1, 2. (a) Kan si Moises 40 anyos, anong desisyon an ginibo niya? (Hilingon an ritrato sa itaas.) (b) Taano ta pinili ni Moises na pasakitan kaiba kan banwaan nin Diyos?

ARAM ni Moises kun ano an maitatao sa saiya kan Ehipto. Nahihiling niya an darakula asin magagayon na harong kan mga mayaman. Kabilang siya sa maharlikang pamilya. Siya ‘tinukduan kan gabos na kadunungan nin mga taga Ehipto,’ na posibleng kaiba diyan an arts, astronomiya, matematika, asin iba pang langtad sa siyensiya. (Gui. 7:22) May oportunidad siyang magkamit nin kayamanan, kapangyarihan, asin pribilehiyo na puwedeng pangarap sana nin sarong ordinaryong Ehipsiyo!

² Pero, kan siya 40 anyos, naggibo si Moises nin desisyon na siguradong ikinangalas kan maharlikang pamilyang Ehipsiyo na nag-ampon sa saiya. Pinili niya, bako pa ngani an “normal” na buhay nin ordinaryong Ehipsiyo, kundi an buhay kaiba an mga uripon! Taano? May pagtubod si Moises. (Basahon an Hebreo 11:24-26.) Huli sa pagtubod, nahiling ni Moises an urog pa sa pisikal na mga bagay sa palibot niya. Bilang tawong espirituwal, si Moises may pagtubod sa Saro na “dai nahihiling,” si Jehova, asin sa kautuban kan mga panuga nin Diyos.—Heb. 11:27.

3. Anong tulong hapot an sisimbagon sa artikulong ini?

³ Kaipuhan ta man mahiling an urog pa sa aktuwal na nahihiling kan satong mga mata. Dapat kitang magin an klase na “may pagtubod.” (Heb. 10:38, 39) Tanganing matabangan kitang mapakusog an satong pagtubod, siyasaton ta an isinurat manungod ki Moises sa Hebreo 11:24-26. Mantang ginigibo ta iyan, hanapon an simbag sa mga hapot na ini:  Paano an pagtubod nakatabang ki Moises na habuan an makalaman na mga pagmawot? Kan siya tinuya-tuya, paano nakatabang sa saiya an pagtubod na pahalagahan an saiyang pribilehiyo nin paglilingkod? Asin taano ta nakaturuhok na marhay si Moises sa “katimbang na balos”?

4. Ano an nasabutan ni Moises manungod sa ‘pag-ugma sa kasalan’?

⁴ Paagi sa mga mata nin pagtubod, nasabutan ni Moises na an ‘pag-ugma sa kasalan’ temporaryo sana. Tibaad mangatanusan an iba na dawa ngani lakop an idolatriya asin espiritismo sa Ehipto, iyan nagin pambilog na kinaban na kapangyarihan, mantang an banwaan ni Jehova nagsakit bilang mga uripon! Pero, aram ni Moises na kayang baguhon nin Diyos an sitwasyon. Maski ngani garo baga nag-uuswag an mga nagpapanigo sa sadiri nindang mga kamawutan, nagtutubod si Moises na an mga maraot garo tinanom na maaalang. Kaya, dai siya naakit sa temporaryong ‘pag-ugma sa kasalan.’

5. Ano an makakatabang sa sato na malabanan an temporaryong ‘pag-ugma sa kasalan’?

⁵ Paano mo malalabanan an temporaryong ‘pag-ugma sa kasalan’? Nungkang lingawan na an pag-ugma sa kasalan madali sanang mawara. Paagi sa mga mata nin pagtubod, mansayon na ‘an kinaban naagi sana asin an mga hurot,’ o pagmawot kaiyan. (1 Juan 2:15-17) Hurop-hurupon an magigin puturo kan habong magsulsol na mga parakasala. Sinda nasa ‘mahalnas na lugar’ mantang pasiring sa ‘makangingirhat na katapusan’! (Sal. 73:18, 19, BPV) * Kun natetentaran na magkasala, haputon an sadiri, ‘Ano an gusto kong magin puturo ko?’

6. (a) Taano ta nagsayuma si Moises ‘na apudon na aki kan aking babayi ni Faraon’? (b) Sa hiling mo, taano ta tama an nagin desisyon ni Moises?

