KAN nakaaging Pebrero, 122 na payunir an nag-arabot sa South Lansing, New York, tanganing mag-atender sa ika-17 klase kan Gilead School. Kaiba sa mga may oportunidad na magin misyonero iyo si Lowell Turner, William (Bill) Kasten, Richard Kelsey, asin Ramon Templeton. Dai nahaloy, si Lowell asin Bill na parehong taga Michigan, si Richard na taga Iowa, asin si Ramon na taga California nagin dayupot na mag-aramigo.

Pakalihis nin mga limang bulan, ogmahon an gabos kan ipaisi na maabot si Brother Nathan Knorr hale sa world headquarters tanganing magtao nin pahayag sa mga estudyante. Sinabi kan apat na brother na mawot nindang iribang maglingkod sa sarong nasyon—kun posible. Maaaraman na daw kan kada saro sa sainda kun saen talagang nasyon sinda idedestino bilang misyonero? Iyo nanggad!

Kan ipinapaisi na ni Brother Knorr sa bilog na klase kun saen sinda idedestino, haros dai na sinda makapaghalat. An enot na mga inapod sa plataporma iyo an apat na hoben na iyan na ninenerbios pero nakaginhawa na, huling naaraman man giraray ninda na magkakairibanan sinda! Pero saen? An nasorpresa nindang mga kaklase haloy na nagparalakpakan kan ipaisi na idedestino sinda sa Alemania.

An mga Saksi ni Jehova saen man na lugar napapahanga sa kaimbodan na ipinahiling kan mga Saksi sa Alemania poon kan 1933 durante kan rehimen ni Hitler. Nagirumdoman kan dakol na estudyante an pag-andam ninda nin ipapadarang mga bado asin nakakahon na mga suplay kan CARE (Cooperative for American Remittances to Europe) para sa mga tugang ninda sa Europa pagkatapos kan Giera Mundial II. An mga lingkod nin Dios sa Alemania mga halimbawa nin pambihirang pagtubod, determinasyon, kusog nin boot, asin tiwala ki Jehova. ‘Personal mi nang mamimidbid an namomotan na mga tugang na ini,’ an nagirumdoman ni Lowell na inisip nia kaidto. Bako nanggad makangangalas na gabos sinda ogmahon asin kaipuhan mag-apod sa telepono kan bangging idto!

Kan Hulyo 27, 1951, an SS Homeland naghale sa duongan kaiyan sa East River sa New York, asin an apat na mag-aramigo mabiahe nin 11 aldaw pa-Alemania. Si Brother Albert Schroeder, saro sa mga instruktor ninda sa Gilead na kan huri nagin miembro kan Namamahalang Grupo, an nagtokdo sa sainda kan enot nindang mga tataramon sa lenguaheng Aleman. Ngonyan na  may kairiba sindang pasaherong Aleman, tibaad may manodan pa sinda. Pero, minalataw na magkakalaen an dialektong Aleman kan mga pasaherong iyan. Makaribong nanggad!

Kan Martes nin aga, Agosto 7, pagkatapos na magtios nin paorootrong pagkalula, an apat nakaabot man giraray sa Alemania, sa Hamburg. Dawa saen sinda maghiling, yaon an mga epekto kan giera na natapos anom na taon pa sana an nakaagi. Mantang mamondo huli sa nahiling ninda, nagbiahe sinda nin magdamlag sakay nin tren pasiring sa Wiesbaden, na kinamumugtakan kaidto kan sangang opisina.

Kan amay na aga nin Mierkoles, sinabat sinda kan kaenot-enoteng Saksi na namidbid ninda sa Alemania—na an ngaran ordinaryo sana sa nasyon na iyan! Hale sa istasyon kan tren, iminaneho sinda ni Hans pasiring sa Bethel, na duman dinara nia sinda sa may edad nang sister na medyo estrikto asin dai tatao mag-Ingles. Dawa siring, minalataw na iniisip kan sister na masasabotan sia ninda kun mataram sia nin mas makusog. Pero, dawa pigpaparakusogan nia an boses, sia asin an apat na brother mas nadesganar pa logod. Dangan, nag-abot an branch servant na si Brother Erich Frost, na maogmang nakipag-olay sa sainda sa Ingles. Nagrahay an situwasyon.

