1, 2. Anong mga kadepisilan an naeeksperyensiahan nin dakol, pero ano an pagmawot kan mga lingkod nin Dios?

NABUBUHAY kita sa panahon nin mga kadepisilan. An daga apektado nin dakol na kalamidad. An mga linog, tsunami, kasulo, baha, pagtuga nin bulkan, buhawi, asin bagyo nagdadara nin grabeng danyos sa katawohan. Apuera kaiyan, an mga problema sa pamilya asin personal na mga kadepisilan nagtatao nin takot saka kamondoan. Totoo nanggad na an ‘panahon asin pagkanorongod’ minaabot sa sato gabos.—Par. 9:11.

² Sa kabilogan, nakayanan nanggad kan mga lingkod nin Dios an siring na masakit na mga kamugtakan. Dawa siring, gusto niatong magin andam na atubangon an ano man na kadepisilan na puedeng mapaatubang sa sato sa maabot na panahon mantang nagrarani an katapusan kan sistemang ini. Paano ta makakayanan an mga kadepisilan na ini na dai biyong pinangluluyahan nin boot? Ano an makakatabang sa sato na atubangon an mga kadepisilan ngonyan nin may kusog nin boot?

3. Oyon sa Roma 15:4, paano kita puedeng maranga kun napapaatubang sa makamomondong mga kamugtakan?

³ Minsan ngani mas dakol na tawo ngonyan an naaapektaran nin depisil na mga kamugtakan kisa kasuarin man, an nakakapurisaw na mga problema bako nang bago sa katawohan. Hilingon niato kun ano an satong manonodan sa nagkapirang lingkod nin Dios kaidto na mapangganang inatubang an buhay nin may kusog nin boot.—Roma 15:4.

4. Anong mga kadepisilan an tinagalan ni David, asin ano an nakatabang sa saiya?

⁴ Isip-isipa si David. Kabilang sa mga kinaipuhan niang atubangon iyo an grabeng kaanggotan kan hade, mga pagsalakay nin mga kaiwal, pagbihag sa mga agom nia, pagtraydor kan mga tawong harani sa saiya, asin grabeng kulog nin boot.  (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) An mga pagkasaysay sa Biblia dapit sa buhay ni David malinaw na naghahayag kan kulog na namatean nia huli sa mga kadepisilan na iyan. Minsan siring, dai iyan nakapaluya sa saiya sa espirituwal. Sia may bilog na pagtubod na nagsabi: ‘Si Jehova iyo an kasarigan nin sakuyang buhay; kiisay ako matatakot?’—Sal. 27:1; basahon an Salmo 27:5, 10.

5. Ano an nakatabang ki Abraham asin Sara na tagalan an masakit na buhay?

⁵ Sa haros bilog na buhay ni Abraham asin Sara, sinda nag-istar sa mga tolda bilang mga dayo sa bakong pamilyar na mga lugar. Bako pirmeng madali an buhay ninda. Alagad, marigon nindang tinagalan an mga kamugtakan arog nin tiggutom asin mga peligro huli sa nakapalibot na mga nasyon. (Gen. 12:10; 14:14-16) Paano ninda nagibo ini? Sinasabi sa sato kan Tataramon nin Dios na hinahalat ni Abraham ‘an siudad na igwa nin mga pasisikadan, na an kagtogdok asin kaggibo kaiyan iyo an Dios.’ (Heb. 11:8-10) Si Abraham asin Sara nagdanay na nakapokus sa mga bagay na maabot, na dai nagpaapektar sa mga kamugtakan sa palibot ninda.

6. Paano niato maaarog si Job?

⁶ Si Job nag-agi nin grabeng pagsakit. Imahinara na sana an namatean nia kan an gabos na bagay sa buhay nia garo baga nagin bakong marahay. (Job 3:3, 11) An mas grabe pa, dai nia lubos na nasabotan kun taano ta nangyari sa saiya an gabos na iyan. Pero, nungka siang suminuko. Pinagdanay nia an saiyang integridad asin pagtubod sa Dios. (Basahon an Job 27:5, 6.) Marahayon nanggad na halimbawa na dapat tang arogon!

