1. Ano an iniisip kan dakul na tawo manungod sa pagigin uripon, asin ano an pagkakalain diyan kan pagigin uripon na sinasabi kan Roma 12:11?

AN PAGIGIN uripon nin sarong Kristiyano lain na marhay sa iniisip kan dakul na tawo manungod sa pagigin uripon. Pag naiisip ninda iyan, an naiimahinar ninda iyo an maringis na pagdominar, pang-aapi, asin pagmaltrato. Pero, an ipinasabong na Tataramon nin Diyos may sinasabi na sarong klase nin pagigin uripon kun sain kalabot an gikan sa buot na paglilingkod sa sarong mamumuton na Kagurangnan. Sa katunayan, kan sadulon ni apostol Pablo an mga Kristiyano kan inot na siglo na “magpauripon ki Jehova,” dinadagka niya sinda na gumibo nin sagradong paglilingkod na motibado nin pagkamuot sa Diyos. (Roma 12:11, NW) Ano an kalabot sa siring na klase nin pagigin uripon? Paano niyato malilikayan na magin uripon ni Satanas asin kan saiyang kinaban? Asin ano an mga balos na aakuon nin saro na maimbod na naglilingkod bilang uripon ni Jehova?

2. (a) Ano an puwedeng magpahiro sa sarong uripon na Israelita na talikdan an saiyang oportunidad na magin talingkas? (b) Kun an sarong uripon andam na magpalabot sa talinga, ano an ipinapahiling kaiyan?

² Paagi sa Ley na itinao nin Diyos sa Israel, masasabutan niyato kun ano an kahagadan ni Jehova sa sato bilang uripon niya. An sarong Hebreong uripon pinapatalingkas sa ikapitong taon kan saiyang paglilingkod. (Ex. 21:2) Pero, sa sarong uripon na talagang namumutan an saiyang kagurangnan asin gustong magdanay sa saiyang paglilingkod, nagtao si Jehova nin pambihirang probisyon. Dadarahon kan kagurangnan an saiyang uripon sa may pinto o sa may harigi kan pinto asin lalabutan, o luluhuan, an talinga kaini. (Ex. 21:5, 6) Makahulugan na an bagay na ini sa talinga ginigibo. Sa lengguwaheng Hebreo, an pundamental na ideya nin pagkuyog ipinapahayag nin termino na konektado sa pagdangog asin paghinanyog. An uripon na andam na magpalabot sa talinga nagmamawot na padagos na maglingkod nin makinuyog sa saiyang kagurangnan. Tinatabangan kita kaini na masabutan kun ano an kalabot sa satong pagdusay ki  Jehova—an gikan sa buot na pagkuyog na motibado nin pagkamuot sa Diyos.

3. Ano an dahilan kan satong pagdusay sa Diyos?

³ Bago niyato iprinesentar an satong sadiri sa Kristiyanong bawtismo, nagdesisyon na kita na maglingkod ki Jehova, na magin uripon niya. An satong pagdusay resulta kan satong kamawutan na kuyugon si Jehova asin gibuhon an saiyang kabutan. Mayo nin siisay man na nagpirit sa sato na gibuhon iyan. Sa katunayan, dawa an mga aki pa na nagpapabawtismo naggigibo kaiyan pagkatapos sana na sinda personal mismong magdusay ki Jehova, bako tanganing paugmahon sana an saindang mga magurang. An dahilan kun taano ta an saro nagdusay bilang Kristiyano iyo an pagkamuot sa satong langitnon na Kagurangnan, si Jehova. Isinurat ni apostol Juan: ‘An namumuot sa Diyos nagkukuyog kan saiyang mga tugon.’—1 Juan 5:3, BPV. *

