IYAN an saro sa inot kong mga nagigirumduman ki Tatay, sarong simple, asin mahigos na lalaki. Hararom an pagpapahalaga niya sa hustisya, kaya nagkainteres tulos siya sa mensahe kan Bibliya kan madangog niya iyan kan 1953. Puon kaidto, ginibo niya an gabos tanganing ikatukdo sa samo na mga aki niya an saiyang mga nanunudan. Kan inot, nagduwa-duwa si Nanay na bayaan an mga tradisyon kan Katoliko. Pero pag-abot nin panahon, inako niya na man an mga katukduan sa Bibliya.

Dipisil para sa mga magurang mi na tukduan kami sa Bibliya. Si Nanay haros dai tatao magbasa saka magsurat, asin si Tatay maghapon na nagtatrabaho sa uma. Huli sa grabeng kapagalan, kun minsan napapaturog na siya pag nag-aadal kami. Pero, sulit an paghihinguwa niya. Ako an pinakamatuang aki, kaya nagtatabang ako sa pagtukdo sa tugang kong babayi asin sa duwa kong tugang na lalaki. Kaiba diyan an sarong bagay na parating sinasabi ni Tatay—an pagkamuot ni Noe sa saiyang pamilya, na ikinapahiling niya paagi sa pagkuyog sa Diyos. Gustuhon ko talaga an istoryang ini sa Bibliya! Dai nahaloy, nag-aatender na kami gabos sa mga pagtiripon sa Kingdom Hall sa Roseto degli Abruzzi, sarong siyudad sa baybayon nin Adriatico sa Italia.

Kan 1955, 11 anyos pa sana ako kan kami ni Nanay nagbalyo nin kabukidan pa-sulnupan para mag-atender sa inot na pagkakataon nin kumbensiyon sa Roma. Puon kaidto, ibinibilang ko an darakulang pagtiripon na ini na saro sa pinakamagayon na kabtang kan buhay nin sarong Kristiyano.

Kan suminunod na taon, nabawtismuhan ako asin dai nahaloy naglaog sa bilog na panahon na paglilingkod. Kan 17 anyos ako, nagin espesyal payunir ako sa Latina, sa timog na parte nin Roma na mga 300 kilometros an rayo sa harong mi. Bago pa sanang siyudad iyan, kaya daing gayo naghahadit an mga tawo sa iisipon nin iba kun mag-ako sinda kan mensahe nin Bibliya. Ugmahon kami kan kapartner kong payunir na makapasakamot nin dakul na babasahon sa Bibliya, pero palibhasa hoben pa, napupungaw ako sa samo! Pero, gusto ko pa man giraray gibuhon an asignasyon sa sako.

Paghaloy-haloy, idinestino ako sa Milan tanganing magtabang sa preparasyon para sa “Everlasting Good News” na  Internasyonal na Asamblea kan 1963. Durante kan kumbensiyon, nagboluntaryo ako kaiba kan dakul na iba pa, saro na diyan si Paolo Piccioli, sarong hoben na brother na taga Florence. Sa ikaduwang aldaw kan kumbensiyon, nagtao siya nin nakakapukaw sa buot na pahayag dapit sa pagigin daing agom. Natatandaan ko pa an sinabi ko kaidto, ‘Siguradong dai maagom an brother na iyan.’ Minsan siring, nagsuratan kami, asin naaraman ming magkapareho kami sa dakul na bagay—an samong mga pasuhan, pagkamuot ki Jehova, asin an makusog na pagmawot na kuyugon siya. Kan 1965, ikinasal kami ni Paolo.

Nagin regular payunir ako sa Florence sa laog nin sampulong taon. Nakakaugmang mahiling an pag-uswag kan mga kongregasyon, lalo na kan mga hoben. Nauugma kami ni Paolo na magtao sa sainda nin panahon sa pakikipag-ulay sa espirituwal na mga bagay saka sa pag-aling-aling, na sa parati, para ki Paolo iyan pakikikawat nin soccer. Siyempre, gusto kong makaibanan an agom ko, pero nasasabutan kong kaipuhan kan mga hoben asin pamilya sa kongregasyon an saiyang mamumuton na atensiyon saka panahon.