⁶ An pagtubod ni Moises nakatabang man sa saiya sa pagpili nin karera. ‘Huli sa pagtubod, si Moises, kan dakula na, nagsayuma na pag-apudon na aki kan aking babayi ni Faraon.’ (Heb. 11:24) Dai siya nagrason na puwede man siyang maglingkod sa Diyos sa palasyo kan hadi, dangan gagamiton niya an saiyang kayamanan asin pribilehiyo sa pagtabang sa mga tugang niyang Israelita. Imbes, determinado si Moises na kamutan si Jehova nin bilog niyang puso, kalag, asin kusog. (Deut. 6:5) Huli sa nagin desisyon ni Moises, nalikayan niya an grabeng kamunduan. Dai nahaloy, sinamsam kan mga Israelita mismo an dakul sa kayamanan kan Ehipto na binayaan niya! (Ex. 12:35, 36) Napasupog si Faraon asin ginadan. (Sal. 136:15) Sa ibong na kampi, si Moises ilinigtas asin ginamit nin Diyos tanganing panginutan an bilog na nasyon pasiring sa ligtas na lugar. Nagin makahulugan nanggad an buhay niya.

7. (a) Uyon sa Mateo 6:19-21, taano ta maninigo kitang magplano para sa puturo na daing katapusan? (b) Magsaysay nin sarong eksperyensiya na nagduduon kan pagkakalain kan materyal asin espirituwal na kayamanan.

⁷ Kun saro kang hoben na lingkod ni Jehova, paano makakatabang sa saimo an pagtubod sa pagpili nin karera? Sarong kadunungan kun maplano ka para sa puturo. Pero an pagtubod mo daw sa mga panuga nin Diyos mapahiro sa saimo na magtipon para sa puturo na temporaryo sana o sa saro na daing katapusan? (Basahon an Mateo 6:19-21.) Iyan an hapot na napaatubang ki Sophie na parabayle nin ballet. Inalukan siya nin mga scholarship asin posisyon na pinapangarap nin dakul sa mga kompanya nin ballet sa Estados Unidos. “Nakakaugma pag hinahangaan ka. An totoo, pagmati ko mas nakakalabi ako sa mga pag-iriba ko,” an pag-admitir niya. “Pero, bako talaga akong maugma.” Dangan, hiniling ni Sophie an video na Young People Ask—What Will I Do With My Life? “Narealisar ko na tinawan ako kan kinaban nin kapangganahan asin mga tagahanga karibay kan sakong bilog na pusong pagsamba ki Jehova,” an sabi niya. “Udok sa puso akong namibi sa saiya. Dangan binayaan ko an sakong pagbayle.” Ano an pagmati niya sa nagin desisyon niya? “Dai ko hinahanap-hanap an dati kong buhay. Ngunyan, talagang maugma ako. Kaiba ko sa pagpayunir an agom ko. Bako kaming sikat, saka dikiton sana an samong materyal na bagay. Pero yaon samo si Jehova, saka may mga Bible study kami, asin espirituwal na mga pasuhan. Dai lamang akong pinagbabasulan.”

8. Anong konseho sa Bibliya an makakatabang sa sarong hoben na magdesisyon kun ano an gigibuhon niya sa saiyang buhay?

 ⁸ Aram ni Jehova kun ano an pinakamarahay para sa saimo. Sinabi ni Moises: ‘Anong pinaghahagad sa saimo ni Jehova na saimong Diyos, kundi matakot ka ki Jehova na saimong Diyos, na maglakaw ka sa gabos niyang dalan, asin kamutan mo siya, asin maglingkod ki Jehova na saimong Diyos sa bilog mong puso asin sa bilog mong kalag; na kuyugon mo an mga tugon ni Jehova na saimong Diyos asin an saiyang mga pinagpapakuyog, na itinatao ko sa saimo ngunyan, [para sa] ikakarahay mo?’ (Deut. 10:12, 13) Mantang hoben ka pa, pumili nin karera na makakatabang sa saimo na kamutan si Jehova asin paglingkudan siya nin ‘bilog mong puso asin bilog mong kalag.’ Makakapagtiwala ka na ‘para iyan sa ikakarahay mo.’

