1, 2. Paano napapakusog an satong kumpiyansa kun hinuhurop-hurop ta an dapit sa unibersal na organisasyon ni Jehova?

NAKAKAPUKAW nanggad sa buot na isip-isipon na kita kabtang nin dakulaon na unibersal na organisasyon. Sa mga bisyon sa Ezequiel kapitulo 1 asin Daniel kapitulo 7, malinaw na ilinaladawan si Jehova na minamaniobra an mga bagay-bagay pasiring sa mamuraway na kulminasyon. Pinapanginutan ni Jesus an pagdirehir sa daganon na kabtang kan organisasyon ni Jehova tanganing magpokus sa paghuhulit kan maugmang bareta, maasikaso an espirituwalidad kan mga nakikikabtang sa gibuhon na iyan, asin palakupon an tunay na pagsamba ki Jehova. Huli kaini, makakapagtiwala nanggad kita sa organisasyon ni Jehova!—Mat. 24:45.

² Kita daw personalmenteng nakakasabay sa paghiro kan makangangalas na organisasyon na ini? An sato daw na entusiyasmo sa katotoohan urog pang nagkukusog o nagluluya na? Kun pighuhurop-hurop an mga hapot na iyan, tibaad marisa ta na kita nagpupuon nang mangluya o nainaan na an kaigutan. Puwede iyan mangyari. Kan inot na siglo, kinaipuhan ni apostol Pablo na ipagirumdom sa mga kapwa Kristiyano an halimbawa nin kaigutan ni Jesus. Sinabi ni Pablo na matatabangan sinda kaini na dai ‘mapagal asin mangluya sa saindang mga kalag.’ (Heb. 12:3) An maingat na pagsiyasat kan nakaaging artikulo, na nagpapahiling kun ano an mga ginigibo kan organisasyon ni Jehova, siyertong nakatabang man na marhay sa sato na mapagdanay an entusiyasmo asin padagos na magtagal.

3. Ano an kaipuhan tanganing dai kita mangluya, asin ano an satong pag-uulayan sa artikulong ini?

³ Pero, ipinarisa ni Pablo na urog pa an kaipuhan tanganing dai kita mangluya. Sinabi niya na kaipuhan tang magmaigot sa “paggibo nin karahayan.” (Gal. 6:9, NW) Kaya, kaipuhan tang humiro. Pag-ulayan ta an limang bagay na makakatabang sa sato na magdanay na marigon asin danay na makasabay sa paghiro kan organisasyon ni Jehova. Pagkatapos, personal kitang makakapagdesisyon kun baga igwa sa mga iyan na kaipuhan ta o kan satong pamilya na tawan nin urog na atensiyon.

4. Taano ta masasabi ta na an pagtiripon mahalagang marhay na kabtang kan tunay na pagsamba?

⁴ Puon pa kaidto, an pagtiripon dati nang mahalagang marhay na aktibidad para sa mga lingkod ni Jehova. Sa langit, iniimbitaran an espiritung mga linalang na magtiripon sa mismong atubangan ni Jehova sa angay na mga panahon. (1 Ha. 22:19; Job 1:6; 2:1; Dan. 7:10) Sa suanoy na Israel, kahagadan sa nasyon na magtiripon ‘tanganing maghinanyog sinda asin mag-adal.’ (Deut. 31:10-12) Kaugalian kan mga Judio kan inot na siglo na magpasiring sa mga sinagoga tanganing magbasa sa Kasuratan. (Luc. 4:16; Gui. 15:21) An pagpapahalagang ini sa pagtiripon nagpadagos sagkod na maestablisar an Kristiyanong kongregasyon, asin iyan mahalagang marhay na kabtang pa man giraray kan satong pagsamba. An tunay na mga Kristiyano ‘naghahanap nin paagi kun paano madadara an saindang kapwa sa pagkaminuruutan saka sa paggibo nin marahay.’ Kaipuhan tang padagos na ‘pakusugon an buot kan lambang saro, urog na ta aram niyatong harani na an aldaw kan pag-abot nin Kagurangnan.’—Heb. 10:24, 25, BPV. *

5. Paano kita makakapagparinigunan sa satong mga pagtiripon?

⁵ An sarong mahalagang paagi tanganing magparinigunan iyo an pagpartisipar ta sa mga pagtiripon. Puwede tang ipahayag an satong pagtubod paagi sa pagsimbag sa nakaimprentang hapot, pagpaliwanag kun paano iaaplikar an sarong teksto, pagsaysay nin halipot na eksperyensiya na nagpapahiling na sarong kadunungan an pagsunod sa mga prinsipyo sa Bibliya, o iba pang paagi. (Sal. 22:22; 40:9) Siyertong mauyon ka na dawa pirang taon na kitang nag-aatender sa mga pagtiripon, nakakapagparigon pa man giraray an magdangog sa udok sa pusong mga komento kan satong mga tugang—hoben man o gurang.

