Matatabangan ka kan pirang eksperyensiya sa Britanya na mahiling kun taano ta dai ka nuarin man maninigong mawaran nin paglaom. Mahihiling mo man kun paano mo puwedeng ‘iapon an saimong tinapay sa ibabaw kan katubigan,’ sabi ngani, tanganing matabangan an mga dai pa naghihimati sa katotoohan.—Par. 11:1.

Mahalagang marhay kun magtitiyaga ka. Kaipuhan mong magdanay sa katotoohan asin mangapot ki Jehova. (Deut. 10:20) Iyan an ginibo ni Georgina. Kan makipag-adal siya sa Bibliya sa mga Saksi ni Jehova kan 1970, angguton an agom niyang si Kyriacos. Pinurbaran niyang papunduhon siya sa pag-adal, dai pinapadagos an mga Saksi, asin kinukua an ano man na mahiling niyang publikasyon kan Mga Saksi ni Jehova.

Kan nag-aatender na si Georgina sa mga pagtiripon, lalo pang naanggot si Kyriacos. Sarong aldaw nagduman siya sa Kingdom Hall para makipag-argumento. Kan narisa kan sarong sister na mas nakakapagtaram si Kyriacos nin Griego kisa sa Ingles, inapudan niya an sarong Griegong brother sa ibang kongregasyon para tumabang. Marahay an nagin reaksiyon ni Kyriacos huli sa kabuutan kan brother, asin sa laog nin pirang bulan, nag-adal pa ngani sinda nin Bibliya. Pero nagpundo si Kyriacos sa pag-adal.

Nagpadagos nin tulo pang taon an pagkontra ki Georgina. Sinabi ni Kyriacos na babayaan niya siya pag nagpabawtismo siya. Sa aldaw kan bawtismo, udok na namibi si Georgina ki Jehova na lugod dai siya pagbayaan ni Kyriacos. Kan si Georgina hapiton kan mga Saksi tanganing isabay pa-asamblea, sinabi ni Kyriacos: “Inot na kamo. Masunod na lang kami sa lunadan mi.” Nag-atender siya sa pang-agang sesyon asin nahiling an pagbawtismo sa agom niya!

Pakatapos kaiyan nabawasan an pagkontra ni Kyriacos, asin luway-luway siyang guminibo nin dakulang mga pagbabago. Haros 40 taon pakatapos kan inot niyang makaulay an mga Saksi, nahiling ni Georgina na binabawtismuhan an agom niya! Ano an nakatabang ki Kyriacos? Sinabi niya: “Ugmahon ako ki Georgina ta determinado talaga siya.” Sinabi ni Georgina: “Sa ibong kan pagkontra kan agom ko, dai ko inisip na magpundo sa pagsamba sa sakong Diyos. Puon kaidto, padagos akong namibi ki Jehova, asin dai ako nuarin man nawaran nin paglaom.”

An saro pang bagay tanganing matabangan mo an saimong agom iyo an pagkultibar mo kan Kristiyanong personalidad. Sinadol ni apostol Pedro an Kristiyanong mga agom na babayi: ‘Magpasakop sa saindong mga agom na lalaki, tanganing kun may dai minatubod sa tataramon, sinda madara na dai kan tataramon huli kan pamumuhay nin saindang mga agom na babayi.’ (1 Ped. 3:1) Sinunod iyan ni Christine, dawa ngani dakul na taon an naglihis bago niya nadara sa katotoohan an agom niya. Kan siya magin Saksi labing 20 taon na an nakaagi, an agom niyang si John dai nagtutubod na kaipuhan niya an Diyos sa saiyang buhay. Habo ni John na mapalabot sa relihiyon, alagad nahihiling niya kun gurano kahalaga ki Christine an saiyang bagong pagtubod. “Nahihiling ko na nakakapaugma iyan saiya,” an sabi niya. “Nagkaigwa siya nin makusog nanggad na paninindugan saka nagin masasarigan; nakatabang ini sako sa dakul na dipisil na sitwasyon.”

Nungkang ipinirit ni Christine an relihiyon niya sa saiyang agom, na nagsabi: “Sa puon pa sana, aram na ni Christine na mas maray kun pababayaan lang ako, asin mapasensiya niya akong pinabayaan na makanuod sa sadiri kong rikas asin paagi.” Pag may nahihiling si Christine na mga artikulo sa Watchtower o Awake! na aram niyang interesante para ki John, arog baga kan dapit sa siyensiya asin natural na kapalibutan, ipinapahiling niya iyan ki John asin minasabi, “Sa hiling ko magugustuhan mong basahon ini.”

Pag-abot nin panahon, nagretiro si John asin nag-ataman nin hardin. Huling mas may panahon na siya na pag-isipan an mas hararom na mga hapot sa buhay, napag-isip-isip niya, ‘Kita daw napadigdi huli sa sunod-sunod na pagkanurungod, o linalang kita na may katuyuhan?’ Sarong aldaw, hinapot si John kan kaistoryahan niyang brother, “Ano daw kun mag-adal kita?” “Ngunyan na nagtutubod na ako sa Diyos,” an sabi ni John, “nag-uyon ako.”

