1, 2. (a) Ano an sinasabi nin dakol manongod sa kapangganahan? (b) Paano mo maaaraman an pagmansay mo sa kapangganahan?

ANO an boot sabihon nin kapangganahan sa buhay? Kun ihahapot iyan sa mga tawo, magkakalaen nanggad an isisimbag ninda. Halimbawa, sinasabi nin dakol na an kapangganahan nakadepende sa pambihirang mga naabot kun manongod sa materyal na bagay, propesyon, o pag-eskuela. Para man sa iba, mahalaga dian an marahay na relasyon sa pamilya, mga katood, o mga katrabaho. Sa sarong lingkod nin Dios, tibaad ikonektar pa ngani an kapangganahan sa katongdan na may responsabilidad sa kongregasyon o sa mga nagibo sa ministeryo.

² Tanganing maaraman an personal na pagmansay mo sa kapangganahan, puede mong isurat an ngaran kan nagkapirang ibinibilang mo na mapanggana—an mga hinahangaan asin irinerespeto mong marhay. Sa anong pambihirang karakteristiko nagkakaparareho sinda? Sinda daw mayaman o bantog? Ihahayag kan simbag kun ano an nasa puso mo, asin makakaimpluwensia iyan na marhay sa saimong mga desisyon asin sa mga pasohan na inaabot mo.—Luc. 6:45.

3. (a) Ano an dapat gibohon ni Josue tanganing magin mapanggana? (b) Ano an eestudyaran niato ngonyan?

³ An pinakaimportante iyo an pagigin mapanggana niato oyon sa pagmansay ni Jehova, huling an buhay niato nakadepende sa pag-oyon nia. Kan itao ni Jehova ki Josue an magabat na paninimbagan na pangenotan an mga Israelita pasiring sa Dagang Panuga, sinabi Nia sa saiya na basahon an Ley ni Moises “aldaw asin banggi” asin maingat na sunodon an nakasurat dian. Inasegurar sa saiya nin Dios: “Paagi kaiyan gigibohon mong mapanggana an saimong dalan asin paagi kaiyan mahiro ka na may kadonongan.” (Jos. 1:7, 8, NW) Asin siring kan aram nindo, nagin mapanggana si Josue. Kumusta man kita? Paano niato maaaraman kun baga an pagmansay niato sa kapangganahan kaoyon kan pagmansay nin Dios? Sa katuyohan  na iyan, estudyaran niato an buhay nin duwang lalaki na nasambitan sa Biblia.

4. Taano ta masasabing mapanggana si Salomon?

⁴ Sa dakol na paagi, pambihira an kapangganahan ni Salomon. Taano? Huling sa laog nin dakol na taon, natakot asin nagkuyog sia ki Jehova, na nagtao sa saiya nin dakol na bendisyon. Tandaan na kan sabihon ni Jehova ki Salomon na maghagad nin ano man, naghagad an hade nin kadonongan tanganing mapangenotan an banwaan. Kaya binendisyonan sia nin Dios nin kadonongan asin kayamanan. (Basahon an 1 Hade 3:10-14.) An kadonongan ni Salomon ‘labi kan sa gabos na taga subangan [sirangan] asin kan sa bilog na kadonongan kan mga taga Egipto.’ Nagin bantog si Salomon sa ‘gabos na nasyon sa palibot.’ (1 Ha. 4:30, 31) Kun dapit sa kayamanan, kada taon nagkakaigwa sia nin mga 25 toneladang bulawan! (2 Cron. 9:13) Matibayon sia kun dapit sa pagigin mataktika, pagtogdok, asin komersio. Iyo, mapanggana si Salomon sagkod na may matanos siang kamugtakan sa atubangan nin Dios.—2 Cron. 9:22-24.

5. Ano an kongklusyon ni Salomon manongod sa mga mapanggana sa paghiling nin Dios?

⁵ Ipinapahiling kan isinurat ni Salomon sa libro nin Parahulit na dai sia nadaya na mag-isip na an mga mayaman o bantog sana an puedeng magin mapanggana asin maogma. Dai nanggad. Isinurat nia: ‘Ako nakamidbid na mayong orog karahay sa sainda, kundi mag-ogma, asin maggibo nin marahay sa saindang pagkabuhay. Asin siring man na balaog nin Dios na an gabos na tawo magkakan asin mag-inom, asin magkamit kan karahayan kan gabos niang hinigosan.’ (Par. 3:12, 13) Asin narealisar nia na an siring na mga kawilihan tunay na makahulogan para sa saro na inooyonan nin Dios, na igwa nin marahay na relasyon sa Saiya. Tama sanang sabihon ni Salomon: ‘An katapusan [kongklusyon] kan gabos na ipinagtaram na nadangog iyo ini: Matakot sa Dios, asin kuyoga an saiyang mga togon; huli ta ini iyo an katongdan kan gabos na tawo.’—Par. 12:13.

