1, 2. (a) Ano an ‘tabernakulo ni David,’ asin paano iyan itutugdok liwat? (b) Sairisay an nagkakasararo bilang mga lingkod ni Jehova ngunyan?

DURANTE kan sarong mahalagang marhay na pagtiripon kan namamahalang grupo sa Jerusalem kan 49 C.E., an disipulong si Santiago nagsabi: ‘Si Simon [Pedro] nagsaysay sato dapit kan pagsungko [pagtao nin atensiyon] nin Diyos sa mga Hentil, sa pagkua diyan sa sainda nin sarong banwaan manungod sa saiyang ngaran. Asin digdi minauyon an tataramon nin mga Propeta, siring sa nasusurat, “Pakatapos kan mga bagay na ini ako mabalik asin mapatindog liwat kan tabernakulo ni David na nagaba; asin ako mahirahay liwat kan saiyang mga pagkagaba asin iyan titindugon ko, tanganing maghanap sa Kagurangnan an matada sa mga tawo asin an gabos na Hentil na diyan sa sainda inaapod an sakong ngaran, [an sabi] nin Kagurangnan, na kaidto pa nagpapahayag kan mga bagay na ini.”’—Gui. 15:13-18.

² ‘An tabernakulo [o, dinastiya nin mga hadi] ni David’ buminagsak kan hinali sa trono si Hading Zedequias. (Amos 9:11) Pero an ‘tabernakulo’ na iyan itutugdok liwat, na an permanenteng Hadi iyo si Jesus na naggikan ki David. (Ezeq. 21:27; Gui. 2:29-36) Arog kan sinabi ni Santiago sa makasaysayan na pagtiripon na iyan, an hulang ini ni Amos nauutob sa pagtipon kan mga magmamana kan Kahadian, Judio sagkod Hentil. Ngunyan, an natatada sa linahidan na mga Kristiyano asin an minilyon na ‘ibang karnero’ ni Jesus nagkakasararo sa pagpahayag kan katotoohan sa Bibliya bilang mga lingkod ni Jehova.—Juan 10:16.

3, 4. Paano napagdanay kan banwaan ni Jehova an espirituwalidad ninda mantang nasa Babilonya?

³ Kan an mga Judio darahon sa Babilonya bilang mga bihag, malinaw na buminagsak na an ‘tabernakulo ni David.’ Huling lakop na marhay sa kahadian nin Babilonya an palsong relihiyon, paano napagdanay kan banwaan nin Diyos an espirituwalidad  ninda durante kan 70 taon na pagkadistiyero duman puon 607 B.C.E. sagkod 537 B.C.E.? Kapareho kan ginigibo ta bilang banwaan ni Jehova sa kinaban na ini na kontrolado ni Satanas. (1 Juan 5:19) An abundang espirituwal na mana nakatabang na mapagdanay an espirituwalidad.

⁴ Yaon sa sato an nasusurat na Tataramon nin Diyos bilang kabtang kan satong espirituwal na mana. An mga Judiong nadistiyero sa Babilonya mayo kan kompletong Banal na Kasuratan, pero aram ninda an Ley ni Moises, kaiba na an Sampulong Tugon. Aram ninda an mga ‘awit nin pag-omaw sa Sion,’ nagigirumduman an dakul na talinhaga, asin pamilyar sa pambihirang mga nagibo kan suanoy na mga lingkod ni Jehova. Iyo, naghihiribi an mga nadistiyerong idto pag nagigirumduman an Sion, asin dai ninda liningawan si Jehova. (Basahon an Salmo 137:1-6.) Pinagdanay sinda kaiyan na buhay sa espirituwal dawa nasa Babilonya, na kadakul nin palsong doktrina asin kaugalian.