Marahay na sana ta dai nuarin man nawaran nin paglaom si Christine! Pakatapos niyang mamibi sa laog nin 20 taon na lugod akuon ni John an katotoohan, nabawtismuhan ini. Ngunyan, pareho na sindang maigot na naglilingkod ki Jehova. Sinabi ni John: “Duwang bagay an partikularmenteng nakadara sako—an kabuutan asin pagigin makikatuod kan mga Saksi. Asin kun an agom mo Saksi ni Jehova, igwa ka nin maimbod, masasarigan, asin mapagsakripisyong agom.” Iyo, isinabuhay ni Christine an sinabi sa 1 Pedro 3:1, asin nagin epektibo iyan!

Kumusta man an mga tinutukduan sa Bibliya na huli sa ano man na dahilan nawaran nin interes? ‘Itanom mo pagkaaga an saimong banhi, asin pagkahapon dai mo pagpahingaluan an saimong kamot,’ an isinurat ni Hading Salomon, ‘huli ta ika dai nakakaisi kun arin an urog karahay, kun baga ini kun baga idto, kun baga sindang duwa anas na marahay.’ (Par. 11:6) Kun minsan, an mga banhi kan katotoohan inaabot nin dakul na taon bago magtubo. Pero pag-abot nin panahon tibaad marealisar nin saro an kahalagahan kan pagrani sa Diyos. (Sant. 4:8) Iyo, sarong aldaw tibaad masurpresa ka na sana.

Estudyari an eksperyensiya ni Alice, na nagbalyo sa Inglatera hali sa India. Kan 1974 nag-ako siya nin pag-adal sa Bibliya. An saiyang lengguwahe Hindi pero gusto niyang magin mahusay sa Ingles. Nagpadagos an pag-adal niya nin pirang taon asin nag-atender nin pirang beses sa sarong kongregasyon na Ingles an lengguwahe. Aram niyang an pinag-aadalan niya iyo an katotoohan pero dai niya iyan sineseryoso. Saro pa, an saiyang atensiyon medyo nakapokus sa kuwarta asin gustuhon niyang magpasiring sa mga parti. Kan huri, nagpundo siya sa pag-adal.

Pakalihis nin haros 30 taon, si Stella, na dating nagtutukdo nin Bibliya ki Alice, nakaresibi nin surat hali sa saiya. Ini an sabi: “Sigurado akong mabibigla ka pag naaraman mo na an tinutukduan mo sa Bibliya kan 1974 nabawtismuhan kan nakaaging pandistritong kumbensiyon. Dakulaon an nagin papel mo sa buhay ko. Itinanom mo sakuya an banhi kan katotoohan, asin dawa ngani dai pa ako andam kaidto na magdusay sa Diyos, iningatan ko an banhing iyan nin katotoohan sa isip ko asin puso.”

Ano an nangyari? Ipinaliwanag ni Alice na namundo siyang marhay kan magadan an agom niya kan 1997. Namibi siya sa Diyos. Dai pang diyes minutos, duwang Saksi na nagtataram nin Punjabi an nagduman sa harong niya asin winalatan siya kan tract na What Hope for Dead Loved Ones? Namatian ni Alice na sinimbag an saiyang pamibi kaya nagdesisyon siya na kaipuhan niyang makiasosyar sa Mga Saksi ni Jehova. Pero sain sinda manunumpungan? Nakua niya an sarong lumang diary na igwa kan address kan kongregasyon na Punjabi na itinao ni Stella. Nagduman si Alice sa Kingdom Hall asin maugma siyang inako kan mga tugang sa kongregasyon na Punjabi. “Padagos kong namatian an pagkamuot na ipinahiling ninda, na nakatabang sako na maranga sa sakong kamunduan,” an sabi ni Alice.

Regular na siyang nag-atender sa mga pagtiripon asin nag-adal giraray nin Bibliya, asin nagin mahusay magtaram saka magbasa nin Punjabi. Nabawtismuhan siya kan 2003. Arog kaini nagtapos an surat niya ki Stella, “Salamat na marhay sa pagtanom kan mga banhing idto 29 taon na an nakaagi asin sa pagtao nin marahay na halimbawa na maaarog ko.”

“Salamat na marhay sa pagtanom kan mga banhing idto 29 taon na an nakaagi asin sa pagtao nin marahay na halimbawa na maaarog ko.”—Alice

Ano an manunudan mo sa mga eksperyensiyang ini? Tibaad mas maghaloy iyan kisa sa inaasahan mo, pero kun an saro talagang gutom sa espirituwal, onesto, asin mapakumbaba, papatalubuon ni Jehova an katotoohan sa saiyang puso. Tandaan an sinabi sa ilustrasyon ni Jesus: ‘An banhi nabuhay asin nagtalubo, na dai naaaraman [kan parasabwag] kun paano. An daga minabunga sa saiya man sana; an dahon nguna, dangan an uhoy, dangan an matimgas na tipasi sa uhoy.’ (Mar. 4:27, 28) An siring na pagtalubo luway-luway asin nangyayari “sa saiya man sana,” o sa sadiri niya. An totoo, dai aram kan lambang parabalangibog kan Kahadian kun paano iyan puwedeng mangyari. Kaya padagos na magsabwag nin dakul na banhi. Puwede kang mag-ani nin abunda.

Asin dai paglingawan na mahalaga an pamibi. Si Georgina asin Christine padagos na namibi ki Jehova. Kun ika matiyaga o “maigot sa pamibi” asin dai nuarin man nawawaran nin paglaom, ‘pakaagi nin dakul na aldaw,’ posibleng marhay na manumpungan mo giraray an “tinapay” na inapon mo sa ibabaw kan katubigan.—Roma 12:12; Par. 11:1.