli ta an gabos na bagay na ini hinahanap nin mga Gentil; huli ta naaaraman kan saindong Amang langitnon na kinakaipuhan nindo an gabos na bagay na ini.’—Mat. 6:31, 32; Luc. 21:34, 35.

¹⁰ Imbes na mabiktima kan mapandayang kapangyarihan nin kayamanan, magmaigot na arogon an kaisipan kan kagsurat sa Biblia na si Agur, na nagsabi: “Dai mo ako pagpabayaan na magin pobrehon o mayamanon. Itao mo sana sa sako an kaipuhan ko.” (Tal. 30:8, Contemporary English Version) Malinaw na nasabotan ni Agur an nakakaprotektar na kahalagahan nin kuarta saka an mapandayang kapangyarihan nin kayamanan. Tandaan na an mga kahaditan kan sistemang ini asin an mapandayang kapangyarihan nin kayamanan puedeng magresulta sa espirituwal na kapahamakan. Huli sa sobrang paghadit sa materyal na mga bagay, puedeng maubos an panahon asin kosog mo, kaya an pagmawot mong enoton an intereses kan Kahadean dikit na sana o mayo na ngani. Kun siring, magin determinado kang dai madakop sa silo nin materyalismo ni Satanas!—Basahon an Hebreo 13:5.

PAGSAMBAY—KALOT NA MAY KATUSOHAN AN PAGKATAGO

11, 12. Paano puedeng mabiktima nin pagsambay an sarong Kristiano sa pinagtatrabahohan?

¹¹ An mga paraayam na gustong makadakop nin makosog na hayop puedeng magkalot sa lugar na parateng inaagihan kan bibiktimahon. Sa parate an kalot binubugtakan nin mahimpis na tahob na kompuesto nin mga bala asin daga tanganing dai marisa. An saro sa pinakamapangganang mga sugot ni Satanas kaagid kan silong iyan. Iyo iyan an kasalan na imoralidad. (Tal. 22:14; 23:27) May mga Kristianong nahulog sa kalot na iyan huling tinogotan ninda na mamugtak sinda sa mga situwasyon na madalion na sanang magkompromiso. An nagkapirang Kristianong may agom nagpadaog sa sugot na magsambay pagkatapos na magkaigwa nin salang romantikong relasyon.

¹² An salang romantikong relasyon tibaad magpoon sa pinagtatrabahohan mo. Sa katunayan, ihinayag nin sarong sekular na pag-adal na labing kabanga kan nagsambay na mga babae asin haros 3 sa 4 na nagsambay na lalaki an nagkaigwa nin bawal na relasyon sa sarong katrabaho. Dai daw malilikayan sa trabaho mo na makaibanan an mga bakong kasekso? Kun arog kaiyan, ano an relasyon mo sa sainda? Nagbubugtak ka daw nin mga limitasyon tanganing iyan mapagdanay na trabaho sana asin dai na lumampas pa dian? Halimbawa, pagkatapos nin paorootrong pakikipag-olay nin Kristianong sister sa sarong lalaking katrabaho, tibaad magtutuga na sia nin sekreto sa lalaking ini, na sinasabi pa ngani digdi an mga problema nindang mag-agom. Sa saro pang situwasyon, pagkatapos na makiamigo sa babaeng katrabaho, tibaad an sarong Kristianong  lalaki magrason: “Pinapahalagahan nia an opinyon ko asin talagang dinadangog nia ako kun kaolay ko sia. Asin inaapresyar nia ako. Kutana arog man kaiyan an agom ko!” Nahihiling mo daw kun paano madali sanang makagibo nin pagsambay an mga Kristianong nasa siring na mga situwasyon?