9. Ipaliwanag kun taano ta tibaad nagin masakit ki Moises na mautob an saiyang asignasyon.

⁹ Para ki Moises, ‘an mga pag-ulog-ulog ki Cristo urog pang kayamanan ki kan mga kayamanan kan Ehipto.’ (Heb. 11:26) Isinugo si Moises bilang “Cristo,” o “Linahidan,” huli ta pinili siya ni Jehova na panginutan an Israel paluwas sa Ehipto. Aram ni Moises na an pag-utob sa sugong ini magigin masakit, na maresulta pa ngani sa ‘pag-ulog-ulog.’ Saro sa mga Israelita an mapagtuyang nagsabi sa saiya: ‘Siisay an nagbugtak sa saimo na siring sa prinsipe asin hukom sa samuya?’ (Ex. 2:13, 14) Kan huri, hinapot mismo ni Moises si Jehova: ‘Paano ako dadangugon ni Faraon?’ (Ex. 6:12) Tanganing mag-andam asin maatubang an pagtuya, sinabi ni Moises ki Jehova an mga ikinakatakot asin ikinakahadit niya. Paano tinabangan ni Jehova si Moises na mautob an masakit na asignasyon kaini?

10. Paano tinabangan ni Jehova si Moises sa asignasyon kaini?

¹⁰ Inot, inasegurar ni Jehova si Moises: ‘Yaon ako sa saimo.’ (Ex. 3:12) Ikaduwa, pinakusog ni Jehova an buot ni Moises paagi sa pagpaliwanag kan sarong aspekto kan kahulugan kan pangaran niya: “Ako Magigin Kun Ano an Gusto Kong Magin.” * (Ex. 3:14, NW) Ikatulo, tinawan niya si Moises nin kapangyarihan na maggibo nin mga milagro na nagpatunay na talagang isinugo nin Diyos si Moises. (Ex. 4:2-5) Ikaapat, tinawan ni Jehova si Moises nin kaiba asin tagapagtaram, si Aaron, na matabang sa saiya na mautob an asignasyon niya. (Ex. 4:14-16) Kan madali na siyang magadan, kumbinsidong marhay si Moises na tinatabangan ni Jehova an Saiyang mga lingkod na mautob an ano man na asignasyon na itinatao Niya sa sainda; kaya may kumpiyansa siyang nakapagsabi sa masalida sa saiya na si Josue: ‘Si Jehova iyo an nanginginutan sa saimo; siya kaibanan mo, dai ka niya babayaan, ni isisikwal; dai ka matakot, dai ka man mahandal.’—Deut. 31:8.

11. Taano ta pinahalagahan na marhay ni Moises an saiyang asignasyon?

¹¹ Huli sa suporta ni Jehova, napahalagahan na marhay ni Moises an saiyang masakiton na asignasyon, na minamansay iyan na ‘urog pang kayamanan ki kan mga kayamanan kan Ehipto.’ Iyo, an paglilingkod ki Faraon mayo lamang kun ikukumparar sa paglilingkod sa Makapangyarihan sa Gabos na Diyos! Mayo lamang nin halaga an pagigin prinsipe kan Ehipto kun ikukumparar sa pagigin “Cristo,” o linahidan ni Jehova! Tinawan nin balos si Moises huli sa saiyang pagigin mapagpahalaga. Igwa siya nin dayupot na relasyon ki Jehova, na nagtao sa saiya nin pambihirang kapangyarihan tanganing panginutan an mga Israelita pasiring sa Dagang Panuga.—Deut. 34:10-12.

12. Anong mga pribilehiyo hali ki Jehova an maninigo niyatong pahalagahan?

¹² Igwa man kita nin asignasyon. Paagi sa saiyang Aki, itinao sa sato ni Jehova an sarong ministeryo, siring kan ki apostol Pablo asin iba pa. (Basahon an 1 Timoteo 1:12-14.) Gabos kita may pribilehiyong ipahayag an maugmang bareta. (Mat. 24:14; 28:19, 20) May mga naglilingkod bilang bilog  na panahon na ministro. An maygurang na mga brother naglilingkod sa iba bilang mga ministeryal na lingkod asin elder sa kongregasyon. Pero, tibaad kuwestiyunon kan saimong bakong kapagtubod na kapamilya asin kan iba pa an kahalagahan kan mga pribilehiyong ini o tuyaon pa ngani an pagsasakripisyo mo. (Mat. 10:34-37) Kun madisganar ka ninda, tibaad punan mong pagdudahan an halaga kan pagsasakripisyo mo o kun baga magigibo mo talaga an saimong asignasyon. Kun mangyari iyan sa saimo, paano makakatabang an pagtubod tanganing makatagal ka?