6. Paano kita natatabangan kan mga pagtiripon na magdanay na aktibo sa espirituwal?

⁶ Ano pa an ibang dahilan kun taano ta arog kaiyan kaimportante sa Diyos na kita regular na magtiripon? An satong mga pagtiripon, asamblea, asin kumbensiyon nakakatabang sa sato na magkaigwa nin kusog nin buot tanganing makapagtaram nin may kapusuan asin maatubang an pagtumang o kawaran nin interes sa satong teritoryo. (Gui. 4:23, 31) An mga kabtang na suno sa Kasuratan nakakapakusog sa sato asin nakakaparigon kan satong pagtubod. (Gui. 15:32; Roma 1:11, 12) An pagtutukdo asin pagparinigunan nin buot sa satong mga pagtiripon nakakatabang sa sato na makamati nin tunay na kaugmahan asin nagtatao nin ‘kapahingaluan sa mga aldaw nin kasakitan.’ (Sal. 94:12, 13, BPV) Dinidirehiran kan Komite sa Pagtutukdo kan Namamahalang Grupo an pag-andam sa gabos na espirituwal na programa para sa pagtutukdo sa banwaan ni Jehova sa bilog na daga. Nagpapasalamat nanggad kita sa mga probisyon na ginigibo para sa sato tanganing mag-ako kita nin kapakipakinabang na pagtutukdo sa satong mga pagtiripon kada semana sa bilog na taon!

7, 8. (a) Ano an panginot na katuyuhan kan satong mga pagtiripon sa kongregasyon? (b) Paano an mga pagtiripon nakakatabang sa saimo sa espirituwal?

⁷ Pero, igwa pa nin mas mahalaga kisa sa personal na mga pakinabang na nakukua ta sa mga pagtiripon. An panginot na katuyuhan kan satong pagtiripon iyo na sambahon si Jehova. (Basahon an Salmo 95:6.) Dakulang pribilehiyo nanggad an umawon an satong marahayon na Diyos! (Col. 3:16) Maninigo si Jehova sa satong regular na pagsamba paagi sa pag-atender asin pagpartisipar sa teokratikong mga pagtiripon. (Kap. 4:11) Kaya bako nanggad makangangalas na kita sinasadol na ‘dai pagpabayaan an satong pagturutiripon siring kan kaugalian nin nagkapira’!—Heb. 10:25.

⁸ Minamansay ta daw an satong Kristiyanong mga pagtiripon bilang probisyon tanganing tabangan kita na makatagal sagkod na humiro si Jehova laban sa maraot na sistemang ini nin mga bagay? Kun iyo, an mga pagtiripon kaiba sa urog na mahalagang mga bagay na tatawan ta nin lugar dawa sibot kita sa buhay. (Fil. 1:10) Papalampason ta lang an oportunidad na makaibanan an mga tugang  sa pagsamba ki Jehova kun igwa kita nin seryosong marhay na dahilan.

9. Paano ta naaraman na mahalaga an gibuhon na paghuhulit?

⁹ An lubos na pakikikabtang sa paghuhulit nakakatabang man sa sato na danay na makasabay sa paghiro kan organisasyon ni Jehova. Pinunan ni Jesus an gibuhon na ini kan siya yaon digdi sa daga. (Mat. 28:19, 20) Puon kaidto, an paghuhulit kan Kahadian asin paggibo nin disipulo saro na sa panginot na pokus kan bilog na organisasyon ni Jehova. Dakul na eksperyensiya sa panahon ta an nagpapatunay na sinusuportaran kan mga anghel an satong gibuhon asin ginigiyahan kita pasiring sa mga “may tamang inklinasyon sa buhay na daing katapusan.” (Gui. 13:48, NW; Kap. 14:6, 7) An daganon na kabtang kan organisasyon ni Jehova yaon ngunyan asin organisado tanganing suportaran an pinakamahalagang gibuhon na ini. Nakapokus man daw sa ministeryo an satong buhay?

10. (a) Magtao nin halimbawa kun paano niyato mapagdadanay an satong entusiyasmo sa katotoohan. (b) Paano nakatabang sa saimo an ministeryo na dai mangluya?