5. Anong mga halimbawa nin tuluhan na diyos, o trinidad, an pinapaniwalaan sa suanoy na Babilonya asin Ehipto?

⁵ An tuluhan na diyos, o trinidad, sarong nangingibabaw na kabtang nin pagsamba sa Babilonya. An sarong trinidad kan Babilonya kompuwesto ni Sin (diyos na bulan), Samas (diyos na saldang), asin Istar (diyosa nin pagkamainaki asin giyera). Sa suanoy na Ehipto, an sarong diyos parating ibinibilang na may agom na diyosa na nagkaaki nin lalaki, kaya sinda “nagigin tuluhan na diyos o trinidad kun sain an ama bako pirmi an namumuon, kundi kun minsan kontento na siya bilang agom na prinsipe, mantang an panginot na sinasamba kan mga taga duman iyo an diyosa.” (New Larousse Encyclopedia of Mythology) An sarong trinidad kan Ehipto kompuwesto kan diyos na si Osiris, diyosang si Isis, asin kan aki nindang lalaki na si Horus.

6. Ano an Trinidad, asin paano kita napoprotektaran sa siring na salang paniniwala?

⁶ An Kakristiyanuhan nagtutubod man sa tuluhan na diyos—an Trinidad. Sinasabi kan mga klerigo na an Ama, an Aki, asin an banal na espiritu sarong Diyos. Pero saro iyan na pag-atake sa soberaniya ni Jehova, na garo baga pinapaluwas na siya kabtang nin tuluhan na diyos—an buot sabihon, un-tersio sana kan subuot na pagka-diyos. Napoprotektaran an banwaan ni Jehova sa siring na salang paniniwala huling uyon sinda sa ipinasabong na mga tataramon na ini: ‘Danguga, Israel: Si Jehova satuyang Diyos, si Jehova saro sana.’ (Deut. 6:4) Kinotar iyan ni Jesus, asin igwa daw nin tunay na Kristiyano na dai mauyon sa saiya?—Mar. 12:29.

7. Taano ta an saro na nagtutubod sa Trinidad imposibleng mabawtismuhan bilang simbolo nin balidong pagdusay sa Diyos?

⁷ An doktrinang Trinidad minakontra sa sugo ni Jesus sa saiyang mga parasunod na ‘gibuhon na disipulo an gabos na nasyon, na bunyagan [bawtismuhan] sinda sa ngaran nin Ama asin nin Aki patin nin espiritu santo.’ (Mat. 28:19) Tanganing mabawtismuhan bilang tunay na Kristiyano asin saro sa mga Saksi ni Jehova, dapat midbidon nin saro an pagigin supremo kan Ama, si Jehova, siring man an posisyon saka awtoridad kan Aki nin Diyos, si Jesus. An kandidato sa bawtismo dapat man na magtubod na an banal na espiritu iyo an aktibong puwersa nin Diyos, asin bakong kabtang nin Trinidad. (Gen. 1:2) An indibiduwal na padagos na nagtutubod sa Trinidad dai puwedeng mabawtismuhan bilang simbolo nin balidong pagdusay ki Jehova Diyos. Nagpapasalamat nanggad kita huling an satong espirituwal na mana nagpoprotektar sa sato sa katukdoan na ini na dai nagtataong onra sa Diyos!

8. Ano an paniniwala kan mga Babilonyo dapit sa mga diyos asin demonyo?

⁸ An mga tawo sa kahadian nin Babilonya nagtutubod sa mga palsong doktrina, mga diyos, demonyo, asin espiritismo. An The International Standard Bible Encyclopaedia nagsasabi: “Sa relihiyon kan Babilonya, an sunod na importante apuwera sa mga diyos iyo an mga demonyo na may kapangyarihan na pasakitan an mga tawo nin dakul  na klase nin hilang sa hawak o sa isip. An dakulang kabtang kan relihiyon na ini minalataw na nakakonsentrar sa masakit na pakikipaglaban sa mga demonyo, asin sain man na lugar, an mga diyos pinapamibian tanganing tabangan an mga tawo laban sa mga demonyong ini.”