4. Ano an kaipuhan tanganing magin ‘mga uripon nin katanusan’?

⁴ Nagpapasalamat nanggad kita ki Jehova huling pinagin posible niya na kita magin mga uripon niya! An satong pagtubod sa atang na pantubos ni Cristo nagpapatalingkas sa sato sa pagigin uripon kan kasalan. Dawa bako pang perpekto, kita gikan sa buot na nagpapasakop sa awtoridad ni Jehova asin ni Jesus. Malinaw ining ipinaliwanag ni Pablo sa saro sa saiyang ipinasabong na surat: ‘Ibilang nindong kamo gadan sa kasalan alagad buhay sa Diyos huli ki Cristo Jesus.’ Dangan nagpatanid siya: ‘Aram nindo na kun magpauripon kamo, sakop kamo kan kagurangnan nindo asin an pagbuot niya an kinukuyog nindo. Kun sa kasalan kamo magpauripon, madara iyan saindo sa kagadanan; kun sa pagkamakinuyog-kuyog, madara iyan saindo sa katanusan. Totoo na kamo mga uripon kaidto kan kasalan, alagad salamat sa Diyos ta ngunyan nagkukuyog na kamo nin udok sa puso kan mga katukduan na inako nindo. Pinatalingkas kamo sa kasalan asin nagin mga uripon nin katanusan.’ (Roma 6:11, 16-18, BPV) Mangnuhon na sinambit kan apostol an ‘pagkuyog nin udok sa puso.’ Iyo, kan kita magdusay ki Jehova, kita nagin ‘mga uripon nin katanusan.’

5. Anong pakikilaban sa sadiri an inaatubang ta gabos, asin taano?

⁵ Minsan siring, may mga ulang na kaipuhan na mapangganahan tanganing makapamuhay kauyon kan satong pagdusay. Napapaatubang kita sa duwang pakikilaban. An inot iyo an pakikilaban na kapareho kan inatubang ni Pablo. ‘Ako nag-uugma diyan sa katugunan nin Diyos sa irarom nin sakong buot,’ an isinurat niya, ‘alagad ako nakakahiling nin lain na katugunan sa mga kabtang nin sakong hawak na minatumang sa katugunan nin sakong pag-isip asin minadara sako sa pagkabihag sa irarom kan katugunan nin kasalan na nasa sakuyang mga kabtang nin hawak.’ (Roma 7:22, 23) Kita man nagmana nin pagkabakong perpekto. Kaya kita padagos na nakikilaban sa satong makalaman na mga tendensiya. Sinadol kita ni apostol Pedro: ‘Mamuhay kamo siring sa mga tawong talingkas; alagad dai nindo paggamiton an saindong katalingkasan sa paggibo nin maraot. Mamuhay kamo siring sa mga uripon nin Diyos.’—1 Ped. 2:16, BPV.

6, 7. Ano an ginigibo ni Satanas tanganing paluwason na an kinaban na ini nakakaakit?

⁶ An ikaduwa niyatong pakikilaban iyo an pakikilaban sa kinaban na ini na nasa irarom kan impluwensiya kan mga demonyo. Pinupuntirya kita ni Satanas, an namamahala sa kinaban na ini, gamit an saiyang arog-busog na mga armas tanganing purbaran na rauton an satong kaimbudan ki Jehova asin ki Jesus. Gusto niya kitang magin uripon paagi sa pagtentar sa sato na magpadara sa saiyang nakakaraot na impluwensiya. (Basahon an Efeso 6:11, 12.) An sarong paagi na ginigibo ini ni Satanas iyo na pinapaluwas niya na an kinaban magayon asin nakakaakit. ‘Kun an siisay man namumuot sa kinaban,’ an patanid ni apostol Juan, ‘an pagkamuot kan Ama dai diyan saiya. Huli ta an gabos na nasa kinaban—an hurot nin laman asin an hurot nin mga mata patin an kapaabaw-abawan nin buhay—bakong sa Ama, kundi sa kinaban.’—1 Juan 2:15, 16.

