1, 2. Taano ta mahalaga na iinagid ni Jehova an saiyang sadiri sa sarong pastor?

IKINUMPARAR ni Jehova an sadiri niya sa sarong pastor. (Ezeq. 34:11-14) Mahalaga iyan huling nakakatabang iyan sa sato na masabutan kun anong klaseng persona si Jehova. An sarong mamumuton na pastor nakakamati na siya may lubos na paninimbagan para sa kaligtasan asin kapakanan kan aripumpon nin mga karnero na pinangangatamanan niya. Ginigiyahan niya sinda pasiring sa sabsaban asin kun sain may tubig (Sal. 23:1, 2); binabantayan aldaw asin banggi (Luc. 2:8); pinoprotektaran sa mga naniniba (1 Sam. 17:34, 35); kinakarga an bagong iugbon (Isa. 40:11); hinahanap an mga nalalagalag, saka inaataman na marhay an mga karnerong nabarian o nalugadan.—Ezeq. 34:16.

² Huling pastor asin parauma an kadaklan sa suanoy na banwaan ni Jehova, madali nindang nasabutan an kahulugan kan pagkumparar ki Jehova Diyos sa sarong mamumuton na pastor. Aram ninda na an mga karnero nangangaipo nin pag-ataman asin atensiyon para magin makusog. Sa espirituwal na paagi, arog man kaiyan an mga tawo. (Mar. 6:34) Kun mayo nin marahay na pangangataman asin panginginot sa espirituwal, apektado sinda. Madali sindang nabibiktima asin minaluya an moralidad—kun paanong nagkakawararak an ‘mga karnero na mayo nin pastor.’ (1 Ha. 22:17, BPV) * Minsan siring, mamumuton na itinatao ni Jehova an pangangaipo kan banwaan niya.

3. Ano an pag-uulayan ta sa artikulong ini?

³ An paglaladawan ki Jehova bilang sarong pastor may kahulugan dawa sa presenteng panahon. Itinatao pa man giraray ni Jehova an pangangaipo kan arog-karnerong mga lingkod niya. Aramon ta kun paano niya ginigiyahan an mga karnero asin pinapaniguan an pangangaipo ninda ngunyan. Pag-uulayan ta man kun paano makikinabang an mga karnero sa mamumuton na pagmakulog ni Jehova sa sainda.

4. Ano an papel ni Jesus sa pagtao kan pangangaipo kan mga karnero ni Jehova?

⁴ Ninombrahan ni Jehova si Jesus bilang Payo kan Kristiyanong kongregasyon. (Efe. 1:22, 23) Bilang “an marahay na pastor,” ipinapabanaag ni Jesus an intereses, mga katuyuhan asin kuwalidad kan saiyang Ama. ‘Itinao pa ngani ni Jesus an saiyang buhay dahil sa mga karnero.’ (Juan 10:11, 15) Bendisyon nanggad an atang na pantubos ni Cristo para sa katawuhan! (Mat. 20:28) Iyo, katuyuhan ni Jehova na ‘an siisay man na minatubod ki Jesus dai mapahamak kundi magkaigwa nin buhay na daing katapusan’!—Juan 3:16.

5, 6. (a) Siisay an ninombrahan ni Jesus na mangataman sa mga karnero niya, asin ano an dapat gibuhon kan mga karnero para makinabang sa areglong ini? (b) Ano an maninigong panginot na dahilan kun taano ta gusto tang magpasakop sa mga elder sa kongregasyon?

⁵ Paano ipinapahiling kan mga karnero na si Jesu-Cristo an saindang Marahay na Pastor? ‘An sakong mga karnero nagdadangog sa sakong tingog,’ an sabi ni Jesus, ‘asin midbid ko sinda, asin sinda minasunod sako.’ (Juan 10:27) An paghinanyog sa tingog kan Marahay na Pastor nangangahulugan nin pagsunod sa paggiya niya sa gabos na bagay. Kaiba digdi an pakikikooperar sa espirituwal na katabang na mga pastor na ninombrahan niya. Ipinarisa ni Jesus na ipapadagos kan mga apostol asin disipulo an gibuhon na pinunan niya. ‘Tutukduan’ asin ‘papasabsabon ninda an mga karnero ni Jesus.’ (Mat. 28:20; basahon an Juan 21:15-17.) Mantang naglalakop an maugmang bareta asin nagdadakul an mga disipulo, iinareglo ni Jesus na pasturan nin maygurang na mga Kristiyano an mga kongregasyon.—Efe. 4:11, 12.