Sa paghinanapos kan Agosto, an apat nag-atender sa enot nindang kombension sa lenguaheng Aleman na may temang “Clean Worship,” sa Frankfurt am Main. An pinakahalangkaw na bilang kan nag-atender 47,432 asin 2,373 an nabautismohan, kaya napakusog giraray an kaigotan nindang apat sa pagmimisyonero saka an pagmawot ninda na maghulit. Pero pakalihis nin pirang aldaw, sinabi ni Brother Knorr na magdadanay sinda sa Bethel asin duman maglilingkod.

Huling an puso nia yaon sa pagmimisyonero, sinayumahan ni Ramon kan enot an oportunidad na maglingkod sa Bethel sa Estados Unidos. Dai man lamang inisip ni Richard asin ni Bill na maglingkod sa Bethel. Pero, huli sa namatean nindang kagayagayahan sa saindang asignasyon, lubos sindang nakombensir na aram pirme ni Jehova an pinakamarahay. Kaya, mas madonong nanggad na sunodon an paggiya nia imbes na an personal na kamawotan! Kun manodan ini nin saro, maoogma siang maglingkod ki  Jehova saen man na lugar asin ano man an asignasyon sa saiya.

Maogma an dakol sa pamilyang Bethel sa Alemania na may makaibanan na mga Amerikano na makakaolay ninda tanganing makapagpraktis sa pagtaram nin Ingles. Pero sarong aldaw sa kakanan, an inaasahan nindang ini biglang nawara. Sa entusiastiko niang paagi arog kan dati, nagtaram nin Aleman si Brother Frost dapit sa sarong bagay na minalataw na seryoso nanggad. An kadaklan sa pamilya nagdanay na toninong na marhay, na nakahiling sana sa plato ninda. Dawa ngani dai nasasabotan kan mga bagong abot kun ano an sinasabi, luway-luway nindang narealisar na may koneksion iyan sa sainda. Kaya kan si Brother Frost makusog na magsabi nin “VERBOTEN!” (“Ipinagbabawal!”) asin inotro iyan nin mas makusog pa bilang pagdodoon, dai na sinda mapamugtak. Ano an nagibo ninda na nagin dahilan kan siring kakusog na emosyon?

Pakatapos kan pagkakan, an gabos nagdaralidali pasiring sa mga kuarto ninda. Dangan, ipinaliwanag nin sarong brother: “Tanganing matabangan nindo kami, dapat makataram kamo nin Aleman. Iyan an dahilan kaya sinabi ni Brother Frost na sagkod na dai kamo nakakanood kan lenguahe, an pakikipag-olay sa saindo sa Ingles VERBOTEN.”

Madaling nagsunod an pamilyang Bethel. Apuera sa nakatabang iyan sa mga bagong abot na makanood nin Aleman, tinokdoan man sinda kaiyan na an konsehong itinatao nin sarong mamomoton na tugang, dawa ngani depisil iaplikar sa primero, parateng para sa ikakarahay niato. Mahihiling sa konseho ni Brother Frost na interesado sia sa kapakanan kan organisasyon ni Jehova asin namomotan nia an mga tugang. * Bako nanggad makangangalas na namotan sia kan apat!

