1, 2. (a) Ano an puwedeng makaimpluwensiya sa aktuwal na nahihiling ta? (b) Sa ano kita nakakasiyerto dapit sa Kahadian nin Diyos?

AROG kan tibaad naririsa mo, sa parati medyo magkakalain an mga detalye na nagigirumduman nin mga nakahiling mismo sa sarong pangyayari. Kaagid kaiyan, tibaad nadidipisilan an saro na magirumduman an eksaktong sinabi kan doktor pagkatao nin diagnosis. O tibaad dai nakukua nin saro an saiyang liyabe o antipara, minsan ngani nasa atubangan na niya iyan. Puwedeng konektado gabos ini sa sinasabi nin mga parasiyasat na sarong klase nin pagkabuta—dai naririsa an sarong bagay, o nalilingawan iyan, huling may ibang bagay na ginigibo an saro. Minalataw na kabtang ini kan pagpunsiyonar kan satong hutok.

² Dakul ngunyan an may kaagid na klase nin pagkabuta kun dapit sa mga pangyayari sa kinaban. Tibaad sinasabi ninda na dakulaon an pagbabago sa kinaban puon kan 1914, pero dai ninda nasasabutan an tunay na kahulugan kan mga pangyayaring ini. Bilang mga estudyante sa Bibliya, aram niyato na kan 1914 nagdatong sa sarong paagi an Kahadian nin Diyos kan patukawon sa trono si Jesus bilang Hadi sa langit. Pero aram niyato na urog pa diyan an kalabot sa simbag sa pamibi na ‘Dumatong lugod an kahadian mo. Gibuhon an buot mo, digdi sa daga nin siring sa langit.’ (Mat. 6:10) Malinaw na kaiba diyan  an katapusan kan presenteng maraot na sistema. Pag nangyari na iyan, saka sana mangyayari an kabutan nin Diyos digdi sa daga nin siring sa langit.

3. Ano an bentaha ta sa pag-adal kan Tataramon nin Diyos?

³ Huling regular kitang nag-aadal kan Tataramon nin Diyos, nahihiling niyato na nauutob na ngunyan an mga hula. Lain nanggad sa kadaklan na tawo! Sibot-sibot sinda sa buhay asin mga pinagmamaigutan na kamtan kaya dai ninda nahihiling an malinaw na ebidensiya na si Cristo namamahala na puon kan 1914 saka dai mahahaloy ipapaabot na niya an paghukom nin Diyos. Minsan siring, pag-isipan an personal na hapot na ini: Kun ika dakul nang dekada na naglilingkod sa Diyos, ika daw mapagrisa asin interesado pa man giraray arog kaidtong dakul na taon na an nakaagi kun dapit sa kahulugan kan mga nangyayari sa panahon ta? Dawa kun ika baguhan pa sanang Saksi, sa ano nakapokus an atensiyon mo? Ano man an simbag ta, repasuhon niyato an tulong mahalagang dahilan na makakapagtiwala kita na dai mahahaloy magibo na nin dugang pang mga lakdang an Hadi na linahidan ni Jehova para lubos na utubon an kabutan nin Diyos digdi sa daga.

4, 5. (a) Ano an ginigibo ni Jesus puon pa kan 1914? (Hilingon an ritrato sa kapinunan kan artikulo.) (b) Sa ano nagrerepresentar an tulong nangangabayo, asin paano nauutob an hulang ini?

⁴ Kan 1914, tinawan nin langitnon na korona si Jesu-Cristo—na ilinaladawan na nakasakay sa puting kabayo. Tulos-tulos siyang huminiro para tapuson an pandadaog sa maraot na sistema ni Satanas. (Basahon an Kapahayagan 6:1, 2.) An naglaladawan na hula sa Kapahayagan kapitulo  nagtaong dahilan para asahan na pagkaestablisar kan Kahadian nin Diyos, marikas na magrabe an mga kamugtakan sa kinaban—giyera, kakulangan nin kakanon, damat o nakakagadan na hilang, asin iba pang kawsa nin kagadanan. An mga pangyayaring ini ilinaladawan kan tulong nangangabayo na kasunod mismo ni Jesu-Cristo.—Kap. 6:3-8, NW.

⁵ Arog kan ihinula, ‘hinali an katuninungan sa daga,’ sa ibong kan mga panuga nin tawo na internasyonal na kooperasyon asin diplomasya. An Giyera Mundiyal I puwedeng mansayon na kapinunan sana nin mapanglaglag na mga giyera, arog kan pinapatunayan kan dai pa sana nahahaloy na mga pangyayari sa kinaban. Asin sa ibong kan dakul na pag-uswag sa ekonomiya saka siyensiya puon 1914, padagos na namemeligro an katiwasayan kan kinaban huli sa kakulangan nin kakanon. Apuwera kaini, siisay an makakanigar na minilyon kada taon an nagagadan huli sa gabos na klase nin “damat” asin natural na kalamidad? An hiwas, pagigin parati, asin paggrabe kan mga iyan dai pang kaagid sa kasaysayan nin tawo. Narerealisar mo daw an kahulugan kaiyan?