⁶ Sa surat ni apostol Pablo sa mga paraataman sa kongregasyon sa Efeso kan inot na siglo, idinuon niya na sinda ninombrahan kan banal na espiritu na magin mga paraataman para ‘magpastor sa kongregasyon nin Diyos.’ (Gui. 20:28, NW) Totoo man iyan sa Kristiyanong mga paraataman ngunyan, huling sinda ninombrahan man basado sa mga kahagadan sa Kasuratan na ipinasabong kan banal na espiritu. Kaya, an pagkuyog ta sa sainda nagpapahiling nin paggalang ki Jehova asin ki Jesus, an duwang pinakadakulang Pastor. (Luc. 10:16) Maninigo nanggad na ini an panginot na dahilan kun taano ta gusto tang magpasakop sa mga elder. Minsan siring, may iba pang dahilan kun taano ta madunong na magpasakop sa sainda.

7. Paano kamo tinatabangan kan mga elder na mapagdanay an marahay na relasyon ki Jehova?

⁷ Sa paggiya sa mga kapagtubod, nagtatao an mga elder nin pamparigon asin konseho na basado sa Kasuratan o sa mga prinsipyo diyan. An katuyuhan ninda sa pagtao kaiyan bakong para diktahan an mga tugang ninda kun paano maninigong mamuhay. (2 Cor. 1:24) Imbes, ginigibo ninda iyan para tabangan an mga kapwa Kristiyano na makapagdesisyon nin tama asin magkaigwa nin areglo saka katuninungan sa kongregasyon. (1 Cor. 14:33, 40) Sinda nagbabantay o ‘nagpupuka dahil sa mga kalag,’ an buot sabihon, gusto nindang tabangan an lambang miyembro kan kongregasyon na mapagdanay an marahay na relasyon ki Jehova. Huli kaiyan, sinda alistong nagtatabang kun naririsa ninda na an sarong tugang namemeligrong makagibo, o nakagibo na, nin ‘paglapas.’ (Gal. 6:1, 2; Jud. 22) Bako daw mararahay na dahilan ini na magin ‘makinuyog sa mga nanginginot’?—Basahon an Hebreo 13:17.

8. Paano pinoprotektaran kan mga elder an aripumpon nin Diyos?

⁸ Si Pablo, na espirituwal na pastor, nagsurat sa mga tugang sa Colosas: ‘Mag-ingat kamo [ta] tibaad may siisay man na bumihag saindo huli kan saiyang pilosopiya asin basang na daya, suno sa mga usipon nin mga tawo, suno sa mga inot na katukduan kan kinaban, asin bakong suno ki Cristo.’ (Col. 2:8) Ipinapahiling kan patanid na ini an saro pang marahay na dahilan kun taano ta mahalagang magtao nin atensiyon sa maka-Kasuratan na konseho kan mga elder. Pinoprotektaran ninda an aripumpon paagi sa pagpatanid sa mga tugang na magmaan sa siisay man na tibaad magpurbar na paluyahon an pagtubod ninda. Nagpatanid si apostol Pedro dapit sa “mga bakong tunay na propeta” asin “mga bakong tunay na paratukdo” na mapurbar na ‘dagkahon na magkasala an  mga maluyang tawo.’ (2 Ped. 2:1, 14, BPV) An mga elder ngunyan dapat na magtao nin kaagid na mga patanid kun kaipuhan. Bilang maygurang na mga Kristiyano, may eksperyensiya na sinda sa buhay. Dugang pa, bago sinda ninombrahan, ipinahiling ninda na may malinaw sindang pakasabot sa Kasuratan asin kuwalipikadong magtukdo kun ano an marahay. (1 Tim. 3:2; Tito 1:9) Huli sa pagkamaygurang, pagigin timbang, asin kadunungan ninda na basado sa Bibliya, nakakatao sinda nin marahay na paggiya sa aripumpon.

9. Paano ginigiyahan asin pinapakakan ni Jesus an Kristiyanong kongregasyon ngunyan?

⁹ Paagi sa organisasyon ni Jehova, nagtatao siya nin abundang espirituwal na kakanon sa bilog na kasararuan nin mga tugang sa kinaban. Dakul na maka-Kasuratan na konseho an itinatao paagi sa mga publikasyon ta. Dugang pa, may mga panahon na an organisasyon direktang nagtatao nin paggiya sa mga elder, paagi man sa mga surat o instruksiyon na ipinapaabot kan nagbibiyaheng mga paraataman. Sa siring na mga paagi, an mga karnero nag-aako nin malinaw na paggiya.