⁷ An pagmawot na magin asensado sa materyal  lakop sa kinaban. Pinapatubod ni Satanas an mga tawo na an dakul na kuwarta iyo an makakapagtao nin kaugmahan. Kadakul nin darakulang shopping center. Ineengganyar nin mga anunsiyo an mga tawo na magkaigwa nin istilo nin pamumuhay na nakasentro sa pagkaigwa nin materyal na mga bagay asin paglilibang. Nag-aalok an mga travel agency nin mga pagbiyahe sa interesanteng mga lugar, na sa parati an kairiba mga tawo na kinabanon an kaisipan. Iyo, maski sain kita, yaon an pag-engganyar na magin “mas marahay”—pero sigun pirmi sa mga pamantayan kan kinaban.

8, 9. Anong grabeng peligro an yaon sa kinaban, asin taano?

⁸ Mapadapit sa mga Kristiyano sa kongregasyon kan inot na siglo na nagkaigwa nin kinabanon na punto de vista, si Pedro nagpatanid: ‘Sinda naghuhuna na kaugmahan an pagpauyon kun aldaw, mga ramog asin mga digta, na nagpapauyon sa saindang mga pagdaya mantang sinda nakikipagkakan sa kaibahan nindo. Huli ta sa pagtaram nin mga mapaabhaw na basang na tataramon, nalulumay ninda sa mga hurot nin laman huli sa karumputan an mga nagpupuon pa sanang magdulag sa mga namumuhay sa kasalaan, na nanunuga sainda nin libertad mantang sinda man sana mga uripon nin kalapaan; huli ta an tawo nagigin uripon kan nakakadaog saiya.’—2 Ped. 2:13, 18, 19.

⁹ An pagpanigo sa ‘hurot nin mga mata’ dai nagpapatalingkas sa saro. Imbes, siya nagigin uripon kan dai nahihiling na kagurangnan kan kinaban na ini, si Satanas na Diyablo. (1 Juan 5:19) Tunay nanggad na igwa nin peligro na magin uripon kan materyalismo—sarong klase nin pagigin uripon na diyan masakit makabutas.

10, 11. Siisay sa ngunyan an gustuhon na salakayon ni Satanas, asin paano sinda puwedeng madipisilan huli sa edukasyon sa kinaban?

¹⁰ Arog kan ginibo ni Satanas sa Eden, pinupuntirya man niya ngunyan an mga daing eksperyensiya. An mga hoben an gustuhon niyang salakayon. Dai nauugma si Satanas kun an sarong hoben, o siisay pa man, gikan sa buot na nagpapauripon ki Jehova. Gusto kan kaiwal nin Diyos na mawara an debosyon asin kaimbudan kan gabos na nagdusay kan saindang buhay ki Jehova.

¹¹ Balikan ta an manungod sa sarong uripon na nagpalabot sa talinga. Siya siguradong nakamati nin kulog; pero dai nahaloy nawara iyan, asin nagkaigwa siya nin permanenteng tanda kan saiyang pagigin uripon. An paggibo nin desisyon na iba man sa desisyon kan mga kairiba puwede man na magin dipisil, makulog pa ngani, para sa sarong hoben. Pinapalakop ni Satanas an ideya na an pagkaigwa nin karera sa saiyang kinaban matao nin pagkakontento sa saro, pero maninigong pakaisipon kan mga Kristiyano an kahalagahan kan pagpanigo sa saindang espirituwal na pangangaipo. “Maugma an mga nakakamati kan saindang espirituwal  na pangangaipo,” an sabi ni Jesus. (Mat. 5:3, NW) An nagdusay na mga Kristiyano nabubuhay para sa kabutan nin Diyos, bako kan ki Satanas. Ikinakaugma ninda an ley ni Jehova, asin naghuhurop-hurop diyan aldaw asin banggi. (Basahon an Salmo 1:1-3.) Minsan siring, an kadaklan sa mga kurso ngunyan sa kolehiyo naghahagad nin dakul na panahon kaya dikit na sana an panahon nin sarong lingkod ni Jehova tanganing makapaghurop-hurop asin mapaniguan an saiyang espirituwal na pangangaipo.

