1, 2. Ano an pagkakalain kan mamumuton na pagbabantay ni Jehova asin kan pagmanman nin mga kamera?

SA DAKUL na nasyon, padakul nin padakul an nagagamit nin mga CCTV camera tanganing masubaybayan an trapiko asin mahiling an nangyayaring mga aksidente. Kun may nabunggo tapos duminulag an drayber, makakatabang sa awtoridad an narekord kan kamera tanganing mahanap asin maarestar an drayber. Huli sa mga kamerang iyan na yaon sa dakul na lugar, nagigin mas dipisil na sa mga tawo na malusutan an saindang mga ginibo.

² Pero, tama daw na isipon ta na arog kan kamerang iyan an satong mamumuton na Ama na si Jehova? Sinasabi man nanggad kan Bibliya na an saiyang mga mata ‘yaon sa gabos na lugar.’ (Tal. 15:3) Pero buot sabihon daw kaini pirmi niyang pigmamanmanan an ginigibo ta? Binabantayan daw kita nin Diyos tangani sanang ipautob an saiyang mga ley, na an iniisip pagpadusa? (Jer. 16:17; Heb. 4:13) Dai nanggad! Binabantayan kita ni Jehova huli ta inot sa gabos namumutan niya an kada saro sa sato asin interesado siya sa kapakanan ta.—1 Ped. 3:12.

3. Ano an pag-uulayan tang limang paagi na diyan ipinapahiling nin Diyos an saiyang mamumuton na pag-ataman?

 ³ Ano an makakatabang sa sato na pahalagahan an mamumuton na pagbabantay sa sato nin Diyos? Pag-ulayan ta an minasunod na mga paagi kun paano niya ini ginigibo: (1) pagtao nin patanid pag nahihiling niya sa sato an tendensiya na gumibo nin maraot, (2) pagtatanos sa sato pag napapasala kita, (3) paggiya sa sato paagi sa mga prinsipyo na yaon sa saiyang Tataramon, (4) pagtabang sa sato pag nag-aagi kita nin manlain-lain na problema, asin (5) pagtao nin balos pag may nahihiling siyang marahay sa sato.

4. Taano ta pinatanidan ni Jehova si Cain na an kasalan ‘yaon sa tata’ nakaabang?

⁴ Inot, pag-ulayan ta kun paano kita pinapatanidan nin Diyos pag nahihiling niya sa sato an tendensiya na gumibo nin maraot. (1 Cron. 28:9) Tanganing mapahalagahan an paaging ini nin mamumuton na pagbabantay nin Diyos, hilingon ta kun paano niya kinaulay si Cain, na ‘naanggot na gayo’ kan dai siya uyunan nin Diyos. (Basahon an Genesis 4:3-7.) Sinadol ni Jehova si Cain na ‘maggibo nin marahay.’ Ta kun dai, nagpatanid si Jehova na an kasalan ‘yaon sa tata’ nakaabang. Habo nin Diyos na ‘magpasakop’ o magpadaog siya diyan. Gusto nin Diyos na maghimati si Cain sa patanid asin mag-ako nin ‘pag-umaw’ o pag-uyon nin Diyos. An pagkaigwa kaiyan makakatabang tanganing maingatan an marahay na relasyon sa Diyos.

5. Sa anong mga paagi pinapatanidan kita ni Jehova dapit sa bakong marahay na mga kaisipan na tibaad igwa kita?

⁵ Kumusta kita ngunyan? Nahihiling ni Jehova an nasa puso ta; dai ta maitatago sa saiya kun ano talaga an mga iniisip saka motibo ta. Gusto kan satong mamumuton na Ama na maglakaw kita sa dalan nin katanusan; pero, dai niya kita pinipirit na gibuhon iyan. Pag napapasala na kita nin direksiyon, pinapatanidan niya kita gamit an saiyang Tataramon, an Bibliya. Paano? Sa satong aroaldaw na pagbasa kan Bibliya, parati kitang nakakabasa nin teksto na nakakatabang sa sato na malabanan an maraot na mga tendensiya asin bakong marahay na mga kaisipan. May panahon man na ipinapaliwanag sa mga publikasyon ta an pinaglalabanan tang problema saka kun paano ta iyan makakaya. Asin sa satong mga pagtiripon sa kongregasyon, gabos kita nag-aako nin napapanahon nanggad na sadol!

6, 7. (a) Taano ta masasabing an mga publikasyon na ginigibo para sa minilyon na tawo ebidensiya kan mamumuton na pag-ataman nin Diyos sa saimo? (b) Paano ka makikinabang sa pagtao sa saimo ni Jehova nin mamumuton na atensiyon?