10. Ano an paninimbagan nin espirituwal na mga pastor sa mga naparayo sa aripumpon?

¹⁰ Sa espirituwal na paagi, may paninimbagan an mga paraataman na protektaran, atamanon, asin asikasuhon an salud kan mga miyembro kan kongregasyon, nangurugna an mga nakulgan o nagkahilang sa espirituwal. (Basahon an Santiago 5:14, 15.) An nagkapira sa sainda tibaad naparayo sa aripumpon asin nagpundo na sa  pakikikabtang sa Kristiyanong mga aktibidad. Sa siring na kamugtakan, bako daw na gigibuhon nin mapagmakulog na elder an gabos na makakaya para hanapon an nalagalag na karnero asin dagkahon ini na bumalik sa aripumpon, an buot sabihon, sa kongregasyon? Siyempre iyo! ‘Bakong kabutan kan saindong Ama na nasa langit na an saro kaining saradit na aki mapahamak,’ an paliwanag ni Jesus.—Mat. 18:12-14.

11. Taano ta tibaad may mga nadidipisilan na sumunod sa panginginot kan mga elder?

¹¹ Perpektong mga Pastor si Jehova asin si Jesus. Pero, bakong perpekto an mga tawong katabang na pastor na pinagkatiwalaan nindang mangataman sa mga kongregasyon. Huli kaini, tibaad may mga nadidipisilan na sumunod sa panginginot kan mga elder. Tibaad mangatanusan sinda: ‘Bako man sindang perpekto arog niyato. Taano ta mahinanyog kita sa konseho ninda?’ Totoo, bakong perpekto an mga elder. Minsan siring, kaipuhan na magkaigwa kita nin tamang pagmansay sa mga pagkukulang asin kaluyahan ninda.

12, 13. (a) Ano an masasabi ta dapit sa mga pagkukulang kan nagkapira na tinawan ni Jehova nin katungdan na may responsabilidad? (b) Taano ta isinurat sa Bibliya an mga pagkukulang kan mga ninombrahan na manginot?

¹² Dai itinago kan Kasuratan an mga pagkukulang kan mga lalaking ginamit ni Jehova na manginot sa banwaan niya kaidto. Halimbawa, si David linahidan bilang hadi asin lider kan Israel. Alagad, nagpadaog siya sa sugot asin nagkasala nin pagsambay saka paggadan. (2 Sam. 12:7-9) Isip-isipa man si Pedro. Minsan ngani pinagkatiwalaan nin dakulang paninimbagan sa Kristiyanong kongregasyon kan inot na siglo, nakagibo siya nin magabat na mga sala. (Mat. 16:18, 19; Juan 13:38; 18:27; Gal. 2:11-14) Apuwera ki Jesus, daing tawong nabuhay na perpekto puon ki Adan asin Eva.

¹³ Taano ta ipinasurat ni Jehova sa Bibliya an mga pagkukulang kan mga ninombrahan niya na manginot? An sarong dahilan iyo na para ipahiling nin Diyos na puwede niyang gamiton an bakong perpektong mga lalaki na manginot sa banwaan niya. Sa katunayan, pirmi niyang ginigibo iyan. Huli kaini, dai ta maninigong gamiton na sarahutan an mga pagkukulang kan mga nanginginot sa sato ngunyan na maggumod-gumod laban sa sainda o baliwalaon an awtoridad ninda. Linalauman ni Jehova na igagalang asin kukuyugon ta an siring na mga brother.—Basahon an Exodo 16:2, 8.

14, 15. Ano an manunudan ta sa paagi nin pakikikomunikar ni Jehova sa banwaan niya kaidto?