7. Ano an naeksperyensiahan ni Pablo mantang naglilingkod sia sa Dios, pero ano an narealisar nia na nagtao sa saiya nin kusog nin boot na magpadagos?

⁷ Isip-isipa man an halimbawa ni apostol Pablo. Nakaeksperyensia sia nin mga peligro o ‘pag-alaman sa siudad, sa kapatagan, asin sa dagat.’ Nasambitan nia an ‘gutom asin paha, lipot asin kahubaan.’ Nasambitan man ni Pablo na sia ‘sarong banggi asin sarong aldaw na nasa kaawagan nin dagat,’ na posibleng marhay na huli sa saro sa mga naeksperyensiahan niang pagkawasak nin barko. (2 Cor. 11:23-27) Sa ibong kan gabos na iyan, mangnoha an ipinahayag niang kaisipan pakatapos na sia dikit pang magadan huli sa paglilingkod sa Dios: ‘Tanganing dai kami manarig sa samo man sana, kundi sa Dios na nagbabangon kan mga gadan, na nagligtas samo sa siring kadakulang kagadanan, asin maligtas liwat.’ (2 Cor. 1:8-10) Pira sanang tawo an nakaeksperyensia nin dakol na maraot na pangyayari arog ni Pablo. Alagad, dakol sa sato an nakakamate nin arog kan namatean nia asin puedeng maranga kan saiyang halimbawa nin kusog nin boot.

8. Paano puedeng makaapektar sa sato an mga problema ngonyan? Iilustrar.

⁸ Sa kinaban ta ngonyan na pano-pano nin kadepisilan, pagsakit, asin kalamidad, dakol an biyong pinangluluyahan nin boot. Dawa an nagkapirang Kristiano nakakamate nin arog kaiyan. Si Lani, * na maogma mantang nasa bilog na panahon na paglilingkod kaiba kan saiyang agom sa Australia, nagsabi na kan madiskobre na may kanser sia sa suso, sia biyong pinangluyahan nin boot asin garo tinamaan nin kikilat. Sia nagsabi, “Luminuya nin grabe an salud ko huli sa mga pagbolong asin an pagmate ko mayo na akong halaga.” Kasabay kaiyan, kaipuhan niang atamanon an saiyang agom, na naoperaran sa gulod. Kun yaon kita sa arog kaiyan na situwasyon, ano an puede tang gibohon?

9, 10. (a) Ano an dai niato dapat pagtogotan na gibohon ni Satanas? (b) Paano niato puedeng mansayon an katunayan na nasambitan sa Gibo 14:22?

⁹ Marahay na girumdomon niato na gustong gamiton ni Satanas an inaagihan tang mga problema tanganing paluyahon an satong pagtubod. Minsan siring, dai niato sia dapat pagtogotan na haleon an satong kagayagayahan huli kaiyan. An Talinhaga 24:10 nagsasabi na kun ika pinangluluyahan sa panahon nin kasakitan, ‘an saimong kusog mag-iina.’ An paghorophorop sa mga halimbawa sa Biblia, arog kan pinag-olayan niato sa enotan, makakatabang  sa sato na magkaigwa nin kinakaipuhan na kusog nin boot kun napapaatubang sa mga kadepisilan.

¹⁰ Marahay man na tandaan na dai niato mahahale an gabos na problema. Sa katunayan, asahan niato na magkakaigwa kita kaiyan. (2 Tim. 3:12) An Biblia nagsasabi sa sato: ‘Kaipuhan mag-agi kita nin dakol na kasakitan bago makalaog sa Kahadean nin Dios.’ (Gibo 14:22, BPV *) Imbes na biyong pangluyahan nin boot, taano ta dai mansayon iyan bilang mga oportunidad tanganing ipahiling an kusog nin boot na basado sa pagtubod mo sa kakayahan nin Dios na tabangan ka?

