1. Ano an makakatabang sa sato na magdanay na mapagbantay asin makayanan an mga pagbalo?

MADALI nang umabot sa daga an nakakabiglang mga pangyayari. An bagay na ini pinapatunayan kan kaotoban kan mga hula sa Biblia, kaya kaipuhan tang magdanay na mapagbantay. Ano an makakatabang sa sato na gibohon iyan? Sinasadol kita ni apostol Pablo na padagos na ‘tanawon an mga bagay na dai nahihiling.’ Iyo, kaipuhan tang isaisip an balos sa sato na buhay na daing katapusan, sa langit man iyan o sa daga. Arog kan ipinapahiling kan konteksto, isinurat iyan ni Pablo tanganing dagkahon an mga kapagtubod na magpokus sa maogmang ibubunga kan kaimbodan ninda. An paggibo kaiyan makakatabang man sa sainda na makayanan an mga pagbalo asin persekusyon.—2 Cor. 4:8, 9, 16-18; 5:7.

2. (a) Tanganing mapagdanay na marigon an satong paglaom, ano an dapat tang gibohon? (b) Ano an pag-oolayan niato digdi asin sa sunod na artikulo?

² An konseho ni Pablo igwa nin mahalagang prinsipyo: Tanganing mapagdanay na marigon an satong paglaom, dapat na bako sanang an mga bagay na nahihiling niato an tatawan niato nin atension. Kaipuhan tang magpokus sa mahalagang mga pangyayari na dai pa nahihiling. (Heb. 11:1; 12:1, 2) Kun siring, pag-olayan niato an sampulong pangyayari na maabot pa sana asin konektadong marhay sa satong paglaom na buhay na daing katapusan. *

3. (a) Anong pangyayari na nasambitan sa 1 Tesalonica 5:2, 3 an maabot pa sana? (b) Ano an gigibohon kan mga lider nin politika, asin sairisay an posibleng makiayon sa sainda?

³ Sinambit ni Pablo sa saiyang surat sa mga taga Tesalonica an saro sa mga pangyayari na maabot. (Basahon an  1 Tesalonica 5:2, 3.) Tinawan nia nin atension an ‘aldaw ni [Jehova].’ Digdi, an aldaw ni Jehova nanonongod sa peryodo nin panahon na mapoon sa paglaglag sa falsong relihion asin matapos sa giera nin Armagedon. Minsan siring, kun madali nang magpoon an aldaw na iyan ni Jehova, an mga lider sa kinaban masarabing, “Katoninongan asin katiwasayan!” (NW) Ini puedeng nanonongod sa saro o sa sunod-sunod na pangyayari. Tibaad isipon kan mga nasyon na madali na nindang maresolberan an nagkapira sa darakulang problema ninda. Kumusta man an mga lider nin relihion? Kabtang sinda kan kinaban, kaya posibleng makiayon sinda sa politikal na mga lider. (Kap. 17:1, 2) Sa siring, aarogon kan klero an falsong mga propeta sa suanoy na Juda. Sinabi ni Jehova manongod sa sainda: ‘Sinda nagsasabi, “Katoninongan, katoninongan; asin mayo nin katoninongan.”’—Jer. 6:14; 23:16, 17.

4. Bakong arog kan katawohan sa pangkagabsan, ano an nasasabotan niato?

⁴ Dawa siisay pa an magsabing, “Katoninongan asin katiwasayan!” an pangyayaring iyan tanda na mapoon na an aldaw ni Jehova. Kun siring masasabi ni Pablo: ‘Kamo mga tugang, dai na sa kadikloman, na an aldaw na iyan umabot sa saindo siring sa parahabon; huli ta kamo gabos mga aki nin liwanag.’ (1 Tes. 5:4, 5) Bakong arog kan katawohan sa pangkagabsan, nasasabotan niato an sono sa Kasuratan na kahulogan kan mga nangyayari sa presente. Paano eksaktong maootob an hulang ini na pagsabi nin “Katoninongan asin katiwasayan!”? Halaton ta asin hilingon. Kaya, magin determinado kitang ‘magpuka asin magpakamayokod,’ o magdanay na toltol an pag-iisip.—1 Tes. 5:6; Sof. 3:8.

5. (a) Paano mapoon an “dakulang kahorasaan”? (b) Siisay na “reyna” an mapapasala sa paghona niang dai sia maaano?