6. Anong pakasabot an itinatao sa sato kan halimbawa ni Salomon kun dapit sa basehan nin tunay na kapangganahan?

⁶ Sa laog nin dakol na taon, naglakaw si Salomon na may pagkatakot sa Dios. Mababasa niato na ‘namoot sia ki Jehova, na naglakaw sia sa mga ipinapakuyog kan saiyang ama na si David.’ (1 Ha. 3:3) Bako daw na tunay na kapangganahan iyan? Sa paggiya nin Dios, si Salomon nagtogdok nin kahangahangang templo para sa tunay na pagsamba asin nagsurat nin tolong libro sa Biblia. Minsan ngani tibaad dai man niato gigibohon an arog kaiyan, an halimbawa ni Salomon kan maimbod pa sia sa Dios makakatabang sa sato na isip-isipon kun ano an tunay na kapangganahan asin aboton iyan. Mapadapit digdi, girumdomon na pinasabngan si Salomon na sambiton na daing saysay an ibinibilang nin kadaklan na tawo ngonyan na basehan nin kapangganahan—an kayamanan, kadonongan, kabantogan, asin kapangyarihan. An siring na mga bagay talagang daing halaga, paglapag sa duros. Dai daw nindo naoobserbaran na dakol na mamomoton sa kayamanan an nagmamawot na magkaigwa nin mas dakol pa? Asin parate sindang nahahadit sa mga pagsadiri ninda. Dugang pa, maabot an panahon na an saindang kayamanan mapapasaibang tawo.—Basahon an Parahulit 2:8-11, 17; 5:10-12.

7, 8. Paano nawara ni Salomon an saiyang kaimbodan, asin ano an nagin resulta?

⁷ Aram man nindo na kan huri dai na nagin maimbod si Salomon. An Tataramon nin Dios nagsasabi: ‘Kan maggurang na si Salomon, an saiyang mga agom pinakiling an saiyang puso [sa pagsunod sa] ibang mga dios; asin an saiyang puso bakong sangkap ki Jehova na saiyang Dios, na siring kan puso kan saiyang amang si David. Guminibo si Salomon kan maraot sa mga mata ni Jehova.’—1 Ha. 11:4-6.

⁸ Tama sanang maanggot si Jehova asin sinabi nia ki Salomon: ‘Huli ta dai mo pinagkuyog an sakuyang tipan asin an sakuyang mga ipinapakuyog  na ipinagboot ko sa saimo, puputolon ko an saimong kahadean, asin itatao ko iyan sa saimong oripon na lalaki.’ (1 Ha. 11:11) Makamomondo nanggad! Minsan ngani mapanggana si Salomon sa dakol na paagi, pag-abot nin panahon napamondo nia si Jehova. Si Salomon dai nagin mapanggana sa pagigin maimbod sa Dios, na iyo an pinakaimportanteng aspekto kan buhay. Puedeng ihapot kan lambang saro sa sato, ‘Determinado daw akong siertohon na an leksion na nanodan ko sa buhay ni Salomon makakatabang sa sako na magin mapanggana?’

9. Sa pamantayan kan kinaban, mapanggana daw si Pablo? Ipaliwanag.

⁹ An buhay ni apostol Pablo laen na marhay sa buhay ni Hadeng Salomon. Si Pablo dai namuhay nin maginhawa sa palasyo o nagkakan asin nag-inom kaiba nin mga hade. Imbes, igwa nin mga panahon na sia nagutom, napaha, linipot, asin haros daing ikasulot. (2 Cor. 11:24-27) Pagkatapos na akoon nia si Jesus bilang Mesiyas, si Pablo dai na nagkaigwa nin katongdan sa Judiong relihion. Imbes, naongis sa saiya an Judiong mga lider nin relihion. Sia ibinilanggo, linatigo, hinampak, asin ginapo. Sinabi ni Pablo na sia asin an saiyang mga kapwa Kristiano piglait, pinersegir, asin pinakaraot. “Garo na kami basura sa kinaban na ini—mga mayong pakinabang sa kinaban sagkod sa oras na ini!”—1 Cor. 4:11-13, An Marahay na Bareta Biblia.

10. Taano ta garo baga sinayumahan ni Pablo an kapangganahan?

¹⁰ Kan si apostol Pablo hoben pa asin midbid na Saulo, dakol siang bentaha. Tibaad gikan sia sa prominenteng pamilya. Tinokdoan sia ni Gamaliel, na sarong iginagalang na paratokdo, asin kan huri isinurat nia: ‘Ako nagtalubo sa relihion nin mga Judio nin labi kan ibang mga kaedad ko.’ (Gal. 1:14) Si Saulo matibay sa Hebreo saka Griego. Siudadano man sia kan Roma, kaya yaon sa saiya an minamawot na marhay na mga pribilehio asin deretso. Kun ipinagpadagos nia an mga ibinibilang na kapangganahan kan kinaban, posibleng marhay na mas nagin bantog sia asin mas may kasegurohan sa pinansial. Pero, pinili nia an pamumuhay na para sa iba—tibaad pati sa ibang kapamilya nia —biyong kamangmangan. Taano?