11. Ano an puede tang gibohon tanganing dai biyong pangluyahan nin boot huli sa mga kadepisilan sa buhay?

¹¹ Kaipuhan niatong magkonsentrar sa positibong mga bagay. An Tataramon nin Dios nagsasabi sa sato: ‘An pusong maogma nagpapagayon sa lalawgon, tara huli kan kasakitan nin puso minaluya an espiritu.’ (Tal. 15:13) Haloy nang aram kan mga parasiyasat sa medisina na nakakarahay an pagigin positibo. Minarahay an pagmate nin dakol na pasyenteng tinatawan nin tabletang gibo sana sa asukar (placebo) huli sana ta iniisip ninda na mararahay sinda kaiyan. An kabaliktaran kaiyan, na inaapod na nocebo effect, naobserbaran man. Minagrabe an kamugtakan kan salud nin mga pasyente huli sana ta sinabihan sinda na may maraot na mga epekto an itinataong bolong. Mangluluya sana kita kun pagpaparaisipon niato an mga situwasyon na dai ta man mababago. Nakakaogma ta bakong “mga tabletang gibo sana sa asukar” an itinatao sa sato ni Jehova. Imbes, dawa sa mga panahon nin kalamidad, nagtatao sia nin tunay na tabang paagi sa pamparigon sa boot na yaon sa saiyang Tataramon, sa satong mapagsuportar na kasararoan nin magturugang, asin sa kusog na itinatao kan banal na espiritu. An pagkonsentrar sa mga bagay na ini an makakapaogma sa sato. Imbes na pagparaisipon an mga problema, gibohon an makakaya mo tanganing matagalan iyan asin magkonsentrar sa positibong mga bagay sa saimong buhay.—Tal. 17:22.

12, 13. (a) Ano an nakatabang sa mga lingkod nin Dios na tagalan an mga epekto nin mga kalamidad? Iilustrar. (b) Sa mga panahon nin kalamidad, paano nagigin malinaw kun ano an pinakamahalaga sa buhay nin saro?

¹² Kasuarin pa sana, may mga nasyon na tinamaan nin grabeng mga kalamidad. Pero, risang-risa an pambihirang pakatagal nin dakol na tugang sa mga nasyon na ini. Dai ini nangangahulogan na nagin madali iyan para sa sainda. Kan Pebrero 2010, dinestroso nin makusogon na linog asin tsunami sa Chile an dakol sa mga harong asin rogaring kan mga tugang ta, asin an iba nawaran pati nin kabuhayan. Sa ibong kaini, aktibo pa man giraray sinda sa espirituwal. Si Samuel, na an harong biyong nadestroso, nagsabi: “Dawa sa grabe kasakit na mga kamugtakan na ini, kaming mag-agom nungkang nagpondo sa pag-atender sa mga pagtiripon asin paghuhulit. Nagtutubod ako na nakatabang sa samo an rutinang ini na dai magin desperado.” Arog kan dakol na iba pa, dai ninda tinogotan na paluyahon kan kalamidad an boot ninda, imbes nagpadagos sinda sa paglilingkod ki Jehova.

¹³ Kan Setyembre 2009, binaha an labing 80 porsiento kan Manila, sa Pilipinas, huli sa makusogon na oran. Sarong mayaman na lalaki na nawaran nin dakol na pagsasadiri an nagsabi, “Hinale nanggad kan baha an pagkakalaen kan mayaman asin pobre huling parareho sindang nadepisilan asin nagsakit.” Ipinapagirumdom kaini sa sato an madonong na sadol ni Jesus: ‘Magtiripon kamo sa saindo nin mga kayamanan sa langit, na duman an bukbok ni an takla dai nakakaraot, asin an mga mahabon dai nagsasalakat asin dai naghahabon.’ (Mat. 6:20) Kun an buhay nin saro nakasentro sa materyal na mga bagay, na madalion sanang mawara, iyan parateng minaresulta sa pagkadesganar. Mas madonong nanggad na enoton sa satong buhay an relasyon niato ki Jehova, na puedeng magdanay ano man an mangyari sa palibot niato!—Basahon an Hebreo 13:5, 6.