⁵ Anong pangyayari na dai pa nahihiling an sunod na maabot? Si Pablo nagsabi: ‘Kun sinda nagsasarabi, “Katoninongan asin [“katiwasayan,” NW],” dangan madaling madatong sa sainda an pagkatunaw.’ An enot na kabtang kan biglang ‘pagkatunaw’ na ini iyo an pagsalakay sa ‘Dakulang Babilonya,’ an pambilog na kinaban na imperyo nin falsong relihion, na midbid man na “maraot na babae” o patotot. (Kap. 17:5, 6, 15) An pagsalakay na iyan sa gabos na klase nin falsong relihion, kaiba na an Kakristianohan, iyo an kapinonan kan “dakulang kahorasaan.” (Mat. 24:21; 2 Tes. 2:8) Dakol an mabibigla sa pangyayaring ini. Taano? Huling sagkod sa panahon na iyan, kompiado an patotot na sia “reyna” (NW) na ‘dai makakahiling nin kamondoan.’ Alagad bigla niang maaaraman na nasala sia sa paghona niang dai sia maaano. Mapopoho tolos sia, na garo ‘sa sarong aldaw’ sana.—Kap. 18:7, 8.

6. Siisay an malaglag sa falsong relihion?

 ⁶ Sinasabi kan Tataramon nin Dios na sarong mabangis na “hayop” na may ‘sampulong sungay’ an masalakay sa patotot. Sa libro nin Kapahayagan, nanodan niato na an mabangis na hayop iyo an Naciones Unidas. An ‘sampulong sungay’ nagrerepresentar sa gabos na politikal na kapangyarihan na nagsusuportar sa ‘mapulang hayop’ na ini. * (Kap. 17:3, 5, 11, 12) Gurano kagrabe an epekto kan pagsalakay na iyan? Sasamsamon kan mga nasyon kan Naciones Unidas an kayamanan kan patotot, ibubuyagyag kun gurano sia karaot, sisibaon sia, asin ‘tototongon sia.’ An kalaglagan nia magigin pinal.—Basahon an Kapahayagan 17:16.

7. Paano mapoon an pagsalakay kan mabangis na “hayop”?

⁷ Sinasabi man kan hula sa Biblia kun paano mapoon an pagsalakay na ini. May gigibohon si Jehova tanganing pahiroon an puso kan politikal na mga namamahala na ‘gibohon an saiyang kaisipan,’ an boot sabihon, na laglagon an patotot. (Kap. 17:17) Padagos na nakakaparibok sa kinaban an relihion na nagsusutsut nin giera; huli kaini, puedeng isipon kan mga nasyon na sa ikakarahay kan nasyon ninda an paglaglag sa patotot. Sa katunayan, kun magsalakay na an mga namamahala, iisipon ninda na ginigibo ninda an saindang ‘sararong pag-iisip.’ Pero, an totoo, sinda magigin kasangkapan nin Dios tanganing pohoon an gabos na falsong relihion. Sa siring, sa nakakabiglang pagbabago nin mga pangyayari, sasalakayon kan sarong kabtang kan sistema ni Satanas an saro pang kabtang kaiyan, asin dai nia iyan mapupugolan.—Mat. 12:25, 26.

8. Ano an pagsalakay ni ‘Gog kan daga nin Magog’?

⁸ Pagkatapos na laglagon an falsong relihion, an mga lingkod nin Dios ‘nag-eerok [pa man giraray] sa paniwala,’ o katiwasayan pero ‘mayong kuta.’ (Ezeq. 38:11, 14) Ano an mangyayari sa garo baga daing kalabanlaban na grupong ini nin mga tawo na padagos na nagsasamba ki Jehova? Minalataw na sinda an magigin punteriya nin todo-todong pagsalakay kan ‘dakol na banwaan.’ Ilinaladawan kan Tataramon nin Dios an pangyayaring iyan bilang an pagsalakay ni ‘Gog kan daga nin Magog.’ (Basahon an Ezequiel 38:2, 15, 16.) Paano niato maninigong mansayon an pagsalakay na iyan?

9. (a) Ano an pangenot para sa sarong Kristiano? (b) Ano an maninigo tang gibohon ngonyan tanganing mapakosog an satong pagtubod?