13. Paano posibleng magpoon an salang romantikong relasyon sa laog nin kongregasyon?

¹³ Posibleng magpoon an salang romantikong relasyon sa laog nin kongregasyon. Isip-isipa an halimbawang ini na nangyari sa totoong buhay. Si Daniel asin an agom nia, si Sarah, * parehong regular payunir. Si Daniel man sarong “elder na nungkang minasayuma,” arog kan sabi nia. Entusiastikong inaako nia an kada pribilehiong itinatao sa saiya. Bilang kabtang kan saiyang ministeryo, limang hoben na lalaki an tinotokdoan ni Daniel sa Biblia—tolo sa sainda an nabautismohan. An bagong bautisadong mga brother na ini nangangaipo nin darudakulang tabang. Kan sibot si Daniel sa manlaenlaen na teokratikong asignasyon, si Sarah an parateng nagtatao kan tabang na iyan. Dai nahaloy arog kaini an parateng nangyayari: An dating mga tinotokdoan ni Daniel sa Biblia nangangaipo nin emosyonal na suporta, asin nakukua ninda iyan ki Sarah. Nangangaipo man si Sarah nin atension, asin nakukua nia iyan sa dating mga tinotokdoan ni Daniel sa Biblia. Nagin nakakagadan na silo iyan. “Huli sa dakol na bulan na pagparatabang kan sakong agom sa iba, sia nagluya sa espirituwal saka sa emosyonal na paagi,” an sabi ni Daniel. “Ini, kaiba na an katunayan na napabayaan ko sia, nagresulta sa kapahapahamak na pagbabago nin mga pangyayari. An agom ko nakagibo nin pagsambay sa saro sa dati kong mga tinotokdoan sa Biblia. Nagluya na palan sia sa espirituwal, pero sibot akong marhay sa mga pribilehio ko kaya dai ko iyan nariparo.” Paano mo malilikayan an siring na trahedya?

14, 15. Anong mga bagay an makakatabang sa mga Kristianong may agom na malikayan an kalot nin pagsambay?

¹⁴ Tanganing malikayan an kalot nin pagsambay, horophoropon an kahulogan nin kapanugaan sa pag-agom. Si Jesus nagsabi: “Idtong pinagsaro nin Dios, dai nin siisay man na magbulag sainda.” (Mat. 19:6) Nungkang isipon na mas mahalaga an teokratikong mga pribilehio mo kisa sa saimong agom. Dugang pa, girumdomon na kun parateng dai mo kaiba an saimong agom huli sa mga aktibidad na bakong mahalaga, iyan puedeng magparisa na may kulang sa pag-agoman nindo asin posibleng sumagkod sa sugot saka sa magabat na kasalan.

¹⁵ Pero, kun saro kang elder, paano an aripompon? Si apostol Pedro nagsurat: ‘Atamana nindo an aripompon nin Dios na yaon saindo, na mangnohon nindo, bakong huli sa kapiritan kundi sa sadiring boot; sono sa boot nin Dios; ni minsan huli sa maating pirak, kundi sa andam na pag-isip.’ (1 Ped. 5:2) An mga miembro kan kongregasyon na nasa pangangataman mo dai nanggad maninigong pagbaliwalaon. Minsan siring, sa pag-otob mo kan saimong papel bilang pastor, dai mo dapat pagpabayaan an saimong papel bilang agom. Magigin daing saysay—peligroso pa ngani—na ipokus an bilog mong atension sa espirituwal na pagpakakan sa kongregasyon mantang an saimong agom “nagugutom na marhay” sa harong. Si Daniel nagsabi, “Sayang sana kan paghihingoang asikasohon an mga pribilehio kun mapapahamak an saimong pamilya.”

16, 17. (a) Sa pinagtatrabahohan, anong praktikal na mga paagi an magigibo nin mga Kristianong may agom tanganing malinaw na ipahiling sa iba na dai sinda makikipagrelasyon sa bako nindang agom? (b) Magtao nin halimbawa nin ipinublikar na impormasyon na makakatabang sa mga Kristiano na malikayan an pagsambay.