9. (a) Pagkatapos kan pagkadistiyero ninda sa Babilonya, paano an dakul na Judio nabiktima nin palsong mga ideya nin relihiyon? (b) Paano kita napoprotektaran sa mga peligro nin tuyong pakikilabot sa mga demonyo?

⁹ Pagkatapos kan pagkadistiyero ninda sa Babilonya, dakul na Judio an nabiktima nin mga ideya na bakong suno sa Kasuratan. Kan luminaog an mga ideya kan mga Griego, an dakul na Judio nagin madaling makontrol nin mga demonyo huling naniniwala na sinda na puwedeng magin maraot o marahay an mga demonyo. An satong espirituwal na mana nagpoprotektar sa sato sa mga peligro nin tuyong pakikilabot sa mga demonyo, huling aram ta na kinokondenar nin Diyos an espiritistikong mga kaugalian kan Babilonya. (Isa. 47:1, 12-15) An pagmansay nin Diyos sa espiritismo naggigiya man sa sato.—Basahon an Deuteronomio 18:10-12; Kapahayagan 21:8.

10. Ano an sinasabi manungod sa mga kaugalian asin paniniwala kan Dakulang Babilonya?

¹⁰ Bako sanang mga Babilonyo an nagsagibo nin espiritismo; ginigibo man iyan kan mga nagsusuportar sa Dakulang Babilonya, an pambilog na kinaban na imperyo nin palsong relihiyon. (Kap. 18:21-24) An The Interpreter’s Dictionary of the Bible nagsasabi: “Bako sanang sarong imperyo o kultura an sakop kan [Dakulang] Babilonya. An nagdedeterminar kaiyan iyo an lakop na idolatriya imbes na an heograpikong mga linderos o peryodo nin panahon.” (Vol. 1, p. 338) An Dakulang Babilonya, na pano-pano nin espiritismo, idolatriya, asin iba pang kasalan, yaon pa man giraray—pero dai iyan mahaloy.—Basahon an Kapahayagan 18:1-5.

11. Anong mga patanid mapadapit sa espiritismo an nasa satong mga publikasyon?

¹¹ Ipinahayag ni Jehova: “Dai ko na matitios an paggamit nin misteryosong kapangyarihan.” (Isa. 1:13, NW) An pagsagibo nin espiritismo, na parating inaapod na espirituwalismo, dakula an nagin impluwensiya sa kaisipan nin mga tawo kan ika-19 siglo. Kaya an Zion’s Watch Tower na Mayo 1885 nagsabi: “An pagtubod na an mga gadan buhay sa ibang rona o nabubuhay bilang ibang linalang bako nang bago. Kabtang na iyan kan suanoy na mga relihiyon, asin diyan mismo nakabase an gabos na mitolohiya.” Idinagdag pa kan artikulo na an bakong suno sa Kasuratan na paniniwala na an mga gadan nakakakomunikar sa mga buhay “nagtahob asin nagsuportar sa pandadaya kan ‘mga demonyo’ na nagsasagin na mga espiritung nagsuway sa hawak kan mga nagadan. Gustuhon nindang pagparaaprobetsaran an paaging ini nin pagtago kun siisay sinda, asin sa siring padagos nindang naiimpluwensiyahan an kaisipan asin buhay nin dakul.” An buklet kaidto na What Say the Scriptures About Spiritism? nagtao nin kaagid na mga patanid, arog kan ginigibo kan mga publikasyon ta ngunyan.

12. Ano an ipinasabong ki Salomon manungod sa kamugtakan kan mga gadan?

¹² “An gabos . . . na nakakaaram kan katotoohan” makakasimbag sa hapot na iyan. (2 Juan 1) Siyertong uyon kita sa mga tataramon ni Salomon: ‘Marahay pa an ayam na buhay kisa kan leon na gadan. Huli ta an mga nabubuhay nakakaisi na magkakagaradan sinda; tara an mga gadan mayo nin ano man na nanunudan. An gabos na umabot sa kamot mo na gigibuhon, gibuha nin bagay sa saimong mga kusog, huli ta sa lulubngan na saimong pinagdadangadangan mayong gigibuhon, minsan kadunungan, minsan pakanuod.’—Par. 9:4, 5, 10.