⁹ Minsan ngani aram niato antes pa an dapit sa pagsalakay na ini sa banwaan nin Dios, dai kita nahahadit nin labi-labi. Imbes, bako an sadiri tang kaligtasan an pangenot sa sato, kundi an pagpakangbanal kan ngaran ni Jehova asin  an pagbindikar kan saiyang soberaniya. Sa katunayan, labing 60 beses na ipinahayag ni Jehova: “Makakaisi kamo na ako si Jehova.” (Ezeq. 6:7) Huli kaini, inaantisipar niatong marhay an kaotoban kan pambihirang kabtang kan hula ni Ezequiel, na nagtitiwala na ‘[si Jehova] tataong magkalda kan mga banal hale sa sugot’ o pagbalo. (2 Ped. 2:9) Mientras tanto, gusto niatong gamiton an lambang oportunidad na pakosogon an satong pagtubod tanganing mapagdanay an satong integridad ki Jehova ano man na pagbalo an tibaad atubangon niato. Ano an maninigo niatong gibohon? Maninigo kitang mamibi, mag-adal kan Tataramon nin Dios saka maghorophorop dian, asin magpaabot sa iba kan mensahe kan Kahadean. Paagi kaiyan, pinapagdanay tang marigon an satong paglaom na buhay na daing katapusan, siring sa sarong “bontogon,” o angkla.—Heb. 6:19; Sal. 25:21.

10, 11. Paano mapoon an Armagedon, asin ano an mangyayari sa panahon na iyan?

¹⁰ Anong nakakabiglang pangyayari an maabot kun salakayon na an mga lingkod ni Jehova? Paagi ki Jesus asin sa langitnon na mga hukbo, mainterbenir si Jehova para sa Saiyang banwaan. (Kap. 19:11-16) An pag-interbenir na iyan iyo an giera o ‘ralaban sa dakulang aldaw nin Dios na Makapangyarihan sa gabos’—an Armagedon.—Kap. 16:14, 16.

¹¹ Mapadapit sa gierang iyan, ipinahayag ni Jehova paagi ki Ezequiel: ‘“Sa sakuyang gabos na kabukidan maapod ako nin sarong espada tumang ki Gog,” sabi kan Kagurangnan na Jehova; an espada nin lambang saro magigin tumang sa saiyang tugang.’ Huli sa grabeng pagkataranta, an mga nasa lado ni Satanas magkakariribaraw asin gagamiton an saindang mga armas laban sa kada saro—parapakilaban tumang sa parapakilaban. Sa katunayan, an kapahamakan na iyan mangyayari sa bilog na sistema ni Satanas. Si Jehova nagsabi: ‘Papaoranan ko si Gog asin an saiyang mga kapisanan, asin an dakol na banwaan na yaon sa saiya, nin makosogon na oran, asin mga gapong graniso, kalayo asin asupre.’ (Ezeq. 38:21, 22) Ano an magigin resulta kan pag-aksion na ini nin Dios?

12. Mapipiritan an mga nasyon na gibohon an ano?

¹² Marerealisar kan mga nasyon na an grabeng kadaogan ninda resulta kan pagboot mismo ni Jehova. Dangan, arog kan nangyari sa suanoy na mga parasalakay na Egipcio na luminapag sa mga Israelita sa Dagat na Pula, an mga hukbo ni Satanas puedeng desperadong magkururahaw: ‘Si Jehova nakikipag-iwal huli sa sainda’! (Ex. 14:25) Iyo, mapipiritan an mga nasyon na midbidon si Jehova. (Basahon an Ezequiel 38:23.) Gurano na kita karani sa pagpoon kan sunod-sunod na mga pangyayaring ini?

13. Ano an aram niato manongod sa ikalimang parte kan imahen na ilinadawan ni Daniel?

¹³ Tinatabangan kita nin sarong hula sa libro nin Daniel na maaraman kun haen na kita sa dalagan nin panahon. Ilinadawan ni Daniel an sarong imahen na korteng tawo na gibo sa manlaenlaen na metal. (Dan. 2:28, 31-33) Nagrerepresentar iyan sa sunod-sunod na pambilog na kinaban na kapangyarihan na nagkaigwa nin dakulang impluwensia sa banwaan nin Dios, kaidto asin sa presente. An mga ini an Babilonya, Medo-Persia, Grecia, Roma—asin an ultimo, an pambilog na kinaban na kapangyarihan sa panahon niato. Sa hula ni Daniel, nanodan niato na an ultimong pambilog na kinaban na kapangyarihan na ini ilinadawan bilang mga bitis saka moro sa bitis kan imahen. Durante kan Giera Mundial I, nagkaigwa nin espesyal na alyansa an Britania asin an Estados Unidos. Kaya, an ikalimang parte kan imahen sa hula ni Daniel iyo an Pambilog na Kinaban na Kapangyarihan na Anglo-Amerikano. An mga bitis iyo an ultimong parte kan imahen, na nagpaparisang mayo nang masunod na pambilog na kinaban na  kapangyarihan nin tawo. An mga bitis asin moro sa bitis na gibo sa batbat asin dalipay naglaladawan sa luminuyang kamugtakan kan Pambilog na Kinaban na Kapangyarihan na Anglo-Amerikano.