Sagkod ngunyan nauugma akong isip-isipon an dakul sa tinukduan mi kaidto sa Bibliya. Saro sa sainda si Adriana, na ipinakipag-ulay sa duwa pang pamilya an nanunudan niya. Nag-areglo sinda nin pakikipag-ulay sa sarong padi para pag-ulayan an mga doktrina kan simbahan, arog baga kan Trinidad asin imortal na kalag. Tulong prelado an nag-abot. Makaribong asin paburubago an mga paliwanag ninda, na tulos na narisa kan mga tinutukduan mi sa Bibliya kan ikumparar ninda iyan sa malinaw na mga katukduan sa Bibliya. Iyo, an pag-urulay na iyan nagresulta sa dakulang pagbabago. Pag-abot nin panahon, nagin mga Saksi an 15 miyembro kan pamilyang idto.

Siyempre, medyo iba na an mga paagi ta nin paghuhulit ngunyan. Kaidto, nagin “eksperto” si Paolo sa pakikipag-ulay sa mga padi—asin dakul na beses niya iyan nagibo. Nagigirumduman ko kan ginibo niya iyan sa atubangan nin mga bakong Saksi. Malinaw na patiinot nang plinano kan mga parakontra na an nagkapira sa mga nagdadangog magpalataw nin alanganon na mga hapot. Pero, nabaliktad an sitwasyon. May naghapot kun baga tama na makiaram sa pulitika an simbahan, arog kan ginigibo kaini sa laog nin dakul na siglo. Kan oras na idto, dai na aram kan mga padi kun ano an isisimbag. Bigla na sanang napalsok an ilaw, kaya napundo an pag-urulay. Pakalihis nin pirang taon, napag-araman ming plinano palan an pagpalsok kan ilaw enkaso dai mangyari sa pag-urulay an linalauman kan mga padi.

Kan sampulong taon na kaming mag-agom ni Paolo, inimbitaran kaming maglingkod sa pansirkitong gibuhon. Magayon an trabaho ni Paolo, kaya bakong  madali an nagin desisyon mi. Pero pakatapos na maghurop-hurop asin mamibi, nagdesisyon kaming akuon an bagong asignasyon na iyan. Naugma kaming makaibanan an mga pamilyang dinadagusan mi. Pag banggi, parati kaming nag-aadal bilang grupo, dangan tinatabangan ni Paolo an mga aki sa assignment ninda lalo na kun sa matematika. Apuwera kaini, mahilig magbasa si Paolo asin galaga niyang ihinihiras an interesante saka nakakapakusog na mga bagay na nababasa niya. Pag Lunes, pirmi kaming naghuhulit sa mga banwaan na mayong mga Saksi, asin nangingimbitar para sa sarong pahayag sa banggi.

Pakalihis sana nin duwang taon sa pansirkitong gibuhon, inimbitaran kaming maglingkod sa Bethel sa Roma. Inaasikaso ni Paolo an mga bagay na may koneksiyon sa ley, asin sa Departamento nin Magasin man ako. Bakong pasil gibuhon an pagbabagong ini, pero determinado kaming magin makinuyog. Nakakaugmang mahiling an luway-luway na paghiwas kan sangay asin an dakulaon na pag-uswag kan kasararuan nin magturugang sa Italia. Kan panahon na iyan, inaprubaran kan gobyerno nin Italia bilang legal na relihiyon an Mga Saksi ni Jehova. Maugmahon nanggad kami sa bago ming asignasyon.

Kan naglilingkod kami sa Bethel, nagin isyu sa Italia an satong paninindugan na basado sa Bibliya may koneksiyon sa dugo. Sa kapinunan kan dekada nin 1980, nagin urulay-ulay an isinangat na kaso manungod digdi. Putik na inakusaran an sarong mag-agom na Saksi na sinasabing iyo an may sala sa pagkagadan kan aki nindang babayi huling habo nindang salinan ini nin dugo. Pero an totoo, nagadan ini huli sa grabeng hilang sa dugo na namamana nin dakul na tawo sa rehiyon nin Mediteraneo. Tinabangan kan mga tugang sa pamilyang Bethel an mga abogado kan Kristiyanong mga magurang. Nakatabang an pulyeto asin an espesyal na edisyon kan Awake! para makakua nin impormasyon an mga tawo asin masabutan nin tama kun ano an sinasabi kan Bibliya dapit sa dugo. Durante kan mga bulan na iyan, parating nagtatrabaho si Paolo nin sagkod 16 na oras kada aldaw na mayong purupundo. Ginibo ko an pinakamakakaya ko para suportaran siya sa mga paghihinguwa niya.