11. Ano an pinahalagahan ni Pablo, asin ano an determinasyon nia? Taano?

¹¹ Namotan ni Pablo si Jehova asin mas minawot nia an Saiyang pag-oyon kisa magin mayaman saka prominente. Huli sa tamang pakaaram kan katotoohan, pinahalagahan ni Pablo an pantubos, an Kristianong ministeryo, an paglaom na buhay sa langit—mga bagay na binabaliwala kan kinaban. Napag-isip-isip ni Pablo na igwang isyu na dapat resolberan. Sinabi ni Satanas na kaya niang italikod an mga tawo sa paglilingkod sa Dios. (Job 1:9-11; 2:3-5) Ano man na mga pagbalo an agihan ni Pablo, determinado siang magin maimbod sa  Dios asin magdanay sa tunay na pagsamba. Sarong bagay iyan na dai kinokonsiderar kan kadaklan sa kinaban na gustong magin mapanggana.

12. Taano ta sa Dios ka naglalaom?

¹² An determinasyon mo daw kapareho kan ki Pablo? Minsan ngani bakong pirmeng pasil an magin maimbod, aram niato na nagbubunga iyan nin bendisyon saka pag-oyon ni Jehova, asin iyan an nagpapagin mapanggana sa saro. (Tal. 10:22) Nakikinabang kita ngonyan, asin siertong makakalaom kita nin mga bendisyon sa maabot na panahon. (Basahon an Marcos 10:29, 30.) Kaya, may dahilan nanggad kita na ‘dai maglaom sa kadayaan nin kayamanan, kundi sa Dios, na nagtatao sa sato nin labi-labi kan gabos na bagay’ para sa satong ikakaogma. Kita nagtitipon o ‘nagririmpos manongod sa sato man sana nin marahay na [pundasyon] manongod sa panahon na madatong’ tanganing makapangapot kita sa tunay na buhay. (1 Tim. 6:17-19) Iyo, makakasierto nanggad kita na pakalihis nin sanggatos o sangribo pa nganing taon poon ngonyan, masasabi niato mantang ginigirumdom an nakaagi, “Naglakaw ako sa dalan nin tunay na kapangganahan!”

13. Anong konseho an itinao ni Jesus dapit sa pagtipon nin kayamanan?

¹³ Dapit sa kayamanan, sinabi ni Jesus: ‘Dai kamo magtipon nin mga kayamanan sa kinaban, kun saen an bukbok asin an takla nakakaraot, asin kun saen an mga mahabon nagsasalakat asin naghahabon. Kundi magtiripon kamo sa saindo nin mga kayamanan sa langit, na duman an bukbok asin takla dai nakakaraot, asin an mga parahabon dai nagsasalakat asin dai naghahabon: Huli ta kun saen an saindong kayamanan, dian man an saindong puso.’—Mat. 6:19-21.

14. Taano ta bakong madonong na maghanap nin kayamanan sa kinaban?

¹⁴ An kayamanan nin saro tibaad bako sanang kuarta. Puedeng kaiba dian an arin man sa mga sinambit ni Salomon na sa pagmansay nin mga tawo konektado sa pagigin mapanggana—an kabantogan o kapangyarihan. An sinabi ni Jesus kapareho kan sinambit ni Salomon sa libro nin Parahulit—an kayamanan sa kinaban dai nagdadanay. Arog kan posibleng marhay na naoobserbaran nindo sa kinaban, an siring na kayamanan nararaot asin madaling mawara. Dapit sa siring na kayamanan, si Propesor F. Dale Bruner nagsurat: “Aram na marhay na an kabantogan temporaryo sana. An iniidolo kan Sabado dai mahahaloy malilingawan na. An mapanggana sa pinansial ngonyan na taon bangkarote na sa sunod na taon. . . . Namomotan [ni Jesus] an mga tawo. Sinadol nia sinda na likayan an seguradong kamondoan na resulta nin madaling mawarang onra. Dai iyan nagdadanay. Habo ni Jesus na magin mamondo an saiyang mga disipulo. ‘Aroaldaw sa kinaban may minabagsak na dati nasa itaas pa sana.’” Minsan ngani an kadaklan maoyon sa mga sinabing iyan, pira man daw an magigin andam na ioyon an saindang pamumuhay sa mga katunayan na iyan? Saro ka daw sa sainda?