14. Arin na pambilog na kinaban na kapangyarihan an nangingibabaw pag-abot kan Armagedon?

¹⁴ Sa hula man sanang iyan, an Kahadean nin Dios ilinadawan bilang dakulang gapo na tinipak hale sa bukid kan soberaniya ni Jehova kan 1914. An gapong iyan sa ngonyan marikas na nagdadangadang sa target kaiyan—an mga bitis kan imahen. Sa Armagedon, an mga bitis asin an iba pang parte kan imahen roronoton. (Basahon an Daniel 2:44, 45.) Sa siring, an Anglo-Amerika pa man giraray an nangingibabaw na pambilog na kinaban na kapangyarihan pag-abot kan Armagedon. Nakakapukaw nanggad sa boot na mahiling an lubos na kaotoban kan hulang ini! * Pero, ano an gigibohon ni Jehova ki Satanas?

15. Pagkatapos kan Armagedon, ano an mangyayari ki Satanas asin sa saiyang mga demonyo?

¹⁵ Enot, mahihiling ni Satanas poon sa kapinonan sagkod sa katapusan an paglaglag sa bilog na organisasyon nia sa daga. Dangan, si Satanas na an sentro kan atension. Sinabi ni apostol Juan an sunod na mangyayari. (Basahon an Kapahayagan 20:1-3.) Si Jesu-Cristo—an ‘anghel na igwa kan liabe sa bûngaw’—dadakopon si Satanas saka an saiyang mga demonyo, iaapon sa bûngaw, asin ibibilanggo duman nin sangribong taon. (Luc. 8:30, 31; 1 Juan 3:8) Iyan an enot na kabtang kan paglugad sa payo kan halas. *—Gen. 3:15.

16. Ano an magigin kamugtakan ni Satanas sa ‘bûngaw’?

¹⁶ Ano an ‘bûngaw’ na aaponan ki Satanas asin sa mga demonyo? An Griegong tataramon na aʹbys·sos na ginamit ni Juan nangangahulogan na “hararomon o labi nanggad kararom.” Itinatradusir man iyan na “dai masosokol, daing sagkodan,” asin “daing katapusan na espasyo.” Kaya, iyan sarong lugar na dai nanggad madudumanan nin siisay man apuera ki Jehova asin sa saiyang nombradong anghel ‘na igwa kan liabe sa bûngaw.’ Duman, an magigin kamugtakan ni Satanas garo gadan na daing ginigibo tanganing ‘dai na sia makadaya sa mga nasyon.’ Tunay nanggad, papasilensiohon an ‘nagngangarob na leon’ na iyan!—1 Ped. 5:8.

17, 18. (a) Anong mga pangyayari na dai pa nahihiling an pinag-olayan pa sana niato? (b) Pagkatapos kan mga pangyayaring ini, sa anong peryodo nin panahon kita malaog?

¹⁷ Harani na an mahalaga asin nakakabiglang mga pangyayari sa daga. Inaantisipar niato na mahiling kun paano mangyayari an pagsabi nin “Katoninongan asin katiwasayan!” Dangan, mahihiling niato an paglaglag sa Dakulang Babilonya, an pagsalakay ni Gog nin Magog, asin an ralaban nin Armagedon. Pagkatapos, si Satanas asin an saiyang mga demonyo iaapon sa bûngaw. Pagkatapos kan mga pangyayaring ini, kun mayo na an gabos na karatan, malaog kita sa bagong peryodo sa satong buhay—an Milenyal na Paghade ni Cristo, na durante kaiyan maeeksperyensiahan ta an ‘labi-labing katoninongan.’—Sal. 37:10, 11.

¹⁸ Apuera sa limang pangyayaring pinag-olayan pa sana niato, igwa pa nin ibang ‘mga bagay na dai nahihiling’ na gusto niatong padagos na ‘tanawon.’ Pag-oolayan niato an mga pangyayaring ini sa sunod na artikulo.