Makakanood kita nin mahahalagang leksion sa mga katood tang may takot sa Dios, asin iyan makakatabang man sa sato na magin mas marahay na katood ni Jehova. Sa maimbod na mga tugang na Aleman—na dakolon kun sasambiton sa ngaran—dakol an nanodan kan apat, pero nakanood man sinda sa lambang saro. Ipinaliwanag ni Richard: “May aram si Lowell sa lenguaheng Aleman asin nagagamit niang marhay iyan, pero kaming tolo nadedepisilan. Huling sia man an pinakamatua sa grupo mi, natural sanang saiya kami minadolok kun dapit sa lenguahe saka pangengenot.” Nagigirumdoman ni Ramon: “Ogmahon ako kan ialok nin sarong brother na Swiso na gamiton mi an sadit niang harong na gibo sa kahoy duman sa  Switzerland para sa enot ming bakasyon pagkatapos nin sarong taon sa Alemania! Duwang semana kaming dai masasakitan sa pagtaram nin Aleman! Pero dai ko naisip an gigibohon ni Lowell. Ipinirit nia na basahon asin pag-olayan mi kada aga an pang-aroaldaw na teksto—sa lenguaheng Aleman! Desganado ako ta porsegido talaga sia. Pero nakanood kami nin mahalagang leksion. Sumunod sa pangengenot kan mga nagmamawot kan pinakaikakarahay nindo, dawa kun beses dai kamo oyon dian. Huli sa kaisipan na ini, nakinabang kami sa laog nin dakol na taon asin nagin mas pasil samuya na magpasakop sa teokratikong pagdirehir.”

Nanodan man kan apat na mag-aramigo na apresyaron an marahay na mga kualidad kan lambang saro, arog kan sinasabi sa Filipos 2:3: ‘Sa kapakumbabaan nin pag-isip ibilang kan saro an saro na marahay kisa saiya.’ Kaya parateng ipinapahiling kan tolo na inaapresyar ninda si Bill paagi sa pagdelegar sa saiya nin mga gibohon na pinagkaoroyonan kan tolo na mas maaasikaso nia kisa sa sainda. “Kun kaipuhan gumibo nin depisil o bakong kombenyenteng desisyon tanganing resolberan an masakit na mga situwasyon,” an nagigirumdoman ni Lowell, “minadolok kami ki Bill. Aram nia kun paano atubangon an masakit na mga situwasyon sa paagi na napagkakaoroyonan mi gabos pero minsan paano kulang sia nin kusog nin boot o kakayahan na gibohon iyan.”

Saro-saro na nag-agom an apat. An pagigin mag-aramigo ninda nakabasar sa pagkamoot kan lambang saro ki Jehova asin sa bilog na panahon na ministeryo, kaya determinado sindang maghanap nin maaagom na andam na enoton si Jehova. Nanodan ninda sa bilog na panahon na paglilingkod na mas nakakakontento an pagtao kisa sa pag-ako asin na an personal na kamawotan dai dapat paorogon kisa sa intereses kan Kahadean. Huli kaini, nagpili sinda nin mga sister na yaon na sa bilog na panahon na paglilingkod, na naglaog dian sa sadiri nindang kabotan. Apat na makusog asin maogmang pag-agoman an nagin resulta.

Tanganing tunay na magdanay an pagkakatood o pag-agoman, dapat na yaon si Jehova sa relasyon. (Par. 4:12) Dawa ngani uminabot an panahon na namondo si Bill asin si Ramon huli sa pagkagadan nin agom, pareho nindang naeksperyensiahan an kagayagayahan saka suporta na puedeng itao nin maimbod na agom. Padagos na naeeksperyensiahan ni Lowell saka Richard an arog kaiyan na suporta, asin si Bill, na nag-agom giraray, madonong na nagpili nin agom tanganing makapagdanay sa bilog na panahon na paglilingkod.