14. Ano an mga dahilan niato na magin makusog an boot?

¹⁴ Nagsabi si Jesus na magkakaigwa nin mga  problema durante kan saiyang presensia, pero sinabi nia: “Dai kamo matakot.” (Luc. 21:9) Huling tinatabangan kita kan satong Hade asin kan Kaglalang kan uniberso, yaon sa sato an gabos na dahilan na magkaigwa nin kompiansa. Pinakusog ni Pablo si Timoteo paagi sa pagsabi: ‘Dai an Dios nagtao sa sato nin espiritu nin pagkatakot, kundi nin kapangyarihan asin pagkamoot patin kamayokodan.’—2 Tim. 1:7.

15. Magtao nin mga halimbawa nin kapahayagan nin pagtitiwala kan mga lingkod nin Dios, asin ipaliwanag kun paano kita magkakaigwa nin kusog nin boot arog ninda.

¹⁵ Mangnoha an nagkapirang kapahayagan nin makusog na pagtitiwala kan mga lingkod nin Dios. Si David nagsabi: ‘Si Jehova iyo an sakuyang kasarigan asin sakuyang kalasag. Dian sa saiya naglaom an sakuyang puso, asin tinabangan nia ako; nin huli kaiyan naogma an sakuyang puso.’ (Sal. 28:7) Ipinahayag ni Pablo an saiyang marigon na kompiansa paagi sa pagsabi: ‘Sa gabos na bagay na ini kami orog pa kisa mga nandaog huli saiya na namoot samo.’ (Roma 8:37) Siring man, kan madali na siang arestaron asin gadanon, sinierto ni Jesus sa mga nagdadangog sa saiya na igwa sia nin makusog na relasyon sa Dios paagi sa pagsabi: “Dai ako nagsasarosaro, huli ta an Ama nasa kaibahan ko.” (Juan 16:32) Ano an risang-risa sa mga kapahayagan na ini? Gabos naghahayag nin marigon na pagtitiwala ki Jehova. Kun papataluboon ta an arog kaiyan na kompiansa sa Dios, magkakaigwa kita nin kusog nin boot na atubangon an ano man na kadepisilan ngonyan.—Basahon an Salmo 46:1-3.

16. Taano ta mahalaga na pag-adalan niato an Tataramon nin Dios?

¹⁶ An kusog nin boot nin sarong Kristiano dai minagikan sa pagsarig sa sadiri. Imbes, resulta iyan kan pakamidbid ta sa Dios asin pagsarig sa saiya. Magigibo niato ini paagi sa pag-adal kan saiyang nasusurat na Tataramon, an Biblia. Ipinaliwanag nin sarong sister na may depresyon kun ano an nakakatabang sa saiya, “Paorootro kong binabasa an nakakarangang marhay na mga teksto.” Sinusunod na daw niato an pagdirehir na magkaigwa nin regular na iskedyul nin pampamilyang pagsamba? An paggibo kan mga bagay na ini makakatabang sa sato na magkaigwa kan saboot kan salmista, na nagsabi: ‘Kanigoan an pagkamoot ko sa saimong pagboot! Sa bilog na aldaw iyo iyan an sakuyang pinaghohorophorop.’—Sal. 119:97.

17. (a) Anong probisyon an puedeng makatabang sa sato na magdanay na may kusog nin boot? (b) Magtao nin halimbawa kun paano ka natabangan nin sarong ipinublikar na estorya nin buhay.

¹⁷ Igwa man kita nin basado sa Biblia na mga publikasyon na may mga impormasyon na nakakapakusog kan kompiansa niato ki Jehova. Dakol na tugang an natatabangan nanggad kan mga estorya nin buhay na yaon sa satong mga magasin. Sarong sister sa Asia na may bipolar mood disorder an naogmang marhay kan nabasa nia an estorya kan buhay nin dating misyonero na mapangganang inatubang an helang na iyan. Sia nagsurat, “Tinabangan ako kaiyan na masabotan an sadiri kong problema asin magkaigwa nin paglaom.”