13. Paano kita tinatabangan ni Jehova na mautob an satong teokratikong mga asignasyon?

¹³ May pagtubod na hagadon ki Jehova an tabang niya. Sabihon sa saiya an mga ikinakatakot asin ikinakahadit mo. Iyo, si Jehova an nagsugo sa saimo, kaya tatabangan ka niyang magin mapanggana. Paano? Sa kaparehong paagi kan pagtabang niya ki Moises. Inot, inaasegurar ka ni Jehova: “Papakusugon taka, iyo, tatabangan taka, talagang kakaputan taka kan sakong tuong kamot nin katanusan.” (Isa. 41:10, NW) Ikaduwa, ipinapagirumdom niya sa saimo na an mga panuga niya mapagtitiwalaan: ‘Nagtaram ako asin papadatungon ko iyan. Inisip ko iyan, asin gigibuhon ko man iyan.’ (Isa. 46:11) Ikatulo, itinatao sa saimo ni Jehova “an puwersa na labi sa ordinaryo” tanganing mautob mo an saimong ministeryo. (2 Cor. 4:7, NW) Ikaapat, tanganing tabangan ka na makatagal sa asignasyon mo, itinatao sa saimo kan satong mapagmakulog na Ama an kasararuan nin magturugang nin tunay na mga parasamba sa bilog na kinaban na padagos na ‘nagraranga’ asin ‘nagpaparigon’ sa lambang saro. (1 Tes. 5:11) Mantang tinatabangan ka ni Jehova na mautob mo an saimong asignasyon, matalubo an pagtubod mo sa saiya asin masasabutan mong an saimong mga pribilehiyo sa paglilingkod sa saiya kayamanan na urog pa kisa sa ano man na kayamanan sa daga.

14. Taano ta sigurado si Moises na tatawan siya nin balos?

¹⁴ Si Moises nakaturuhok na marhay sa “katimbang na balos.” (Heb. 11:26) Iyo, dawa ngani limitado kaidto an kaaraman ni Moises manungod sa puturo, tinugutan niya iyan na makaimpluwensiya sa saiyang pananaw. Arog kan saiyang apuon na si Abraham, nagtitiwala si Moises na kayang buhayon ni Jehova an mga gadan. (Luc. 20:37, 38; Heb. 11:17-19) An paglaom ni Moises sa magigin mga bendisyon sa puturo nakatabang sa saiya na dai pagmansayon bilang nasayang na mga panahon sa saiyang buhay an 40 taon nin pagigin dulag asin 40 taon sa kaawagan. Dawa dai niya aram an gabos na detalye sa kautuban kan mga panuga nin Diyos, nahihiling kan saiyang mga mata nin pagtubod an dai nahihiling na balos.

15, 16. (a) Taano ta kaipuhan kitang magturuhok sa itataong balos sa sato? (b) Anong mga bendisyon sa irarom kan pamamahala kan Kahadian an gustong-gusto mong makamtan?

 ¹⁵ Nakaturuhok ka daw na marhay sa itataong balos sa saimo? Kapareho ni Moises, dai ta pa man aram an gabos na detalye dapit sa mga panuga nin Diyos. Halimbawa, ‘dai niyato aram kun nuarin an [itinalaan na] panahon’ para sa dakulang kahurasaan. (Mar. 13:32, 33) Pero, mas dakul an aram ta manungod sa maabot na Paraiso kisa sa aram ni Moises. Dawa dai ta aram an gabos na detalye, igo an mga panuga sa sato nin Diyos manungod sa magigin buhay sa irarom kan Kahadian nin Diyos tanganing magturuhok kita diyan. Kun malinaw tang naiimahinar an bagong kinaban, mapapahiro kitang inuton an Kahadian. Paano? Pag-isipan ini: Mabakal ka daw nin sarong harong kun dai kang gayong aram manungod diyan? Siyempre dai! Sa kaparehong paagi, dai ta gagamiton an buhay ta para makamtan an bakong malinaw na paglaom. Paagi sa pagtubod, dapat na nahihiling ta nin malinaw an buhay sa irarom kan pamamahala kan Kahadian.