13. Paano an mga Judio naapektaran kan relihiyon asin kultura kan mga Griego?

¹³ Aram kan mga Judio an katotoohan manungod sa mga gadan. Pero kan an Grecia magkabaranga sa mga heneral ni Alejandrong Dakula, nagkaigwa nin paghihinguwa na isaro an Juda sa Siria paagi sa relihiyon saka kultura kan mga Griego. Bilang resulta, inako kan mga Judio an palsong  mga katukduan na an kalag nin tawo imortal asin na igwa nin sarong kinaban nin pagpasakit sa irarom kan daga. Bakong hali sa mga Griego an ideya dapit sa sarong lugar sa irarom kan daga na pano nin nagsasakit na mga kalag, huling an mga Babilonyo naniniwala sa “kinaban sa irarom kan daga . . . bilang makatakuton na lugar, . . . na pinamamahalaan nin makusugon asin maisugon na mga diyos saka demonyo.” (The Religion of Babylonia and Assyria) Iyo, naniniwala an mga Babilonyo na imortal an kalag.

14. Ano an aram ni Job asin Abraham manungod sa kagadanan asin pagkabuhay liwat?

¹⁴ Dawa ngani mayo kan Kasuratan an matanos na si Job, aram niya an katotoohan manungod sa kagadanan. Nasasabutan man niya na si Jehova sarong mamumuton na Diyos na maghihimuyawot na buhayon siya liwat. (Job 14:13-15) Si Abraham nagtutubod man sa pagkabuhay liwat. (Basahon an Hebreo 11:17-19.) Huling imposibleng buhayon liwat an saro na dai nagagadan, an mga lalaking idto na may takot sa Diyos dai nagtubod na an kalag nin tawo imortal. Daing duda na si Job saka Abraham tinabangan kan espiritu nin Diyos na masabutan an kamugtakan kan mga gadan asin magtubod sa pagkabuhay liwat. An mga katotoohan na ini kabtang man kan satong mana.

15, 16. Paano kita nakabutas sa kasalan asin kagadanan?

¹⁵ Nagpapasalamat kita huling ihinayag man nin Diyos an katotoohan manungod sa saiyang paagi nin pagligtas sa sato sa kasalan asin kagadanan na minana ta ki Adan. (Roma 5:12) Nasasabutan ta na si Jesus ‘dai napadigdi tanganing paglingkudan, kundi tanganing maglingkod asin itao an saiyang buhay sa pagtubos sa kabalakidan.’ (Mar. 10:45) Marahayon nanggad na maaraman an manungod sa “pagkabutas huli sa pantubos na ibinayad ni Cristo Jesus”!—Roma 3:22-24, NW.

¹⁶ An mga Judio saka Hentil kan inot na siglo kinaipuhan na magsulsol kan saindang mga kasalan asin magtubod sa atang na pantubos ni Jesus. Ta kun dai, dai sinda mapapatawad. Iyo man  ngunyan. (Juan 3:16, 36) Kun an saro nangangapot sa palsong mga doktrina, arog kan Trinidad asin imortalidad kan kalag, dai siya makikinabang sa pantubos. Pero kita iyo. Aram ta an katotoohan manungod sa ‘Aki kan pagkamuot [nin Diyos], na diyan sa saiya igwa kita kan satong katubusan [pagkabutas huli sa pantubos], an kapatawadan kan satong mga kasalan.’—Col. 1:13, 14.

17, 18. Sain kita makakakua nin nakakatabang na impormasyon manungod sa satong kasaysayan, asin paano kita makikinabang sa pakanuod dapit diyan?