¹⁴ Mahalagang marhay an pagkuyog sa mga nanginginot sa sato ngunyan. Isip-isipa kun paano nakikomunikar si Jehova sa banwaan niya sa masakit na mga panahon kaidto. Kan humali sa suanoy na Ehipto an banwaan nin Israel, an mga pagbuot nin Diyos sa sainda ipinaagi ki Moises asin Aaron. Para makaligtas sa ikasampulong damat, kaipuhan na kuyugon kan mga Israelita an instruksiyon na magkaigwa nin espesyal na pamanggihan asin magwirik nin dugo nin binunong karnero sa mga harigi kan pinto saka hamba sa itaas kan pinto kan harong ninda. Ipinaabot an instruksiyon na iyan sa sainda bakong paagi sa sarong boses na hali sa langit. Imbes, kaipuhan nindang maghinanyog sa kamagurangan na lalaki nin Israel, na tinawan ni Moises nin espesipikong mga instruksiyon. (Ex. 12:1-7, 21-23, 29) Sa mga kamugtakan na idto, si Moises asin an kamagurangan na lalaki nagin paradara nin mga instruksiyon ni Jehova sa banwaan niya. Arog man kaiyan an mahalagang katungdan ngunyan kan mga elder.

¹⁵ Posibleng marhay na may maisip ka pang dakul na pangyayari sa Bibliya na si Jehova nagtao nin nagliligtas-buhay na mga instruksiyon paagi sa representanteng mga tawo o anghel. Sa gabos na ini, nahiling nin Diyos na angay na magdelegar nin awtoridad. An mga mensahero nagtaram sa ngaran niya, asin nagsabi sa saiyang banwaan  kun ano an kaipuhan nindang gibuhon para makaligtas sa peligro. Naiimahinar ta daw na posibleng arog man kaiyan an gibuhon ni Jehova sa Armagedon? Siyempre, an siisay man na elder ngunyan na dinelegaran kan paninimbagan bilang representante ni Jehova o kan organisasyon niya dapat na mag-ingat na marhay na dai nuarin man abusuhon an awtoridad na ipinagkatiwala sa sainda.

16. Sa anong “tataramon” kaipuhan kitang maghinanyog?

¹⁶ An banwaan ni Jehova kompuwesto nin ‘sarong aripumpon’ sa pangangataman nin “sarong pastor,” si Jesu-Cristo. (Juan 10:16) Sinabi ni Jesus na siya makakaibanan kan mga disipulo sa gabos na aldaw ‘sagkod sa katapusan nin kinaban,’ o sistema nin mga bagay. (Mat. 28:20) Bilang langitnon na Hadi, lubos niyang kontrolado an gabos na pangyayari na masagkod sa paghukom sa kinaban ni Satanas. Para magdanay na nagkakasararo asin ligtas sa laog kan aripumpon nin Diyos, kaipuhan tang hinanyugon an ‘tataramon sa satong likudan,’ na nagsasabi sa sato kun arin an dalan na dapat lakawan. Kaiba sa “tataramon” na ini an sinasabi kan banal na espiritu nin Diyos na ihinayag paagi sa Bibliya saka kun ano an sinasabi ni Jehova asin ni Jesus paagi sa nombrado nindang katabang na mga pastor.—Basahon an Isaias 30:21; Kapahayagan 3:22.

17, 18. (a) Sa ano namemeligro an aripumpon, pero sa ano kita makakapagtiwala? (b) Ano an pag-uulayan sa sunod na artikulo?

¹⁷ Sinasabi sa Bibliya na si Satanas naglilibot ‘siring sa nagngangarob na leon, na naghahanap nin masisiba.’ (1 Ped. 5:8) Arog nin mabangis asin naninibang hayop, pigpaparasundan niya an aripumpon, na naghahalat nin oportunidad na biktimahon an mga dai nagmamaan o naparayo. Sarong marahayon na dahilan iyan kun taano ta maninigo kitang magdanay na harani nanggad sa iba pa na nasa aripumpon saka ki Jehova, an ‘pastor asin paraataman kan satong kalag.’ (1 Ped. 2:25, BPV) Mapadapit sa mga makakaligtas sa dakulang kahurasaan, nagsasabi an Kapahayagan 7:17: ‘An Kordero [si Jesus magigin] pastor ninda asin madara sainda sa mga burabod nin tubig nin buhay, asin papahidon nin Diyos an gabos na luha sa saindang mga mata.’ May mas marahay pa daw na panuga kisa diyan?

¹⁸ Mantang napag-ulayan na niyato an mahalagang marhay na papel kan mga elder bilang espirituwal na katabang na mga pastor, ini an hapot, Paano masisigurado kan nombradong mga lalaking ini na tinatratar ninda sa tamang paagi an mga karnero ni Jesus? Pag-uulayan an simbag sa sunod na artikulo.