12. Sa anong pagpili napapaatubang an dakul na hoben sa ngunyan?

¹² Puwedeng magin dipisil an buhay nin sarong uripon na Kristiyano huli sa pinaglilingkudan niyang kagurangnan sa kinaban. Sa saiyang inot na surat sa mga taga Corinto, si Pablo naghapot: ‘Uripon ka kan apudon ka nin Diyos?’ Dangan sinadol niya sinda: ‘Dai bali; alagad kun may oportunidad kang magin talingkas, gamita iyan.’ (1 Cor. 7:21, BPV) Mas marahay kun an saro makatalingkas sa pagkauripon. Sa ngunyan, sa dakul na kadagaan, obligatoryo an pag-eskuwela sagkod sa sarong partikular na edad. Dangan tinatawan an mga estudyante nin pagpipilian. Kun an saro makua nin halangkaw na edukasyon tanganing magkaigwa nin karera sa kinaban na ini, puwedeng mainaan an saiyang katalingkasan na maglaog sa bilog na panahon na paglilingkod.—Basahon an 1 Corinto 7:23.

13. Anong klaseng sekular na edukasyon an makakatabang na marhay sa mga lingkod ni Jehova?

¹³ Pinatanidan ni Pablo an mga Kristiyano sa Colosas: ‘Mag-ingat kamo ta tibaad may siisay man na bumihag saindo huli kan saiyang pilosopiya asin basang na daya, suno sa mga usipon nin mga tawo, suno sa mga katukduan nin kinaban, asin bakong suno ki Cristo.’ (Col. 2:8) An ‘pilosopiya asin basang na daya suno sa mga usipon nin mga tawo’ nangingibabaw ngunyan sa kinabanon na kaisipan na pinapalakop kan dakul na intelektuwal. An halangkaw na edukasyon, na nagtatao nin importansiya sa akademikong pag-adal, sa parati nakakaprodusir nin mga naggradwar na dikit sana an praktikal na abilidad o mayo ngani kaiyan, kaya bako sindang andam na atubangon an realidad kan buhay. Sa kabaliktaran, an mga lingkod ni Jehova nagpipili nin sekular na edukasyon na matabang sa sainda na magkaigwa kan abilidad na kaipuhan tanganing makapamuhay nin simple asin makapaglingkod sa Diyos. Isinasapuso ninda an konseho ni Pablo ki Timoteo: ‘An kabanalan na may kaugmahan sarong dakulang pakinabang. Kun igwa nin kakanon asin gubing maniguan na kita kaiyan.’ (1 Tim. 6:6, 8) Imbes na magkaigwa nin sekular na mga tinapusan saka titulo na nakakabit sa saindang pangaran, an tunay na mga Kristiyano nakapokus sa pagkaigwa nin ‘mga surat nin pagpamidbid,’ an buot sabihon, idtong mga natabangan ninda na magin disipulo ni  Jesus, paagi sa lubos na pakikikabtang sa ministeryo sa langtad sagkod sa mapupuwede.—Basahon an 2 Corinto 3:1-3.

14. Sigun sa Filipos 3:8, paano minansay ni Pablo an saiyang pribilehiyo bilang uripon nin Diyos asin ni Cristo?

¹⁴ Isip-isipon an halimbawa ni apostol Pablo. Tinukduan siya ni Gamaliel, na sarong paratukdo sa Judiong Ley. An edukasyon na inako ni Pablo puwedeng ikumparar sa edukasyon sa mga unibersidad sa ngunyan. Pero, paano ini minansay ni Pablo kan ikumparar niya sa saiyang pribilehiyo bilang uripon nin Diyos asin ni Cristo? Siya nagsurat: ‘Ibinilang ko an gabos na bagay siring sa nawara huli kan kahalangkawan kan pakamidbid ki Cristo Jesus na sakong Kagurangnan.’ Dangan sinabi pa niya: ‘Dahil saiya tinios ko an pagkawara kan gabos na bagay, asin ibinilang ko iyan na tapok, tanganing makamtan ko si Cristo.’ (Fil. 3:8) An siring na pagmansay nakakatabang sa mga hoben na Kristiyano asin sa saindang may takot sa Diyos na mga magurang na magin madunong sa pagpili kun dapit sa sekular na edukasyon. (Hilingon an mga ritrato.)

