1, 2. (a) Taano ta mahalaga na “magin mapinamibi”? (b) Anong mga bagay mapadapit sa pamibi an marahay na ihapot ta sa satong sadiri?

“AN PINAKAMASAKIT na oras na magdanay na mata iyo an mag-aagahon,” an sabi nin sarong dating nagtatrabaho sa banggi. Posible nanggad na mauyon diyan an iba na an trabaho nangangaipong magdanay na mata sa bilog na banggi. An mga Kristiyano ngunyan napapaatubang sa kaagid na kadipisilan huling yaon na sa pinakamadiklom na peryodo an garo halawigon na banggi kan maraot na sistema nin mga bagay ni Satanas. (Roma 13:12) Peligroso nanggad para sa sato na mapaturog sa ultimo ora na ini! Kaipuhan tang “magin tultol an isip” asin maghimati sa sadol kan Kasuratan na “magin mapinamibi.”—1 Ped. 4:7, NW.

² Huli sa panahon na kinabubuhayan ta, madunong na ihapot ta sa satong sadiri: ‘Gurano ako kamapinamibi? Ginagamit ko daw an gabos na klase nin pamibi, asin padagos daw akong namimibi? Ugali ko daw na ipamibi an iba, o an mga pamibi ko daw parati sanang nakapokus sa pangangaipo asin kagustuhan ko? Asin gurano kahalaga an pamibi kun dapit sa sakong kaligtasan?’

3. Ano an nagkapirang klase nin pamibi?

³ Sa surat ni apostol Pablo sa mga taga Efeso, sinambit niya an ‘gabos na [klase nin] pamibi.’ (Efe. 6:18) Sa satong mga pamibi, tibaad parati tang hinahagad ki Jehova an saiyang tabang na mapaniguan an mga pangangaipo niyato asin mapangganahan an mga kadipisilan. An ‘Naghihinanyog kan pamibi’ mamumuton na nagdadangog sa satong mga pakiulay para sa tabang. (Sal. 65:2) Minsan siring, maninigo na hinguwahon ta man na tawan nin atensiyon an iba pang klase nin pamibi. Kaiba digdi an mga pag-umaw, pagpasalamat, asin pagngayo-ngayo.

4. Taano ta maninigo na parati tang umawon si Jehova sa satong mga pamibi?

⁴ Dakul an dahilan kun taano ta maninigong kaiba sa  satong mga pamibi ki Jehova an mga tataramon nin pag-umaw. Halimbawa, napapahiro kitang umawon siya pag naiisip ta an ‘saiyang kadakulaan’ asin an ‘saiyang kadunungan’ na nahihiling sa mga gibo niya. (Basahon an Salmo 150:1-6.) Iyo, 11 beses kitang sinasadol kan anom na bersikulo kan ika-150 Salmo na umawon si Jehova! Huli sa hararom na paggalang sa Diyos, an nagsurat nin saro pang salmo nag-awit: ‘Inuumaw taka pitong beses sa sarong aldaw huli kan saimong matanos na mga paghukom.’ (Sal. 119:164, BPV) * Maninigo nanggad na umawon si Jehova. Kun siring, bako daw na maninigo ta siyang umawon sa satong mga pamibi nin “pitong beses sa sarong aldaw,” an buot sabihon, parati nanggad?

5. Paano sarong proteksiyon an pagigin mapagpasalamat sa pamibi?

⁵ An pagpasalamat saro pang mahalagang klase nin pamibi. Sinadol ni Pablo an mga Kristiyano sa siyudad nin Filipos: ‘Sa ano man dai kamo mahadit, kundi sa gabos na bagay [paagi] sa pamibi asin pagngayo-ngayo na may pagpasalamat, ipahayag nindo sa Diyos an saindong mga hinahagad.’ (Fil. 4:6) Sarong proteksiyon sa sato an pagpahayag nin udok sa pusong pasasalamat sa pamibi ki Jehova. Nangurugnang mahalaga ini ta kita nabubuhay na sa huring mga aldaw na an mga tawo “dai tataong magbalos.” (2 Tim. 3:1, 2) Lakop nanggad sa kinaban an pagigin bakong mapagpasalamat. Kun dai kita mag-iingat, madali kitang maulakitan kan ugaling iyan. An pagpasalamat sa Diyos paagi sa pamibi nakakatabang sa sato na magin kontento saka dai magin ‘paragumod-gumod asin parareklamo manungod sa satong kamugtakan sa buhay.’ (Jud. 16, NW) Apuwera diyan, kun nagpapasalamat an mga payo nin pamilya sa saindang pamibi kaiba kan saindang mga mahal sa buhay, dinadagka ninda an saindang agom asin mga aki na magin mapagpasalamat man.

