Nagigirumdoman Mo daw?
Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Bueno, hilinga kun masisimbag mo an minasunod na mga hapot:
Paano niato masisigbo an kalayo nin daing kontrol na pagtaram?
Maninigo tang siyasaton an satong puso. Imbes na magin mapagkritika sa sarong tugang, taano ta dai aramon kun ano an posibleng dahilan na kinikritika niato sia? Tangani daw na ipahiling na mas marahay kita? Apuera dian, an pagigin mapagkritika puedeng makapagrabe sa nakakatension na situwasyon.—8/15, pahina 21.
Paano ipinahiling kan Ley an pagmansay nin Dios sa mga babae?
An mga babaeng Israelita igwa nanggad nin katalingkasan asin may oportunidad sa edukasyon. Dapat sindang tawan nin onra asin igalang, na pinoprotektaran an saindang mga deretso.—9/1-E, pahina 5-7.
Mantang nagdadangadang an aldaw ni Jehova, ano pa an mga mangyayari?
Ipoproklamar an “Katoninongan asin katiwasayan!” Sasalakayon asin lalaglagon kan mga nasyon an Dakulang Babilonya. Sasalakayon an banwaan nin Dios. Mangyayari an giera nin Armagedon, dangan si Satanas asin an saiyang mga demonyo iaapon sa bûngaw.—9/15, pahina 4.
Paano kita nakikinabang sa dai ta pakaaram kun noarin maabot an katapusan?
Huling dai ta aram an eksaktong aldaw o oras, may pagkakataon kitang ipahiling kun ano an nasa puso niato. Nagtatao iyan sa sato nin oportunidad na paogmahon an puso nin Dios. Dinadagka kita kaiyan na mamuhay na may pagsasakripisyo asin tinatabangan na lubos na magsarig sa Dios saka sa saiyang Tataramon. Huli man kaiyan, nadadalisay kita kan mga problema sa presente.—9/15, pahina 24-25.
Paano ta magagamit an Genesis 3:19 tanganing mangatanosan sa saro na nagtutubod sa nagkakalayong impierno?
Sinasabi kan bersikulo na pag nagadan, si Adan mabalik sa kabokabo kan daga, bako na mapapaduman sa nagkakalayong impierno.—10/1, pahina 13.
Sairisay an irinerepresentar kan “pitong bitoon” sa toong kamot ni Jesus na nasambitan sa Kapahayagan 1:16, 20?
Nagrerepresentar iyan sa linahidan nin espiritu na mga paraataman sa mga kongregasyon, asin puede man na ipanongod sa gabos na paraataman.—10/15, pahina 14.
Ano an puedeng gibohon nin pamilya kun may mga utang sinda?
An mag-agom maninigong mag-olay nin kalmado asin daing pag-alangan dapit sa saindang utang. Makakatabang kun aanalisaron ninda an saindang badyet ngonyan. Kaya daw nindang dagdagan an saindang ginaganar o bawasan an gastos kan pamilya? Maninigo sindang magdesisyon kun arin an enot nindang babayadan, na puedeng nakikipagnegosyar sa mga inutangan. Pero dapat realistiko sinda asin timbang an pagmansay sa kuarta. (1 Tim. 6:8)—11/1-E, pahina 19-21.
Paano ipinahiling ni Jesus an kapakumbabaan na ilinaladawan sa Isaias 50:4, 5?
An saro na igwa kan “dila na sa madonong,” segun sa mga bersikulong iyan, ‘dai masibog.’ Nagpahiling si Jesus nin kapakumbabaan paagi sa pagigin atentibo sa itinotokdo sa saiya kan saiyang Ama. Gustong-gusto ni Jesus asin andam sia na makanood ki Jehova, na inoobserbaran na marhay an kapakumbabaan nin Dios sa pagpahiling nin pagkaherak sa makasalan na katawohan.—11/15, pahina 11.
Paano an sarong selyo dapit sa kasaysayan nin Estonia nagpapatotoo sa integridad kan mga Saksi ni Jehova?
Kan 2007, an National Post Office nagpaluwas nin selyo dapit sa paggadan ni Stalin sa dakolon na taga Estonia. Nakasurat dian an numerong 382, na nanonongod sa bilang kan mga Saksi pati kan saindang mga aki na idineportar kan 1951 sa mga kampo nin puersahan na pagtrabaho sa Russia, na harayo sa saindang mga harong sa Estonia.—12/1-E, pahina 27-28.