18. Taano ta maninigo niatong aprobetsaran an probisyon na pamibi?

 ¹⁸ An pamibi nakakatabang sa gabos na klase nin situwasyon. Idinoon ni apostol Pablo an kahalagahan kan probisyon na ini paagi sa pagsabi: ‘Sa ano man dai kamo mahadit; kundi sa gabos na bagay huli sa pamibi asin pagngayongayo na may pagpasalamat, ipahayag nindo sa Dios an saindong mga hinahagad. Asin an katoninongan nin Dios, na minalampas sa gabos na pakasabot, maingat kan saindong mga puso asin kan saindong mga pag-isip dian ki Cristo Jesus.’ (Fil. 4:6, 7) Lubos daw niatong inaaprobetsaran an paaging ini nin pagtabang tanganing magkaigwa nin kusog kun napapaatubang sa mga kadepisilan? Si Alex, sarong brother na taga Britania na haloy nang may depresyon, nagsabi: “An pakikipag-olay ki Jehova sa pamibi asin pagdangog sa saiya paagi sa pagbasa kan saiyang Tataramon an nakakasustenir sa sako.”

19. Ano an dapat na pagmansay niato sa pag-atender sa Kristianong mga pagtiripon?

¹⁹ An pakikiasosyar sa mga pagtiripon saro pang mahalagang marhay na probisyon na makakatabang sa sato. An salmista nagsurat: “An sakong kalag napupungaw asin naghihidaw sa mga patyo nin KAGURANGNAN.” (Sal. 84:2, BPV) Arog man daw kaiyan an namamatean niato? Ipinahayag ni Lani, na nasambitan sa enotan, an pagmansay nia dapit sa Kristianong asosasyon: “An pag-atender sa mga pagtiripon bakong opsional. Aram ko na dapat yaon ako duman kun naglalaom ako na tatabangan ako ni Jehova.”

20. Paano makakatabang sa sato an paghuhulit?

²⁰ Napapakusog man an satong boot paagi sa pagdadanay na aktibo sa paghuhulit kan Kahadean. (1 Tim. 4:16) Sarong sister sa Australia na nag-agi nin kadakol na problema an nagsabi: “Mayo na akong ganang maghulit, pero inagda ako nin sarong elder na maghulit kaiba nia. Nag-iba ako. Siertong nagtatabang si Jehova huling sa kada pagluwas ko sa langtad, maogmahon ako.” (Tal. 16:20) Naaraman nin dakol na sa pagtabang sa iba na magkaigwa nin pagtubod ki Jehova napapakusog an sainda mismong pagtubod. Sa paggibo kaiyan, dai ninda gayong naiisip an saindang mga problema asin danay sindang nakakonsentrar sa mas mahahalagang bagay.—Fil. 1:10, 11.

21. Kun napapaatubang sa mga kadepisilan, sa ano kita makakasierto?

²¹ Nagtatao si Jehova nin abundang tabang tanganing maatubang niato nin may kusog nin boot an mga kadepisilan ngonyan. Kun aaprobetsaran ta an gabos na probisyon na ini asin hohorophoropon saka aarogon an marahay na halimbawa nin mga lingkod nin Dios na makusog an boot, makakasierto kita na mapanggana niatong maaatubang an mga kadepisilan. Minsan ngani dakol pang problema an puedeng umabot mantang nagrarani an katapusan kan sistemang ini, masasabi man niato an arog kan sinabi ni Pablo: ‘Ilinalampog kami, alagad dai naaano. Dai kami nalulunosan.’ (2 Cor. 4:9, 16) Sa tabang ni Jehova, maaatubang niato an mga kadepisilan ngonyan nin may kusog nin boot.—Basahon an 2 Corinto 4:17, 18.