6. Siisay an nagtaong atensiyon sa kautuban kan hula sa Bibliya, asin huli kaini ano an ginibo ninda?

⁶ Kan biglang mangyari an Giyera Mundiyal  asin epidemya nin trangkaso Española, diyan na nakapokus an isip nin dakul. Alagad, inaantisipar nang marhay kaidto kan linahidan na mga Kristiyano an 1914 bilang an katapusan kan Mga Panahon kan mga Hentil, o “itinalaan na mga panahon kan mga nasyon.” (Luc. 21:24, NW) Dai sinda lubos na sigurado kun ano an mangyayari. Pero, aram ninda na an taon 1914 an magigin kapinunan nin dakulang pagbabago kun dapit sa pamamahala nin Diyos. Kan masabutan ninda an kautuban kan hula sa Bibliya, pusuan nindang idineklarar sa iba na nagpuon na an pamamahala nin Diyos. An paghihinguwa ninda na ibalangibog an Kahadian nagresulta sa grabeng persekusyon. Nangyari iyan sa dakul na nasyon, na saro pang kautuban kan hula. Sa suminunod na mga dekada, an mga kaiwal kan Kahadian ‘nagmukna nin karibukan sa ngaran kan ley.’ Naggamit man sinda nin pisikal na kadahasan, pagbilanggo, asin paggadan pa ngani paagi sa pagbitay, pagbadil, o pagpugot sa mga tugang.—Sal. 94:20, NW; Kap. 12:15.

7. Taano ta dai nasasabutan kan kadaklan an tunay na kahulugan kan mga pangyayari sa kinaban?

 ⁷ Mantang kadakul nin ebidensiya na naestablisar na sa langit an Kahadian nin Diyos, taano ta dai inaako kan kadaklan an kahulugan kaini? Taano ta dai ninda nasasabutan an koneksiyon kan mga kamugtakan sa kinaban asin kan espesipikong mga hula sa Bibliya na haloy nang ipinapaisi kan mga lingkod nin Diyos? Puwede daw na huling an kadaklan nakapokus sa nahihiling sana kan mga mata ninda? (2 Cor. 5:7) Sibot-sibot daw sinda sa mga aktibidad nin tawo kaya garo sinda buta kun dapit sa ginigibo nin Diyos? (Mat. 24:37-39) An iba daw sa sainda naliling-ling huli sa mga propaganda ni Satanas? (2 Cor. 4:4) Kaipuhan an pagtubod asin pagigin mapagrisa sa espirituwal para masabutan an nangyayari sa runa nin mga espiritu. Nauugma nanggad kita na bako kitang buta sa talagang nangyayari!

8-10. (a) Paano nauutob an 2 Timoteo 3:1-5? (b) Taano ta masasabi niyato na urog na naggagrabe an karatan?

⁸ May ikaduwang dahilan kun taano ta aram niyato na dai mahahaloy magigin lubos nang kontrolado kan Kahadian nin Diyos an mga bagay-bagay sa daga: Urog na naggagrabe an karatan sa sosyedad nin tawo. Haros sarong siglo nang hiling-hiling an mga kamugtakan na ihinula sa 2 Timoteo 3:1-5. Sa katunayan, iyan urog man na naghihiwas, naglalawig, asin nagigin parati. Dai mo daw naririsa na urog na nauutob an hulang ini? Pag-ulayan ta an nagkapirang halimbawa na nag-iilustrar na marhay kaini.—Basahon an 2 Timoteo 3:1, 13.

⁹ Isip-isipa an pagkakalain kan mga bagay na bakong akseptable kan dekada nin 1940 o 1950 asin an nangyayari ngunyan sa lugar nin trabaho, pag-aling-aling, isport, saka moda. Ordinaryo na sana an grabeng kadahasan asin imoralidad. Gustong-gusto nin mga tawo na mahiling sinda na mas maringis, malaswa, o daing hirak kisa sa iba. An mga programa sa telebisyon na bakong akseptable kan dekada nin 1950 klasipikado na ngunyan na angay hilingon nin mga pamilya. Asin dakul an nag-aadmitir na makusog an impluwensiya nin mga homoseksuwal kun dapit sa aling-alingan saka moda, na pinapalakop sa publiko an istilo nin pamumuhay ninda. Nagpapasalamat nanggad kita na aram ta an pagmansay nin Diyos!—Basahon an Judas 14, 15.