¹⁶ Dakol na marahay na konseho an makukua sa An Torrengbantayan asin Awake! tanganing tabangan an mga Kristianong may agom na labanan an silo nin pagsambay. Halimbawa, An Torrengbantayan na Setyembre 15, 2006, nagtao kan sadol na ini: ‘Sa pinagtatrabahohan asin saen man na lugar, magmaan sa mga situwasyon na tibaad makaenkaminar nin kadayupotan. Halimbawa, an paggamit nin ekstrang mga oras na nagtatrabahong kaibaiba an bakong kasekso puedeng  magtaong lugar sa sugot. Bilang may agom na lalaki o babae, maninigo na magin malinaw paagi sa saindong pagtaram asin hiro-hiro na kamo talagang dai makikipagrelasyon sa siisay man na bako nindong agom. Bilang saro na nagmamaigot na magibo an diosnon na debosyon, siertong dai nindo gugustohon na makaapod nin dai maninigong atension paagi sa pakigitilan o paagi sa pagigin bakong mabini sa saindong paggubing asin pag-alinyar. An pagbugtak nindo nin mga retrato kan saindong agom asin mga aki sa saindong pinagtatrabahohan magseserbing nahihiling na pagirumdom para sa saindo asin sa iba na pinapahalagahan nindo an saindong pamilya. Magin determinado na nungkang enkaminaron—o togotan pa ngani—an romantikong pang-aakit nin iba.’

¹⁷ An artikulo na may titulong “Marital Fidelity—What Does It Really Mean?” sa Awake! na Abril 2009 nagpapatanid tumang sa seksuwal na mga pagpantasia sa saro na bako nindong agom. Sinasabi kan artikulo na an mga pagpantasia sa sekso mas mapadakula kan posibilidad na makagibo ka nin pagsambay. (Sant. 1:14, 15) Kun may agom ka, madonong nanggad na sa panapanahon repasohon nindong mag-agom na magkaibanan an siring na impormasyon. An pag-agoman sarong areglo na inestablisar ni Jehova mismo, asin iyan sagrado. An pagtagama nin panahon na makipag-olay sa saimong agom dapit sa saindong pag-agoman sarong marahay na paagi na ikapahiling na pinapahalagahan mo an sagradong mga bagay.—Gen. 2:21-24.

18, 19. (a) Ano an mga epekto nin pagsambay? (b) Anong mga pakinabang an ibinubunga nin kaimbodan sa agom?

¹⁸ Kun natetentaran kang magkaigwa nin salang romantikong relasyon, horophoropon an nakakaraot na mga epekto nin pakikisaro asin pagsambay. (Tal. 7:22, 23; Gal. 6:7) An mga naggigibo nin imoralidad nakakapaanggot ki Jehova asin kinokologan an saindang agom saka an sadiri ninda. (Basahon an Malaquias 2:13, 14.) Sa kabaliktaran, horophoropon an mga pakinabang na makakamtan kan mga pinapagdanay an malinig na paggawe. Apuera sa paglaom na mabuhay nin daing sagkod, igwa man sinda kan pinakamarahay na buhay ngonyan, kaiba na an malinig na konsensia.—Basahon an Talinhaga 3:1, 2.

¹⁹ An salmista nag-awit: ‘Igwa nin dakol na katoninongan an mga namomoot sa pagboot nin Dios; asin manongod sa sainda mayo nin pagkadalinas.’ (Sal. 119:165) Kaya kamotan an katotoohan, asin ‘maanan nindo nin marhay kun paano an saindong paglakaw, bakong siring sa mangmang, kundi siring sa madonong’ sa maraot na mga panahon na ini. (Efe. 5:15, 16) An dalan na linalakawan niato pano nin mga silo na ginagamit ni Satanas tanganing siodon an tunay na mga parasamba. Alagad kita nasasangkapan na marhay tanganing protektaran an satong sadiri. Tinawan kita ni Jehova kan kaipuhan niato tanganing marigon na makapanindogan asin ‘masigbo an gabos na naglalaad na busog [kan saro na] maraot’!—Efe. 6:11, 16.

[Nota sa Ibaba]

[Mga Hapot Para sa Pag-adal]

[Ritrato sa pahina 26]

An materyalismo puedeng makapuot sa saro sa espirituwal. Dai pagtogotan na mangyari iyan sa saimo

[Ritrato sa pahina 29]

An pakigitilan nin saro—o pagtogot nia na gibohon iyan sa saiya—puedeng magresulta na sia mabiktima nin pagsambay