6, 7. Ano an pagngayo-ngayo, asin ano an puwede tang ipagngayo-ngayo ki Jehova?

⁶ An pagngayo-ngayo sarong udok sa pusong pamibi na may makusugon na emosyon. Ano an puwede tang ipagngayo-ngayo ki Jehova? Puwede ta nanggad gibuhon iyan kun kita pinepersegir o may hilang na puwedeng ikagadan. Sa siring na mga panahon, natural sanang nagigin mapagngayo-ngayo an satong mga pamibi para sa tabang nin Diyos. Pero sa arog lang daw kaiyan na mga kamugtakan puwede kitang magngayo-ngayo ki Jehova?

⁷ Isip-isipon an modelong pamibi ni Jesus, asin mangnuhon an sinabi niya dapit sa pangaran nin Diyos, sa Saiyang Kahadian, asin kabutan. (Basahon an Mateo 6:9, 10.) Lakop nanggad sa kinaban na ini an karatan, asin dai ikinakatao kan mga gobyerno nin tawo dawa an panginot na pangangaipo kan mga siyudadano. Kun siring, maninigo nanggad na ipamibi ta na pakangbanalon lugod an pangaran kan satong langitnon na Ama asin halion kan saiyang Kahadian an pamamahala ni Satanas digdi sa daga. Panahon man ini na magngayo-ngayo ki Jehova na gibuhon lugod an saiyang kabutan digdi sa daga nin siring sa langit. Kun siring, magdanay kitang mapinamibi, na andam na gamiton an gabos na klase nin pamibi.

8, 9. Taano ta dai niyato maninigong husgaran si Pedro asin an iba pang apostol na napaturog sa hardin nin Getsemane?

⁸ Dawa ngani sinadol ni apostol Pedro an mga Kristiyano na “magin mapinamibi,” siya mismo dai nakagibo kaiyan sa kisiyera sarong pagkakataon. Saro siya sa mga disipulo na napaturog mantang namimibi si Jesus sa hardin nin Getsemane. Dawa pagkatapos na sabihan sinda ni Jesus na ‘magpuka asin [padagos na] mamibi,’ dai ninda iyan nagibo.—Basahon an Mateo 26:40-45.

⁹ Minsan siring, imbes na husgaran si Pedro asin an iba pang apostol huling dai sinda  nakapagdanay na mata, maninigo tang girumdumon na pagalon na sinda huli sa gabos nindang ginibo kan aldaw na idto. Nagpreparar asin nagselebrar sinda kan Paskuwa kan bangging idto. Dangan pinunan ni Jesus an Pamanggihan kan Kagurangnan, na magigin arugan kun paano iseselebrar an Memoryal kan saiyang kagadanan. (1 Cor. 11:23-25) ‘Pakaawit ninda nin sarong himno, nagduruman sinda sa bukid nin mga Oliva,’ na naglakaw nin huruhalawig sa hayakpit na mga tinampo nin Jerusalem. (Mat. 26:30, 36) Kan oras na iyan, posibleng matangaon na. Kun kita nasa hardin nin Getsemane kan bangging idto, posibleng napaturog man kita. Imbes na anggutan ni Jesus an pagal nang mga apostol, mamumuton niyang minidbid na ‘an espiritu nagmamawot nanggad, alagad an laman maluya.’

10, 11. (a) Anong leksiyon an nanudan ni Pedro sa nangyari sa saiya sa hardin nin Getsemane? (b) Ano an nanudan mo sa nangyari ki Pedro?

¹⁰ An nangyari ki Pedro sa hardin nin Getsemane dai nawaran nin saysay. Nakanuod siya nin leksiyon sa makulog na paagi huling dai siya nagin mapinamibi. Bago kaiyan, sinabi ni Jesus: ‘Kamo gabos magkakasiringkog sa sako ngunyan na banggi.’ Pero, marigon na nagsabi si Pedro: ‘Minsan an gabos magkasiringkog sa saimo, ako dai nanggad masisingkog.’ Nagsimbag si Jesus na papaindahan siya ni Pedro nin tulong beses. Huling dai nagtubod, nagsabi si Pedro: ‘Minsan pa kaipuhan na magadan ako kaiba mo, dai ko ika papaindahan.’ (Mat. 26:31-35) Minsan siring, talagang nasingkog siya siring sa sinabi ni Jesus. Kan ultimong pagpainda niya ki Jesus, siya namundo nanggad kaya ‘nagtangis nin mapaiton.’—Luc. 22:60-62.