 ¹⁰ O puwedeng pagkumpararon nin sarong Kristiyano an rebelyosong paggawi nin mga hoben kan dekada nin 1950 asin an nangyayari ngunyan. Kaidto, tama sanang mahadit an mga magurang kun baga an mga aki ninda naninigarilyo, nag-iinom nin inumon na de alkohol, o nagbabayle nin malaswa. Ngunyan, ordinaryo na sana an arog kaining nakakabiglang mga bareta: Pinagbabadil nin sarong 15 anyos na estudyante an mga kaklase niya, na 2 an nagadan asin 13 an naerido. Daing hirak na ginadan nin sarong grupo nin burat na mga tin-edyer an sarong nuwebe anyos na aking babayi asin binugbog an ama saka pinsan niya. Sigun sa report, sa sarong nasyon sa Asia mga hoben an responsable sa kabanga kan mga krimen sa nakaaging sampulong taon. Rasonable daw na nigaran nin siisay man an urog na paggrabe nin mga kamugtakan?

11. Taano ta dakul an dai nakakarealisar na urog na naggagrabe an mga kamugtakan?

¹¹ Eksakto an pagkasabi ni apostol Pedro: ‘Sa mga huring aldaw an mga paraulog-ulog madatong na may pag-ulog-ulog, na maglalakaw suno sa saindang sadiring mga hurot, asin magsasabi, Hain an panuga kan saiyang pagdatong? Huli ta, magpuon kan aldaw na tumurog [sa kagadanan an mga apuon], an gabos na bagay nagdadanay siring sa dati, puon sa kapinunan kan paglalang.’ (2 Ped. 3:3, 4) Ano an posibleng dahilan kun taano ta arog kaini an reaksiyon nin mga tawo? Garo baga miyentras na mas nagigin komun an sarong sitwasyon, mas dai na man iyan pig-iintindi nin mga tawo. An dagos-dagos na pagruro kan moralidad nin mga tawo sa pangkagabsan garo baga dai nang gayo nakakakubhan kisa sa bigla asin dai inaasahan na pagbago sa paggawi nin sarong dayupot na kamidbid. Minsan siring, peligroso an luway-luway na pagrurong ini nin moralidad.

12, 13. (a) Taano ta dai dapat mangluya an satong buot huli sa mga pangyayari sa kinaban? (b) Ano an makakatabang sa sato na makayanan an mga kamugtakan na masakit pakibagayan?

¹² Pinatanidan kita ni apostol Pablo na ‘sa huring mga aldaw,’ an mga kamugtakan magigin ‘makahahandal’ o masakit pakibagayan. (2 Tim. 3:1) Pero posibleng pakibagayan iyan, kaya puwede tang atubangon iyan. Sa tabang ni Jehova, kan saiyang espiritu, asin kan Kristiyanong kongregasyon, mapapangganahan ta an ano man na pagkadisganar o pagkatakot na aatubangon niyato. Makakapagdanay kitang maimbod. ‘An kapangyarihan’ na labi sa ordinaryo hali sa Diyos, bako sa sato mismo.—2 Cor. 4:7-10.

¹³ Bilang introduksiyon ni Pablo sa hula dapit sa huring mga aldaw, marahay na mangnuhon ta an pananaram na ‘aramon mo ini.’ Garantiya iyan na siyertong mangyayari an suminunod na sinabi dapit sa hula. Daing duda na urog na magrabe an karatan nin bakong diyosnon na sosyedad sagkod na tapuson iyan ni Jehova. May dokumentadong ebidensiya an mga historyador na may mga sosyedad o nasyon na buminagsak huli sa grabeng pagruro nin moralidad. Minsan siring, dai pa nuarin man nangyari sa kasaysayan nin tawo na ruminuro an moralidad kan bilog na kinaban arog ngunyan. Tibaad dai iniintindi nin dakul na tawo an kahulugan kan daing kaagid na mga pangyayaring ini puon 1914, pero malinaw na ipinapahiling kaiyan sa sato na makakapagtiwala kita na dai mahahaloy mahiro na nanggad an Kahadian nin Diyos.

14-16. Ano an ikatulong dahilan para magtubod na dai mahahaloy maabot na an Kahadian nin Diyos?

¹⁴ May ikatulo pang dahilan para magtiwala. An nangyayari sa banwaan nin Diyos nagpaparisa na harani na an katapusan. Halimbawa, bago establisaron sa langit an Kahadian nin Diyos, sarong grupo nin maimbod na mga linahidan an aktibong naglilingkod sa Diyos. Kan dai nangyari kan 1914 an nagkapira sa mga bagay na inaasahan ninda, ano an ginibo ninda? Dawa nag-agi nin mga pagbalo asin persekusyon, pinatunayan kan kadaklan sa sainda an integridad ninda asin padagos na naglingkod ki Jehova. Sa pag-agi nin  mga taon, an kadaklan—kun bakong gabos—sa mga linahidan na idto maimbod na natapos an buhay ninda digdi sa daga.