¹⁰ An pagigin maigot sa ministeryo nakakatabang sa sato na mapagdanay an satong entusiyasmo sa katotoohan. Estudyari an sinabi ni Mitchel, sarong haloy nang elder asin regular payunir. Siya nagsabi: “Gustuhon kong sabihon sa iba an dapit sa katotoohan. Pinag-iisipan ko an sarong bagong artikulo sa Torrengbantayan o Awake! asin napapahanga na sana ako sa kadunungan asin pakasabot na yaon sa kada isyu saka sa pagigin balanseng-balanse kaiyan. Gusto kong magluwas sa langtad tanganing mahiling kun ano an magigin reaksiyon kan mga tawo, kun paano ko mapupukaw an saindang interes. Huli sa sakong  ministeryo, nagdadanay akong makusog sa espirituwal. Hinihimo kong gibuhon an gabos na iba pang bagay bago o pakatapos kan iskedyul para sa ministeryo.” An satong pagigin sibot pirmi sa sagradong paglilingkod makakatabang man sa sato na magdanay na marigon sa huring mga aldaw na ini.—Basahon an 1 Corinto 15:58.

11. Taano ta maninigo na lubos tang aprobetsaran an espirituwal na kakanon na itinatao sa sato ni Jehova?

¹¹ Nagtatao si Jehova nin abundang suplay nin nasusurat na espirituwal na kakanon tanganing pakusugon kita. Siyertong may nagigirumduman kang panahon na, pakabasa mo nin sarong publikasyon, nasabi mo sa sadiri: ‘Ini mismo an kaipuhan ko! Garo baga ipinasurat ini ni Jehova para mismo sako!’ Dai iyan nagkataon lang. Paagi sa mga probisyon na ini, talagang tinutukduan asin ginigiyahan kita ni Jehova. Sinabi niya: ‘Ipapasabot ko saimo asin itutukdo ko saimo an dalan na maninigo mong lakawan.’ (Sal. 32:8) Nagmamaigot daw kita na aprobetsaran an gabos na espirituwal na kakanon na itinatao sa sato asin hinuhurop-hurop iyan? An paggibo kaiyan matabang sa sato na padagos na mamunga asin dai maluyos sa espirituwal sa masakit na huring mga aldaw na ini.—Basahon an Salmo 1:1-3; 35:28; 119:97.

12. Ano an makakatabang sa sato na dai pagbaliwalaon an espirituwal na mga probisyon sa sato?

¹² Marahay para sa sato kun pag-iisipan ta an dapit sa mga trabahong kalabot tanganing masiyerto na igwa kita nin regular na suplay nin nakakapakusog na espirituwal na mga probisyon. Dinidirehiran kan Komite sa Pagsurat kan Namamahalang Grupo an ginigibong pagsiyasat, pagsurat, pagbasa saka pagkorehir, pagpili nin mga retrato, asin pagtradusir kan satong iniimprentang mga publikasyon siring man an mga impormasyon na ilinalaag sa satong Web site. An mga literatura ipinapadara kan nag-iimprentang mga sangang opisina sa hararani asin hararayong kongregasyon. Taano ta ginigibo an gabos na ini? Tanganing an banwaan ni Jehova mapakakan na marhay sa espirituwal. (Isa. 65:13) Lugod na maigot niyatong aprobetsaran an gabos na espirituwal na kakanon na itinatao sa sato paagi sa organisasyon ni Jehova.—Sal. 119:27.

13, 14. Sairisay sa langit an nagsusuportar sa mga areglo ni Jehova, asin paano kita makakapahiling nin arog kaiyan na pagsuportar digdi sa daga?

¹³ Sa bisyon na itinao ki apostol Juan, nahiling niya si Jesus na nakasakay sa sarong puting kabayo tanganing daugon an mga nagrerebelde ki Jehova. (Kap. 19:11-15) Nakakapakusog nanggad sa pagtubod na maaraman na nasa likudan mismo ni Jesus an maimbod na mga anghel asin kaiba niya an mga linahidan na hali sa daga, na nag-ako na kan saindang langitnon na balos! (Kap. 2:26, 27) Marahayon nanggad na halimbawa nin pagsuportar sa mga areglo ni Jehova!

¹⁴ An dakulang kadaklan lubos man na nagsusuportar sa gibuhon kan linahidan na mga tugang ni Cristo na yaon pa digdi sa daga asin nanginginot ngunyan sa organisasyon. (Basahon an Zacarias 8:23.) Paano ta personalmenteng ikakapahiling an satong suporta sa mga areglo ni Jehova? An sarong paagi iyo an pagpapasakop sa mga nanginginot. (Heb. 13:7, 17) Minapuon ini sa sato mismong kongregasyon. An sato daw na mga sinasabi dapit sa mga elder nakakadagka sa iba na igalang sinda asin an saindang katungdan? Tinutukduan ta daw an satong mga aki na igalang an maimbod na mga lalaking ini asin maghimati sa saindang maka-Kasuratan na mga sadol? Saro pa, pinag-uulayan ta daw bilang pamilya kun paano ta masusuportaran sa pinansiyal an pambilog na kinaban na gibuhon paagi sa satong mga donasyon? (Tal. 3:9; 1 Cor. 16:2; 2 Cor. 8:12) Minamansay ta daw na mahalaga an pribilehiyo na magtabang sa paglinig asin pagmentenar kan satong Kingdom Hall? Lubos na minabulos an espiritu ni Jehova kun sain igwa nin arog kaiyan na paggalang asin pagkasararo. Paagi sa espiritung iyan, tinatawan kita nin dagos-dagos na tabang tanganing dai mangluya sa huring mga aldaw na ini.—Isa. 40:29-31.