15, 16. Anong klaseng edukasyon an itinatao kan organisasyon ni Jehova, asin sa ano iyan nakapokus?

¹⁵ Ano an kamugtakan kan dakul sa mga unibersidad saka kolehiyo sa kinaban na ini? Bako daw na may mga panahon na diyan minapuon an kariribukan sa pulitika asin sosyedad? (Efe. 2:2) Sa kabaliktaran, itinatao kan organisasyon ni Jehova an pinakahalangkaw na klase nin edukasyon sa laog nin matuninong na kamugtakan kan Kristiyanong kongregasyon. An kada saro sa sato igwa kan oportunidad na makinabang sa semanal na Teokratikong Paadalan sa Pagmiministro. Igwa man nin espesyal na paadalan para sa daing agom na mga brother na payunir (Bible School for Single Brothers) asin mga mag-agom na payunir (Bible School for Christian Couples). An siring na teokratikong edukasyon nakakatabang sa sato na kuyugon si Jehova, an satong langitnon na Kagurangnan.

¹⁶ Makakakua kita nin abundang espirituwal na kayamanan sa Watch Tower Publications Index o sa Watchtower Library sa CD-ROM. An edukasyon na ini nakapokus sa pagsamba ki Jehova. Tinutukduan kita kaini kun paano matatabangan an iba na makipag-ulian sa Diyos. (2 Cor. 5:20) Bilang resulta, matatabangan sinda na tukduan man an iba pa.—2 Tim. 2:2.

17. Anong mga balos an aakuon ta pag pinili ta an pinakahalangkaw na edukasyon?

¹⁷ Sa parabula ni Jesus dapit sa mga talento, an duwang maimbod na uripon nag-ako nin komendasyon asin naggaya-gaya kaiba kan saindang kagurangnan huling pinagkatiwalaan sinda nin mas dakulang gibuhon. (Basahon an Mateo 25:21, 23.) An pagpili kan pinakahalangkaw na edukasyon sa ngunyan nagtatao nin kagayagayahan asin mga bendisyon. Estudyaran an halimbawa ni Michael. Haralangkaw an saiyang grado kaya inimbitaran siya kan saiyang mga maestra na pag-ulayan an saiyang mga oportunidad na makapag-adal sa unibersidad. Sa saindang pagkabigla, pinili ni Michael na kumua nin halipot na kursong bokasyonal na dai nahaloy nakatabang sa saiya na suportaran an sadiri bilang regular payunir. Namatian niya daw na may pinalampas siyang magayon na oportunidad? “An teokratikong edukasyon na inako ko bilang payunir—asin ngunyan bilang elder sa kongregasyon—daing kaagid sa halaga,” an sabi niya. “An mga bendisyon asin pribilehiyo na nakakamtan ko mas mahalaga nanggad kisa sa ano man na kantidad nin kuwarta na puwede ko kutanang naganar. Talagang maugma ako na pinili kong dai magkua nin halangkaw na edukasyon.”

18. Ano an nagpahiro sa saimo na pilion an pinakahalangkaw na edukasyon?

¹⁸ An pinakahalangkaw na edukasyon nagtutukdo sa sato kan kabutan nin Diyos asin nagtatabang sa sato na magpauripon ki Jehova. Nagtatao iyan sa sato kan oportunidad na ‘patalingkason nin Diyos tanganing dai na malapa’ asin pag-abot nin panahon magkamit kan ‘mamurawayon na katalingkasan kan mga aki nin Diyos.’ (Roma 8:21, BPV) Urog sa gabos, nanunudan ta an pinakamarahay na paagi tanganing ipahiling na talagang namumutan ta an satong langitnon na Kagurangnan, si Jehova.—Ex. 21:5.