¹⁵ Sa detalyadong hula ni Jesus dapit sa pagtatapos kan sistemang ini nin mga bagay, sinabi niya: ‘An kapag-arakian na ini dai malihis sagkod na mautob an gabos na bagay na ini.’ (Basahon an Mateo 24:33-35.) Nasasabutan niyato na kan sambiton ni Jesus an ‘kapag-arakian na ini,’ duwang grupo nin linahidan na mga Kristiyano an pinapanungdan niya. An inot na grupo buhay na kan 1914, asin nasabutan tulos ninda an tanda kan presensiya ni Cristo kan taon na idto. An mga kabilang sa grupong ini bako sanang buhay na kan 1914 kundi sinda linahidan nin espiritu bilang mga aki nin Diyos kan taon na iyan o bago pa.—Roma 8:14-17.

¹⁶ Kabilang sa ikaduwang grupo kan ‘kapag-arakian na ini’ an linahidan na mga kakontemporanyo kan inot na grupo. Bako sanang buhay na sinda kan buhay pa an mga kabilang sa inot na grupo kundi sinda linahidan kan banal na espiritu kan nasa daga pa an mga kabilang sa inot na grupo. Huli kaini, bako gabos na linahidan ngunyan kabilang sa ‘kapag-arakian na ini’ na sinambit ni Jesus. Ngunyan, naggugurang na man an mga kabilang sa ikaduwang grupo. Alagad, sinisiyerto sa sato kan sinabi ni Jesus sa Mateo 24:34 na kisiyera an ibang kabilang sa ‘kapag-arakian na ini dai malihis’ sagkod na dai ninda nahihiling an pagpuon kan dakulang kahurasaan. Maninigo na urog na pakusugon kaini an panarig niyato na dikit na sanang panahon an natatada bago humiro an Hadi kan Kahadian nin Diyos para laglagon an mga maraot asin punan an sarong matanos na bagong kinaban.—2 Ped. 3:13.

17. Ano an kongklusyon niyato basado sa tulong ebidensiyang pinag-ulayan ta?

¹⁷ Ano an kongklusyon ta basado sa tulong ebidensiyang pinag-ulayan niyato? Nagpatanid si Jesus na dai ta maaaraman—dai ta aram—an eksaktong aldaw o oras. (Mat. 24:36; 25:13) Pero puwede tang maaraman asin talagang aram ta an ‘kapanahunan,’ na sinambit ni Pablo. (Basahon an Roma 13:11.) Nabubuhay kita sa kapanahunan na iyan, an huring mga aldaw. Kun nagtatao kita nin lubos na atensiyon sa hula kan Bibliya asin sa mga ginigibo ni Jehova Diyos saka ni Jesu-Cristo, siyertong mahihiling ta an makusog na ebidensiya na talagang nabubuhay na kita sa panahon na harani na an katapusan kan sistemang ini nin mga bagay.

18. Ano an naghahalat sa mga habong magmidbid sa Kahadian nin Diyos?

¹⁸ Dai mahahaloy, an mga habong magmidbid sa makangingirhat na awtoridad na itinao ki Jesu-Cristo, an mapangganang Nakasakay sa puting kabayo, mapipiritan na admitiron na sala sinda. Dai sinda nin madudulagan. Sa panahon na iyan, dakul an makurahaw sa grabeng takot: “Siisay an makakatagal?” (Kap. 6:15-17) Alagad, an simbag itinatao kan sunod mismong kapitulo kan Kapahayagan. An mga linahidan asin an mga may paglaom na mabuhay digdi sa daga iyo an “makakatagal” sa aldaw na iyan na may pag-uyon nin Diyos. Dangan makakaligtas sa dakulang kahurasaan an “dakulang kadaklan” nin ibang mga karnero.—Kap. 7:9, 13-15.

19. Bilang saro na nagmimidbid, nag-aako, asin naghihiro kauyon kan malinaw na ebidensiya na madali nang matapos an huring mga aldaw, ano an linalauman mo?

¹⁹ Kun nagtatao kita ngunyan nin lubos na atensiyon sa nahihiling na kautuban kan hula sa Bibliya sa importanteng mga panahon na ini, dai kita maliling-ling kan mga pang-akit kan kinaban ni Satanas; dai man kita mabubuta kun dapit sa tunay na kahulugan kan mga pangyayari sa kinaban. Madali nang tapuson ni Cristo an pandadaog niya sa bakong diyosnon na sosyedad na ini paagi sa matanos na pangultimong giyera. (Kap. 19:11, 19-21) Isip-isipa nanggad an pagsiyerto sa sato kan Bibliya na magigin maugma kita sa panahon na iyan!—Kap. 20:1-3, 6; 21:3, 4.