¹⁶ Tanganing magin malinaw sa satong isip an Kahadian nin Diyos, magturuhok o magpokus na marhay sa magigin buhay mo sa Paraiso. Gamiton an saimong imahinasyon. Halimbawa, kun pinag-aadalan mo an manungod sa buhay kan mga karakter sa Bibliya bago an panahon kan mga Kristiyano, isip-isipon kun ano an puwede mong ihapot sa sainda pag binuhay na sinda. Tibaad haputon ka man ninda manungod sa nagin buhay mo durante kan huring mga aldaw. Imahinaron kun gurano ka kaugma na mamidbid an saimong mga apuon na nabuhay kaidtong nakaaging mga siglo asin na tukduan sinda manungod sa gabos na ginibo nin Diyos para sa sainda. Imahinaron man na ugmahon ka mantang nanunudan mo an manungod sa dakul na layas na hayop paagi sa pag-obserbar sa sainda sa matuninong na kapalibutan. Hurop-hurupon kun gurano ka urog na magigin dayupot ki Jehova mantang nagigin perpekto ka.

17. Paano nakakatabang sa sato ngunyan an malinaw na pag-imahinar sa magigin balos sa sato?

¹⁷ An malinaw na pag-imahinar sa magigin balos sa sato makakatabang sa sato na magpadagos, maggaya-gaya, asin maggibo nin mga desisyon basado sa siguradong puturo na buhay na daing sagkod. Nagsurat si apostol Pablo sa linahidan na mga Kristiyano: ‘Kun kita naglalaom kan dai ta nahihiling, kita naghahalat kaiyan na may pakatios.’ (Roma 8:25) An prinsipyong iyan aplikado sa gabos na Kristiyano na may paglaom na buhay na daing katapusan. Maski ngani dai ta pa nakakamtan an magigin balos sa sato, an satong pagtubod makusugon nanggad kaya padagos kitang mapasensiyang naghahalat sa “katimbang na balos.” Arog ni Moises, dai ta ibinibilang na nasayang na panahon an arin man na taon sa paglilingkod ki Jehova. Imbes, kumbinsido kita na ‘an mga bagay na nahihiling naagi sana, alagad an mga bagay na dai nahihiling dai nin katapusan.’—Basahon an 2 Corinto 4:16-18.

18, 19. (a) Taano ta dapat kitang magmaigot na mapagdanay an satong pagtubod? (b) Ano an tutukaron sa sunod na artikulo?

¹⁸ An pagtubod nagtatabang sa sato na mahiling an nakakakumbinsir na ebidensiya kan ‘mga bagay na dai nahihiling.’ (Heb. 11:1) Dai nahihiling kan tawong pisikal na mahalagang marhay an paglilingkod ki Jehova. Para sa arog kaiyan na tawo, ‘karungawan’ an espirituwal na kayamanan. (1 Cor. 2:14) Pero kita, gusto tang mabuhay nin daing katapusan asin mahiling an pagbuhay liwat, mga bagay na dai nahihiling kan kinaban. Arog kan mga pilosopo kan panahon ni Pablo na inapod siyang ignoranteng “matabil,” iniisip man kan kadaklan na tawo ngunyan na an paglaom na ihinuhulit ta biyong kalokohan.—Gui. 17:18.

¹⁹ Mantang yaon kita sa kinaban na ini na mayong pagtubod, dapat na magmaigot kitang papagdanayon an satong pagtubod. Mapagngayo-ngayong hagadon ki Jehova na “dai magluya an saimong pagtubod.” (Luc. 22:32, BPV) Pirming isipon an puwedeng magin epekto kan kasalan, an daing kaagid na halaga nin paglilingkod ki Jehova, asin an paglaom mo na mabuhay nin daing sagkod. Pero, huli sa pagtubod ni Moises, urog pa sa mga bagay na iyan an nahiling niya. Sa sunod na artikulo, sisiyasaton ta kun paano nakatabang ki Moises an pagtubod na mahiling an Saro na “dai nahihiling.”—Heb. 11:27.