Kan 20 taon na kaming mag-agom, uminabot an dai linalauman na pangyayari sa buhay mi. Si Paolo 49 anyos na asin 41 man ako kan sabihon ko sa saiya na garo bados ako. Nabasa ko sa diary niya an mga tataramon na ini na isinurat kan aldaw na idto: “Pamibi: Kun totoo man idto, tabangi po kami na magdanay sa bilog na panahon na paglilingkod, na dai magin kampante sa espirituwal, saka tabangi po kaming magin marahay na mga magurang paagi sa halimbawa mi. Urog sa gabos, tabangi po ako na iaplikar an dawa sarong porsiyento kan gabos na sinabi ko sa entablado sa nakaaging 30 taon.” Kun hihilingon an nagin buhay mi, talagang sinimbag ni Jehova an pamibi niya—asin an sa sako.

 Nabago nanggad an buhay mi kan mamundag si Ilaria. An totoo, may mga panahon na pinangluluyahan kami nin buot, arog kan sinasabi sa Talinhaga 24:10 (NW): “Nangluluya daw an buot mo sa aldaw nin kasakitan? An saimong kusog magigin kadikit.” Pero sinusuportaran mi an lambang saro, na isinasaisip an kahalagahan nin pagpakinusugan.

Pirming sinasabi ni Ilaria kun gurano siya kaugma na an mga magurang niya parehong Saksi asin sibot sa bilog na panahon na paglilingkod. Nungka niyang namatian na pinabayaan siya; nagdakula siya sa sarong tipikal na pamilya. Ako an kaibanan niya sa maghapon. Pag-uli ni Paolo sa banggi, minsan ngani may dapat pa siyang tapuson na trabaho, nagtatao siya nin panahon ki Ilaria, na nakikikawat asin tinatabangan ini sa saiyang assignment. Ginigibo niya iyan dawa abuton pa ngani siya nin sagkod alas dos o alas tres nin aga para tapuson an trabaho niya. Parating sinasabi ni Ilaria, “Si Papa an best friend ko.”

Siyempre, kaipuhan an disiplinang bakong paburubago—asin may pagkaistrikto kun minsan—para tabangan si Ilaria na magdanay sa Kristiyanong pamantayan. Nagigirumduman ko kan sarong beses nakikikawat siya sa amiga niya pero nakipag-iwal siya. Ipinaliwanag mi sa saiya sa Bibliya kun taano ta dai niya dapat ginibo idto. Yaon man kami kan pinahagad mi siya nin dispensa sa amiga niya.

Pirming sinasabi ni Ilaria na pinapahalagahan niya an pagkamuot sa ministeryo na ipinahiling kan saiyang mga magurang. Ngunyan na may agom na siya, mas nasasabutan niya na kun gurano kahalaga an pagkuyog asin pagsunod sa paggiya ni Jehova.

Kan 2008, naaraman ni Paolo na may kanser siya. Sa primero, garo baga mararahay siya, asin pinakusog niya nanggad an buot ko. Naghagad kami nin pinakamarahay na sadol nin doktor. Apuwera kaiyan, magkaibanan kami ni Ilaria sa pagpamibi nin udok ki Jehova, na hinahagad an saiyang tabang na maatubang an mga mangyayari sa maabot na panahon. Pero, nahiling ko kun paanong an saro na dating maliksi asin makusugon luway-luway na nagluya. An pagkagadan ni Paolo kan 2010 makulugon nanggad para sa sako. Pero, nakakaranga sa sako an paghurop-hurop sa mga nagibo mi sa laog nin 45 taon na kami magkaibanan. Itinao mi ki Jehova an pinakamakakaya mi. Aram ko na an mga ginibo mi igwa nin nagdadanay na halaga. Asin galaga kong hinahalat an pagkabuhay liwat ni Paolo, kauyon kan mga tataramon ni Jesus sa Juan 5:28, 29.

Sa puso ko, ako pa man giraray an sadit na aking gustuhon an istorya dapit ki Noe. Dai nagbabago an determinasyon ko. Gusto kong kuyugon si Jehova, ano man an hagadon niya sa sako. Sigurado ako na an ano man na kaulangan, sakripisyo, o kawaran saditon sana kun ikukumparar sa marahayon na mga bendisyon na itinatao kan satong mamumuton na Diyos. Naeksperyensiyahan ko mismo ini—asin sinisiyerto ko sa saindo na sulit iyan.