Pakalihis nin mga taon, nakaduman sinda sa magkakalaen na lugar huli sa saindang asignasyon—pangenot na sa Alemania, Austria, Luxembourg, Canada, asin Estados Unidos. Bilang resulta, dai nang gayo sinda nagkakairibanan arog kan gusto kutana ninda. Pero dawa ngani magkararayo, padagos pa man giraray an komunikasyon ninda, na naggagayagaya sa mga bendisyon kan lambang saro asin iribang nagtatangis sa mga kamondoan ninda. (Roma 12:15) Dapat na pakamahalon an siring na mga katood asin maninigo nanggad na ipagpasalamat. Sinda mahalagang marhay na regalo hale ki Jehova. (Tal. 17:17) Bihira nanggad sa kinaban ngonyan an tunay na mga katood! Pero, an lambang tunay na Kristiano puedeng magkaigwa nin dakol kaiyan. Bilang mga Saksi ni Jehova, ikinakaogma niato an pakikikatood  sa mga kapagtubod sa bilog na kinaban asin, orog sa gabos, ki Jehova Dios saka ki Jesu-Cristo.

Kapareho niato gabos, an mag-aramigong ini nagkakaproblema man—baga man iyan kamondoan huli sa pagkagadan nin agom, tension huli sa grabeng helang, kahaditan sa pag-ataman sa may edad nang mga magurang, kadepisilan sa pagpadakula nin aki mantang nasa bilog na panahon na paglilingkod, pagkahandal kun tinatawan nin bagong teokratikong mga asignasyon, asin ngonyan an naggagrabeng problema huli sa paggurang. Pero naaraman man ninda base sa eksperyensia na an mga katood—harani man o harayo—nakakatabang sa mga namomoot ki Jehova na mapangganahan an lambang kadepisilan.

Marahayon nanggad na sa edad na 18, 12, 11, asin 10, si Lowell, Ramon, Bill, asin Richard nagdusay kan saindang sadiri ki Jehova, asin sa pag-oltanan nin 17 saka 21 anyos, sinda gabos nagpayunir. Ginibo ninda an pangagda kan Parahulit 12:1: ‘Ngonyan, girumdoma an saimong Kaglalang sa mga aldaw nin saimong pagkabarobata.’

Kun saro kang hoben na Kristianong lalaki, akoon kun posible an pangagda ni Jehova na lumaog sa bilog na panahon na paglilingkod. Dangan huli sa saiyang dai na kutana maninigong kabootan, maeeksperyensiahan mo an kagayagayahan—arog kan apat na mag-aramigong ini—sa paglilingkod bilang paraataman nin sirkito, distrito, o sona; paglilingkod sa Bethel, kaiba na an pagigin miembro kan mga Komite kan Sangay; pagtotokdo sa Pang-Kahadean na Paadalan sa Pagmiministro saka Paadalan sa Paglilingkod Bilang Payunir; asin pagtao nin pahayag sa mga kombension, darakula man o saradit. Dakula nanggad an kagayagayahan kan apat na ini sa pakaaram na manampulong ribo an nakikinabang sa ginigibo ninda! An gabos nagin posible nanggad huli ta kan sinda hoben pa, inako ninda an mamomoton na pangagda ni Jehova na paglingkodan sia nin bilog na kalag.—Col. 3:23.

Ngonyan, si Lowell, Richard, asin Ramon iriba giraray na naglilingkod sa sangang opisina sa Alemania, na ngonyan yaon na sa Selters. Makamomondo, nagadan si Bill kan 2010 mantang naglilingkod bilang espesyal payunir sa Estados Unidos. An haros 60 taon nin espesyal na marhay na relasyon kan apat na mag-aramigo naputol huli sa kagadanan! Pero nungkang lilingawan kan satong Dios na si Jehova an mga katood nia. Makakasierto kita na sa pamamahala kan saiyang Kahadean, an lambang pagkakatood nin mga Kristiano na temporaryong naputol huli sa kagadanan ibabalik sa dati.

Dai nahaloy bago nagadan si Bill, sia nagsurat: “Sa laog nin 60 taon bilang mag-aramigo, mayo akong nagigirumdoman na pagkakataon na dai ko nagustohan. An relasyon ta pirmeng espesyal na marhay sakuya.” Dangan an tolo niang amigo, na malinaw sa isip an paglaom na mapadagos an saindang pagigin mag-aramigo sa bagong kinaban, tolos man na nagsabi, “Pero minapoon pa sana kita.”