¹¹ Siguradong nakanuod digdi nin leksiyon si Pedro asin napangganahan niya an tendensiyang magtiwala sa sadiri. Malinaw na nakatabang sa saiya an pamimibi sa bagay na ini. An totoo, mahalagang mangnuhon na hali sa saiya an sadol na “magin mapinamibi.” Hinihimati ta daw an ipinasabong na sadol na iyan? Dugang pa, kita daw ‘padagos na namimibi’ asin sa siring ipinapahiling ta an pagsarig ki Jehova? (Sal. 78:7) Girumdumon ta man an sadol ni Pablo: ‘An naghuhuna na siya nagtitindog, mag-ingat na dai siya mapukan’ o matumba.—1 Cor. 10:12.

12. Taano ta marahay na halimbawa sa sato si Nehemias?

¹² Isip-isipon si Nehemias, na nagin kopero ni Hading Artajerjes nin Persia kan ikalimang siglo B.C.E. Siya marahayon na halimbawa sa pagpamibi nin udok sa puso. Dakul na aldaw siyang padagos na ‘nag-ayuno asin nag-arang sa atubangan nin Diyos’ dapit sa mamundong kamugtakan kan mga Judio sa Jerusalem. (Neh. 1:4) Kan si Nehemias haputon ni Artajerjes kun taano ta mamundo siya, tulos siyang ‘namibi sa Diyos nin kalangitan.’ (Neh. 2:2-4) Ano an resulta?  Sinimbag ni Jehova an mga pamibi niya asin minaniobra an mga bagay-bagay para sa kapakinabangan kan Saiyang banwaan. (Neh. 2:5, 6) Siyertong napakusog kaini an pagtubod ni Nehemias!

13, 14. Ano an maninigo tang gibuhon para mapagdanay na makusog an pagtubod ta asin malabanan an paghihinguwa ni Satanas na paluyahon kita?

¹³ An padagos na pamimibi, arog kan ginibo ni Nehemias, nakakatabang sa sato na mapagdanay an makusog na pagtubod. Si Satanas daing hirak asin parating minasalakay kun maluya kita. Halimbawa, kun grabe an satong hilang o depresyon, tibaad magpuon kitang mag-isip na dai pinapahalagahan nin Diyos an panahon na ginagamit ta sa ministeryo kada bulan. An nagkapira sa sato tibaad napupurisaw huli gayod sa mga inagihan ta sa buhay. Pinapaniwala kita ni Satanas na dai kitang halaga. Sa parati, an katuyuhan kan mga pagsalakay niya iyo na aprobetsaran an satong emosyon asin sa siring paluyahon an pagtubod ta. Minsan siring, kun kita “mapinamibi,” mapagdadanay tang makusog an pagtubod niyato. Iyo, paagi sa dakulang kalasag ‘nin pagtubod, masisigbo ta an gabos na naglalaad na busog [kan saro na] maraot.’—Efe. 6:16.

¹⁴ Kun kita “mapinamibi,” magigin kitang mapagbantay asin sa siring dai makompromiso kun umabot an dai inaasahan na pagbalo sa pagtubod. Kun napapaatubang kita sa mga pagbalo asin kasakitan, girumdumon ta an halimbawa ni Nehemias saka tulos na mamibi sa Diyos. Mapapangganahan ta an mga sugot asin pagbalo sa satong pagtubod solamente paagi sa tabang ni Jehova.