⁶ An mga pagpatanid na arog kaiyan ebidensiya talaga kan mamumuton na pagbabantay ni Jehova sa kada saro sa sato. Iyo, haluyon nang yaon an Bibliya, para sa minilyon na tawo an mga publikasyon na ginigibo kan organisasyon nin Diyos, asin para sa bilog na kongregasyon an mga sadol na itinatao sa mga pagtiripon. Pero gusto ni Jehova na tawan mo nin atensiyon an saiyang Tataramon tanganing maliwat mo an saimong kaisipan. Kaya masasabi tang ebidensiya ini kan mamumuton na pag-ataman ni Jehova sa saimo personalmente.

⁷ Tanganing makinabang sa mga patanid nin Diyos, dapat ta ngunang masabutan na talagang nagmamakulog siya sa sato. Dangan, dapat na maghimati kita sa saiyang Tataramon paagi sa pagmamaigot na halion an ano man na kaisipan na dai inuuyunan nin Diyos. (Basahon an Isaias 55:6, 7.) Kun susunudon ta an mga patanid sa sato, malilikayan ta an dakul na kamunduan. Pero kumusta kun nagpadara kita sa maraot na mga tendensiya? Anong tabang an itinatao kan satong mamumuton na Ama?

8, 9. Paano mahihiling sa konsehong itinatao ni Jehova paagi sa saiyang mga lingkod na nagmamakulog siyang marhay sa sato? Magtao nin halimbawa.

⁸ Tibaad mas lalo tang mamatian an pagmakulog ni Jehova pag itinatanos kita. (Basahon an Hebreo 12:5, 6.) Totoo, dai kita nauugma pag dinidisiplina  kita o tinatawan nin konseho. (Heb. 12:11) Pero, isipa kun ano an mga kinokonsiderar kan nagtatao sa sato nin konseho. Kaipuhan aram niya an ginigibo ta na puwedeng makaapektar sa satong relasyon sa Diyos na Jehova, kaipuhan niyang konsideraron an namamatian ta, asin kaipuhan niyang magtao nin panahon saka maghinguwa tanganing maipahiling sa sato sa Bibliya kun paano kita puwedeng magbago tanganing mapaugma an Diyos. Lalo nang nagmamakulog sa sato an mismong Pinaghalian kan siring na konseho, si Jehova.

⁹ Pag-ulayan ta an sarong halimbawa kun paano puwedeng mahiling sa nagtatao nin konseho an pagmakulog nin Diyos. Bago manudan nin sarong brother an katotoohan, mahilig siyang maghiling nin pornograpiya, alagad napangganahan niya iyan. Pero dai pa talaga nawawara an hilig niyang iyan, arog sa baga na mayo nang kalayo pero nag-aaso pa. Kan magkaigwa siya nin bagong cell phone, nabuhay giraray an saiyang salang pagmawot. (Sant. 1:14, 15) Ginagamit niya iyan tanganing makalaog sa pornograpikong mga Web site. Sarong aldaw, mantang nagpapatotoo paagi sa telepono, pinasubli niya an saiyang cell phone sa sarong elder tanganing maghiling nin mga adres. Kan ginagamit na iyan kan elder, may nagruluwas na kuwestiyonableng mga Web site. An pangyayaring ini nagin bendisyon sa satong brother na namemeligro sa espirituwal. Nag-ako siya nin napapanahon na konseho, nakinabang sa pagtatanos, asin kan huri napangganahan an maraot na hilig. Nagpapasalamat nanggad kita sa satong mapagmakulog na Ama sa langit, na nahihiling dawa an itinatago tang mga kasalan saka itinatanos kita bago pa magin huri an gabos!

10, 11. (a) Paano ka puwedeng magpagiya sa Diyos? (b) Paano naeksperyensiyahan nin sarong pamilya an kapakinabangan nin pagpagiya ki Jehova?

¹⁰ An salmista nag-awit ki Jehova: ‘Tinutukduan mo ako paagi sa saimong hatol.’ (Sal. 73:24) Pag kaipuhan ta nin paggiya, masasabing ‘minimidbid’ ta si Jehova kun kinokonsulta ta an saiyang Tataramon para maaraman an pagmansay niya sa mga bagay-bagay. Pag inaaplikar ta an mga prinsipyo sa Bibliya, dai sana kita nakikinabang sa espirituwal kundi natatabangan man kita na maasikaso an satong materyal na mga pangangaipo.—Tal. 3:6.