¹⁷ Kadakul pa kitang masasabi manungod sa totoong mga katukduan na tinutubod ta, sa mga eksperyensiya ta bilang mga lingkod nin Diyos, asin sa espirituwal saka materyal na mga bendisyon na nakakamtan ta. An satong mga Yearbook dakul na dekada nang igwa nin nakakapukaw sa buot na mga salaysay manungod sa mga aktibidad niyato sa mga kadagaan sa bilog na kinaban. An kasaysayan ta iinestorya sa mga video na Faith in Action, Part 1 saka Part 2, asin sa mga publikasyon na arog kan Jehovah’s Witnesses—Proclaimers of God’s Kingdom. Asin an mga magasin ta parating igwa nin nakakapukaw sa buot na personal na mga salaysay kan satuyang namumutan na marhay na mga kapagtubod.

¹⁸ Nakikinabang kita sa timbang na pag-estudyar sa kasaysayan kan organisasyon ni Jehova, kun paanong nakinabang an banwaan nin Israel sa paghurop-hurop dapit sa kun paano sinda kinalda nin Diyos sa pagkauripon sa Ehipto. (Ex. 12:26, 27) Bilang sarong gurang na makakapagpatotoo sa makangangalas na mga ginibo nin Diyos, sinadol ni Moises an mga Israelita: ‘Girumdumon mo an mga inot na panahon; huna-hunaon nindo an mga taon nin dakul na kapag-arakian; haputa an saimong ama, ta siya magsasabi saimo; an mga magugurang, asin sinda sasabihan ka.’ (Deut. 32:7) Bilang ‘banwaan ni Jehova,’ kita gabos magayagayang nagpapahayag nin pag-umaw sa saiya asin nagsasabi sa iba kan makapangyarihan niyang mga gibo. (Sal. 79:13) Marahay na siyasaton ta man an satong kasaysayan, makanuod diyan, asin magplano para sa maabot na panahon.

19. Huling igwa kita kan espirituwal na liwanag, ano an dapat tang gibuhon?

¹⁹ Nagpapasalamat kita huling dai kita naglalakaw sa kadikluman kundi igwa kita kan espirituwal na liwanag na gikan sa Diyos. (Tal. 4:18, 19) Kaya mahigos tang pag-adalan an Tataramon nin Diyos asin maigot na ipaabot sa iba an katotoohan na may mapagngayongayong espiritu arog kan salmista, na inumaw an Soberanong Kagurangnan na Jehova paagi sa mga tataramon na ini: ‘Mayo akong ipagbabantog kundi an saimong karahayan. O Diyos, puon kan ako aki pa tinukduan mo na ako, asin padagos na ipagbabantog ko an makangangalas mong mga gibo. Ngunyan na ako gurang saka ubanon na, O Diyos, dai mo ako pagbayaan, sagkod na ikabalangibog ko an saimong kapangyarihan sa gabos na maabot na kapag-arakian.’—Sal. 71:16-18, An Marahay na Bareta Biblia.

20. Anong duwang isyu an magkakonektar, asin ano an sabuot mo diyan?

²⁰ Bilang nagdusay na mga lingkod ni Jehova, nasasabutan ta an magkakonektar na isyu dapit sa soberaniya nin Diyos asin integridad nin tawo. Iyo, ibinabalangibog ta an dai manenegaran na katotoohan na si Jehova an Soberano kan Uniberso, na maninigo sa satong bilog na pusong debosyon. (Kap. 4:11) Sa tabang kan saiyang espiritu, ipinapahayag ta man sa mga mahuyo an maugmang bareta, binebendahan sabi ngani an mga nalugadan an puso, asin rinaranga an mga nagtatangis. (Isa. 61:1, 2) Dawa ngani an banwaan nin Diyos asin an bilog na katawuhan hinihinguwa ni Satanas na makontrol, na dai magigin mapanggana, pinapahalagahan tang marhay an satong espirituwal na mana asin determinado na papagdanayon an satong integridad sa Diyos saka umawon an Soberanong Kagurangnan na Jehova ngunyan asin sagkod lamang.—Basahon an Salmo 26:11 *; Sal 86:12.