15. Anong kapangganahan an maninigo niatong pagmaigotan?

¹⁵ Itinotokdo nin nagkapirang lider nin relihion na salang magmaigot na magin mapanggana  asin na maninigong pugolan an gabos na paghihingoang iyan. Pero, mangnohon na dai kinokondenar ni Jesus an gabos na arog kaiyan na paghihingoa. Imbes, sinadol nia an saiyang mga disipulo na bagohon an pokus kan saindang paghihingoa, na magsaray nin dai nararaot na ‘mga kayamanan sa langit.’ Maninigo na an pangenot niatong kamawotan iyo na magin mapanggana sa pagmansay ni Jehova. Iyo, ipinapagirumdom sa sato kan mga tataramon ni Jesus na puede niatong pilion kun ano an satong pagmamaigotan na kamtan. An totoo, an pagmamaigotan niatong kamtan iyo an mga nasa puso ta o mga bagay na pinapahalagahan niato.

16. Sa ano nanggad kita makakapagtiwala?

¹⁶ Kun nasa puso ta na paogmahon si Jehova, makakasierto kita na itatao nia an mga pangangaipo niato. Tibaad itogot nia na temporaryo kitang magutom o mapaha arog kan nangyari ki apostol Pablo. (1 Cor. 4:11) Minsan siring, makakapagtiwala nanggad kita sa madonong na sadol ni Jesus: ‘Dai kamo mahadit asin magsabi, “Ano an samong kakakanon?” o, “Ano an samong iinomon?” o, “Ano an samong gugubingon?” Huli ta an gabos na bagay na ini hinahanap nin mga Gentil; huli ta naaaraman kan saindong Amang langitnon, na kinakaipuhan nindo ining gabos na bagay. Alagad hanapa nguna nindo an kahadean nin Dios asin an saiyang katanosan; asin ining gabos na bagay idadagdag na sana saindo.’—Mat. 6:31-33.

17, 18. (a) Sa ano nakadepende an tunay na kapangganahan? (b) Sa ano dai nakadepende an kapangganahan?

¹⁷ An sarong mayor na punto iyo ini: An tunay na kapangganahan dai nakadepende sa mga naabot niato o sa satong kamugtakan sa paghiling kan kinaban. Dai man iyan nakadepende sa pagkaigwa nin partikular na paninimbagan sa Kristianong areglo. An siring na bendisyon puedeng konektado sa tunay na basehan nin kapangganahan, an pagkuyog asin kaimbodan niato sa Dios, na nag-aasegurar sa sato: ‘Kinakaipuhan sa mga pinaniniwalaan [“mayordomo,” NW] na an tawo magin maimbod.’ (1 Cor. 4:2) Asin kaipuhan kitang magdanay na maimbod. Sinabi ni Jesus: “An makatagal sagkod sa katapusan, ini an makakaligtas.” (Mat. 10:22) Dai daw kamo maoyon na an kaligtasan dai manenegaran na ebidensia nin kapangganahan?

¹⁸ Sa paghorophorop sa mga puntong nasambitan, mahihiling nindo na an kaimbodan sa Dios dai konektado sa kabantogan, edukasyon, pinansial na kamugtakan, o posisyon sa sosyedad. Dai man iyan nakadepende sa kadonongan, talento, o abilidad. Ano man an inaagihan niato puede kitang magin maimbod sa Dios. Sa banwaan nin Dios kan enot na siglo, an nagkapira mayaman mantang an iba dukha. Kun dapit sa mga mayaman, tama sanang sinadol sinda ni Pablo ‘na maggibo nin marahay, tanganing sinda magyaman sa mga marahay na gibo, na magin andam sa pagwaras, na may boot sa pagdamay.’ An mga mayaman asin dukha kaidto parehong makakapangapot sa tunay na buhay. (1 Tim. 6:17-19) Totoo man iyan ngonyan. Gabos kita parareho an oportunidad asin paninimbagan: Kaipuhan kitang magdanay na maimbod asin magin ‘mayaman sa mga marahay na gibo.’ Kun gigibohon niato iyan, magigin mapanggana kita sa paghiling kan satong Kaglalang asin magigin magayagaya sa pakaaram na napapaogma niato Sia.—Tal. 27:11.

19. Kun dapit sa kapangganahan, ano an saimong determinasyon?

¹⁹ Tibaad dai mo makokontrol nin lubos an saimong situwasyon, pero may magigibo ka kun dapit sa pag-atubang dian. Magmaigot na magin maimbod ano man an situwasyon mo. Sulit an paghihingoang iyan. Magtiwala na abundang bebendisyonan ka ni Jehova—ngonyan asin sagkod noarin man. Nungkang lingawan an mga tataramon ni Jesus sa linahidan na mga Kristiano: ‘Magdanay kang maimbod sagkod sa kagadanan, asin ako matao sa saimo kan korona nin buhay.’ (Kap. 2:10) Iyan nanggad an tunay na kapangganahan!