¹¹ An sarong halimbawa kan paggiya ni Jehova mahihiling sa nangyari sa sarong brother na tumatawo sa sarong daga asin nakaistar sa kabubuldan nin Masbate sa Pilipinas. Pareho sindang nagpapayunir kan agom niya dawa  dakul sindang aki. Sarong aldaw, nabigla sinda kan makaresibi sinda nin surat hali sa namamahala kan daga na nagsasabing maghali na sinda. Ano an dahilan? Inaakusaran sinda nin pandadaya. Dawa ngani nahahadit an brother kun sain sinda maistar kan saiyang pamilya, sinabi niya: “May itatao si Jehova. Dai niya kami papabayaan, ano man an mangyari.” Dai napasala an pagtitiwala kan brother. Pagkalihis nin pirang aldaw, naugma an pamilya kan maaraman nindang dai ninda kaipuhan maghali. Ano an nangyari? Naobserbaran kan kagsadiri kan daga na sa ibong kan akusasyon, magalang pa man giraray saka mabuot an pamilyang Saksi, na nagpapagiya sa mga prinsipyo kan Bibliya. Napahangang marhay digdi an kagsadiri kan daga kaya dai na niya sinda pinahali tapos tinawan pa niya sinda nin dagdag na daga na tatanuman. (Basahon an 1 Pedro 2:12.) Iyo, ginigiyahan kita ni Jehova paagi sa saiyang Tataramon tanganing tabangan kita na makayanan an mga kadipisilan sa buhay.

12, 13. Sa anong mga sitwasyon puwedeng magduda an iba kun baga talagang nagmamakulog an Diyos sa problema ninda?

¹² Kun minsan, nagpapadagos an masakit na sitwasyon. Tibaad nasasakitan kita huli sa pabalik-balik na hilang, padagos na pagkontra kan mga kapamilya, o pagpersegir. Asin kumusta man an mga problema na nangyayari kun minsan sa laog kan kongregasyon huli sa pagkakalain-lain nin personalidad?

¹³ Halimbawa, posibleng may nasabi an sarong tugang na para sa saimo nakakakulog. Tibaad sabihon mo, ‘Dai ini puwede sa organisasyon nin Diyos!’ Pero an tugang na iyan nagkakapribilehiyo sa kongregasyon asin garo baga gustong-gusto siya kan iba. ‘Ta’no ta arog kaini?’ an tibaad isipon mo. ‘Dai ini nahihiling ni Jehova? Papabayaan niya sana ini?’—Sal. 13:1, 2; Hab. 1:2, 3.

14. Ano an saro sa posibleng mga dahilan kun taano ta dai nakikilabot an Diyos sa pagresolber sa personal na mga problema ta?

¹⁴ Posibleng may balidong mga dahilan si Jehova kaya mayo siyang ginigibong aksiyon. Halimbawa, tibaad para sa saimo mas may sala an ibong na lado, pero sa paghiling nin Diyos tibaad bakong arog kaiyan. Sa saiya, tibaad ika an mas may sala. Tibaad an sinabi kan tugang na para sa saimo nakakakulog, sa totoo, konseho palan na dapat mo talagang pag-isipan. Sa istorya kan buhay ni Brother Karl Klein, na nagin miyembro kan Namamahalang Grupo, inistorya niya an sarong pangyayari kun sain prangkahan siyang itinanos ni Brother J. F. Rutherford. Dangan sarong aldaw, maugmang tinino ni Brother Rutherford si Brother Klein, “Karl, kumusta?” Pero huling makulog pa an buot ni Brother Klein, nagsimbag lang siya na mayo sa buot. Huling narisa ini ni Brother Rutherford, sinabihan niya si Brother Klein na mag-ingat ta tibaad masilo siya kan Diyablo. Kan huri, sinabi ni Brother Klein: “Pag nagtatanom kita nin raot nin buot sa sarong tugang, lalo na pag nasa katungdan siya na magtao nin konseho, isinasapeligro ta an satong sadiri sa mga silo kan Diyablo.” *

15. Ano an dapat mong tandaan tanganing mapasensiya mong mahalat an tabang ni Jehova sa pag-atubang mo sa problema?

¹⁵ Pero tibaad napapagal na kitang maghalat ta garo baga dai natatapos an problema. Ano an puwede tang gibuhon? Ipamugtak na nagmamaneho ka tapos naguot ka sa trapik. Dai mo aram kun gurano iyan kahaloy. Kun mauuyam ka tapos mahanap nin ibang ruta, tibaad mawara ka. Puwedeng mahuri ka lugod sa dudumanan mo kisa kun mapasensiya ka na sanang naghalat asin nag-agi sa dalan na idto. Kaagid kaiyan, kun magdadanay ka sa dalan na itinutukdo kan Tataramon nin Diyos, tatabangan ka ni Jehova na makatagal sagkod na makaabot sa destinasyon mo.