15. Ano an mga maninigo tang ihapot sa satong sadiri dapit sa pamimibi para sa iba?

¹⁵ Nagngayo-ngayo si Jesus para ki Pedro tanganing dai madaog an pagtubod kan apostol. (Luc. 22:32) Kan inot na siglo, inarog si Jesus sa bagay na ini kan maimbod na Kristiyanong si  Epafras asin maigot siyang namibi para sa mga tugang sa Colosas. ‘Danay niyang ipinapamibi nin maigot,’ an surat ni Pablo sa sainda, ‘na kamo magin masarig, mayo nin pagduwa-duwa sa pagtubod asin andam na magkuyog sa kabutan nin Diyos.’ (Col. 4:12, BPV) Marahay na ihapot niyato sa satong sadiri: ‘Maigot daw akong namimibi para sa sakong mga tugang sa bilog na kinaban? Gurano ko kaparating ipinapamibi an mga kapagtubod na nasasakitan huli sa natural na kalamidad? Kasuarin ako huring namibi nin maigot para sa mga may magabat na responsabilidad sa organisasyon ni Jehova? Ipinamibi ko daw kasuarin pa sana an mga indibidwal sa kongregasyon na napapaatubang sa kadipisilan?’

16. Talaga daw na mahalaga an satong pamimibi para sa iba? Ipaliwanag.

¹⁶ Makakatabang nanggad sa iba an satong mga pamibi ki Jehova Diyos para sa sainda. (Basahon an 2 Corinto 1:11.) Minsan ngani bakong obligado si Jehova na humiro huling dakul na nagsasamba sa saiya an pauruutrong namimibi, pinapahalagahan niya an saindang tunay asin udok na pagmakulog sa lambang saro kaya sisimbagon niya an mga pamibi ninda. Kaya dapat niyatong pahalagahan an satong pribilehiyo asin paninimbagan na mamibi para sa iba. Arog ni Epafras, maninigo niyatong ipahiling an udok sa pusong pagkamuot asin pagmakulog sa satong Kristiyanong mga tugang paagi sa maigot na pamimibi para sa sainda. Sa paggibo kaiyan, madadagdagan an kaugmahan niyato, huling ‘urog pang mapalad [o maugma] an nagtatao kisa nag-aako.’—Gui. 20:35.

17, 18. Paano makakatabang sa sato an pagigin “mapinamibi”?

¹⁷ Bago sabihon ni Pablo na “lihis na an banggi; uya na an aldaw,” isinurat niya: ‘Aram nindo na oras na tanganing magmata kita sa pagkaturog. An satong kaligtasan mas harani na sato kisa kaidto kan bago pa sana kitang magtubod.’ (Roma 13:11, 12, BPV) Harani na an panuga nin Diyos na bagong kinaban, asin an satong kaligtasan mas harani na kisa sa tibaad iniisip niyato. Dai kita dapat magturog sa espirituwal, asin dai niyato nuarin man maninigong pagtugutan an mga pandisturbo kan kinaban na agawon an satong panahon para sa personal na pamimibi ki Jehova. Imbes, “magin mapinamibi” kita. Paagi sa paggibo kaiyan, matatabangan kita na magkaigwa nin ‘banal na pamumuhay asin katanusan’ mantang hinahalat niyato an aldaw ni Jehova. (2 Ped. 3:11, 12) Sa siring, mahihiling sa satong pamumuhay na kita nagdadanay na mata sa espirituwal asin talagang nagtutubod na harani na an katapusan kan maraot na sistemang ini nin mga bagay. Kun siring, kita lugod ‘mamibi sa gabos na oras.’ (1 Tes. 5:17, BPV) Arugon man niyato si Jesus paagi sa paghanap nin lugar na makapamibi nin solo. Kun magtatao kita nin igong panahon para sa satong personal na pamimibi ki Jehova, urog pa kitang magigin harani sa saiya. (Sant. 4:7, 8) Marahayon nanggad na bendisyon iyan!

¹⁸ An Kasuratan nagsasabi: ‘Kan mga aldaw nin saiyang laman, [si Cristo] nagdulot nin mga pamibi asin pagngayo-ngayo na may makusog na pagtangis asin mga luha sa [Saro na] makakaligtas saiya sa kagadanan, asin dinangog siya huli kan saiyang diyosnon na takot.’ (Heb. 5:7) Si Jesus nagngayo-ngayo saka nakimahirak asin nagdanay na maimbod sa Diyos sagkod sa mismong katapusan kan saiyang buhay digdi sa daga. Bilang resulta, binuhay liwat ni Jehova an saiyang namumutan na Aki asin tinawan siya nin balos na imortal na buhay sa langit. Kita man puwedeng magin maimbod sa satong langitnon na Ama ano man na sugot asin kasakitan an tibaad mapaatubang sa sato. Iyo, puwede niyatong makamtan an premyong buhay na daing katapusan—basta kita magdanay na “mapinamibi.”