15. Taano ta dapat kitang padagos na makipaglaban tanganing makapamuhay kauyon kan mamuraway na katuyuhan ni Jehova?

¹⁵ Ultimo, tanganing makatagal asin danay na makasabay sa paghiro kan organisasyon ni Jehova, dapat na padagos kitang mamuhay kauyon kan mensaheng dinadara niyato paagi sa ‘pagsigurado kun ano an inaako kan Kagurangnan.’ (Efe. 5:10, 11, NW) Huli kan satong pagkabakong perpekto asin kan paghihinguwa ni Satanas saka kan maraot na kinaban na ini, kita padagos na nakikipaglaban sa negatibong mga impluwensiya sa satong buhay. An iba sa saindo namumutan na mga tugang maigot nanggad na nakikipaglaban aroaldaw tanganing mapagdanay an saindong relasyon ki Jehova. Huli kaiyan, kamo urog na napapamahal sa saiya. Dai magsuko! An pamumuhay kauyon kan katuyuhan ni Jehova matao sa sato nin dakulang satispaksiyon asin nin garantiya na an satong pagsamba bakong sayang sana.—1 Cor. 9:24-27.

16, 17. (a) Ano an maninigo tang gibuhon kun nakagibo kita nin magabat na pagkakasala? (b) Paano kita makikinabang sa nangyari ki Anne?

¹⁶ Pero, ano an maninigo tang gibuhon kun nakagibo kita nin magabat na pagkakasala? Maghagad tulos nin tabang. An pagtago kaiyan makakapagrabe sana kan situwasyon. Girumdumon, sinabi ni David na kan siya nagsilensio sana dapit sa saiyang mga kasalan, ‘an saiyang mga tulang nangluya huli sa saiyang pag-agrangay sa bilog na aldaw.’ (Sal. 32:3, NW) Iyo, kun itatago ta an sekretong mga pagkakasala, mangluluya sana kita sa emosyon asin sa espirituwal, pero ‘an nagpapahayag kaiyan asin minalikay [“minabaya diyan,” NW] magkakamit nin pagpapatawad.’—Tal. 28:13.

¹⁷ Estudyari an nangyari ki Anne. * Kan si Anne madali nang mag-20 anyos, nagregular payunir siya. Pero, nagpuon siyang magkaigwa nin dobleng pamumuhay. Grabe an nagin epekto kaini sa saiya. Sinabi niya: “Nakonsensiya ako. Pirmi akong mamundo saka pinangluluyahan nin buot.” Ano an ginibo niya? Sinabi niya na sarong aldaw sa pagtiripon, tinukar an Santiago 5:14, 15. Narealisar ni Anne na kaipuhan niya nin tabang kaya nagdulok siya sa mga elder. Sa paggirumdom kaiyan, siya nagsabi: “An tekstong idto reseta ni Jehova para sa espirituwal na pagpaumay. Bakong pasil an pagtomar kan bulong na iyan, pero nakakarahay talaga iyan. Sinunod ko an sadol sa teksto, asin marahay an epekto kaiyan.” Uminagi an pirang taon, asin si Anne nagkaigwa nin panibagong kusog saka nagin maigot giraray sa paglilingkod ki Jehova na may marahay na konsensiya.

18. Ano an maninigo na determinado tang gibuhon?

¹⁸ Sarong pribilehiyo nanggad na mabuhay sa huring mga aldaw na ini asin magin kabilang sa makangangalas na organisasyon ni Jehova! Lugod na magin determinado kita na dai nuarin man pagbaliwalaon kun ano an igwa kita. Imbes, magtarabangan kita bilang pamilya na magin regular sa pagtiripon para sa pagsamba kaiba kan satong lokal na kongregasyon, hanapon nin may kaigutan an mga sadiyusan an puso sa satong teritoryo, asin pahalagahan an regular na suplay nin espirituwal na kakanon na itinatao sa sato. Suportaran ta man an mga nanginginot asin mamuhay kauyon kan mensaheng dinadara ta. Kun gigibuhon ta iyan, dai sana kita makakasabay sa paghiro kan organisasyon ni Jehova kundi dai man kita nuarin man mangluluya sa paggibo nin karahayan!