16. Ano an saro pang dahilan na tibaad itugot ni Jehova na mag-agi kita nin mga problema?

 ¹⁶ Tibaad itinutugot ni Jehova na mag-agi kita nin mga problema huli ta gusto niya na makanuod kita diyan. (Basahon an 1 Pedro 5:6-10.) Pero, bako iyan hali sa Diyos. (Sant. 1:13) ‘An saindong kaiwal, an Diyablo,’ an may kagigibuhan kan kadaklan na kasakitan. Pero, puwedeng gamiton nin Diyos an masakit na sitwasyon tanganing tabangan kita na umuswag sa espirituwal. Nahihiling niya an mga kasakitan ta, asin ‘huli ta siya may pagmakulog’ sa sato, sisiguraduhon niya na mapadagos sana iyan sa “kadikit na panahon.” Pag may inaagihan kang problema, nauugma ka daw na mamumuton kang binabantayan ni Jehova, na nagtitiwala na tatabangan ka niyang makaya iyan?—2 Cor. 4:7-9.

17. Siisay an binabantayan ni Jehova, asin taano?

¹⁷ Ultimo, an mga mata nin Diyos yaon sa sato huli sa sarong nakakapakusog nanggad na dahilan. Paagi sa propetang si Hanani, sinabi ni Jehova ki Hading Asa: “An mga mata ni Jehova naglilibot sa bilog na daga tanganing ipahiling an saiyang kusog para sa mga bilog an puso sa saiya.” (2 Cron. 16:9, NW) Dai nahiling nin Diyos ki Asa na bilog an puso kaini sa saiya. Pero kun padagos mong gigibuhon an tama, ‘ipapahiling niya sa saimo an saiyang kusog.’

18. Kun pagmati mo baliwala sana sa iba an ginigibo mo, ano an dapat mong tandaan manungod ki Jehova? (Hilingon an ritrato sa kapinunan kan artikulo.)

¹⁸ Gusto nin Diyos na ‘hanapon ta an marahay,’ ‘kamutan an marahay,’ asin ‘gibuhon an marahay’ tanganing mapahilingan niya kita nin ‘pagkahirak.’ (Amos 5:14, 15; 1 Ped. 3:11, 12) Dai binabaliwala ni Jehova an mga matanos asin binebendisyunan niya sinda. (Sal. 34:15) Pag-isipan an halimbawa kan duwang partirang Hebreo na si Sifra asin Pua. Kan an Israel uripon pa kan Ehipto, ipinahiling kan duwang babaying ini na mas may takot sinda sa Diyos kisa ki Faraon, na nagsugong gadanon an gabos na mamumundag na lalaking Israelita. Malinaw nanggad na huli sa saindang diyosnon na konsiyensiya, dai ninda ginadan an mga umboy. Pag-abot nin panahon, si Sifra asin Pua binendisyunan na magkaigwa nin sadiri nindang pamilya. (Ex. 1:15-17, 20, 21) Nahiling ni Jehova an marahay na mga ginibo ninda. Kun minsan, tibaad pagmati ta baliwala sa iba an marahay na ginigibo ta. Pero mahalaga iyan ki Jehova. Dai niya binabaliwala an lambang marahay na bagay na ginigibo ta, asin babalusan niya kita.—Mat. 6:4, 6; 1 Tim. 5:25; Heb. 6:10.

19. Paano napatunayan nin sarong sister na dai binabaliwala ni Jehova an marahay na mga ginigibo ta?

¹⁹ Napatunayan kan sarong sister sa Austria na dai binabaliwala nin Diyos an mga pagmamaigot niya. Huling Hungarian siya, sa saiya itinao an adres nin sarong babaying nagtataram nin Hungarian na puwedeng dalawon. Dinumanan niya tulos iyan, pero mayong tawo. Pauruutro-utro siyang nagbalik. Kun minsan pagmati niya garo may tawo man, pero mayong nagsisimbag. Nagwawalat siya nin literatura, surat, numero kan telepono niya, asin iba pa. Pagkatapos nin saro may kabangang taon na pagpabalik-balik, may nagbukas man giraray nin pinto! Sarong mabuot na babayi an nagluwas asin nagsabi sa sister: “Dagos tabi. Binasa ko su gabos na winalat mo saka pighahalat taka talaga.” Nagpapa-chemotherapy palan an kagharong kaya dai siya nakakaluwas. Napunan an pag-adal sa Bibliya. Iyo, binalusan nin Diyos an sister huli sa kaigutan niya!

20. Ano an masasabi mo sa mamumuton na pagbabantay ni Jehova sa saimo?

²⁰ Nahihiling ni Jehova an ano man na ginigibo mo asin pag-abot nin panahon babalusan ka niya. Iyo, binabantayan ka ni Jehova, pero dai mo pag-isipon na garo siya kamerang nakatutok para bantayan an mga sala mo. Imbes, lugod na mas maparani ka sa mamumuton na Diyos na talagang nagmamakulog sa saimo!